‘Diad Ngaran na Masanton Espiritu’
“Onla kayo sirin tan manggawa na babangatan ed amin a nasyones, a bautismoan yora diad ngaran na masanton espiritu.”—MATEO 28:19.
1. Anton balon balikas so inusar nen Juan a Managbautismo a misiglaotan ed masanton espiritu?
DIAD taon 29 ed Komon a Panaon tayo, si Juan a Managbautismo so aktibo ed Israel diad pangipaparaan na dalan parad Mesias, tan diad kurang na ministeryo to, inyabawag to so bengatlan balo nipaakar ed masanton espiritu. Siempre, kabat la na saray Judios no anto so ibabaga na Hebreon Kasulatan nipaakar ed espiritu. Anggaman kuan, nayarin sikara so asupresa, sanen inkuan nen Juan: “Siak, ed biang ko, bautismoan takayo ed danum lapud panagsibkel yo; balet say mantumbok ed siak . . . bautismoan to kayon totoo ed masanton espiritu.” (Mateo 3:11) Say ‘bautismo ed masanton espiritu’ so sakey a balon balikas.
2. Anton balon balikas a manasaglawi ed masanton espiritu so imparungtal nen Jesus?
2 Samay onsabi et si Jesus. Legan na mangaraldalin a bilay to, si Jesus so peteg ya agnanbautismo ed siopaman ed masanton espiritu, anggaman sinalambit to so espiritu ed aminpigan danay. Niarum ni, kayari inkioli to, tinukoy to so masanton espiritu ed sananey nin balon dalan. Imbaga to ed saray babangatan to: “Onla kayo sirin tan manggawa kayo na saray babangatan ed amin a nasyones, a bautismoan yora ed ngaray Ama tan ed Anak tan ed masanton espiritu.” (Mateo 28:19) Say balikas a “diad ngaran na” et kabaliksan to so “diad pamidbir ed.” Say bautismo ed danum so pamidbir ed Ama, ed Anak, tan say masanton espiritu so miduma ed bautismo ed masanton espiritu. Satan met so balon balikas a manasaglawi ed masanton espiritu.
Bautismoan ed Masanton Espiritu
3, 4. (a) Kapigan agawa so inmunan bautismo ed masanton espiritu? (b) Nilikud ed impanbautismo ed sikara, panon so inkiwas na masanton espiritu ed saray babangatan nen Jesus ed Pentecostes 33 K.P.?
3 No nipaakar ed bautismo ed masanton espiritu, insipan nen Jesus ed saray babangatan to sakbay a tuloy na itokotok to: “Nabautismoan kayo na masanton espiritu ya aliwa lan dakel ya agew manlapu ed natan.” (Gawa 1:5, 8) Ag-abayag nanlapulad saman, atan a sipan so asumpal. Linmeksab so masanton espiritu ed 120 iran babangatan a nandoroypo ed tagey a kuarto ed Jerusalem unong a si Jesus, a walad tawen et ginawa to so inmunan bautismo ed masanton espiritu. (Gawa 2:1-4, 33) Diad anton nansumpalan? Saray babangatan so nagmaliw a kabiangan na espiritual a laman nen Kristo. Unong ya isalaysay nen apostol Pablo, “ta dia ed sakey ya espiritu [sikara] so abautismoan ya amin ed sakey a laman.” (1 Corinto 12:13) Diad parehon panaon, sikara so alanaan a magmaliw ya arapen ya arari tan saserdote ed mangatatawen a Panarian na Dios. (Efeso 1:13, 14; 2 Timoteo 2:12; Apocalipsis 20:6) Nanserbi met so masanton espiritu a bilang unaan a tatak tan regalo na saman a maglorian tawir ed arapen, balet aliwan atan labat.—2 Corinto 1:21, 22.
