Tepetepet Manlapud Managbasa
Kasin say balikas a “maespiritu,” a naromog ed 1 Corinto 14:37, et kabaliksan to a say sakey a too so akaawat na masanton espiritu diad pantalos a sikatoy alanaan, odino kasin kabaliksan to a sikato so walaan na mamilagron langkap a nanlapud espiritu?
Diad New World Translation of the Holy Scriptures, nabasa iyan bersikulo a: “No siopaman et nonoten to a sikato so sakey a propeta odino apalaboan na say espiritu, abuloyan a bidbiren to iray bengatlan isulat ko ed sikayo, lapud saratan so ganggan na Katawan.”—1 Corinto 14:37.
Say managbasa et nipasen to so balikas ya “apalaboan na espiritu” bilang sakey a panukoy ed katuaan a saray inmunan-siglon Kristiano so tinagibi ed espiritu tan nagmaliw ya espiritual ya ananak na Dios. Odino say balikas et nayarin natalosan ya onaplika ed sakey ya akaawat na nikadkaduman langkap na masanton espiritu. Sayan kaunoran a kabaliksan so nayarin duga, unong a tutulongan ya ipanengneng na abenegan.
Inusar dia nen apostol Pablo so Griegon pneu·ma·ti·kosʹ, a walaan na manunan kabaliksan na “mitukoyan ed espiritu, espiritual.” Saray porma na satan so nauusar ed panedeskribe na “maespiritun laman,” “espiritual a panamendisyon,” “karonongan a maespiritu,” tan “abung a maespiritu.”—1 Corinto 15:44; Efeso 1:3; Colosas 1:9; 1 Pedro 2:5.
Diad saraman a kipapasen, ipapanengneng na Biblia so tema (laman, bendisyon, karunongan, abung) a dedeskribien na “maespiritual.” Balet diad arum a kipapasen, say pantalos tan matukoy a panangipatalos ed “maespiritual” so nepeg a nadetermina manlapud konteksto. Alimbawa, say 1 Corinto 2:14, 15 et pandumaan to so awawey na pisikal a too tan say ho pneu·ma·ti·kosʹ, a lohikon mankabaliksan a “too a maespiritu.”
Say 1 Corinto kapitulo 12 ya anggad 14 so mangiyaapasakey ed mamilagro iran langkap na masanton espiritu. Saraya so initer na Dios ed saray pigaran asasakbay a Kristianos pian idemostra a sikato so agla manguusar ed Israel ed laman noagta sikato la natan so mamebendisyon ed Kristianon “Israel na Dios.” (Galacia 6:16) Nipaakar ed sarayan langkap, insulat nen Pablo: “Natan wala so panduruma na saray langkap, balet saksakey ya Espiritu.” (1 Corinto 12:4) Say nikadkaduman kakabatan, pikakabat, tan pananisia so kabiangan na saray langkap na espiritu, a singa met ed say panagpropesiya, nambabangil a nengneng na panagsalita, tan ed panangipatalos na panagsalita.—1 Corinto 12:8-11.
Saray Kristiano ed Corinto a sinulatan nen Pablo so nilanaan na masanton espiritu na Dios. Inkuan nen Pablo: “Balet naurasan kayo la, balet apasantos kayo la, balet nibilang kayo la a matunong ed ngaran na Katawan a Jesu-Cristo tan dia ed Espiritu na Dios tayo.” (1 Corinto 6:11; 12:13) On, amin so akaawat na “tanda na Espiritu.” (2 Corinto 5:5) Anggaman ontan, aliwan amin ed sikara so akaawat na nikadkaduman langkap diad panamegley na masanton espiritu. Tan ompatnag a dakel so asagyat ed nambabangil a nengneng na panagsalita, ya ipapasen a masyadon importanti iyan langkap. Nansulat si Pablo pian korihien so kanonotan da tan angidanet a saray panagsalita so agmangungguna ed dakel a totoo a singa ed langkap na panagpropesiya. Diad kaunoran na kapitulo 12, sinimbawa nen Pablo iray Kristiano: “Panpirawatan yo a siseseseg so sarayan ankakabaleg a langkap.”—1 Corinto 12:28-31.
Kayari to, diad gapo na kapitulo 14, impaseseg to: “Tombok yo so aro; panpirawatan [anapen, NW] yo ni marlang so maespiritu’n [ta pneu·ma·ti·kaʹ] langkap balet lalo la no manprofeta kayo.” Anapen so anto? Saraman a Kristianos so agnakaukolan a mananap na pakalanaan ed espiritu, ta sikaralay walaan na ontan. Makatunongan a say tutukoyen nen Pablo et “saray langkap” na espiritu, a diad sampot na kapitulo 12 et impaseseg ton anapen da. Kanian, say New World Translation of the Holy Scriptures so mangipapatalos ed 1 Corinto 14:1: “Mantultuloy a siseseseg a mananap na espiritual iran langkap.” Arum iran bersyon na Biblia so angipatalos ed ta pneu·ma·ti·kaʹ a “saray maespiritual a langkap” odino “saray langkap na Espiritu.”
Tekep na satan a punto-de-bista, naimano tayo diad asingger ed sampot na kapitulo 14, isisiglaot nen Pablo so panagpropesiya tan pneu·ma·ti·kosʹ. A singa ed bersikulo 1, isusuhiri na konteksto a say labay ton ibaga et apalangkapan na say espiritu. Inadapta iyan patalos na The New Testament in Modern Speech, nen R. F. Weymouth: “No ipasen na sakey a sikaton mismo so sakey a propeta odino sakey a lakin walaan na espiritual iran langkap, abuloyan a mamidbir unong ed ganggan na Katawan no antoy isusulat ko natan.”
On, amin a Kristiano, balanglan sikaray walaan na langkap na panagpropesiya odino antokaman a langkap na espiritu, so nakakaukolan a mangawat tan ontumbok ed simbawa ya insulat nen Pablo nipaakar ed no panon so kagawa na saray bengatla ed kongregasyon.