Say Regalo nen Jehova a Masanton Espiritu

“Nagkalalo a say Ama ed tawen so mangiter na masanton espiritu ed saray onkerew ed sikato!”​—LUCAS 11:13.

1, 2. (a) Anton sipan so ginawa nen Jesus nipaakar ed masanton espiritu, tan akin a saya so peteg a makaligliwa? (b) Anto so masanton espiritu?

DIAD otonyo na taon 32 K.P. legan a manpupulong si Jesus na maong a balita ed Judea, sikato so nansalita ed saray babangatan to nipaakar ed inkamabunlok nen Jehova. Sikato so angusar na mabiskeg iran ilustrasyon tan insan nanggawa na makapakelaw a sipan, ya angikuan: “No sikayo, anta mauges kayo, amta yo so mangiter na saray maong a panangaro ed saray anak yo, nagkalalo a say Ama ed tawen so mangiter na masanton espiritu ed saray onkerew ed sikato!”​—Lucas 11:13.

² Agaylan makaligliwa iratan a salita! Legan a sungdoan tayo so gutgutan na kaunoran ya agew na sayan mundo, gulaen si Satanas tan saray demonyos to, tan mibakal ed dilin kaleteyan tayo, peteg a makapaseseg a naamtaan a say Dios so mamabiskeg ed sikatayo diad panamegley na espiritu to. Peteg, ya imposibli so matoor a panagsungdo no anggapo itan a tulong. Kasin naeksperiensia yo so pakayari na sayan espiritu, say dilin aktibon puersa na Dios? Kasin natalosan yo no panon kabaleg so nitulong to ed sikayo? Kasin uusaren yon nagnap itan?

Say Pakayari na Masanton Espiritu

3, 4. Iyilustra so pakayari na masanton espiritu.

³ Kunsideraen ya ununa so pakayari na masanton espiritu. Isipen so abenegan a taon 1954. Sanen binmetag so bomba hydrogen ed Bikini Atoll diad Abalaten a Pasipiko. Kayarin tampol na insabog na bomba, say marakep a pulo so inakmon na baleg a bolan-apuy tan pinaspas na eksplosyon a misimbangan ed puersa na iterak na 15 laksan toneladan TNT. Iner so nanlapuan na amin na atan a makaderal a pakayari? Atan so nansumpalan na impansalat na samet a kabiangan labat na uranyum (uranium) tan hydrogen ed enerhya ya anibukel ed utel na bomba. Anggaman kuan, anto no saray sientista so makapanggawa na kasuniyan na walan agawaan da ed Bikini? No bilang ta naala ran amin iman so maapuy ya enerhya tan pagmaliwen itan a daiset a libra na uranyum tan hydrogen. Agaylan aligwas itan! Ingen, nanggawa si Jehova na bengatlan mipadpara ed atan balet diad babaleg ya eskala sanen “diad gapo pinalsa [to] so katawenan tan say dalin.”​—Genesis 1:1.

⁴ Si Jehova so walaan na baleg a simpen na dinamikon enerhya. (Isaias 40:26) Diad panamalsa, nayarin sikato so angusar na daiset ed sayan enerhya sanen pinorma to so amin a pamaakaran a manugyop ed talba. Anto so inusar to ed sayan panamalsan kimey? Say masanton espiritu. Nabasa tayo: “Diad salita nen Jehova agawa so katawenan, tan amin ya ejercito ra lapu ed espiritu na sangi to.” (Salmo 33:6) Tan salitaen na salaysay na inkapalsa ed Genesis: “Say aktibon puersa [masanton espiritu] na Dios so ginmalaw ed tapew na danudanum.” (Genesis 1:2) Agaylan mabiskeg a puersa so masanton espiritu!

Mamilagron Kimkimey

5. Diad anton mapagalang iran dalan ya onkukurang so masanton espiritu?

⁵ Siansian onkukurang so masanton espiritu ed mapagalang iran dalan. Iwawanwan tan idederihe to so mangatatawen a muyongan nen Jehova. (Ezequiel 1:20, 21) Singa say enerhyan impaway na bomba hydrogen, nausar itan a maneral diad pangukom ed kakabusol nen Jehova, balet kinmurang met itan ed arum iran dalan a mamakelaw ed sikatayo.​—Isaias 11:15; 30:27, 28; 40:7, 8; 2 Tesalonica 2:8.

