Saray Tulong a Probisyon so Mangisisindag na Kristianon Aro

PINASESEG nen apostol Pedro iray kapara ton Kristianos ya “aroen so . . . impanaagi.” (1 Pedro 2:17) Kaukolan a palumbasan na ontan ya aro so rasyal, sosyal, tan nasyonal iran ketegan, a pankakasakeyen iray totoo ed tuan impanaagi. Sanen linmesa so pankaukolan ed materyal ed limog na asasakbay a Kristianos, say aro so amayubo ed dakel a mangiter na kontribusyon ed apostoles pian ibunog ed saramay mankaukolan. Kuan na rekord ya “ami’ bengatla nanmomoyongan da.”​—Gawa 2:41-45; 4:32.

Say ontan a panangaro so nipatnag sanen say Mananguley ya Ulop na saray Tasi nen Jehova, diad kasampotan na 1991, so angimbita ed pigaran sanga na Watch Tower Society ed Mamabukig a Europa a mangitarok na tagano tan kawes parad saray mankakaukolan ya agagi ra ed Mamabukig a Europa, a pati saray kabiangan na datin Sobyet Union. Ipresenta mi dia iray serye na report manlalapud pigaran nalalanor iran sanga.

Sweden

Nen Disyembre 5, 1991, sakey a sulat a mangisasalaysay ed pankaukolan so nipawit ed amin a 348 kongregasyon diad Sweden. Maples so ebat. Diad loob na pigaran agew, amaarap so inmunan trak ed St. Petersburg, Rusya, a napno na 15 toneladan arina, mantika, enlatan karne baka, gatas a polbos, tan arum a mipadparan bengabengatla. Indiskarga na lokal a Tastasi nen Jehova tan tampol ya inbunog iray 750 balkot ed saramay mankaukolan. Diad saginonor, duara nin trak so angitarok na tagano ed Rusya. Diad amiamin, masulok a 51.5 tonelada so inpawit na Sweden.

Say inkamabunlok a mangidona na saray kawes tan sapatos so analona ed amin iran iilaloan. Abalbalkot iran kawes so maples ya atipon diad saray Kingdom Hall. Dakel a Kristianos so angidona na kawekawes da. Arum so analiw na balo iran kawes. Sakey ya agin laki so analiw na limaran terno. Sanen naaralan na nikelawan a negosyante so gagala, sikatoy angidona na limara nin terno. Sananey ya agin laki so analiw na sakey kahon a medyas, guwantis, tan bandana. Sanen insalaysay toy gagala, say akankayarian so angiyopresi’d sikato na 30 balon terno diad presyo na duara. Sakey a negosyante na kakawesen ed esport so angidona na 100 paris a balon sapatos tan boots.

Insan amin na sayan materyal so inawit ed sanga parad pangibiig, panbalkot, tan pankarga. Say kawes​—ya ontumbas ed kargaen na 40 trak​—so amano ed baleg a solar na sanga! Saray agagin lalaki tan bibii so nankimey ed loob na saray simba a nanbibiig ed satan ed saray salansan a parad lalaki, bibii, tan ugugaw tan imbabalkot ira ed karton. Labinliman nanduruman trak so inusar a mangitulor na saray kawes diad Rusya, Ukraine, tan Estonia.

Sakey ya agin lakin aminwalon angimaneho ed sakey ed saray trak na Sosyedad ed datin Sobyet Union so nankuan: “Say panangabrasa na agagi ed sikami diad saray destinasyon so baleg a tumang. Nilakap tan inangoban da kami, tan anggaman kapos ed saray kayarian, inikdan da kami na maabig a leksion diad Kristianon inkamabunlok.”

Finland

Anggaman ed subran kairapan, kasmak a kaandian na trabaho tan saray problema ed ekonomya na Finland, abalbaleg so inkamabulos ed limog na ngalngali 18,000 agagin taga Finland pian tulongan iray agagi ra ed datin Sobyet Union. Inpawit da so masulok a 58 toneladan tagano diad 4,850 karton ed St. Petersburg, Estonia, Latvia, Lithuania, tan Kaliningrad. Pinano da met so bakanten espasyo na saray trak na 420 kubikon piye na kawes. Ngalngali 25 segunda-manon kotse tan van so indona met ya usaren parad kimey na Panarian.

