Mansiansia ed Panagpayunir
NGALNGALI 4,500,000 a Tastasi nen Jehova so mangiyaabawag na maong a balita ed sankamundoan. Diad limog da et masulok a 600,000 so payunir, odino sigpot-panaon a manangiyabawag na Panarian. Saramay walad sayan armada na saray payunir so walad edad a kasakbayan na inkatinedyer ya anggad saray retirado a manedad na 90 a mamatagey. Sikaray walaan na nanduruman nanlapuan tan kabibilay.
Anggapoy duaruwa, ya amin ed sarayan sigpot-panaon a manangipulong so malabay ya ontalona ed panagpayunir a ministeryo. Dakel so manpipirawat a manggawa ed saya bilang legay-bilay a karera da. Saray arum so agmakagawa ed ontan nisesengeg ed pigaran rason. Ingen, say arum so makapantutultuloy ed panagpayunir anggaman ed saray kairapan ed pinansyal, inkamasakit, inkadismaya, tan arum niran problema. Kanian panon a natalonaan na saray sigpot-panaon a managpulong iratan a problema tan siansian makapansiansia ed panagpayunir?
Panuporta ed Pinansyal Iran Pankaukolan
Diad interamenti, saray payunir so walaan na sekular a trabaho pian nasuportaan daray gagastosen da, a singa ginawa nen apostol Pablo. (1 Tesalonica 2:9) Diad maslak a kabiangan na mundo, sikaray nidudunget ed masyadon itatagey na presyoy tagano, kawesen, ayaman, tan transportasyon. Mabetbet a mairap so pakalmo na part-time a sekular a trabahon kaukolan da. No bilang ta wala, saratan a trabaho so naynay a niyopresi ed memelag a sueldo, ya anggaporay benepisyo para’d seguro ed bunigas (health insurance).
No ‘mantultuloy [tayon] anapen so Panarian na Dios tan say inkatunong to,’ nawalaan tayo na pananisa a tarokan itayo nen Jehova na materyal iran pankaukolan tayo. Kanian, sano manasagmak na inkagipit ed pinansyal, saray payunir so kaukolan ya ‘agmapaga nipaakar ed agew ya onsabi.’ (Mateo 6:25-34) Bangta sikaray manggugunaet a manresolbi ed saratan a problema, say mabiskeg a pananisia ed si Jehova so ontulong ed sikara ta pian ag-alablabas a manaburido.
Sano say sakey a too so nipaarap ed inkagipit ed pinansyal, angangko ta nayarin bawasan iray gagastosen. Sano manggawa na pigaran pananguman ed badyet, ompan natustusan iray pankaukolan, aliwan saray bengatlan kaliktanen lambengat. Pian nabawasan iray gastos, saray arum a payunir so miiiba ed arum a Kristianon mangupa ed sakey ya apartment. Diad panulong ed saray anak da pian makapanpayunir, saray ateng no maminsan so mangitatarok na pampundoan a libre odino ed melag lambengat ya upa. Saray arum so ontutulong ed saray payunir ed saray gastos ed tagano odino transportasyon. Balet aglabay na saray payunir a sikaray magmaliw a pabelat ed arum, ta sikaray walaan na Makasulatan ya obligasyon a suportaan so inkasikara.—2 Tesalonica 3:10-12.
Saray gastos ed transportasyon so nayarin nabawasan no miapag iray arum a payunir ed gagastosen. No duaran payunir so walaan na kotse, sikaray nayarin manulop a manpulong ed saksakey a lugar, ya uusaren so sakey a kotse tan diad ontan et napaliisan so gagastosen para’d duaran luluganan. Saray payunir ya andian na kotse so nayarin migrupo ed saramay walaan na ontan tan miapag ed gastos ed transportasyon. Saray gastos ed panagbiahe so nayarin nabawasan diad pangobre ed asingger iran teritoryan nayarin akaren. Diad dakel a bansa saray payunir so manguusar na ekonomikon publikon luluganan.
Diad limog na saramay tinmalona ed saray problema ed kabibilay tan nansiansia ed sigpot-panaon a serbisyo et di Newton Cantwell tan say asawa to. Inlako ra so taneman da tan ginmapon manpayunir a kaiba iray anemira ed pitoran anak da nen 1932, ed panaon na Great Depression. “Ag-abayag et agastos mi lan amin so nanlakoan mi ed taneman mi—baleg a kantidad ed satan so imbayar mi ed doktor,” insulat nen Brother Cantwell. “Nanonotan mi a sanen sikami inmalis ed komaduan asainmin mi, say kuarta mi so magenap lambengat ed panbayar na upa para’d duaran simba, a limaran dolyar so atilak. Anggaman kuan, amta min sikami so tarokan nen Jehova legan a sikamiy sikukulin manlilingkor. . . . Naaralan mi so mangimper ed nanduruman paraan. Alimbawa, diad iyalis mi ed sakey a balon teritorya, katongtongen ko so pigaran akankayarian na gasolinaan tan isalaysay a walaan kami na taloran kotsen uusaren ya inagew-agew a nisisiglaot ed Kristianon kimey mi. Kaslakan a sikami makakasaliw na gasolina ed kantidad a walaay diskuento bilang resulta na saya. Ag-abayag et naaralan na saray anak mi so manasikaso ed panag-apiger na kotse mi, ya akapangimper kami na baleg ed panagpaapiger.” Diad onman et atalonaan na pamilyan Cantwell iray angat ed panagbilay tan akapansiansia ed sigpot-panaon a serbisyo. Si Brother Cantwell so siansian payunir sanen sikatoy inatey ed edad a 103.
