Saray Eksena Manlapud Insipan a Dalin

Sinai​—Palandey nen Moises tan Panangasi

SANO nanonotan yo so Palandey Sinai, angangko ta naisip yo si Moises. Akin? Lapud inawat nen Moises so Ganggan na Dios ed sakey a palandey na Sinai Peninsula. Dinan a palandey? Nayarin say nipanengneng ed tagey.a

Diad mamaabalaten a kabiangan na peninsula, ngalngali kapegleyan na baetan na saray paloob ya ilog na Ambalangan Dayat et walay sakey a pantok a duaray toktok to. Say inheneral a pasen so ontukoy ed saray salaysay na Biblia nipaakar ed si Moises. Say sakey a toktok so atawag a Jebel Musa, a kabaliksan toy “Palandey nen Moises.”

Matukotukoy so impangingaran na nanduruman Bibliko iran salaysay. Kasin nanonotan yo a si Moises so mamapastol ed pulok nen Jetro sanen pinmatnag so anghel diad mandarlang a kiew? Iner iman? Kuan na Biblia a dima’d ‘palandey na Dios ya anga ed Horeb,’ ya atawag met a Palandey Sinai. (Exodo 3:1-10; 1 Arari 19:8) Kayarin inwanwan nen Moises iray totoo na Dios ya ompaway ed Ehipto, inawit tora’d dia. Kuan na Exodo 19:2, 3 a “diman nancampamento so Israel ed arapan na palandey. Et si Moises tinmatdang ya anga ed Dios, et si Jehova tinawagan to a nanlapu ed palandey.”

Saman so inmunan intatdang nen Moises ed Palandey Sinai, tan nagkalalo so ginawa to nen say basta antikey ya impanakar ed nipukdol. Nabasa tayo: “Et si Jehova linmasor diman ed tapew na palandey a Sinai, diman ed toktok na palandey: tan tinawag to si Moises diman ed tagey ed tapew na palandey.”​—Exodo 19:20.

Nanggunaetan na nilibon modernon-agew a turista so itatdang ed amarkaan iran dalan diad labi pian nasabiy toktok, a manbayag diman pian bantayay ibutay na agew, tan insan onlasor diad panangugto. Aliwan onman si Moises. Imbaga na Dios ed sikato: “Tatdang ka dia ed siak ed palandey tan diman ka: iter ko ed sika so saray tablan [tabletan, NW] bato, tan say panangitonongan tan gangan.” Diad saman “si Moises wadman ed palandey ya apataplo’y agew tan apataplo’y labi.”​—Exodo 24:12-18.

Kanian natalosan a say ngaran nen Moises so nisiglaot ed sayan palandey, balet akin a say “panangasi” so kabiangan na ngaran? Bueno, legan a si Moises so wadman a mangaawat ed Ganggan, saray totoo ed leksab a patar (angangko diad Patar na er-Raha diad retrato) so angala na makulangkulang a kurso. Pinilit day agi nen Moises a manggawa na dios. Inkuan nen Aaron: “Lengat yo so ik-ikaw a balitok . . . ta yakar yo ra dia ed siak.” Kanian sikaray nanggawa na balitok a kilaw a baka a pandayewan. Saya so amasanok ed tuan Dios tan angipaarap ed impatey na nilibo. (Exodo 32:1-35) Balet nipanengneng ed Aaron so panangasi tan nipuera. Akin?

Ipapanengneng na komento na Dios ed Exodo 32:10 ya agto minoria si Aaron a manunan manangigapo’d gawan-mauges na Israel. Tan sanen sinmabi so kolkolan, pinili na “amin na saray anak nen Levi” so idapag ed Dios, ya andi duaruwan angilaktip ed si Aaron. (Exodo 32:26) Kanian anggaman ed impankasalanan nen Aaron, naawat toy panangasi na Dios diad alusadsar na Palandey Sinai.

Diad saginonor, imbalikas nen Moises so pilalek ton nagkalalon kabaten si Jehova tan nengnengen so gloria To. (Exodo 33:13, 18) Anggaman imposiblin nanengneng nen Moises so lupa na Dios, impanengneng nen Jehova so arum ed gloria To, ya idadanet a ‘kasian [To] naani so satay pangipatnagan [Toy] panangasi.” (Exodo 33:17–34:7) Matukotukoy parad Dios ya idanet so panangasi to, ta uusaren na Biblia so “panangasi” a mabetbet a tuloy a mitukoyan ed saray pidedeneng To’d Israel, ya akisipanan to’d Sinai.​—Salmo 103:7-13, 18.

Saray ombisita ed Palandey Sinai natan so makaromog na monasteryo ed alusadsar to, ya agton balot panonotay sakey ed naaralan nen Moises a tuan panagdayew ed tagey na palandey. Imbes, say relihyon ed monasteryo so nipaarap ed saray imahen. Say nipanengneng dia et “Say Takayan a Mamaarap ed Paraiso.” Satan so nibase’d libro na mongha ed Byzantine a si John Climacus. Kayari impanayam a ngalngali 40 a taon ed selda na monasteryo, sikatoy nagmaliw ya abbot na monasteryo tan angisulat na nipaakar ed simbolikon takayan a mamaarap ed tawen. Balet imanoen ya arum a klero so niretrato a guguyoren na dedemonyo ed impiernon-apuy ya andi-anggaan a panamairap. Malinew a panangiretrato, balet agmakasulatan!​—Eclesiastes 9:5, 10; Jeremias 7:31.

Miduma ed satan a palson bangat, say katuaan et say Makapanyarin-amin et “Dios a mapangasi tan mapaaro, mapalna ya onsanok, tan daakan ed maaro ya abig na linawa, tan katuaan.” (Exodo 34:6) Apaapit a maong si Moises ed sayan mapangasin Dios ed Palandey Sinai.

[Paimano ed leksab]

[Picture Credit Line ed pahina 8]

Pictorial Archive (Near Eastern History) Est.

[Picture Credit Line ed pahina 9]

Pictorial Archive (Near Eastern History) Est.

[Picture Credit Line ed pahina 9]

Pictorial Archive (Near Eastern History) Est.