Arum ed saray akakahon a tagano so akasabi’d kongregasyon na 14 a manangipalapag ed Slanti diad lugar na St. Petersburg. Imbalikas day baleg ya apresasyon diad sakey a sulat. “Walaan kami diad kongregasyon mi na samploran agagin akukulaw. Maslak ed sikami so maletletey tan agmakalinyan manbayag pian mangalay tagano. Anggaman ontan, peteg ya agmangiiter na sengegay pakadismayaan so mangatatawen ya Ama tayo diad sarayan mairap a panaon noag ingen papanoen toray kapusoan tayo na gayaga. Mangikokondukta kami 43 panangiyaral na Biblia ed abung.” Sanen naawat na sakey ya agin bii diad St. Petersburg so supot na pananulong, sikatoy akaakis ed loob na duaran oras sakbay [ton] nilukasan itan.

Denmark

Diad sayan melag a bansa diad looban na Dayat a Baltic, ngalngali 16,000 Tastasi nen Jehova so nandaragup tan angipawit ed Ukraine na 19 trak a mankakargay 64 toneladan tagano diad 4,200 kahon; 4,600 kahon na de-kalidad iran kawes; tan 2,269 paris a balon sapatos. Sakey ya agin laki diad Alemanya so angipausar ed sanga na limaran trak [to], a diad saginonor et indona to iratan ed saray agagi diad Ukraine. Diad isesempet, sakey ed saray drayber so nankuan: “Nalmoan min mas dakel so insempet mi nen say nala mi. Say aro tan espirituy panagsakripisyo ya impanengneng na agagi tayo ed Ukraine so amabiskeg a tuloy ed pananisia mi.”

Kaukolan a manbantay iray drayber nisesengeg ed matatakew diad saray kalsada na datin Sobyet Union. Pigaran agew sakbay na inlabas na sakey ed saray trak na Denmark, walay agawan panagtakew ed saman a rota. Sakey a komboy na limaran trak a walaan na tagano manlapud sananey a pananulong ya organisasyon so pinatunda na matatakew diad panamegley na helikopter tan submachine guns. Inala dan amin so limaran trak, ya intilak iray drayber ed lansangan. Anggaman ed ontan a kapeligroan, amin a suplay na sangan Denmark so akasabin maligen ed saray agagi. Diad biek a dapag, angipasempet ira ed drayber na onggendan a nota, a mairirap ya insulat ed Ingles: “Pinablin agagin lalaki tan bibii ed Denmark. Naawat mi tulong yo. Tumangan kayo nen Jehova.”

The Netherlands

Say sanga ed Netherlands so angipawit na 52 toneladan tagano diad 2600 a supot. Saratan so indiliber ed Ukraine diad duaran nandumaan a komboy. Kada danay et intilak iray anemiran trak, unong ya indona na agagi diad Alemanya parad kimey na Panarian diad Bukig. Impasabi na agagi ed Ukraine so dakel a tagano ed Moscow, Siberia, tan arum iran pasen a ditan et walay baleg a pankaukolan. Niarum ni, 26,000 kubiko piye na saray kawes tan sapatos so indona na taga Denmark iran agagi. Saratan so intarok ed Lviv diad Ukraine, ed 11 a trak diad sakey a komboy ya inulop na pribadon kotse.

Kayari na andukey a biahe diad indalan ed Alemanya tan Polandia, pinmasay komboy ed Ukraine customs ya anggapoy problema, tan sinmabi ed 3:00 n.k. diad paway na baley na Lviv. Ireport na saray drayber: “Diad antikey a panaon, sakey a puersa na 140 agagi so wadman a mandiskarga ed saray trak. Sakbay ya inggapoy kimey, sarayan mapaabeban agagi so angipanengneng na talek da’d si Jehova, diad impanpikasin nankakasakey. Sanen asumpal so trabaho, sikara lamet so nantitipon parad pisasalamat ed si Jehova. Kayari inpanliket ed panagparawes na lokal iran agagin daakan ya angiter ed melag a walad sikara, sikami inulop [da] angga ed kalsada, a ditan et nanpikasi ra sakbay da kamin tinaynan.”

“Legan na andukey a biahen pasempet, dakel so walan nonoten nipaakar ed panamarawes na saray agagi diad Alemanya tan Polandia, tan ed saray agagi tayo diad Lviv; say mabiskeg a pananisia tan mapikasin awawey da; say panamarawes da ed pangitatarok na saray panpundoan tan tagano anggaman sikaran mismo so walad mankakaukolan iran sirkumstansya; say impangipatnag da na pankakasakey tan inkamaapit; tan say pisasalamat da. Nanonotan mi met iray agagi ed bansa mi, ya ontanlan mabunlok ya angiter.”