Pangamor na Part-time a Trabaho
Dakel a payunir so manusuporta ed inkasikara diad panamegley na part-time a trabaho. Pian nasustuni to so inkasikato diad panagministeryo ed Corinto, si Pablo so nantrabaho bilang managgaway tolda a kaiba iray kapananisiaan ton si Aquila tan Prisila. (Gawa 18:1-11) Natan, saray espiritual ya agagi so mabetbet a maliket a mangiyopresi ed saray payunir na part-time a trabahon sekular. Saray arum a payunir so mangaawat na ontan a trabaho diad panamegley na “employment agency” a mangiyoopresi na saray temporaryon trabaho. Kaukolan so pananisia ed Dios, tan ontan met ed masimoon a pikakasi ya iwanwan to iray desisyon nipaakar ed panagtrabaho.—Uliran 15:29.
“Kayari impakala na baleg a biskeg manlapud sipipikasin panangunsidera ed saray bengatla,” inkuan na sakey a payunir, “pinakabatan koy superbisor ko a say ministeryal a kimey ko so sakey a seryoson personal a responsabilidad tan agko naawat so sigpot-panaon a posisyon. Diad tinmumbok a Mierkoles, kinerew a kunsideraen ko no awaten ko so trabahon part-time lambengat. Sigagayagan inawat ko.” Agyo leleglemewen so pakayari na pikakasi, tan tekepan na gawa iray pikakasi yo.
Maabig no ibaga na saray payunir ed posiblin magmaliw ya amo ra a say gagala ra ed pantrabaho a part-time et pian nasustuni ra so inkasikara para’d ministeryo. Nayari ran salambiten iray agew a nayarian da so mantrabaho tan say bilang na oras ed loob na sakey a simba a nausar da ed panagtrabaho. Duaran sanagin bii so amaldua ed sakey a sigpot-panaon a trabaho ed sakey a kompanya na saray abogado, ya inmabuloy ed sikaran mantrabaho na duara tan kapalduan agew ed kada simba. Saya so anustuni ed sikara ed panagpayunir da ya anggad sikaray nanaral la ed Watchtower Bible School of Gilead tan akaawat na misioneron asainmin.
Saray nanduruman nengneng na trabaho ya aabobonan na Kasulatan so nayarin naromog diad pitongtong ed saray kapananisiaan tan ed arum odino diad pangonsulta ed saray pakabat ed dyaryo. Makatulong so inkamapaabeba, ta satan so mangipaliis ed saray payunir a magmaliw a mapili ed nengneng na trabahon looban da. (Ipareng so Santiago 4:10.) Pian makapantultuloy ed panagpayunir ompan sikaray kaukolan a mangawat na sekular a trabahon kukunsideraen na arum a totoon abeba odino pakaskasi. No inawat so ontan a trabaho balet ta duma so kakaliktanen, diad kaunoran et posiblin nasalatan so trabaho.
Say Inkamasakit tan Inkadismaya
Arum so nepeg ya ontunda ed panagpayunir da lapud seryoso iran problema ed bunigas. Anggaman ontan, no saray payunir so aliwan biglaan a mandesisyon ed sayan pamaakaran, nayarin napaneknekan dan say sakey a sakit so nayarin natambal odino say bunigas so onabig a tuloy pian sikaray makapantultuloy a manpayunir. Dakel so makapanpapayunir anggaman walaray problema ed bunigas lapud sikaray manpapatambal, mapeget ed panagdietan matukoy para’d sikara, tan nawawalaan na suston painawa tan ehersisyo. Sakey a managbaroy a manangasikaso so akaimano ed sakey a payunir ya agin biin paiirapen na rayuma a kaukolan ton tuloy so tulong pian makapanakar ed kabkaabungan a ministeryo. (Gawa 20:20) Ingen, sikato tan say masiken to so mangikokondukta na 33 a panangiyaral na Biblia tan akatulong ed 83 a totoon mangawat na katuaan na Dios. Sinmabi panaon et inmaligwas so bunigas to, tan kalabas na 11 a taon sikatoy nanaral ed Eskuelaan na Payunir a Serbisyo.
