Singa Saray Doron

SIKA ta so akapasyar la ed uma diad tiagew tan akanengneng na dakerakel a doron a kiluksolukso ed basbas mo? Anggaman agmo’ ra tanton iimanoen, singa sikaray walad amin a pasen. Anggaman ontan, sikaray ompatnag ya agmamasakit tan ag-ikabkabilangan.

Ingen, say talagan ag-inkakabkabilangan na dorodoron so rason no akin a sikaray matukoy a simbolo na katooan. Anggaman ipasen na arum a prominentin totoo so inkasikara ya importantin tuloy, duma so walad kanonotan na Manamalsa tayo. Inkuan nen propeta ton Isaias: “Sikato a manyorong ed tagey na tibukel a dalin, tan saray manayam ed sikato singa ra dondonaron.”​—Isaias 40:22.

Say karlangan, inkabiskeg, tan kakabatan nen Jehova a Dios so mangiyaatagey ed sikaton tuloy ed kawalaan na abebbeban totoo, unong a say too so superyor a tuloy ed doron ed panagnonot tan pakayari. Anggaman ontan, say supremon kalidad na Dios et say aro. Tan say anggapoy-kaparan panangaro to so manadagdag ed sikaton mangimano ed sikatayo, a tulongan itayo, tan ilaban itayo​—no sikatoy aroen tan tuloken tayo. Si Jehova so simamaaron mideneng ed sikatayo, anggaman sikatayo so singa saray ag-ikabkabilangan a doron. Inkuan na salmista: “Siopa so mipadpara ed si Jehova a Dios tayo, sikato a manaayam ed tagey? Sikato a mampaabeba ya onnengneng ed saray bengabengatla ed tawen, tan dia ed dalin? Sikato ipaalagey to so duka ya agwaten ed dabok.”​—Salmo 113:5-7.

Unong ya isasalaysay na sayan salmo, si Jehova so maaron mangiiter na tulong ed saray duka. On, tutulongan To iramay sipapaabeban ‘manaanap ed Dios ta pian sikato so naromog da.’ (Gawa 17:27) Saramay peteg a makakaromog ed Dios​—tan manlilingkor ed sikato—​so magmaliw ni ingen a mabli ed imaton to. (Ipareng so Isaias 43:4, 10.) Say mapaabeban doron sirin so mangipapanonot ed sikatayo ed dili tayon ag-ikabkabilangan tan ed panangaro na makapanyarin-amin a Manamalsa tayo, a mangipapagamor ed matulok a totoo na pikakaaro tan agkanepegan a panangasi to. Kasin ipapanengneng mo so panamabli ed panangaro na Dios?