6. Panon a tinmulong so masanton espiritu ed si Moises tan ed ananak na Israel ed saray pidedeneng da ed Ehipto?

⁶ Alimbawa, sanen 1513 K.K.P., imbaki nen Jehova si Moises ya onarap ed Paraon na Ehipto pian onkerew na kawayangan parad ananak na Israel. Diad apalabas ya 40 taotaon, si Moises so pumapastol ed Midian, kanian akin ya ontalineng si Paraon ed sakey a pumapastol? Lapud si Moises so linma ed ngaran na bokbokor a tuan Dios, si Jehova. Pian saya so napaneknekan, sikato so initdan nen Jehova na pakayarin manggawa na milagro. Ontanlan makapakelaw iraya ya anggan saray saserdoten Ehipsios so apaskar a mamidbir: “Gamet na Dios!”a (Exodo 8:19) Intarok nen Jehova so samploran bakbak ed Ehipto, a samay kaunoran so amilit ed si Paraon ya abuloyan ya ontaynan iray totoo na Dios ed Ehipto. Sanen inlulot nen Paraon a pati armada to so inyusil ed sikara, akaliktar iray Israelita sanen mamilagron alukasan so dalan diad Ambalangan Dayat. Tinmunbok so armada na Ehipto ed sikara tan nalner ed dayat.z​—Isaias 63:11-14; Aggeo 2:4, 5.

7. (a) Anto so arum iran rason no akin a say masanton espiritu so nanggawa na saray milagro? (b) Anggaman saray milagro na masanton espiritu et agla nagagawa, akin a say kurit na saratan ed Biblia so makaligliwa?

⁷ On, si Jehova diad panamegley na espiritu to so nanggawa ed makapanyari iran milagro ed biang na saray Israelitas ed panaon nen Moises, tan ed arum met niran panaon. Anto so getma na saraman a milagro? Pinalaknab daray gagala nen Jehova, impakabat da so ngaran to, tan indemostra ra so pakayari to. Tan no maminsan, a singa ed si Moises, paneknekan dan napanisiaan a say indibidual et walaan na tulong nen Jehova. (Exodo 4:1-9; 9:14-16) Anggaman ontan, saray milagron intarok na masanton espiritu so mataltalag ed interon awaran.b Mipadpara, maslak iran sinansakey a nambilay ed panaon na Biblia so agbalot akatasi, tan natan aglara nagagawa. Anggaman kuan, legan a sikatayo so mipupuligesgesan ed saray probleman singa agnatalonaan, agta sakey a ligliwa so pakaamta a no sikatayo so onkerew ed si Jehova tekep na pananisia et sikato so mangiter ed sikatayo na parehon espiritun tinmulong ed si Moises ed arap nen Paraon tan angilukas na dalan parad Israelitas diad Ambalangan Dayat?​—Mateo 17:20.

Impuyan a Sulsulat

8. Anto so betang na masanton espiritu ed impangiter na Samploran Ganggan?

⁸ Kayari inkiliktar da manlapud Ehipto, intonton nen Moises iray Israelitas ed Palandey Sinai, ditan akisipanan si Jehova ed sikara tan initdan tora na Ganggan to. Sakey a manunan kabiangan na Ganggan a niiter ed panamegley nen Moises et say Samploran Ganggan, tan say orihinal iran kopya na saraya so niukit ed tapyas na bato. Panon? Diad panamegley na masanton espiritu. Ikuan na Biblia: “Natan kayarin tuloy na impisalita [nen Jehova] ed sikato ed Palandey Sinai ya inter to ed si Moises so duaran tapyas a Panamintuaan, tapyas na bato ya insulat na tamoro na Dios.”​—Exodo 31:18; 34:1.

9, 10. Panon a say masanton espiritu so aktibo ed impansulat na Hebreon Kasulatan, tan panon a saya so mapatnag ed saray balikas ya inusar na saray babangatan nen Jesus?

⁹ Niarum ed Samploran Ganggan, inter nen Jehova diad panamegley na espiritu to ed Israel iray nilasus a ganggan tan totontonen a mangiwanwan ed kabibilay na matoor a lalaki tan bibii. Tan dakel nin impuyan a sulsulat so onsabi. Pigaran siglos kayari panaon nen Moises, tinasian na saray Levita diad publikon pikakasi ed si Jehova: “Intepel mora [Israelitas] ed dakerakel a taon tan nantultuloy a nantasi ka sumpa ed sikara diad espiritum ed panamegley na saray propetam.” (Nehemias 9:5, 30) Dakel ya apuyanan iran propesiyan imbalikas na saraman a propeta so nirekord. Niarum ni, say masanton espiritu so amakiwas ed matoor a lalakin mansulat ed sagradon awaran tan impapuson kankanta na panagdayew.