Switzerland

Nilukasan na sangan Switzerland so report to diad impangaon ed Santiago 2:15, 16: “No sakey’a agin laki o bii nalakseban tan naandian iray kanen da ed agew-agew, Et sakey ed sikayo ikuan to ed sikara: Onla kayo la ed kareenan, naimengan tan napesel kayo komon; anta ag yo iter ed sikara so bengatla ya antokaman a kaokolan na laman; Anto so gunguna ra?” Insan ituloy na report: “Sayan Kasulatan so anonotan sanen inimbitaan kami na Mananguley ya Ulop na Saray Tasi nen Jehova a mangitarok na materyal a tulong diad mankakaukolan ya agagi tayo.

“Tampol ya amin et nagmaliw ya okupado! Diad loob labat na duaran agew, 12 toneladan tagano diad 600 supot so impawit ed Ukraine tekep na taloran trak a nanlapud Alemanya, a nidona parad kimey diman. Saray balitan amin et sinmabin maligen, so sengegay baleg a gayaga ed limog na agagi tayo dia. Kaleganan to, angolekta iray kongregasyon na kawes, tan kabekta et say sanga mi so napnapno na saray karton, maleta, tan bag! Saramay nankargay kawes na ugugaw so angilaktip na pigaran galawgalaw a nanlapud ugugaw a taga Switzerland a parad agkabkabat a kakaaro ed arawin Amianen. Dakel iran chocolate bar so insigpit met ed latop na saray kawes.”

Panon iyan idiliber ya amin? Kuan na report: “Tinmulong ed sikami so sanga na Pransya diad impangiter na duaran trak tan apatiran drayber. Niarum ni, sakey a trak a nanlapud sanga mi tan apatira nin kayarian na lokal ya agagi so nakakaukolan a mangguyor ed 72 tonelada a mamaarap ed Ukraine.” Say komboy, a 500 piye ed dukey, so sinmabin anggapoy risgo ed panagsimpenan diad Lviv, a ngalngali sanlasus lokal ya agagi so nanalagar a mandiskarga ed saray trak. Inreport na saray drayber a say babeng ed lenguahe so aliwan samben lapud saray lupa ra so angisindag na aralem a panamabli.

Austria

Impawit na agagin taga Austria so 48.5 toneladan tagano, 5,114 karton iran kawes, tan 6,700 paris na sapatos ed Lviv tan Uzhgorod diad Ukraine. Impawit da met so 7 toneladan tagano, 1,418 kahon na kawekawes, tan 465 paris na sapatos ed Belgrade, Mostar, Osijek, Sarajevo, tan Zagreb ed datin Yugoslavia. Kuan na report na sanga: “Awalaan kami na 12 napnon trak, a nambiahe 34,000 kilometro. Maslak ed sayan panangiyalis so ginawa na sakey ya agin laki tan say ilalak to a walaan na negosyon traking.”

No nipaakar ed nidonan kawes, ituloy na report: “Inusar mi so sakey ya Assembly Hall bilang sentron panagsimpenan. Nantutumbokan a trak so didiskargaan, ya anggad anggapo lay espasyo. A singa ed agew nen Moises, kaukolan a patundaen iray totoo diad pangitarok. (Exodo 36:6) Anggan arum a totoon aliwan Tasi nen Jehova so angidona na kuarta, ‘lapud,’ kuanda, ‘diad sayan paraan et amta mi a naawat itan na totoon mankakaukolan.’ Akaawat kami met na dakel a libren nakakaukolan iran basyon karton manlapud minumundon kompanya.” Say edad na saray agagin lalaki tan bibiin nangibibiig tan nanbabalkot ed amin a bengabengatla so manlapud 9 anggad 80. Nanggunaetan da ni ingen ya inparis so dugan korbata tan long-sleeve ed kada terno.

Kuan na report: “Saray autoridad diad Austria tan ed saray ketegan so akatulong a maong diad isasabi na nanduruman pananulong tan diad inpangaproba na nakakaukolan a papeles ta pian amin ya ididiliber so mainomay a nagawaan.”

Italya

Manlapud Roma et masulok a 188 toneladan tagano so impawit ed duaran baleg a trak a komboy diad Austria, Czechoslovakia, tan Poland a mamaarap ed datin Sobyet Union. Balang komboy et tugyopen to so anemiran drayber, sakey a mekaniko, sakey ya auto elektrisyan, tan sakey ya interpreter, sakey a manangipatulor ya ahente, sakey a kusinero, sakey a doktor, sakey a manangipanguloy komboy diad sakey a dyip, tan sakey ya agin walaan na camper van.