4 Pigaran taon ed asasakbay, inkuan nen Jesus ed si Nicodemos: “Anggad agniyanak lamet so sakey a too, agto nanengneng so panarian na Dios. . . . No siopaman et agniyanak ed danum tan ed espiritu, agto makaloob ed panarian na Dios.” (Juan 3:3, 5) Natan 120 totoo so niyanak lamet. Diad panamegley na masanton espiritu, sikara so atagibi bilang espiritual ya ananak na Dios, agagi nen Kristo. (Juan 1:11-13; Roma 8:14, 15) Amin na sarayan kimey na masanton espiritu diad dilin nikadkaduman dalan et nagkalalon makapakelaw nen saray milagro. Nagkalalo ni, aliwan singa saray milagro nensaman, say masanton espiritu so agtinmunda kayari impatey na saray apostoles noagta nantultuloy ya aktibo diad sayan dalan ya anggad agew tayo. Pribilehyo na saray Tasi nen Jehova a wala ed limog da so kaunoran a bautismado-ed-espiritun membro na laman nen Kristo, tan saraya so manlilingkor a bilang “matoor tan makabat ya aripen” a mangitarok na espiritual a tagano ed dugan panaon.—Mateo 24:45-47.
Abautismoan “ed Ngaran na . . . Masanton Espiritu”
5, 6. Panon a say inmunan bautismo ed masanton espiritu so angitonton ed bautismo ed danum?
5 Balet komusta so nisipan a bautismo ed danum diad ngaran na Ama, say Anak, tan ed masanton espiritu? Saraman so inmunan babangatan ya abautismoan ed espiritu so agdinmalan ed ontan a bautismo ed danum. Sikara so akaawat la na bautismo ed danum nen Juan, tan lapud atan so inabobonan nen Jehova ed saman a partikular a panaon, agnakaukolan a sikaray bautismoan lamet. Balet diad Pentecostes 33 K.P., sakey a baleg ya ulop na kakamarerwa so ag-akaawat na balon bautismo ed danum. Panon iyan agawa?
6 Say bautismo na 120 ed masanton espiritu so binansagan na maksil ya ungol ya anagyat ed saray ulop. Saraya so nikelawan ed impakadngel ed saray babangatan a mansasalita na saray pansasalita, salanti, sangkaili iran lenguahe a natatalosan na saramay presenti. Impaliwawa nen apostol Pedro a sayan milagro so pakapatnagan a say espiritu na Dios so inyibong nen Jesus, ya apaoli tan akayurong la natan ed nikawanan a lima na Dios ed tawen. Pinaseseg nen Pedro iray dumerengel to: “Amtaen a peteg sirin na lapag ya abung na Israel a sayan Jesus ya inpasak yo et ginawa na Dios a sikato so Katawan tan Kristo.” Insan sinampotan to diad impangikuan: “Magbabawi kayo, tan manbautismo so sinansakey ed sikayo ed ngaran nen Jesu-Kristo pian naperdona iray kasalanan yo et awaten yo naani langkap na masanton espiritu.” Ngalngali 3,000 kakamarerwa so inmebat.—Gawa 2:36, 38, 41.
7. Diad anton dalan a saray 3,000 ya abautismoan nen Pentecostes 33 K.P. et abautismoan ed ngaran na Ama, ed Anak, tan ed masanton espiritu?
7 Kasin nibaga a saraya so abautismoan ed ngaran na (a panamidbir ed) say Ama, say Anak, tan ed masanton espiritu? On. Anggaman ag-imbaga nen Pedro ed sikara a manpabautismo ed ngaran na Ama, bibidbiren da la si Jehova a bilang Soberanon Katawan, lapud sikara so natural iran Judios, saray membro na nasyon a nitalaga ed Sikato. Peteg ya inkuan nen Pedro: ‘Manpabautismo ed ngaran na Anak.’ Kanian say bautismo ra so mangipanengneng ed panamidbir da ed si Jesus a bilang Katawan tan Kristo. Sikara la natan so babangatan to tan inawat da a say kaperdona na saray kasalanan et diad panamegley to. Kaunoran, say bautismo so panamidbir ed masanton espiritu, tan agawa itan diad ikiwas ed sipan ya awaten da so espiritu a bilang langkap.
