Amatey So Impanpaleen!

BINMABATIK so taloran pamilya, pitoran adulto tan anemiran ugugaw nisesengeg ed bilay da. Nayarin nanseseksekan ira diad salimbeng na ayaman na sakey, diad panilalon niliktar ed makapataktakot ya uran na bato. Balet legan a pinmalnay panbanengbeng na napepelag iran bato, sinmabi sananey a katatakotan​—andeket a lurem na makapatey a dapol. Natan anggapo lay nagawaan noagta ombatik.

Say manunaan et sakey a laki, angangko sakey ya aripen, a binmatik ya abaray toy bag a walaan na saray probisyon. Manumtumbok so duaran ugugaw a lalaki, say sakey et nayarin manedad na apatira, say sananey et limara, a nantatabinan a binmatik. Natatakot, mipupuligesgesan, napapater-pater a tinmumbok iray arum ed gunaet a makaliktar. Diad impanali ran oningas na dagem, asungap day medyo ambasan dapol. Nantutumbokan ya atumban amin so 13 tan agginmagalaw tan diad kaunoran et tinabonan na napepelag a dapol. Saray pakaskasin bangkay da so akaamot anggad ngalngali 2,000 taon ed saginonor et adiskobre tan tinalosan na saray arkeolohista iray makapaermen a kipapasen sakbay na impatey da.

Daiset labat irayan 13 biktima no ipareng ed akalkulan 16,000 ya inatey diad kadaanan a syudad na Pompeii, Italya, nen Agosto 24, 79 K.P. Dakel so akaliktar diad impanaynan ed syudad sanen imbuga na Palandey Vesuvius so inmunan interak to. Ingen, saramay nanpaleen​—maslak et mayaman a totoon agmalabay a manaynan ed saray ayaman tan kaykayarian da—​so niponpon ed 20 piyen bato tan dapol.

Say agawa ed Pompeii ed ngalngali 2,000 taon lay apalabas so nayarin kadaanan ya awaran. Balet diad dakel iran dalan et mipadpara itan ed situasyon a nipapaarap ed sankatooan a rasa natan. Sakey a sankagloboan a tanda, a lalon manigensigen nen say banengbeng na Palandey Vesuvius, so onkakanan pasakbay a sayan kaplesan ya oksuy na mundo so nipapaarap ed asingsingger lan kadederal. Pian makaliktar, nepeg a sikatayoy onkiwas a tampol. Makapatey so panagpaleen. No antoy tanda tan no panon itayon sikakabat ya onkiwas ed satan so tema ed ontumbok ya artikulo tayo.

[Picture Credit Line ed pahina 2]

Cover photo by National Park Service

[Picture Credit Line ed pahina 3]

Soprintendenza Archeologica di Pompei