“Sakbay na Palpalandey”
“SIKA so panagayaman mi ed amin a kailalakan. Sakbay na inlesay palpalandey odino sanen ginawam so dalin tan say mundo, manlapu’d andi-anggaan ya angga’d andi-anggaan sika so Dios.” (Salmo 90:1, 2, New International Version) Saratan a salita so nipaarap ed Manamalsa tayo, tan agaylan saratan so makaligliwa—nagkalautla natan, sano anggapoy singa maligen!
Diad nagegeban kipapasen na ekonomya, pigara so manliknan matalek nipaakar ed arapen. Say makapataktakot ya idaraak na krimen tan panangabuso ed druga so mamapagmaliw ed arum a syudad a panagbakalan. Anggan samay kadaanan ya institusyon a pamilya so agmaligen. Narerengelan tayoray balon bengatlan singa saray homoseksual a pamilya. Ondarakel iray mansusolon ateng ed pamilya, mabetbet a sakey ya ateng so kaukolan a manalona ed baleg a panaburido. Nagugulo so deen na amayamay a pamilya, a singa say panagpekpek ed asawa tan panangabuso ed anak.
Siopa so mangigiya ed sikatayo diad sarayan mairap a panaon? Bueno, ag-onkukulang na simbawa iray sikolohista, managbangat, tan arum ni, balet maslak ed satan so mansumlangan. Diad loob na interon kailalakan ed saray aliwan komunistan bansa na Europa tan Amerika, si Dr. Benjamin Spock so manunaan a managsimbawa diad pamaakaran na panangibangat ed ugugaw. Diad kaunoran et inaksobi ton say simbawa to et lingo!
Agaylan lalon mas makabat a say Dios so “panagayaman” tayo! Diad sarayan magulon panaon, sikatoy dampay na inkaligen, a wala “manlapu’d andi-anggaan ya angga’d andi-anggaan.” Inkuanto so nipaakar ed inkasikato diad panamegley nen propeta Malaquias: “Siak, si Jehova, agak mangoman.” (Malaquias 3:6) Saray estandarte na Dios unong a nirekord diad Biblia et sigpot a napanmatalkan. Sikato so niwala “sakbay . . . na palpalandey,” tan say konseho ton naromog ed Masanton Kasulatan so nibase’d maandon kakabatan to. Satan so mismon nakakaukolan tayo pian manliket tan ontalona.
Makabat sirin, a nawalaan na kumpinyasa ed Salita na Dios, say Biblia. Aralen itan pian nagunggunaan ed kakabatan na Dios. Manmatalek ed naaralan yo, tan pagmaliwen itan a liwawan mangiwanwan ed sikayo diad basbas na bilay. (Salmo 119:105) Saraman lambengat so manggawa ed satan so walaan na katunongan a makapanmatalek ed arapen tan maralus a kareenan na nonot.