Manakar Unong ed Espiritu tan Manbilay Unong ed Dedikasyon Yo
“Mantultuloy kayon manakar unong ed espiritu pian agyon balot gawaen so pilalek na laman.”—GAL. 5:16.
1. Antoray agawan bautismo nen agew na Pentecostes?
NEN Pentecostes 33 C.E., saray patumbok nen Jesus et akapansalita na nanduruman lenguahe kayari ran abautismoan ed masanton espiritu. Impatnag day mamilagron langkap na espiritu. (1 Cor. 12:4-10) Anto so epekto na sayan langkap tan samay paliwawa nen apostol Pedro? “Agonigon so puso” na dakel a totoo. Diad panamaseseg nen Pedro, nagbabawi tan abautismoan ira. Oniay ibabaga na awaran: “Abautismoan iramay impapuson angawat ed salita to, tan diad saman ya agew et niarum so ngalngalin talonlibo a kamarerwa.” (Gawa 2:22, 36-41) Unong ya ingganggan nen Jesus, mapatnag ya abautismoan ira ed danum diad ngaran na Ama, tan ed Anak, tan ed masanton espiritu.—Mat. 28:19.
2, 3. (a) Ipaliwawa so pandumaan na bautismo ed masanton espiritu tan say bautismo ed ngaran na masanton espiritu. (b) Akin a saray magmaliw a tuan Kristiano et kaukolan a manpabautismo ed danum?
2 Balet, wala ta so pandumaan na bautismo ed masanton espiritu tan say bautismo ed ngaran na masanton espiritu? On. Saramay abautismoan ed masanton espiritu et nianak lamet bilang espiritun ananak na Dios. (Juan 3:3) Sikaray nilanaan pian magmaliw a kaiban arari tan saserdote ed mangatatawen a Panarian na Dios, tan kabiangan ira ed espiritual a laman nen Kristo. (1 Cor. 12:13; Gal. 3:27; Apo. 20:6) Kanian, sayan bautismo ed masanton espiritu imay ginawa nen Jehova sanen pinili to ray totoon magmaliw a tomatawir a kaiba nen Kristo manlapud samay agew na Pentecostes. (Roma 8:15-17) Balet, anto met kasi kabaliksan na bautismo ed danum diad ngaran na masanton espiritu a nagagawa diad saray asemblea tan kombension na saray totoo nen Jehova?
3 Saray tuan Kristiano et manpapabautismo ed danum bilang simbolo na interon-puson dedikasyon da ed si Jehova a Dios. Ontan so ginawa na saray akaawat na mangatatawen ya ilalo. Balet, kaukolan met itan a gawaen na minilyon a lalaki tan bibii natan a walaay ilalon manbilay na andi-anggaan diad dalin. Antokaman so ilalo na sakey a too, say bautismo ed danum diad ngaran na Ama tan ed ngaran na Anak tan ed ngaran na masanton espiritu et kaukolan a gawaen na sakey pian naawat toy panangabobon na Dios. Kanian, amin a Kristiano ya abautismoan ed onian paraan et iilaloan a “manakar unong ed espiritu.” (Basaen so Galacia 5:16.) Kasin manaakar ka unong ed espiritu tan manbibilay ka unong ed dedikasyon mo?
No Antoy Kabaliksan na ‘Panakar Unong ed Espiritu’
4. Anto so kabaliksan na ‘panakar unong ed espiritu’?
4 Say kabaliksan na ‘panakar unong ed espiritu’ et say pangawat ed masanton espiritu, ya abuloyan mo itan a mangimpluensya ed sika. Nayari met ya ibaga a say kabaliksan na satan et paigiya ka ed masanton espiritu diad inagew-agew a kabibilay mo. Diad Galacia kapitulo 5, napatnagan so pandumaan na naimpluensyaan na masanton espiritu tan say naimpluensyaan na laman.—Basaen so Galacia 5:17, 18.
5. No aabuloyan moy masanton espiritu a mangimpluensya ed sika, antoran gawa so nepeg mon paliisan?
5 No aabuloyan moy masanton espiritu a mangimpluensya ed sika, panggunaetan mon paliisan iray gawa na laman. Sarayan gawa na laman et say “pilalawanan, karutakan, anggapoy-baing a kagagawa, idolatriya, espiritismo, pambubusolan, pansisiblangan, imon, sanok, pankokolkol, inkaapag-apag, saray sekta, ib-ibeg, panagbuanges, maingal a panliliket.” (Gal. 5:19-21) Kaukolan sirin a ‘pateyen mo iratan a gawa na laman diad panamegley na espiritu.’ (Roma 8:5, 13) Ontulong itan pian niwanwan ka na espiritu tan niyapasakey moy nonot mo ed saray bengatlan nipaakar ed espiritu, imbes a pakontrol ka ed saray pilalek na laman.