8. (a) Niarum ed bautismo ed danum, anton arum a bautismo so naawat na alanaan iran Kristianos? (b) Siopa nilikud ed 144,000 so akaawat na bautismo ed danum diad ngaran na masanton espiritu?
8 Saraman so abautismoan ed danum diad agew na Pentecostes 33 K.P. so abautismoan met ed espiritu, diad impakalanaan a bilang arari tan saserdote ed arapen diad mangatatawen a Panarian. Unong ed libro na Apocalipsis, wala lambengat so 144,000 ed saraya. Kanian saraman so abautismoan ed masanton espiritu tan diad kaunoran et ‘atatakan’ a bilang mananawir ed Panarian so manbilang lambengat na 144,000. (Apocalipsis 7:4; 14:1) Anggaman ontan, amin a balo iran babangatan—antokaman so ilalo ra—so nabautismoan ed danum diad ngaran na Ama, say Anak, tan say masanton espiritu. (Mateo 28:19, 20) Anto, sirin, so ipakabaliksan na bautismo diad ngaran na masanton espiritu ed amin a Kristianos, balanglan “melag a pulok” odino say “arum a karnero”? (Lucas 12:32; Juan 10:16) Sakbay ya ebatan itan, imanoen tayo so pigaran kimkimey na espiritu ed panaon na Kristiano.
Say Bunga na Espiritu
9. Anton kimey na masanton espiritu so importanti ed amin a Kristianos?
9 Sakey ya importantin kimey na masanton espiritu et say panulong ed sikatayon mamayubo na Kristiano iran personalidad. Tua, lapud ag-inkayadyari agtayo napaliisan so pankasalanan. (Roma 7:21-23) Balet sano sikatayo so masimoon a tuloy a magbabawi, perdonaen itayo nen Jehova ed letnegan na bagat nen Kristo. (Mateo 12:31, 32; Roma 7:24, 25; 1 Juan 2:1, 2) Niarum ni, ilaloan itayo nen Jehova a mipuligesgesan a sumpad pankasalanan, tan say masanton espiritu so ontulong ed sikatayon manggawa ed saya. “Mantultulloy a manakar unong ed espiritu,” kuan nen Pablo, “tan agyo uunoren iray kaalakan na laman.” (Galacia 5:16) Intuloy ya impanengneng nen Pablo a say espiritu so mamawala na sankaabigan iran kalidad ed sikatayo. Insulat to: “Say bunga na espiritu so aro, gayaga, kareenan, panagtepel, kaabigan, kamaongan, pananisia, kaumildian, dangka.”—Galacia 5:22, 23.
10. Panon a say bunga na espiritu so nabayuboan ed sakey a Kristiano?
10 Panon a gawaen a posibli na espiritu so ontan a bunga ed sakey a Kristiano? Ag-otomatikon nagawa itan lapud ta sikatayo so dedikado tan abautismoan iran Kristianos. Nepeg a kimeyan tayo itan. Balet no sikatayo so mililimog ed arum iran Kristianon mangipapanengneng na sarayan kalidad, no ipikasi tayo ed Dios so espiritu to ya ontulong ed sikatayon mamayubo na espisipikon kalidad, no paliisan tayo so mauges a pililimog tan aralen so Biblia parad simbawa tan maabig iran ehemplo, sirin say bunga na espiritu so ombaleg ed sikatayo.—Uliran 13:20; 1 Corinto 15:33; Galacia 5:24-26; Hebreos 10:24, 25.