¹⁰ Sinalita nen Pablo so amin na sarayan sulsulat sanen inkuanto: “Amin a Kasulatan so impuyan na Dios.” (2 Timoteo 3:16; 2 Samuel 23:2; 2 Pedro 1:20, 21) Peteg, sanen aaonen irayan kasulatan, mabetbet ya usaren na saray inmunan-siglon babangatan nen Jesus iray balikas a singa say “masanton espiritu so nansalita . . . ed sangi nen David,” “say masanton espiritu so nansalita ed panamegley nen Isaias,” odino basta “ikuan na masanton espiritu.” (Gawa 1:16; 4:25; 28:25, 26; Hebreos 3:7) Agaylan bendisyon a say parehon masanton espiritu ya angimpluensya ed impansulat na Masanton Kasulatan so angipreserba ed sikara ta pian mangiwanwan tan manligliwa ed sikatayo natan!​—1 Pedro 1:25.

Panmatalek ed Masanton Espiritu

11. Anton kimey na espiritu so anengneng no nipaakar ed impangipaalagey na tabernakulo?

¹¹ Legan na impankampamento na saray Israelitas ed alusadsar na Palandey Sinai, sikara so inganggan nen Jehova a mangipaalagey na tabernakulo a bilang sentro parad tuan panagdayew. Panon dan gawaen iya? “Inkuan nen Moises ed saray anak na Israel: ‘Nengneng yo, si Jehova tinawag to ed ngaran si Besaleel ya ilalak nen Uri, say anak a laki nen Jur ed poli na Juda. Tan pinano to na espiritu na Dios diad kakabatan, diad pakatalos tan diad pikakabat tan ed amin a nengneng na panagkimey.’” (Exodo 35:30, 31) Say masanton espiritu so angarum ed walan sipor ya abilidar nen Besaleel, tan sitatalonan naasikaso to so pamaalagey na makatantandan paalagey.

12. Panon a pinabiskeg na espiritu iray sinansakey ed nikadkaduma iran dalan kayari na panaon nen Moises?

¹² Diad saginonor a panaon, kinmiwas so espiritu nen Jehova ed si Samson, ya angiter ed sikato na labas-nen-toon biskeg a nanggawa ed sikaton mangiliktar ed Israel manlapud saray Filisteos. (Uko-ukom 14:5-7, 9; 15:14-16; 16:28-30) Siansia ed saginonor, naitdan si Solomon na nikadkaduman kakabatan a bilang ari na apilin baley na Dios. (2 Awaran 1:12, 13) Diad silong to, inmaligwas a tuloy so Israel, tan say maliket a kipapasen to so nagmaliw a padron parad saray bendisyon a panggayagaan na totoo na Dios ed leksab na Milenyon Uley nen Kristo Jesus, say Babaleg a Solomon.​—1 Arari 4:20, 25, 29-34; Isaias 2:3, 4; 11:1, 2; Mateo 12:42.

13. Panon a say rekord ed impamabiskeg na espiritu ed si Besaleel, Samson, tan Solomon so mamaseseg ed sikatayo natan?

¹³ Agaylan bendisyon a pawawalaen nen Jehova ed sikatayo so parehon espiritu! Sano nalikna tayon onkulang a manumpal ed sakey ya asainmin odino mibiang ed panagpulong a kimey, nayarin onkerew itayo ed si Jehova ya itdan to itayo na parehon espiritun inter to ed si Besaleel. Sano sikatayo so manirap ed sakit odino mansungdo ed panamasegsegang, say parehon espiritun angiter ed si Samson na makapakelaw a biskeg so mamabiskeg ed sikatayo​—anggaman, siempre et aliwan mamilagro. Tan sano nidunget tayo ed mairap iran problema odino manggawa na importanti iran desisyon, makakerew itayo ed si Jehova, ya angiter ed si Solomon na makapakelaw a kakabatan, ya ontulong ed sikatayon onkiwas a sikakabat. Insan, singa si Pablo, nibaga tayo: “Diad amin a bengatla walaan ak na biskeg diad birtud na saman so mamabiskeg ed siak.” (Filipos 4:13) Tan say sipan nen Santiago so niyaplika ed sikatayo: “No siopaman ed sikayo so makulang na kakabatan, pakerewen ed Dios, ta mangiter a sibubunlok ed amin a too tan agto balawen; tan niiter ed sikato.”​—Santiago 1:5.