6. Iyilustra pa no anto so nakaukolan a gawaen pian nipatnag so bunga na espiritu.
6 Legan kan papaigiya ed masanton espiritu, nipapatnag mo iray maridios a kualidad, salanti, “say bunga na espiritu.” (Gal. 5:22, 23) Balet, kaukolan moy mansagpot. Bilang ilustrasyon: Say sakey a dumaralos et kaukolan ton bayuboan so dalin to. Siempre, nakaukolan met so sinag na agew tan danum, ta no anggapo iratan et anggapoy anien to. Nayarin ikompara so masanton espiritu ed sinag na agew. Nakaukolan so masanton espiritu pian nipatnag tayo so bunga na espiritu. Ingen, wala tay anien na dumaralos no agto mansagpot? (Uli. 10:4) On, baleg so nagawaan na pamayubo ed piguratibon dalin na pusom pian maabig tan daakan so epekto ed sika na masanton espiritu. Kanian tepetan moy inkasika, ‘Kasin papaiwanwan ak ed masanton espiritu pian nipatnag ko so bunga na satan?’
7. Akin et importante so panaral tan pandalepdep pian nabayuboan moy bunga na masanton espiritu?
7 Pian maabig so anien na saray dumaralos, kaukolan da met a salogen iray tanem da. Sirin, kaukolan mo met iray danum na katuaan a naaralan ed Biblia tan diad Kristianon kongregasyon pian nabayuboan moy bunga na espiritu. (Isa. 55:1) Nayarin nitongtong mo la’d dakel a totoo a say Masanton Kasulatan et apawala diad panamegley na masanton espiritu. (2 Tim. 3:16) Ontan met, ontutulong so matoor tan makabat ya aripen pian natalosan tayon maong so malinis a danum na katuaan manlapud Biblia. (Mat. 24:45-47) Malinew so punto. Pian naimpluensyaan itayo na masanton espiritu, nepeg tayon basaen tan dalepdepen so Salita na Dios. No gagawaen mo la itan, aaligen mo iray maabig ya alimbawa na saray propeta a “maseet a nanusisa tan maalwar a nananap” ed saray nitaryan impormasyon. Tan anggan saray anghel et interesadon maong ed saray espiritual a katuaan nipaakar ed insipan a Bini tan say nilanaan a Kristianon kongregasyon.—Basaen so 1 Pedro 1:10-12.
Panon Kan Naimpluensyaan na Espiritu?
8. Akin et importante so ikerew na masanton espiritu ed si Jehova?
8 Aliwa labat a say panaral tan pandalepdep ed Kasulatan so nakaukolan. Importante met so onkerew na tulong tan panangigiya nen Jehova. Nagawaan toy “amin a bengatla a mas nagkalalo ni nen say nayarian tayon kerewen odino isipen.” (Efe. 3:20; Luc. 11:13) Balet, antoy ebat mo no walay nantepet na, “No amta la na Dios iray ‘nakaukolan ko sakbay ak nin onkerew,’ akin et nepeg ak nin mantultuloy ya onkerew ed sikato?” (Mat. 6:8) Diad ikekerew moy masanton espiritu, ipapanengneng moy panagmatalek mo ed si Jehova. Singa bilang, no walay kinmerew na tulong ed sika, gawaen moy anggaay nayarian mo pian sikatoy natulongan lapud antam a walay talek to’d sika sanen inasinggeran to ka. (Ikompara so Uliran 3:27.) Mipadpara, naliliketan si Jehova sano onkekerew kay espiritu to, tan iter to itan ed sika.—Uli. 15:8.
9. Panon a makatulong so iyatendim ed saray Kristianon pantitipon pian naimpluensyaan kay espiritu na Dios?
9 Seguradon naapresyam met so sakey nin paraan pian naimpluensyaan itayo na espiritu na Dios. Satan et diad panamegley na saray aral, asemblea, tan kombension. Importantin maong so iyatendi tan italineng ed saray programa. No gawaen mo itan, natalosan mo iray “aralem a kanonotan na Dios.” (1 Cor. 2:10) Nagunggonaan ka met diad regular a pankomento. Nonot mo pa so impiaral mo diad apalabas ya apatiran simba. Aminpigam ya intagey so limam pian onebat tan ibalikas so pananisiam? Wala ni kasi nakaukolan mon paaligwasen ed saya? No wala, nonot mon maong no antoy gawaen mo ed ontumbok iran simba. Nanengneng nen Jehova so panlabay mon mankomento tan ikdan to kay masanton espiritu to pian lalo kan nagunggonaan ed saray aral.
