Saray Payunir so Mangiiter tan Makakaawat na Saray Bendisyon

“SAY panagpayunir so mas mabli nen say matalonan sekular a karera. Anggapo la so mas makapenek nen say itulong ed totoon mangamta ed si Jehova tan say katuaan to.” Ontan so inkuan na sakey a Kristianon bii a pinili toy panagpayunir​—sigpot-panaon a panangipulong na Panarian—​bilang karera to. Pigara niran arum a karera so makapangiter na ontan a liket?

Say panagpayunir so namparan maabig a kalat tan mablin pribilihyo. Panon a nagawaan na sakey a pilien so ontan a bilay? Anto so nakaukolan ta pian makapansiansia ed panagpayunir ed magenap a dukey na panaon pian manani na saray bendisyon ya iyoopresi to?

Duaran bengatla so kaukolan. Ununa, say duga iran sirkumstansya. Dakel ed saray sirkumstansya a ditan et malinew ya imposibli a makapanpayunir so sakey. Tan komadua, say suston espiritual iran kualipikasyon tan awawey. Siempre, balanglan iyabuloy na kaplesan iran sirkumstansya a makapanpayunir odino andi, amin so makapanggunaet a napaaligwas iray kalidad na Kristianon inkatatken.​—2 Corinto 3:5.

No Akin a Makapanpayunir so Arum

Antoray kualipikasyon para’d matalonan panagpayunir? Bueno, say dunong ed panagpulong so importanti. Kaukolan ya amtaen na saray payunir no panon so pangiparungtal ed maong a balita ed saray sankaili, panggaway panagpawil ed saray interesado, tan pangikondukta na saray panangiyaral na Biblia ed ayaman. Say kakulangan ed sarayan dunong so nayarin manismaya ed sakey a payunir. Anggaman kuan, importanti met iray arum a bengatla.

Alimbawa, amin a bengatlan manasaglawi ed panagdayew tayo so misiglaotan ed relasyon tayo ed si Jehova tan ed organisasyon to. Lalaktipen na saya so panagpayunir. Sakey a kalangweran a payunir a manngaran na Rado so walaan na onian salaysay: “Para’d sakey a kalangweran, anggapo so mas maabig nen say pannodnonot ed si Jehova tan panakar ed dalan na katuaan.” On, say panagpayunir so maabig a dalan para’d saray tobonbalo a mangidemostra na aro ra para’d si Jehova tan inkamaapit ed sikato.​—Eclesiastes 12:1.

Pikakabat tan pakatalos so kaukolan met a tuloy. (Filipos 1:9-11) Diad tua, saraya so gasolina a manpapaandar ed espiritual a makina tayo. Kaukolan so regular a personal a panagaral pian naarawian so inkakesaw ed espiritualidad, a nabalang so entusiasmo tan kumbiksyon tayo. Siempre, say naasol tayon pikakabat so nepeg a mangapekta aliwa lambengat ed kanonotan tayo noagta ontan met ed puso tayo. (Uliran 2:2) Niarum ni ed personal a panagaral, kaukolan tayo so panaon a manpikasi tan mandalepdep ta pian say nagagamoran tayon pikakabat so onsepsep ed kapusoan tayo. Insan, no iyabuloy na saray sirkumstansya tayo, kaliktan tayo so manpayunir.​—Ipareng so Esdras 7:10.

Say panagpayunir so mankakaukolan met na espiritu na dilin-panagsakripisyo. Sakey a kalangweran a manngaran na Ron so nanggawa na amin a plano para’d panagpayunir. Sikato lambengat so manaalagar na duga iran sirkumstansya ta pian sikato so makagapo. Manuna, labay to so sakey a trabahon mangiyabuloy ed sikaton makapanpayunir tan ontan met et napangayagaan iray maabig a bengabengatla’d bilay. Sanen sinalambit to iya ed sakey a matatken ya agin bii, sikato so abigla ed ebat na agin bii. Inkuanto: “Bebendisyonan nen Jehova iray agawaan, aliwan saray sipan.” Akalmo na trabaho iman a kalangweran ya agin laki ya abebbeba so sueldo balet ta mangiyabuloy ed sikaton makapanpayunir. Say panangiyaplika ed Mateo 6:25-34 so ontulong ed sakey a makapantultuloy ed panagpayunir ed melag ya anap.