Tinuro na Masanton Espiritu
11. Diad anton dalan a saray mamatatken et tinuro na masanton espiritu?
11 Si Pablo, sanen mansasalita ed saray mamatatken ed Efeso, so angiparungtal na sananey a kimey na masanton espiritu sanen inkuanto: “Bantayan yo so inkasikayo tan amin a kasimpukokan, a mamastol ed kongregasyon na Dios, a sinaliw to ed dala na dilin Anak to.” (Gawa 20:28) On, saray manangasikaso na kongregasyon, odino mamatatken, so tinuro ed panamegley na masanton espiritu. Diad anton dalan? Diad rason a saray aturon mamatatken so nepeg a mandampot ed saray kualipikasyon a nidatak ed impuyan a Biblia. (1 Timoteo 3:1-13; Tito 1:5-9) Nabayuboan daray kualipikasyon lambengat diad tulong na masanton espiritu. Niarum ni, say ulop na mamatatken a mangirekomenda ed balon matatken so manpikasi ed panangiwanwan na masanton espiritu pian natebek no kasin adampot toray kualipikasyon odino andi. Tan say aktual ya inkaturo so agawa ed silong na panangasikaso na alanaan-ed-espiritun matoor tan makabat ya aripen.
Paiwanwan diad panamegley na Espiritu
12. Panon a say espiritu so mangimpluensya ed sikatayo diad panamegley na Biblia?
12 Bidbiren na saray Kristianos a say Masanton Kasulatan so nisulat ed panangiwanwan na masanton espiritu. Sirin, ontupleg ira ed atan parad apuyanan-ed-espiritun kakabatan, a singa ginawa na sakbay-Kristianon tastasi nen Jehova. (Uliran 2:1-9) Saratan so binasa ra, dinalepdep da, tan inabuloyan dan mangiwanwan ed saray bilay da. (Salmo 1:1-3; 2 Timoteo 3:16) Sirin sikara so tinulongan na espiritu a ‘sukimaten so aralem iran bengatla na Dios.’ (1 Corinto 2:10, 13; 3:19) Say pangiwanwan ed saray ariripen na Dios ed sayan dalan so sakey ya importantin kimey na espiritu na Dios ed panaon tayo.
13, 14. Anto so inusar nen Jesus ed pideneng ed saray problema ed kongregasyon, tan panon ton mipadparan gagawaen itan natan?
13 Niarum ni, diad libro na Apocalipsis, say apaolin Jesus so angipasabi na saray mensahe ed pitoran kongregasyon ed Asya Minor. (Apocalipsis, kapitulo 2 tan 3) Diad sikara ya imparungtal to a sinukimat toray kongregasyon tan atebek to so espiritual a kipapasen da. Arum so aromog ton angiletneg na maabig ya ehemplo na pananisia. Diad saray arum, saray mamatatken so angiyabuloy ed sektarianismo, imoralidad, tan inkamalainemem a mandutak ed pulok. Say kongregasyon na Sardis, a nilikud ed pigaran matoor a kakamarerwa, so inatey ed espiritual. (Apocalipsis 3:1, 4) Panon a binenbenan nen Jesus irayan problema? Tekep na masanton espiritu. Sanen mansimbawa ed pitoran kongregasyon, say mensahe nen Jesus so anampot ed kada kipapasen ed balikas a: “Say walaan na pakadngel denglen to so ikuan na espiritu ed saray kongregasyon.”—Apocalipsis 2:7, 11, 17, 29; 3:6, 13, 22.
14 Natan, met, susukimaten nen Jesus iray kongregasyon. Tan sano natebek toray problema, siansian sikato so mamebenben ed saratan diad panamegley na masanton espiritu. Ontulong ed sikatayo so espiritu a mamidbir tan direktan manalona ed saray problema diad panamegley na pambasa tayo ed Biblia. Onsabi met so tulong diad panamegley na palapagan na Biblia ya ipapalapag na alanaan-ed-espiritun matoor tan makabat ya aripen. Odino atan so onsabi manlapud aturo-ed-espiritun mamatatken ed kongregasyon. Antokaman so kipapasen, balanglan say simbawa et parad saray sinansakey odino ed kongregasyon a bilang interamenti, kasin tutumboken tayoray salita nen Jesus: “Siopaman a makadngel ontalineng ed ikuan na espiritu”?