10. Diad panakar unong ed espiritu, anto met so nakaukolan tayon iyimbita ed arum?
10 Say panakar unong ed espiritu et laktipen to met so pangawat ed imbitasyon a nabasa ed Apocalipsis 22:17: “Ibabaga na espiritu tan say nobya: ‘Gala!’ Tan siopaman ya onderengel et ikuan to komon: ‘Gala!’ Tan siopaman a napgaan et ondago komon; siopaman a malabay et mangala komon na libren danum na bilay.” Diad panamegley na nilanaan a nobyan klase, iyiimbita na espiritu so nipaakar ed danum na bilay. No inawat mo lay imbitasyon a “gala!,” kasin determinado ka met a mangibagay, “Gala!”? Baleg a pribilehyo so pibiang ed sayan manangisalbay-bilay a kimey!
11, 12. Anto so betang na masanton espiritu ed panagpulong?
11 Sayan importantin kimey et nasusumpal natan diad panangigiya na masanton espiritu. Nabasa tayo no antoy betang na masanton espiritu nen inmunan siglo sanen alukasan iray balon teritorya parad saray misionero. Si apostol Pablo tan saray kakaiba to et “ag-ira inabuloyan na masanton espiritu ya ipulong so salita diad distrito na Asia,” tan agmet ira inabuloyan diad Bitinia. Agtayo amta no panon iran sinebelan na espiritu ya onla’d saratan a pasen, ingen mapatnag a si Pablo et inggiya na espiritu diad maawang a teritorya na Europa ta walay pasingawey ya anengneng to nipaakar ed lakin taga Macedonia ya onkekerew na tulong.—Gawa 16:6-10.
12 Natan, igigiya met na espiritu nen Jehova so sankamundoan a panagpulong. Agla manguusar si Jehova na mamilagron pasingawey pian iwanwan itayo noagta igigiya to iray alanaan diad panamegley na masanton espiritu. Tan say espiritu so mamapakiwas ed saray agagi pian gawaen day anggaay nayarian dan manpulong tan manbangat. Seguradon mibibiang ka ed sayan importantin kimey. Labay mo kasin naaruman ni liket mo ed sayan kimey?
13. Panon kan manpasakop ed panangidirehi na masanton espiritu? Ipaliwawa.
13 Manpapasakop ka ed panangidirehi na masanton espiritu no iyaaplikam iray impormasyon ya iiter ed saray totoo na Dios. Isipen pay alimbawa nen Mihoko, sakey a kalangweran ed Japan. Bilang balon payunir, say pakalikna to et agto sarag a pawilen iray unabung ta agto amta no antoy ibaga to pian nasagyat so interes da. Diad saman et walaray praktikal a suhestion ed Ministeryo Tayo ed Panarian no panon a gawaen so simplin panagpawil. Tan walay nipalapag a brosyur ya A Satisfying Life—How to Attain It. Apaneknekan iyan mausa-usar ed saray Hapon. Inyaplika nen Mihoko iray suhestion no panon ya usaren so brosyur, nagkalalo la ed panagpawil. Ag-abayag et sikatoy akapangigapo na panangiyaral na Biblia ed saramay datin agda labay so paiyaralan. Imbaga to: “Dakdakel so iyaaralan ko! No maminsan et anggad 12, kanian kaukolan nin manalagar so arum.” Sirin, no manakar ka unong ed espiritu ya iyaaplikam so panangidirehi nen Jehova ed saray lingkor to, magmaliw a mabunga so ministeryom.
Manmatalek ed Espiritu na Dios
14, 15. (a) Panon a nayarin manbilay iray ag-ayadyarin totoo unong ed dedikasyon da? (b) Panon kan makaromog na sankaabigan iran kakaaro?
14 Bilang ordinadon ministro, walay ministeryo a kaukolan mon sumpalen. (Roma 10:14) Nayarin iisipen mo ya agka kualipikadon manumpal ed satan a responsabilidad. Balet, say Dios so angikualipika ed sika, a singa ginawa to la ed saray alanaan. (Basaen so 2 Corinto 3:5.) Makapambilay ka unong ed dedikasyon mo no gawaen moy anggaay nayarian mo tan manmatalek ka ed espirituy Dios.