Say mapaabeban inkamabulos a tumboken iray maabig a suhestion so makatulong ed iloob ed panagpayunir a serbisyo. Masakbay ed bilay to bilang sakey a Kristiano, binayuboan nen Hanna so pilalek ton manpayunir. Balet sikato so ag-akapanpayunir legan ya aasikasoen to so pamilya, tan diad saginonor et sikato so nagmaliw ya okupado ed sakey a karera ed negosyo. Lapud tinumbok to so simbawa na saray alerton mamatatken, impulisay to so makapainteres a sekular a karera tan nanpayunir. Natan et naeeksperiensia nen Hanna so baleg a gayaga ed pangitatarok na arum ed dedikasyon tan panutulong ed saray inaktibo.

Say pisasalamat ed agawaan na katuaan ed bilay na sakey so nayari met a mamaseseg ed panpayunir. Kunsideraen so kaso na sakey ya alablabas a nagogonigon a bii a ngalngali la nabuyak so panamaley to. Baleg so impanguman na sayan situasyon sanen naaralan to so katuaan na Salita’y Dios tan inyaplika itan. Aliketan ed agawaan na katuaan ed sikato, diniside to a say sankaabigan a paraan a nipanengneng to so apresyasyon et diad panpayunir tan ontulong ed arum. Saya so ginawa to, tan natan et naeeksperiensia to iray bendisyon na dakel ya iyaaralan na Biblia tan sakey a maliket a bilay na pamilya.

Makatulong so Arum

Mabetbet a saray payunir so mamapawala na arum a payunir. Si Rado, ya asalambit la, so manedad na anemira sanen saray ateng to so inyaralan na Biblia na duaran payunir. Sanen sikatoy ugaw ni, maparanay ya akiulop ed sarayan sigpot-panaon a managpulong ed lawak a ministeryo. Si Rado a mismo so nagmaliw a sakey a regular pioneer ed edad a 17. Sananey nin kalangweran a laki, si Arno, a binmaleg ed Kristianon ayaman balet ta linmetey ed espiritualidad. Diad saginonor, sikatoy kinmiwas pian ompawil ed espiritual a biskeg to, tan natan ed inkuanto: “Siak so akawat na dakel a panamaseseg manlapud saray payunir. Akilimog ak ed sikara nagkalautla legan na saray bakasyon ed paneskuela tan no maminsan et manrereport na 60 ya oras ed sakey bulan ed lawak a serbisyo. Kayari na satan, say pagmaliw a sakey a regular pioneer [a mankaukolan na 90 ya oras ed binulan] so aliwan tanton mairap.” Say pandalepdep ed simbawa na 1 Corinto 7:29-31 ya ag-usaren a sigpot so mundo so talagan akatulong ed ontan iran kalangweran.

Say espiritu na panagpayunir so mas mainomay a nilamot ed ayaman a ditan et saray espiritual ya interes so manuna tan papasesegen na saray ateng iray anak da ya onloob ed sigpot-panaon a ministeryo. Si Philo, a binmaleg ed ontan ya ayaman, so nankuan: “Dakel so animbawa ed siak a mantultuloy ed edukasyon ko, pian nawalaan na maligen ya arapen. Balet tinulongan ak na saray ateng ko a manggawa na mas makabat a panagpili. Imbaga ra’d siak a no talagan labay ko so mangiletneg na marakep ya arapen, say manunan nepeg kon asikasoen et say panamayubo na relasyon ed si Jehova.”

Sakey a kalangweran a biin manngaran na Thama so manisia met a say panagpayunir to so resulta na uliran tan sagpot ya impanengneng na saray ateng to. Kuanto: “Agko talagan nibaga no kapigan so impamayubok na espiritual a panmoria ed bilay, balet ta kabat kon niyanak ak ya andian na saya. Say niyugali na atateng kon maparanay a mibiang ed lawak a serbisyo tan iyaatendi ed saray miting, ontan met ed aralem a panangaro ra ed katuaan so akatulong na baleg ed siak a mamayubo na espiritual a panmoria.”

Mansiansia ed Desisyon Mo

Kayari na iloob na sakey ed panagpayunir, say pansiansia ed satan so manggawa ed sikaton manani na sigpot a gungguna na makabat a desisyon. Dakel a praktikal a simbawa so niiter ed satan a gagala. Alimbawa, maabig a naaralan na saray payunir so pangiyeskedyul na panaon da pian magmaliw a mabunga itan no nayari. Ingen, say sankaimportantian a sengegan et say relasyon na sakey ed si Jehova tan say organisasyon to.

