Kasin Sarag Yoy Onloob ed “Baleg a Kapot a Mangitonton ed Aktibidad”?
1. Anton “baleg a kapot a mangitonton ed aktibidad” so nilukas ed sikatayo?
1 Sanen alukasan ed si apostol Pablo so “baleg a kapot a mangitonton ed aktibidad,” sikatoy magunaet ya anganamot ed pankanawnawa ya itultuloy ya ipulong so Panarian anggaman dakel so onsusumpa. (1 Cor. 16:9, NW) Natan et walay manga 642,000 a manangipalapag na Panarian ed interon mundo a linmoob ed baleg a kapot na aktibidad diad impan-regular payunir da.
2. Akin a maabig ya usisaen tayoy kipapasen tayo a panapanaon?
2 Manguuman Iray Sirkumstansya: Anggaman nalilimitaan so aktibidad tayo lapud kaplesan iran sirkumstansya, manguuman iray sirkumstansya. Kanian, maabig no usisaen tayoy dilin sirkumstansya tayo a panapanaon tan agla aalagaren ni so sankaabigan iran sirkumstansya. (Ecl. 11:4) Kasin sakey kan kalangweran a kapkapan-graduar ed haiskul? Kasin sakey kayon ateng a saray anak yo et onggapo la iran maneskuela? Kasin magano kayo lan manretiro ed trabaho? Saratan a pananguman so makapangiter ed sikayo na malaem a panaon pian makapanregular payunir. Sakey ya akulaw lan agi ya akasagmak ed agano ni na saray problema ed bunigas so nandesidin manpayunir diad edad ton 89. Akin? Lapud sikatoy agna-ospital ed loob na sakey taon, kanian liknaen ton sarag lay bunigas to so manpayunir.
3. Anto iran pananguman so ginawa na arum ta pian makapan-regular payunir?
3 Diad kipapasen nen Pablo, nen inmuna et getma ton bisitaen iray agagi ed Corinto. Balet, inuman to iray plano to nisengeg ed maong a balita. Dakel met a regular payunir natan so nanggawa na saray pananguman ta pian makapanpayunir. Arum et pinasimpli day kabibilay da anggad punto a say nakaukolan labat la et part-time a trabaho pian nasalipotpotan so aparaisetan ya inagew-agew a gastos da. Nanggayagaan da iyan pribilehyo. (1 Tim. 6:6-8) Walaray sanasawa a nanggawa na saray pananguman kanian apasarag day sueldo labat la na asawan laki, diad ontan et akapanpayunir so asawan bii.
4. Antoy nagawaan tayo no agtayo segurado no kasin sarag tayon aboten so kakaukolanen ya oras?
4 Agtampol ya ipupulisay so ideya a panagpayunir lapud talawan kayo ompan agyo naabot so kakaukolanen ya oras. Say kaukolan ya oras ed kada agew et masulok labat na daiset ed duaran oras. No agkayo segurado a nagawaan yo itan, sali yoy man-auxiliary payunir ed loob na sakey odino duaran bulan balet abot yoy 70 ya oras. Diad ontan et natawayan yoray gayaga ed panagpayunir. (Sal. 34:8) Mitongtong ed saramay peles a payunir. Nayarin walaray atalonaan dan angat a mipara ed sikayo. (Uli. 15:22) Kerewen ed si Jehova a bendisyonan to iray sagpot yo pian napalaknab yoy ministeryo yo.—1 Juan 5:14.
5. Akin a say panagregular payunir et makanan gegemtan?
5 Makanan Gegemtan: Say panlingkor bilang regular payunir so mangitarok na dakel a bendisyon. Pakaeksperiensyaan tayo itan na babaleg a liket, a resulta na malaglaem a panangiter. (Gawa 20:35) Say panagpayunir so mamaaligwas ed abilidad yon mangusar ed katuaan na Salita na Dios ed dugan paraan. (2 Tim. 2:15) Nawalaan kayo na dakel a pankanawnawa a naeksperiensya so pananuporta nen Jehova. (Gawa 11:21; Fil. 4:11-13) Say panagpayunir so ontulong met ed sikayon napaapit ed si Jehova tan nabayuboan iray espiritual a kalidad, a singa say panagsungdo. (Sant. 4:8) Kasin sarag yoy onloob ed sayan baleg a kapot na aktibidad tan makapan-regular payunir?