14. Siopa, ed kadaanan a panaon tan ed natan, so walan atulongan na masanton espiritu?

¹⁴ Wala met ed si Moises so espiritu nen Jehova ed kimey ton mangukom ed nasyon. Sanen saray arum so aturon ontulong ed si Moises, inkuan nen Jehova: “Mangalaak naani na espiritu a wala ed sika tan iyan ko naani ed sikara et miatangan ira naani ed sika ed awit na katooan pian agmo bokbokor so manawit.” (Numeros 11:17) Sirin, saraman a lalaki so ag-onakto ed dilin biskeg da. Tinmulong so masanton espiritu ed sikara. Nabasa tayo a diad saginonor ya agawgawa, say espiritu nen Jehova so wala ed arum iran indibidual. (Uko-ukom 3:10, 11; 11:29) Sanen nilanaan nen Samuel si David a bilang arapen ya ari na Israel, ikuan na kurit: “Inala nen Samuel so saklor na larak tan sikato so nilanaan to dia ed pegley na saray agagi. Et say espiritu nen Jehova linma a sankamakapanyarian ed David nanlapu ed saman ya agew tan kayari to.” (1 Samuel 16:13) Saraman natan so walaan na ambelat iran responsabilidad​—ed pamilya, kongregasyon, odino organisasyonal​—so naligliwa ed pakaamta a say espiritu na Dios so siansian ontulong ed saray ariripen to legan ya aasikasoen daray obligasyon.

15. Diad anton dalan a say masanton espiritu so amabiskeg ed organisasyon nen Jehova? (a) diad saray agew nen Aggeo tan Zacarias? tan (b) natan?

¹⁵ Libulibon taon kayari panaon nen Moises, pinmawil ed Jerusalem iray matoor ed limog na ananak na Israel a nanlapud Babilonia tekep na kimey a mangipaalagey na templo. (Esdras 1:1-4; Jeremias 25:12; 29:14) Anggaman ontan, linmesa iray mairap a babeng, tan sikaray adismaya ed dakel a taotaon. Kaunoran, pinatalindeg nen Jehova so saray propeta a si Aggeo tan Zacarias a mamaseseg ed saray Judios ya agmanmatalek ed dili ran biskeg. Balet panon a nasumpal so kimey? “‘Agnisengeg ed kabayanian, nisay diad pakayari, noag ingen diad espirituk,’ kuan nen Jehova na saray ejercito.” (Zacarias 4:6) Tan tekep na tulong na espiritu na Dios, nipaalagey so templo. Mipadparan tuloy ya akagawa na baleg iray totoo na Dios natan. Say panagpulong na maong a balita so linmaknab ed sankadalinan. Nilaksalaksan sinansakey so nababangatan na katuaan tan inkatunong. Naorganisa iray kumbension. Nipaalagey iray Kingdom Hall tan sangan opisina. Dakel ed saya so nagagawa ed arap na isusumpa. Balet ag-adismaya iray Tasi nen Jehova, lapud kabat dan amin a bengatlan asumpal da so, aliwan diad kabayanian, nisay atooan a pakayari, noag ingen diad espiritu na Dios.

Say Espiritu na Dios ed Inmunan Siglo

16. Anto so eksperiensia na sakbay-Kristianon ariripen nen Jehova ed kimey na espiritu na Dios?

¹⁶ Unong ya anengneng tayo, saray sakbay-Kristianon ariripen na Dios so sikakabat ed pakayari na espiritu na Dios. Nanmatalek ira ed atan ya ontulong ed sikaran manumpal ed ambelat iran obligasyon tan manggawa ed linawa na Dios. Kabat da met a say Ganggan tan arum a sagradon sulsulat so impuyan, a nisulat ed leksab na impluensya na espiritu nen Jehova, tan sirin sikara so ‘Salita na Dios.’ (Salmo 119:105) Anggaman ontan, komusta met ed Kristianon panaon?

17, 18. Anto iray arum a mamilagron panangipatnag na espiritu ed Kristianon panaon, tan anton gagala so kanaan da?

¹⁷ Say inmunan siglo ed Komon a Panaon tayo so akanengneng met ed makapakelaw a kimkimey na espiritu na Dios. Wala so impuyan-na-espiritun panagpropesiya. (1 Corinto 14:1, 3) Diad kasumpalan na sipan nen Jesus a say masanton espiritu so mangipanonot ed saray babangatan to ed amin a bengabengatlan imbaga to tan ibangat tora na kaaruman iran nengneng na katuaan, dakel a liblibro so nisulat ed leksab na impluensya na masanton espiritu. (Juan 14:26; 15:26, 27; 16:12, 13) Tan walaray milagro, a nagnap a nasingbat ed ontumbok ya artikulo tayo. Peteg, a say inmunan siglo so niparungtal diad panamegley na makatantandan milagro. Diad taon 2 K.K.P., sakey ya espesyal ya ugaw so niyanak, tan bilang tanda, say malangwer ya ina to so sakey a marikit. Panon ya ontan? Diad panamegley na masanton espiritu. Ikuan na kurit: “Say inkiyanak nen Jesu-Kristo so onia. Sanen akidesposada si Maria ya ina to ed kinen Jose sanen agni naasingeran, aromog a malukon lapud masanton espiritu.”​—Mateo 1:18; Lucas 1:35, 36.

