Natan la so Panaon Pian Manpulong!

1. Akin a natan la so panaon pian manpulong?

¹ “Takotan yo so Dios, tan iter yo ed sikato so gloria.” Diad panangiwanwan na saray anghel, sayan mensahe so niyaabawag ed “balang nasyon tan poli tan salita tan baley.” Akin? “Ta say oras na pangukom [na Dios] sinmabi la.” Natan et manbibilay itayo ed satan ya ‘oras na panangukom,’ a mansumpal ed kaderal na peles a sistema na bengabengatla. Importante ya “igalang na [saray totoo] so nanggawa ed tawen tan dalin tan say dayat tan saray subol na saray danum.” Anggapo lay arum a kimey natan a makapipara ed kaimportantian tan inkaapuraan na panangiyabawag ed “andi-angga a maabig a balita.” On, natan la so panaon pian manpulong!​—Apo. 14:6, 7.

2. Panon ya ipapatnag na saray lingkor nen Jehova ya iimanoen da so inkaapuraan la na panaon?

² Legan na apalabas a dekada, saray lingkor nen Jehova so angusar na ngalngali 12 bilyon ya oras ed kimey a panangipulong na Panarian tan panaggaway babangatan. Dakel so angiyarunsa ed panagbilay da pian nagkalalon makapibiang ed espiritual a panagani. (Mat. 9:37, 38) Alimbawa, nen 2004, walay promedyo a masulok a 850,000 a manangipalapag a nampayunir kada bulan. Parad saray regular payunir, satan so mankaukolan na pangusar ed promedyo a 70 oras kada bulan diad panagpulong a kimey. Diad saray auxiliary payunir, say kakaukolanen et 50 oras.

3. Antoran panangiyarunsa so mabetbet a kaukolan a gawaen na saray manangipalapag pian makapanpayunir ira?

³ No Panon a Makapanpayunir: Lapud namomoria na saray payunir a “say panaon apatikeyan la,” panggugunaetan dan pansiansiaen a simpli so bilay da. (1 Cor. 7:29, 31) Manggagawa ira na paraan pian naparaisetan so gastos da diad ontan et daiset labat lay ipanaon da parad anapan. Alimbawa, walaray inmalis ed memelag iran ayaman. Binawas na arum iray agmet nakaukolan a materyal iran kayarian. (Mat. 6:19-21) Mabetbet et kaukolan da met a limitaan iray personal iran gegemtan. Ginawa ra irayan amin pian makapangitalaga ira na malaglaem a panaon tan imano ed ministeryo. (Efe. 5:15, 16) Lapud determinasyon, masakripisyon espiritu, tan mapikasin panagmatalek ed si Jehova, dakel la so manangipalapag ya akapangiyarunsa na praktikal ya eskedyul ya angiyabuloy ed sikaran manpayunir.

4. Antoran praktikal a kundang so ontulong ed sikayon nakapet so kalat a manpayunir?

⁴ Sarag yo kasi so manpayunir? Akin ta no tepetan yo iray matalonan payunir no panon dan nagagawaan itan? Miulop kayo ed sikara ed lawak na ministeryo, tan eksperiensyaen so liket da. Aralen iray artikulo nipaakar ed panagpayunir a pinmaway ed saray publikasyon tayo. Mangiletneg na praktikal a personal iran kalat ya onkanan balitang parad panagpayunir. No walaray pakakasbelan yo natan pian manpayunir, iyasingger yo iratan ed si Jehova diad pikakasi, tan kerewen ed sikato a tulongan to kayon manolbar ed saratan.​—Uli. 16:3.

5. Panon itayon natulongan na panagpayunir a napaaligwas iray dunong tayo ed ministeryo?

⁵ Saray Bendisyon tan Gayaga: Napaaligwas na panagpayunir so dunong tayon mangusar ed Salita na Dios a lalon panggayagaan tayo. “Peteg a sakey a bendisyon so pakasarag mon usaren a susto so Salita na Dios a katuaan,” so inkomento na sakey a biin kalangweran a payunir. “Sano manpayunir ka, naynay mon nausar so Biblia. Natan no siak so mankakabkaabungan, makanonot ak na saray kasulatan a matukoy ed kada unabung.”​—2 Tim. 2:15, NW.

6. Anton panangipasal so ipapagamor na panagpayunir?

⁶ Naaralan tayo met diad pampayunir so dakel iran dunong a mamaaligwas ed bilay tayo. Natulongan na satan iray kalangweran no panon so makabat a pangapag-apag na panaon, panag-badyet, tan pitunosan ed saray totoo. Dakel so awalaan na mas maespiritual a panmoria ed bilay lapud pampapayunir da. (Efe. 4:13) Niarum ni, mabetbet a saray payunir so napripribilehyoan a makaeksperiensya ed pananulong tan pananumang nen Jehova.​—Gawa 11:21; Fil. 4:11-13.

7. Panon itayon natulongan na panagpayunir ya onapit ed si Jehova?

⁷ Nayarin say sankabalgan lan bendisyon a nagamoran ed panagpayunir et say pakatulong na satan ed sikatayon onapit ed si Jehova. Saya so ontulong ed sikatayo ed saray subsubok. Sakey ya agin bii a nansungdo ed panaon na pinasyan irap so angikuan: “Say maapit a siglaotan ed si Jehova ya abayuboan ko diad pampapayunir ko so tinmulong ed siak a nasungdoan so amin ya impanirap ko.” Inyarum to: “Malikeliket ak ta inusar ko so bilay ko bilang adulto pian sigpot-panaon a manlingkor ed si Jehova. Lapud saya et asarag kon innabang so inkasiak ed arum diad saray paraan ya agkon balot naisip a nayarian ko manaya.” (Gawa 20:35) Komon ta naeksperiensya tayo met so daakan a bendisyon legan tayon gagawaen so anggaay nayarian tayo ed sayan importantin kimey a panagpulong.​—Uli. 10:22.