Nisalba so Bilay da Lapud Angimano Ira

AKADKAUNA lan impasakbay nen Jesu-Kristo so anggaan na Judion sistema na saray bengatla ya akasentro ed templo diad Jerusalem. Agto angiter na petsa no kapigan itan nagawa. Balet deneskribe to iray nagawa a mangitonton ed satan a kadederal. Pinaseseg to iray babangatan to a mantultuloy a manbantay tan onarawi ed kapeligroan.

Impasakbay nen Jesus: “Sano nanengneng yo so Jerusalem a niliktob na saray ehersito, saman la amtaen yo a say kabagbag to asingger la.” Inkuanto met: “Sano nanengneng yo sirin so kadimlaan na kapalis . . . a manal-alagey ed santo a pasen . . . saman la saray wala ed Judea ombatik ira komon ed saray palandey.” Pinaseseg nen Jesus iray babangatan to ya ag-ira ompapawil pian isalba iray materyal a kaykayarian da. Maganat so itataynan ta pian nisalba so bilay da.​—Lucas 21:​20, 21; Mateo 24:​15, 16.

Ta pian napatunda so abayag lan panrerebelde, indaulo nen Cestius Gallus iray puersa na Roma sumpad Jerusalem nen 66 K.P. Sikato ni ingen so linmoob ed syudad tan imparaan to so pangubkob ed templo. Pirmi so gulo ed syudad. Atebek na saraman so nansiansian nambantay ya asingger la so desyang. Balet kasin posible so itaynan? Ag-inilaloan et inyatras nen Cestius Gallus iray tropa to. Sikaray inusilan na saray rebeldin Judio. Saman la so panaon pian taynanan so Jerusalem tan interon Judea!

Diad tinmumbok a taon, saray tropa na Roma so pinmawil diad impangidaulo nen Vespasian tan say ilalak ton si Titus. Say interon bansa so aliktob ed bakal. Kasakbayan na 70 K.P., angiletneg iray Romano na kutan palpalitek ed kaliberliber na Jerusalem. Asaraan so amin a papawayan. (Lucas 19:​43, 44) Nampapateyan iray pangkat ed loob na syudad. Saray atilak so pinatey na saray Romano odino kinautibo. Sigpot ya aderal so syudad tan say templo to. Unong ed inmunan-siglon Judion manag-awaran a si Josephus, masulok a sakey milyon a Judio so nanirap tan inatey. Satan a templo so aglan balot nipaalagey lamet.

No saray Kristiano so nansiansia ni ed Jerusalem nen 70 K.P., sikaray apilanor komon ya inatey odino naaripen kaiba iray amin ya atilak diman. Balet, inreport na saray manag-awaran nensaman a saray Kristiano so tinmalineng ed pasakbay na Dios tan tinaynan da so Jerusalem tan say interon Judea a linma ira ed kapalandeyan diad bukig na Ilog Jordan. Arum so nanayam ed Pella, diad probinsya na Perea. Tinaynan da so Judea tan agla ra pinmawil. Nisalba so bilay da lapud tinmalineng ira ed pasakbay nen Jesus.

Kasin Tatalinengen Yo Iray Pasakbay na Napanmatalkan Iran Lapuan?

Sanen nadngelan da so pigaran pasakbay ya ag-agawa, dakel a totoo so angisengansengan ed amin a pasakbay. Balet, say italineng ed saray pasakbay et nayarin mangisalba ed bilay mo.

Diad Tsina nen 1975, niiter iray pasakbay a walay nagawan yegyeg. Kinmiwas iray opisyales. Kinmiwas met iray totoo. Nilibo so asalban bilay.

Nen Abril 1991 ed Pilipinas, inreport na saray manaayam ed alosadsar na Mount Pinatubo ya angipugso itan na laba tan dapol. Kayarin sinubaybayan so situasyon ed loob na duay bulan, impasakbay na Philippine Institute of Volcanology and Seismology so manasingger a kapeligroan. Nilibon totoo so nan-ibakwit a tampol. Asasakbay nen Hunyo 15, tekep na mabiskeg ya insabog, masulok a waloran kubiko-kilometro a dapol so impugso na satan ed tagey tan inmabot anggad kabangibang iran probinsya. Lapud impangimano et nisalba so nilibon bilay.

Ipapasakbay na Biblia so anggaan na peles a sistema na bengabengatla. Manbibilay itayo la natan ed kaunoran iran agew. Legan a manasingger so anggaan, kasin mantutultuloy kayon manbabantay? Kasin onkikiwas kayo ta pian arawi kayo ed mapeligron lugar? Tekep na inkaganatan, kasin papasakbayan yo met so arum ya ontan met so gawaen da?

[Litrato ed pahina 20]

Lapud impangimano ed pasakbay, nisalba so bilay na dakel sanen angipugso na dapol so Mount Pinatubo

[Litrato ed pahina 21]

Alegyas so bilay na saray Kristiano a tinmalineng ed pasakbay nen Jesus sanen aderal so Jerusalem nen 70 K.P.