Say Espiritu tan say Panagpulong a Kimey
15. Panon so ikikiwas na espiritu ed si Jesus no nipaakar ed panagpulong a kimey?
15 Diad sakey a kipapasen sanen nanpulong si Jesus ed sinagoga ed Nazaret, impanengneng to so sananey a kimey na espiritu. Ibabaga na rekord ed sikatayo: “Et binuskag to so lukot tan aromog to so pasen a nisulatan: ‘Say espiritu nen Jehova wala ed siak, ta nilanaan toak a mangiyabawag na maong a balita ed saray duruka, imbaki toak a mangipulong na kibulos na saray adakep tan say pangipawil na pakanengneng na saray bulag, pian ibulos koray nanaaposan.’ Insan ginapoan ton ikuan ed sikara: ‘Natan sayan kasulatan a nadgel yo so asumpal.’” (Lucas 4:17, 18, 21; Isaias 61:1, 2) On, si Jesus so alanaan na masanton espiritu a mangipulong na maong a balita.
16. Diad inmunan siglo, panon a say masanton espiritu so alanor a tuloy ed panagpulong na maong a balita?
16 Sakbay a tuloy na impatey to, impasakbay nen Jesus so engranden kampanya na panagpulong a gawaen na saray patumbok to. Inkuanto: “Diad amin a nasyones kaukolan a nipulong so maong a balita.” (Marcos 13:10) Sarayan salita so walaan na inmunan kasumpalan ed inmunan siglo, tan say betang na masanton espiritu so makatantanda. Say masanton espiritu so angiwanwan ed si Felipe a pulongan so Etiopen eunoko. Inwanwan na masanton espiritu si Pedro ed si Cornelio, tan masanton espiritu so angiwanwan ed si Pablo tan Bernabe a nibaki a bilang apostoles manlapud Antioka. Saginonor, sanen labay nen Pablo so manpulong ed Asya tan Bitania, say masanton espiritu ed arum a dalan so angamper ed sikara. Labay na Dios a say panagtasin kimey so onkurang ed Europa.—Gawa 8:29; 10:19; 13:2; 16:6, 7.
17. Natan, panon a nalalanor so masanton espiritu ed panagpulong a kimey?
17 Natan, say masanton espiritu so nagkalalon nalalanor ed panagpulong a kimey. Diad kaaruman a kasumpalan na Isaias 61:1, 2, nilanaan na espiritu nen Jehova iray agagi nen Jesus a manpulong. Diad kaunoran a kasumpalan na Marcos 13:10, sarayan alanaan, a tutulongan na baleg ya ulop, so literal ya angipulong na maong a balita ed “amin a nasyones.” (Apocalipsis 7:9) Tan ontulong so espiritu ed sikaran amin ed saya. A singa nen inmunan siglo, angilukas itan na saray teritorya tan angitonton ed inkalapagan ya aligwas na kimey. Amabiskeg itan ed saray indibidual, a tutulongan iran ontalona ed inkamatalaw tan mamayubo ed saray abilidad da ed panagbangat. Niarum ni, imbaga nen Jesus ed saray babangatan to: “Ta niakar kayo naani ed arap na saray manuley tan arari nisengeg ed siak, pian pamintuan ed sikara tan ed saray hentiles. Ingen sano indunget da kayo, agkayo mapaga no panon o anto so salitaen yo . . . , ta saray mansasalita so aliwan sikayo lambengat, noagta say espiritu na ama yo so mansalita ed panamegley yo.”—Mateo 10:18-20.