15 Tua, mairap parad sikatayoran ag-ayadyarin totoo so manbilay unong ed dedikasyon tayo ed ayadyarin Dios a si Jehova. Say sakey a pakasubokan mo et no pankelawan na saray datin kaulop mo so balon paraan na kabibilay mo tan ‘pagpaugesen da ka.’ (1 Ped. 4:4) Ingen, agmo lilingwanan a wala la ray balon kakaarom, tan say sankaimportantian et say pikakaarom ed si Jehova tan si Jesu-Kristo. (Basaen so Santiago 2:21-23.) Kaukolan met a kabaten mo iray agagi ed kongregasyon yo, a kabiangan na ulop na “amin ya agagi” ed sankamundoan. (1 Ped. 2:17; Uli. 17:17) Diad panamegley na espiritu to, tulongan ka nen Jehova pian nawalaan kay maabig a kakaaro.
16. Singa si Pablo, akin et nayarin ‘panliketan mo ray kakapuyan’?
16 Anggan wala ni ray maabig a kakaarom ed kongregasyon, nayarin nairapan ka nin siansia a nadaeg iray inagew-agew a problema. No maminsan, nayarin naliknam ya agmo la amtay gawaen mo lapud singa agla mangangga iray problema. Diad saya et kakkaukolan moy onkerew na tulong ed si Jehova parad masanton espiritu to. “No kapigan a makapuy ak, ombibiskeg ak,” so inkuan nen apostol Pablo. (Basaen so 2 Corinto 4:7-10; 12:10.) Amta nen Pablo a say espiritu na Dios so ontulong ed totoo diad saray kakapuyan da, antokaman itan. Kanian, say aktibon puersa na Dios so mamabiskeg ed sika, kapiganman a makapuy ka tan mankaukolan na tulong. Insulat nen Pablo a ‘panliliketan to ray kakapuyan’ ta sanen sikatoy makapuy, mas alikna toy panamabiskeg na masanton espiritu. Ontan met so nayarin naliknam!—Roma 15:13.
17. Panon kan natulongan na masanton espiritu pian nipaarap ka ed dugan direksion?
17 Nakaukolan so espiritu na Dios pian natoor tayoy dedikasyon tayo. Say gagala tayo et say panlingkor ed si Jehova diad andi-anggaan. Ipasen mo pa a sakey kan kapitan na barkon de-layag. Say barkom so akadepende ed dagem ta pian maligen kan makasabi ed laen mo. Say dagem et aliling toy masanton espiritu. Agmo labay so ipalirpalir na espiritu na mundo nen Satanas. (1 Cor. 2:12) Kanian say kaukolan mon gawaen et amtaen so dugan dagem, salanti, say masanton espiritu tan paiwanwan ka ed satan. Diad panamegley na Salitay Dios tan say organisasyon to ya iwawanwan na espiritu to, ipaarap ka na masanton espiritu ed dugan direksion.
18. Anto so determinasyon mo natan, tan akin?
18 No papaiyaralan ka la ed saray Tasi nen Jehova tan miaaral ka la, balet plaplanoen mo ni labat so mangidedikay bilay mo tan manpabautismo, tepetan moy inkasika, ‘Akin et manduaruwa ak ni?” No bibidbiren moy betang na masanton espiritu ed pakakasumpal na linawa nen Jehova natan tan aapresyaen moy ikikiwas na satan, gawam sirin iray manepeg a kundang. Bendisyonan ka nen Jehova. Mabulos ton iter ed sikay masanton espiritu to. No pigapigay taon ka lan bautismado, seguradon aliknam lay impluensya na masanton espiritu. Apaneknekan mo la so panamabiskeg na Dios diad panamegley na espiritu to. Mantultuloy itan, on, angga ed andi-anggaan. Magmaliw ka sirin a determinadon manakar unong ed masanton espiritu.
Kasin Nanonotan Mo?
• Anto so kabaliksan na ‘panakar unong ed espiritu’?
• Anto so makatulong pian ‘mantultuloy kan manakar unong ed espiritu’?
• Panon kan makapambilay unong ed dedikasyon mo?
[Litrato ed pahina 15]
Nakaukolan so pansagpot pian nabayuboan moy piguratibon dalin na pusom
[Saray litrato ed pahina 16, 17]
Papaimpluensyaan ka kasi ed espirituy Dios?