Nisisiglaot ed saya et say niyugalin panagpikasi. “Sanen akaloob ak ed katuaan, labalabay ko so manpayunir,” kuan nen Cor. Anggaman ontan, kinerew na ama to a sumpalen to nin ununa so sakey a kurso ed Agricultural University. Kayari to, si Cor so ginmapon nanpayunir. Ag-abayag sikato so angasawa, tan say asawa to so akibiang ed sikato ed panagpayunir. Sanen say asawa to so nanlukon, sikato so nidunget ed posibilidad ya ontunda ed panagpayunir. “Mabetbet ak a nanpikasi ed si Jehova tan impanengneng ko ed sikato so pilalek na pusok a mantultuloy ed panagpayunir kuan nen Cor. Diad kaunoran aromog nen Cor so sakey a trabahon mangiyabuloy ed sikatayon manpayunir legan a manpapamilya.

Say pagmaliw a kontento ed materyal iran pankaukolan ed bilay so sananey a sengegan a mabetbet ya ontulong ed toon mansiansia ed ministeryo na panagpayunir. Si apostol Pablo so nansulat: “Nabolos kayo komon a manlapu ed aro na pilak, panliketan yo so bengatla ya wala sikayo. Ta sikaton dili inbaga to: ‘Ag taka naani tainan, tan ag taka naani ikaindan.’” (Hebreos 13:5) Say pagmaliw a kontento ed kaplesan a bengabengatla so tinmulong ed si Harry tan Irene a mantultuloy ed panagpayunir. Si Irene, a sakey a bulag, so waloy taon lan payunir natan. “Agmin balot impasen a problema so kipapasen mi ed pinansyal,” kuanto. “Sikami so manaasikason agkami mangala na agkapilitan iran pabelat ed pinansyal. Lawas min kuekuentaen so gastos. Say panagbilay so lawas simpli, anggaman talagan makapaayat, tan sikaray mayaman a nabebendisyonan.”

Daakan a Gayaga tan Bendisyon

Diad inengneng ed siam taon na panagpayunir, onia so kuan nen Thamar: “Sika so lalon onaapit ed si Jehova, a singano sika so aktual ya itatabin to.” (Salmo 73:23) Nanonotan met iray pigaran subok. “Say dilin agko inkayadyari pati ed saray arum so maparanay a mamapaga ed siak,” inyarum ni nen Thamar. “Sakey ni, onnenengneng ak ed agagin lalaki tan bibiin nampili ed daakan a materyal a panagbilay, tan say pili ra so singano makapasagyat sano siak so mankakabkaabungan ya unuuran tan ambetel so panaon. Balet diad akindalem ko, agkon balot labay so misalatan ed kipapasen ko. Wala ta so arum ni nilikud ed panagpayunir a makapangiter na ontan a gayaga, a singa say espiritual a pakapenek, tan ontan iran bendisyon?” Kasin papablien yon tuloy so mipadpara iran gayaga tan bendisyon?

Lapud baleg a panaon so uusaren na saray payunir ed Kristianon ministeryo, walara’d kipapasen ya ontulong ed pigaran sinansakey pian makagamor na pikakabat ed katuaan na Biblia. Si Harry tan Irene, ya asaglawi la, so nankuan: “Dakel a pribilihyo ed organisasyon nen Jehova, balet say itulong ed saray balo nin interesadon onaligwas ed punton sikaray magmaliw ya aripen nen Jehova so sankabalgan ed amin.”

Sananey a payunir so angibalikas a maong ed saray pamaakaran sanen inkuanto: “Saray salita na Uliran 10:22 so napapaneknekan kon tua: ‘Say bendicion nen Jehova makapayaman; tan ag mangarum na ermen.’ Naulit-ulit, sayan teksto so asumpal ed siak ed saray taon a siak so manlilingkor ed si Jehova.”

Sikayoran atateng, kasin ipapasepsep yo ed ananak yo so pilalek a manpayunir? Sikayoran payunir, kasin panbabanikelan yon lagyaten iray arum? Sikayoran mamatatken, kasin susuportaan yoray payunir ed kongregasyon yo tan ontutulong pian saray arum so nawalaan na espiritu na panagpayunir? Komon ta ondakel so totoo nen Jehova a napakiwas a mandampot para’d ontan a mayaman iran bendisyon legan a sikaray mibibiang ed panagpayunir a serbisyo.