Anto so Espiritu Santo?
AMINSAN et oniay intepet nen Jesus ed saray disipulo to: “Siopa ed sikayo so ama sano say anak to onkerew ed sikato na . . . sira, et sikato so mangiter na sakey ya uleg a panagkasira? Ono sikatoy onkerew na sakey ya iknol, iter to ed sikato so sakey ya alakdan?” (Lucas 11:11, 12) Labalabay na saray ugugaw a taga Galilea so mangan na iknol tan sira; amta da no antoy labay da.
Imbaga nen Jesus a nepeg ya agtayo ontutundan onkerew na masanton espiritu, a singa narasan ya ugaw ya onkekerew na naakan. (Lucas 11:9, 13) No naamtaan tayo no anto ita’y masanton espiritu, natalosan tayo no panon kaimportante so pakawalaan na satan. Kanian, pantongtongan tayo nin unona no anto so ibabangat na Biblia nipaakar ed masanton espiritu.
“Pakapanyari na Sankatageyan”
Malinlinew ed Biblia a say masanton espiritu et sakey a puersan uusaren na Dios pian sumpalen so linawa to. Sanen impakabat nen Gabriel ed si Maria a sikatoy manlukon anggaman birhen, oniay inkuan na anghel: “Say espiritu santo onla ed sika, et say pakapanyari na Sankatageyan tarongan to ka: kanian say nianak met ningaran naani Santo, say Anak na Dios.” (Lucas 1:35) Base’d imbaga nen Gabriel, walay pikonektaan na masanton espiritu ed “pakapanyari na Sankatageyan.”
Ontan met so ipapanengneng na arum nin salaysay na Biblia. Oniay imbaga nen Miqueas: “Napno ak na pakayari ed panamegley na espiritu nen Jehova.” (Miqueas 3:8) Onia met so insipan nen Jesus ed saray disipulo to: “Mangawat kayo na pakayari, no onsabi ed sikayo so espiritu santo.” (Gawa 1:8) Tan walay tinukoy nen apostol Pablo a “pakayari na espiritu santo.”—Roma 15:13, 19.
Kanian anto so nayarin konklusyon tayo base’d saratan? Baleg so pankonektaan na masanton espiritu tan pakapanyari na Dios. Say masanton espiritu so puersa nen Jehova, say pakapanyarin uusaren to pian sumpalen iray gagala to. Tan talagan makmaksil itan a puersa! