Tepetepet Manlapud Managbasa

Lapud saray Kristiano so ag-ompupusta, nayarian da kasi so mangawat na saray tiket odino mibiang ed saray bunotan a ditan et nayarin makagamor ira na premyo?

Sakey iyan tepet ya onlelesan tunggal paminsan, kanian satan so nibaga la ed saray palapagan tayo. Diad arum iran lenguahe, angitarya kami na saray indese na literatura tayo, a singa say Watch Tower Publications Index 1930-1985 (tan say mipadpara a mangokobre ed 1986-1990). No say sakey a Kristiano so walaan na saratan ya indese ed lenguahe to, saya so peteg a mausar a tuloy diad pakaromog a tampol na makapnek iran ebat.

Sakey ya alimbawa et say nitepet ed tagey. Diad inengneng ed Index a 1930-1985 ed leksab na paulon “Questions From Readers,” naromog na sakey so sub-titulon “‘drawings,’ may Christian accept ticket for?” Say managbasa so nipaarap ed seksion a “Saray Tepetepet a Manlapud Saray Managbasa” ed Say Panag-Bantayan a Hulyo 1, 1973, pahina 111.a Dakel a Tastasi so walaan na tomo (odino sansakey iran paway) na The Watchtower a 1973, odino nayarin naromog itan diad libraria na dakel iran Kingdom Hall.

Idadanet na diskusyon ya impalapag nen 1973 a nepeg a paliisan na saray Kristiano so antokaman iran sweepstakes odino bunotan a mangilalanor ed pangaliw na pipalaranan (a singa saray raffle ticket) odino pangusar na kuarta a pangaliw na pipalaranan pian napanaloan so pigaran premyo. Malinlinew a nibaga, paliisan tayo so sugal, a satan so peteg a sakey a balikas na inkaagum.​—1 Corinto 5:11; 6:10; Efeso 4:19; 5:3, 5.

Anggaman kuan, say sakey a lakoan odino negosyo so nayarin mangusar na saray bunotan bilang paraan na panangi-advertise. Say gawaen lambengat na too et isumiti so ngaran to odino mangipawit na sakey a porma odino tiket, ya agmanaliw na antokaman. Say bunotan so kabiangan na nengneng na advertisement; ginawa itan bilang agmanangibiig a metodo ed pandeside no siopa so naikdan na premyo odino saray premyo. Liknaen na arum a Kristianos a nayarian dan awaten so premyo ed sakey a bunotan ya agmangilalanor ed sugal, unong a nayarian dan awaten iray libren sample odino arum a regalo a nayarin usaren na sakey a negosyo odino garita diad panangi-advertise a programa to.

Anggaman kuan, arum a Kristianos so mangipulisay na antokaman ed onian nengneng, diad agpanlabay a pangigapol odino panwetwet ed arum tan ontan met ed panggugunaet a pansiansian onarawi ed antokaman a pakaingganyoan a manmatalek ed tatawagen a Bii na Kapalaran. Unong ya ipapanengneng na Isaias 65:11, ag-isisiglaot na ariripen na Dios so inkasikara ed “dios na [Maong a] Kapalaran” odino “dios na Signo.” Nayarin liknaen da met ya agda labay so magmaliw a kabiangan na dinanman a publisidad a nayarin kaukolan a pibiangan na saray manalo. Saramay manliknan onia so maseguron agnepeg a mamalaw ed sakey a Kristiano odino ed saray Kristiano a say konsiensia ra so mangiyabuloy ed sikaran mibiang ed saratan a bunotan.​—Ipareng so Roma 14:1-4.

[Paimano ed leksab]