Say inkadismaya so nayarin sengegan na itunda na arum ed panagpayunir. (Uliran 24:10) Imbaga na sakey a payunir ed managbaroy a manangasikaso: “Ontundaak lan manpayunir. . . . Walaan ak na saray otang a kaukolan kon bayaran.” Sikatoy mankaukolan na anteparan mankantidad na 20 a dolyar. “Kasin sika so ontunda ed panagpayunir lapud kaukolan mo labat so 20 a dolyar?” so intepet na manangasikaso. Nisuhiri ed payunir a mantrabahon sakey agew ed lokal a taneman na kape, pian naalmo so 20 a dolyar, makasaliw na antepara, tan makanpantultuloy ed panagpayunir. Niparungtal ed mantultuloy a tongtongan a say manunan problema et say inkadismaya lapud magastos a panagpaapiger ed kotse. Nirekomenda ed payunir a pian nabawasan so gastos et sikatoy manmaneho ed kada agew ed distansyan pigaran milya lambengat imbes a manbiahe na andukey. Sikatoy sinimbawa met a pansiansiaen to so espiritualidad to. Inyaplika na payunir so simbawa tan kalabas na anemiran bulan et sikato so akaawat na imbitasyon a manaral ed Gilead School. Kayari impangraduar sikato so niasain a manlingkor ed biek-taew a bansa tan sitotoor a nanlingkor diman ed loob na dakel a taon anggad impatey to. On, baleg iran bendisyon so mabetbet a resulta no agtayo onsuko ed pakadismaya noagta ipaslep ed kanonotan a si Jehova so walad sikatayo.
Pablien so Pribilihyom ed Serbisyo
Anggaman ed saray subok, a singa saray kaso na pankaukolan tan saray panaon ya anggapoy tagano, minoria nen Pablo a sakey a kayamanan so ministeryo to. (2 Corinto 4:7; 6:3-6) Diad arap na kairapan tan panamasegsegang natan, dakel ed ariripen nen Jehova ed Aprika, Asya, Mamabukig a Europa, tan inerman so mansiasiansian mamebenben ed pribilihyo ran panagpayunir. Kanian, sano nidunget ed saray subok, gawaen so anggaay nayarian a pansiansiaen iyan pribilihyon serbisyo diad kirayewan nen Jehova.
Maslak a payunir so akaloob ed sigpot-panaon a panagpulong lapu lambengat ta ginawa ran simpli so estiloy panagbilay da. Singa si Pablo, binarangkaan da so materyalistiko iran panangingganyo tan binayuboan so inkakontento no wala lay ‘pantagano tan kawesen.’ Pian makapansiansia ed panagpayunir, kaukolan a sikaray mansiansian kontento ed saray bengatlan nakakaukolan. (1 Timoteo 6:8) Gayaga so resulta no aroen tayo so inter-Dios iran pribilihyo tayo, a papablien iratan nen say materyal a kaykayarian.
Diad pangiyilustra: Si Anton Koerber so awalaan na pribilihyo a mangilaman ed intereses na Panarian ed saray opisyal na gobierno ed Washington, D.C. Sikatoy nanlingkor a bilang payunir ed loob na pigaran panaon tan nagmaliw a manangasikaso na sirkito nen dekada na 1950. Aminsan et sikato so inasinggeran na pigara ed datin kakaiba to ed negosyo ya awalaay proponi a makatubo na sakey milyon a dolyar para’d inkasikato. Balet, pian nagawa itan, nakakaukolan ton usaren ya amin so panaon to diad negosyo ed loob na sakey taon. Kayari impanpikasi to ed panangiwanwan tan espiritu na inkasimbang ed kanonotan, inkuanto: “Imposibli so itundak dia ed makapakelkelaw iran pribilihyok ed panaglingkor ed si Jehova anggan diad loob labat na sakey taon, andi, anggan kasalat na amin na kuarta ed mundo. Say panlingkor ed saray agagik dia ed Washington so mas mabli ed siak, tan dia et amtak a walaan ak na bendisyon nen Jehova. Anggapoy panduaruwak a makalmo ak na sakey milyon a dolyar, balet diad kasampotan na taon ed ontan a nengneng na panagbilay, anto kasi so kipapasen ko ed espiritual, odino anggan ed pisikal?” Kanian agto inawat so opresi. Say panamabli ra ed saray pribilihyo ra ed mipadparan paraan so ontutulong ed dakel a mansiansia ed panagpayunir.
Agaylan engrande iran bendisyon so pangagayagaan na saray payunir! Sakey a bendisyon so pangusar na dakel ya oras ed pansalita nipaakar ed maglorian inkaari nen Jehova. (Salmo 145:11-13) Lapud panguusar na dakel ya oras ed ministeryo, walaan iray payunir na bendisyon ed pangitatarok na espiritual a ligliwa ed saray duka tan napapairap, mansasakit odino inateyan, tan arum niran makapaermen tan mankakaukolan na seguradon ilalo. Kanian, no sikatayo so abuloyan na saray sirkumstansya a makapibiang ed sigpot-panaon a panagpulong, sikatayo so peteg a makapangayaga ed dakel a bendisyon. “Say bendicion nen Jehova makapayaman.” (Uliran 10:22) Tan lapud tulong tan bendisyon to a saray dakel a manangiyabawag na Panarian so sigagayagan mansiasiansia ed panagpayunir.