Kasin Dati et Regular Payunir Ka?
1. Anton pribilehyo so nanggayagaan na dakel, balet antoy kinaukolan a gawaen na arum?
1 Diad inlabas na saray taon, nanggayagaan na nilibon agagi so pribilehyon ‘manbangat tan mangiyabawag ed maong a balita’ bilang sigpot-panaon a ministro. (Gawa 5:42) Balet, walaray tinmunda’d panagpayunir lapud nanduruman rason. No dati et regular payunir ka, inusisam ta lay kaplesan a kipapasen mo pian nadetermina no kasin sarag moy manpayunir lamet?
2. Akin et kaukolan ya usisaen na saramay datin payunir so kaplesan a sirkumstansya ra?
2 Manguuman Iray Sirkumstansya: Nayarin samay situasyon a sengegay intundam ed panagpayunir et anggapo la. Alimbawa, no tinmunda kan payunir lapud agmo naabot so kakaukolanen ya 90 oras kada bulan, sarag mo la kasi ompawil lapud ginawan 70 oras itan? Kasin apalemewan lay pankaukolan mon mantrabaho odino say responsabilidad mo’d pamilya no ikompara sanen tinmunda ka? Sakey ya agin bii ya akatunda’d panagpayunir lapud problema’d bunigas so akapawil diad edad ya 89. Sikatoy agnaospital ed masulok a sakey taon, kanian liknaen ton nayarian to lay manpayunir lamet!
3. Panon a makatulong iray membro na pamilya pian walay makapanpayunir ed sikara?
3 Nayarin aliwa kan datin payunir, balet ta walay kapamilyaan mon akatunda ed panagpayunir pian asikasoey sakey a membro na pamilya, nayarin say matatken lan ateng. (1 Tim. 5:4, 8) No ontan, kasin sarag mo odino na arum ed pamilya so mitulongan? Agta maabig no pantongtongan yo itan? (Uli. 15:22) No mikoopera iray membro na pamilya pian makapanpayunir so anggan sakey ed sikara, balbaleg so nitulong da.
4. Anto so gawaen mo no agka ni makapanpayunir natan?
4 Agka nadidismaya no ag-iyabuloy na kaplesan a sirkumstansyam so pakapanpayunir lamet. Naliliketan si Jehova ed satan a pirawat mo. (2 Cor. 8:12) Usar mo’d ministeryo iray abilidad ya agamoran mo sanen payunir ka ni. Ipikasim so pirawat mo, tan lawas alerto ed saray pankanawnawan sarag mon anamoten. (1 Juan 5:14) Nasabi panaon, ompan lukasan ed sika nen Jehova so “baleg a puerta a mangitonton ed kimey” pian napanggayagaan mo lamet so pan-regular payunir!—1 Cor. 16:9.