Saray Bendisyon ed Panagpayunir
1, 2. Antoran bendisyon so maapit a nisiglaot ed panagpayunir, tan akin?
1 “Amtak ya anggapo lay arum nin kimey a makapenek ed siak nen say panginabang na katuaan ed arum,” so inkuan na sakey a payunir. Oniay inkuan na sananey ni: “Kalabas na sanagew, masamit so ugip ko, tan napno na gayaga so pusok.” Irerepresenta na sarayan payunir iray agagin lalaki tan bibii ed inerman a pasen a nabebendisyonan lapud panagpayunir.—Uli. 10:22.
2 Say panulong ed arum ya onggamor na manangisalbay-bilay a pikakabat ed Salita na Dios so panlapuan na tuan inkapnek. (Gawa 20:35; 1 Tes. 2:19, 20) “Makapaliket tan makapabiskeg na pananisia so pakamorian say Salita na Dios so mapuersan mamapakiwas ed totoo a manguman ed saray kabibilay da,” so insulat na sakey ya abayag lan payunir. On, lapud sikaray mabulos ya ontutulong ed totoo tan mangikokondukta na saray panagaral ed Biblia, panggayagaan na saray payunir iray bendisyon a singa saraya.
3, 4. Panon a say panagpayunir so mangibabangat ed sakey a manmatalek ed si Jehova, tan panon ya ontulong iya ed sakey pian onaligwas ed espiritual?
3 Manmatalek ed si Jehova: Lapud manmamatalek ira a naynay ed espiritu na Dios legan dan susumpalen so ministeryo ra, nababayuboan na saray payunir iray “bunga na espiritu” tan satan so pinagkasalimbeng da. (Gal. 5:16, 22, 23) Niarum ni, lapud naynay a panguusar da ed Salita na Dios, saray payunir so kaslakan lan marundunong diad panangusar ed Kasulatan pian idepensa so katuaan tan pian pabiskegen so arum. (2 Tim. 2:15) Onia so inkomento na sakey ya agin laki a payunir ed loob la na saray dekada: “Say panagpayunir so tinmulong ed siak pian nagamoran so aralem a pikakabat ed Biblia, say pikakabat ya uusaren ko pian natulongan so dakel a totoo a nakabatan si Jehova tan saray gagala to.” Agaylan makapalikliket!
4 Saray regular payunir so nepeg met a manmatalek ed si Jehova diad dakel nin paraan. Napapabiskeg so pananisia ra diad pakakanengneng da a pirmin bebendisyonan nen Jehova iray sagpot dan mangitarya na materyal iran pankaukolan da. Onia so inkuan na sakey a 72-años a regular payunir ed loob la na 55 a taon: “Siak so agbalot pinaulyan nen Jehova.” Niarum ni, lapud pansiasiansiaen dan simpli so kabibilay da, nasasalimbengan na saray payunir so inkasikara manlapud dakel a kapagaan ed bilay. Agta makapasagyat ed sika iya?—Mat. 6:22; Heb. 13:5, 6.
5. Panon a makatulong so panagpayunir ed sakey pian napaapit ed si Jehova?
5 Onapit ed Dios: Say relasyon tayo ed si Jehova so sakey a sankablian a kayarian. (Sal. 63:3) Sano sigpot itayon mibiang diad ministeryo lapud aro tayo ed si Jehova, lalon onapit itan a relasyon. (Sant. 4:8) Oniay inkuan na sakey a payunir ed masulok lan 18 a taon: “Say panlingkor bilang payunir so mangiyaabuloy ed sikatayo a ‘natawayan tan nanengneng a si Jehova [et] maong,’ a satan so lalon mamaelet ed siglaotan tayo ed Manamalsa tayo ed kada agew.”—Sal. 34:8.
6. Antoray nepeg a niwala ed saray payunir, tan nilikud ed inkasikara, siopa ni iray nagugunggonaan?
6 Nilikud ed saray sirkumstansya a mangiyabuloy ed sikaran manpayunir, sikara so nepeg met a nawalaan na mabiskeg a pananisia, puron panangaro ed Dios tan ed kaparan too, tan inkamabulos a mansakripisyo. (Mat. 16:24; 17:20; 22:37-39) Ingen ta agnaparaan iray bendisyon ed panagpayunir, unong a papaneknekan na maliket a kalupaan na saray payunir ed inerman a pasen. (Mal. 3:10) Aliwan saray payunir labat so nabebendisyonan noag pati saray pamilya ra, tan nagugunggonaan met a tuloy so kongregasyon ed maabig ya espiritun ipapatnag na saray payunir.—Fil. 4:23.