“Sarasarag Moy Manpayunir!”

1. Antoy imbaga na sakey ya agi nipaakar ed impanpayunir to?

¹ “Anggapo lay arum nin kimey ya angiter ed siak na inkakontento tan dakel a bendisyon ed espiritual.” Ontan so inkuan nen Kathe B. Palm, a diad pigapigaran dekada et masakripisyon nampayunir ed nanduruman lugar ed Chile, South America. Lapud makapnek so bilay na walad sigpot panaon a serbisyo, ompan wala met lay akapangibaga’d sikan: “Sarasarag moy manpayunir!”

2. Ipaliwawa no akin a nagamoray tuan inkapnek diad espiritual iran kimey.

² Makapnek a Bilay: Say Ehemplo tayo a si Jesus et nainawaan diad impanggawa toy linawa nen Ama to. (Juan 4:34) Kanian mataletalek ton imbangat ed saray papatumbok to ya say tuan inkapnek et nagamoran diad panaglingkor ed si Jehova. Kontento itayo sano okupado itayo ed saray kimey a mamaliket ed si Jehova. Ontan met, legan ya mas iiter tayoy panaon, biskeg tan kaykayarian tayo pian natulongan so arum, mas nalikna tayoy liket.​—Gawa 20:31, 35.

3. Akin et nalikna tayoy liket no mas dakel so panaon tayo ed ministeryo?

³ No mas dakel so panaon tayo’d ministeryo, mas dakel so pankanawnawan nalikna tayoy liket na pangigapo tan pangikonduktay panangiyaral na Biblia. Ompan say abaloan tayo et dakel so ag-ondengel ed teritorya tayo, balet diad pagmamaliw tayon mas eksperiensyado ed ministeryo, namoria tayon dakel ni manayay interesado. Nausa-usar na saray payunir so dakel ya naaralan da ed Pioneer Service School ya atendian da sano akapanpayunir la ra na manga sakey taon. (2 Tim. 2:15) No mantultuloy itayo ed sayan kimey, makapangitanem tayo na saray bini na katuaan a mamawalay bunga.​—Ecl. 11:6.

4. Antoy nepeg ya nodnonoten na saray kalangweran ya asingger lan man-graduate?

⁴ Sikayoran Kalangweran: Legan na paneeskuelam ed haiskul, nonodnonoten mo met kasi so arapen mo? Nayarin say manguupot natan na dakel a panaon mo et say panaaral mo. Panon to la balet ey kapan-graduate mo? Imbes ya mansagpot ka parad sekular a karera, agta mas maabig no nodnonoten mo tan ipikasim so panregular payunir? Diad pampayunir mo et dakel so naaralan mon pakagunggonaan mo’d interon bilay mo, a singa say pampulong ed nanduruman klase na totoo, panaeg ed saray problema, panagdisiplina ed sarili, tan napaaligwas moy abilidad mon manbangat.

5. Panon a nipaseseg na saray atateng tan na kongregasyon so panagpayunir?

⁵ Sikayoran atateng, kasin papasesegen yo ray anak yon manpayunir? Baleg so epekto na saray ibabaga tan maong ya ehemplo yo pian natulongan iran mangiyuna ed Panarian. (Mat. 6:33) Oniay imbaga nen Ray a nampayunir ka-graduate to’d haiskul: “Lanang ya ibabaga nen nanay ya anggapo lay mas makapnek nen say pampayunir.” Amin ed kongregasyon et nipaseseg day pampayunir diad panamegley na salita tan suporta ra. Oniay imbaga nen Jose a taga España: “Ipapasen na saray kakongregasyon ko ya say pampayunir so sankaabigan a karera na saray kalangweran. Saray komento tan panangapresya da ed panagpayunir, ontan met ed praktikal a tulong da, so akatulong pian makapanpayunir ak.”