18, 19. Diad anton dalan a say espiritu so miulop ed nobya ed pangimbita ed saray maulimek-impampuso a “mangala na danum na bilay ya andi-bayar”?
18 Diad libron Apocalipsis, idadanet lamet na Biblia so kilalanor na masanton espiritu ed panagpulong a kimey. Ditan inreport nen apostol Juan: “Say espiritu tan nobya so mantultuloy a mankuan: ‘Gala!’ Tan siopaman a makadngel so mankuan: ‘Gala!’ Tan siopaman a napgaan so ondago; siopaman a malabay so mangala na danum na bilay ya andi-bayar.” (Apocalipsis 22:17) Say nobya, ya ilalaman na nakdaan a 144,000 a siansian walad dalin, so mangiimbita ed amin a mangala na danum na bilay ya andi-bayar. Balet imanoen, say masanton espiritu so mankuan met a “Gala!” Diad anton dalan?
19 Diad pamaakaran a say mensahen ipupulong na nobyan klase—tutulongan natan na baleg ya ulop na arum a karnero—so manlalapud Biblia, a nisulat ed leksab na direktan impluensya na masanton espiritu. Tan atan a parehon espiritu so angilukas ed kapusoan tan kanonotan na nobyan klase a mantalos ed impuyan a Salita tan ipaliwawa itan ed saray arum. Saraman so abautismoan a bilang balon babangatan nen Jesu-Kristo so magayagan mangala na danum na bilay ya andi-bayar. Tan naliketan iran mikoopera ed espiritu tan nobya ed pangikuan “Gala!” ed saray arum ni. Natan, masulok ya apatiran laksa so mibibiang ed espiritu ed sayan kimey.
Manbibilay Unong ed Bautismo Tayo
20, 21. Panon tayon manbilay unong ed bautismo tayo diad ngaran na masanton espiritu, tan panon so nepeg a panmoria tayo ed sayan bautismo?
20 Say bautismo ed ngaran na masanton espiritu so mapublikon panangiyabawag a bibidbiren tayo so masanton espiritu tan aawaten so betang a gawaen to ed saray gagala nen Jehova. Mangipanengneng a sikatayo so mikoopera ed espiritu, ya agmanggawa na antokaman a mangamper ed ikurang to ed limog na totoo nen Jehova. Sirin, bidbiren tan mikoopera itayo ed matoor tan makabat ya aripen. Mikoopera itayo ed oksuyan na matatken ed kongregasyon. (Hebreos 13:7, 17; 1 Pedro 5:1-4) Manbibilay itayo ed panamegley na espiritual, aliwan silalaman, a kakabatan tan abuloyan so espiritu a manmoldi ed personalidad tayo, a gawaen itan a lalon singa-Kristo. (Roma 13:14) Tan miulop itayon sigpot-puso ed espiritu tan say nobya ed pangibagan “Gala!” ed nilaksalaksa nin nayarin onkiwas.
21 Agaylan seryoson bengatla so kabautismoan ‘ed ngaran na masanton espiritu’! Ingen, agaylaran bendisyon so pansumpalan! Komon ta say bilang na saraman so nanpabautismo so mantultuloy ya ondaak. Tan amin tayo komon so mantultuloy a manbilay unong ed kabaliksan na atan a bautismo, legan a paaripen tayo ed si Jehova tan mantultuloy a magmaliw a “marlang ed espiritu.”—Roma 12:11.
Anto so Natandaan Yo Nipaakar ed Masanton Espiritu?
◻ Diad anto iran dalan a say masanton espiritu so aktibo nen Pentecostes 33 K.P.?
◻ Panon tayon mamawala na saray bunga na espiritu?
◻ Diad anton dalan a saray mamatatken so aturo diad panamegley na masanton espiritu?
◻ Panon so impamenben nen Jesus ed saray problema na kongregasyon diad panamegley na masanton espiritu?
◻ Panon a nalalanor a tuloy so espiritu ed panagpulong a kimey?