¹⁸ Sanen binmaleg si Jesus, sikato so amapaway na saray demonyos, nantambal ed mansasakit, pinaoli to ni ingen so inatey diad pakayari na masanton espiritu. Arum ed saray patumbok to so nanggawa met na saray milagro tan makapanyarin gawagawa. Sarayan nikadkaduman abilidad so langkap na espiritu. Anto so gagala ra? Unong a singa walan ginawa na asasakbay iran milagro, inlaknab daray gagala na Dios tan imparungtal da so pakayari to. Niarum ni, indemostra ra so inkapeteg na ibabaga nen Jesus a sikato so nibaki nisengeg ed Dios; tan saginonor, paneknekan da a say inmunan-siglon Kristianon kongregasyon so apilin nasyon na Dios.​—Mateo 11:2-6; Juan 16:8; Gawa 2:22; 1 Corinto 12:4-11; Hebreos 2:4; 1 Pedro 2:9.

19. Panon a say pananisia tayo so napabiskeg ed salaysay na Biblia ed saray milagro nen Jesus tan saray apostoles to?

¹⁹ Anggaman ontan, inkuan nen apostol Pablo a saratan a mamilagron panangipatnag na espiritu so nagawa ed igapo na kongregasyon tan onlabas, kanian agtayo nanengneng natan so ontan iran milagron gawa na masanton espiritu. (1 Corinto 13:8-11) Siansia, a saray milagron ginawa nen Jesus tan saray apostoles to so walaan na nagkalalo nen maawaran ya interes. Pabiskegen da so pananisia tayo ed sipan na Dios a say sakit tan patey so naandi ed silong na pananguley nen Jesus ed balon mundo.​—Isaias 25:6-8; 33:24; 65:20-24.

Gungguna Manlapud Masanton Espiritu na Dios

20, 21. Panon tayon gunggunaan so inkasikatayo ed probisyon na masanton espiritu?

²⁰ Agaylan makapanyarin puersa iyan espiritu! Balet panon a saray Kristianos natan so nagunggunaan ed atan? Ununa, inkuan nen Jesus a nepeg tayon kerewen itan, kanian akin ya aggawaen itan? Manpikasi ed si Jehova a mangiter ed sikayo na sayan makapakelaw a regalo ya aliwa lambengat ed panaon na gonigon noag ingen ed amin a panaon. Niarum ni, basaen so Biblia ta pian say masanton espiritu so misalita ed sikayo. (Ipareng so Hebreos 3:7.) Dalepdepen so abasa tan iyaplika itan ta pian say masanton espiritu so mangimpluensya ed bilay yo. (Salmo 1:1-3) Nagkalalo ni, milimog​—a sinansakey, ed saray kongregasyon, tan diad saray asamblea​—tekep na saray arum a manmamatalek ed espiritu na Dios. Agaylan mayamyaman a pabibiskegen na masanton espiritu iramay mamendito ed Dios da “ed saray doydoypo”!​—Salmo 68:26.

²¹ Agta si Jehova et sakey a mabunlok a Dios? Ikuan ton onkerew tayo lambengat na masanton espiritu tan iter to ed sikatayo. Agaylan makulangkulang so panmatalek ed dilin kakabatan tan biskeg tayo anta say ontan a makapanyarin tulong et niwawala ed sikatayo! Anggaman ontan, walara so arum a pamaakaran ed espiritu na Dios a walaan na pangapekta ed sikatayo a bilang Kristianos, tan saraya so nasingbat ed ontumbok ya artikulo.

[Saray paimano ed leksab]

Kasin Naebatan Yo so Onggendan a Tepetepet?

◻ Panon a pinalsa nen Jehova so amin a bengatla ed talba?

◻ Anto iray arum a dalan a say masanton espiritu so kinmurang ed sakbay-Kristianon panaon?

◻ Panon a makaligliwa ed sikatayo natan so pakaamta ed agawaan na masanton espiritu ed kadaanan a panaon?

◻ Panon tayon agunggunaan a mismo so inkasikatayo ed probisyon na masanton espiritu?

[Litrato ed pahina 16]

Say espiritun angiter ed si Samson na labas-nen-toon biskeg so mangiter ed sikatayo na pakayari ed amin a bengabengatla