Inala so tagano manlapud pitoran suplayer. Irereport na sanga: “Sanen nadngelan na suplayer mi so rason parad inkamabulos, arum ed sikara so nanpirawat a mibiang. Pigaran nilasus kilo na pasta tan belas, a pati saray panagbalkot iran kahon, so indona na minumundon suplayer. Siansian arum so angidona na saray dalig parad saray trak no niyebe odino angiyoopresi na kuarta.

“Inapresya na agagi diad Italya iyan pankanawnawa ya ontulong. Kaliktan met na ugugaw so ontulong. Sakey a limay-taon a laki so angipawit na melag a kontribusyon ya iilaloan ton makasaliw na ‘balbaleg a lata na tuna parad saray agagi diad Rusya.’ Lapud atagey iran grado to’d eskuelaan, sakey ya ugaw nin bii so akawaat na kuarta manlapud laki tan bai to pian isaliw na regalo parad atateng to. “Balet,’ unong ya insulat to, ‘sanen amoriak a dakel ed saray agagik so andian na maong a bengatlan kakanen ko, diad satan anonotan kon say sankaabigan a regalon nasaliw ko parad atateng ko et say itulong ed saraman ya agagi.’ Angiter na baleg a kantidad na kuarta ed kontribusyon box. “Ilaloan ko a mantultuloy a nawalaan ak na atagey iran grado, ta pian makapangipawit ak na dakel a kuarta,’ inkuanto.” Sampotan na saray report na sanga diad impangibaga a saray sulat na aralem a panamabli manlapud agagi diad Ukraine, dakel a salita na panamabli na Italyanon agagi, tan say maabig iran eksperiensia diad panagparaan tan panagdiliber na saray suplay so makatenyeg, makapaseseg, tan makapankakasakey.

Tagano Parad Nilibon Delegado

Say inmunan internasyonal a kumbension na saray Tasi nen Jehova diad datin Sobyet Union so agawa ed Kirov Estadyum diad St. Petersburg diad Rusya, nen Hunyo 28-30, 1992. Sayan importanten ebenton kumbension, a walaan na teman “Saray Manangakbibit na Liwawa,” so inatendian na masulok a 46,200 delegadon nanlapud 28 bansa. Angitarok na sananey a pankanawnawan pangipanengneng na Kristianon aro ed “amin . . . ya impanaagi.”​—1 Pedro 2:17.

Tinolinadan taganon nanlapud Denmark, Finland, Sweden, tan arum a daldalin diad Mamasagur a Europa so libren inbunog ed nilibon delegado ed kumbension a nanlapud datin U.S.S.R., pian kanen legan na kumbension. Diad intaynan da manlapud kumbension kayari kaunoran a sesyon, sikara met so inikdan na supot na tagano a walaan na saray probisyon ed isempet da.

Saray report ya asaglawi dia so mangipanengneng a say panangiter so aliwan saksakey a dalan​—mamabukig—​lambengat. Wala so paniiteran. On, tagano tan kawesen diad mamabukig, balet diad mamasagur et dakerakel ya makapaligsay-puso iran balikas na aro tan makapasagyat-pananisia iran eksperiensian mangisisindag na anos tan katooran na nilibon managdayew nen Jehova legan na saray dekada na desdes tan irirap. Kanian, namparan dapag so akaeksperiensia ed katuaan na saray salita nen Jesus: “Lalo a mapalar so mangiter nen say mangawat.”​—Gawa 20:35.

[Diagram/Litrato ed pahina 21]

1. Nanlapud Finland: St. Petersburg, Rusya: Tallinn tan Tartu, Estonia; Riga, Latvia; Vilnius tan Kaunas, Lithuania; Kaliningrad, Rusya; Petrozavodsk, Karelia

2. Nanlapud the Netherlands: Lviv, Ukraine

3. Nanlapud Sweden: St. Petersburg, Rusya; Lviv, Ukraine; Nevinnomyssk, Rusya

4. Nanlapud Denmark: St. Petersburg, Rusya; Lviv, Ukraine

5. Nanlapud Austria: Lviv, Ukraine; Belgrade, Mostar, Osijek, Sarajevo, Zagreb (diad datin Yugoslavia)

6. Nanlapud Switzerland: Lviv, Ukraine

7. Nanlapud Italya: Lviv, Ukraine

[Saray litrato ed pahina 23]

Kinarton a kawes diad sanga na Sweden

Panangikarga na saray pananulong a probisyon

Saray tagano diad sakey a supot

Bacon tan ham a nanlapud Denmark

Sakey a komboy na 11 trak tan 1 kotse

Saray balkot tan maleta diad sanga na Austria

Panagdiskarga diad Lviv, Ukraine