6. Antoy sarag tayon gawaen no natan et anggapo’d puso tayoy pampayunir?

⁶ Panaeg ed Saray Makaamper: Balet ompan ikuan mon, ‘Anggapo’d pusok so pampayunir.’ No diad primero et ontan so naliliknam, ipikasim itan ed si Jehova tan ibagam ed sikato ya, ‘Agko amta no parad siak so panagpayunir, balet ta labay kon gawaen no antoy mamaliket ed sika.’ (Sal. 62:8; Uli. 23:26) Anap moy panangigiya to diad Salita tan organisasyon to. Aliling to et ‘tinawayan’ na dakel so panagpayunir diad impan-auxiliary payunir da, tan lapud liket ya alikna ra’d satan et apakiwas iran manregular payunir.​—Sal. 34:8.

7. Antoy nagawaan tayo no ag-itayo segurado ya naabot imay kakaukolanen a 70 oras binulan?

⁷ Panon to no agka seguradon naabot mo so kakaukolanen a 70 oras binulan? Maabig no mitongtong ka’d saray payunir a say sirkumstansya ra et pareho ed sika. (Uli. 15:22) Insan mo isulat so pigaran posible ya eskedyul mo. Ompan ditan mo namoria ya aliwa met manayan mairap a “saliwen so panaon” ya uusaren mo’d agtanton importantin bengatla pian nausar mo’d ministeryo.​—Efe. 5:15, 16, paimano’d leksab.

8. Akin et nepeg a sagpaminsan et usisaen tayoy kipapasen tayo?

⁸ Usisam Lamet so Kipapasen Mo: Say kipapasen na sakey a too et manguuman. Kanian maabig no sagpaminsan et usisaen moy sirkumstansyam. Singa bilang, kasin asingger ka lan manretiro? Oniay inkuan nen Randy, ya asakbay a nanretiro: Lapud sayan desisyon ko, akapanpayunir kami nen akulaw ko tan akapanlingkor kami ed lugar a mas baleg so pankaukolan. Agnabilang so bendisyon a naawat ko lapud saya, balet say pabpablien kon maong ed sarayan amin et walaan ak na maong a konsiensia.”

9. Antoy nepeg ya usisaen na sanasawa?

⁹ Walaray sanasawa a kayari dan inusisay kipapasen da et amoria ran agmet la kaukolan a pareho iran mantrabahon full-time. Nayarin mankabaliksan itan a pasimplien na pamilya so kabibilay da, balet ta nabawbawi da itan a sakripisyo. Oniay imbaga nen John, a say akulaw to et nanresign ed trabaho pian mas dakel so panaon to’d ministeryo: “Malikeliket ak ta amtak a diad sanagew et okupado so asawak ed espiritual iran bengatla.”

10. Antoy mamakiwas ed sakey a Kristiano a manpayunir?

¹⁰ Panangipanengneng na Aro tan Pananisia: Say panagpulong so sankaimportantian a kimey ya inter nen Jehova ed sikatayo. Asingger lan deralen iyan daan a sistema, tan saraman labat so ontatawag ed ngaran nen Jehova so nilaban. (Roma 10:13) Lapud sikatoy inad-aro tayo tan misalsalamat itayo’d ginawa to parad sikatayo, napapakiwas itayon unoren so ingganggan na Anak to, salanti, say maseseg a pampulong. (Mat. 28:19, 20; 1 Juan 5:3) Ontan met, lapud walaan itayo na pananisia a talagan manbibilay itayo la ed kaunoran iran agew, napakiwas itayon gawaey anggaay nayarian tayo’d ministeryo legan a wala ni panaon, imbes ya ‘usaren a maong so mundo.’​—1 Cor. 7:29-31.

11. Antoy pangipasen tayo sano walay mangibagan sarasarag tayoy manpayunir?

¹¹ Say panregular payunir et aliwa labat a pangusar na dakel ya oras ed ministeryo. Panangipatnag itan na debosyon tayo ed Dios. Kanian no walay mangibaga’d sika ya sarasarag moy manpayunir, ipasen mon komendasyon itan. Nodnonot mo tan ipikasim a sakey ka met ed saramay makapibiang ed sayan makapnek a serbisyo.

[Blurb ed pahina 4]

Sikayoran atateng, kasin papasesegen yo ray anak yon manpayunir?

[Blurb ed pahina 5]

Say panagpulong so sanka-importantian a kimey ya inter nen Jehova ed sikatayo.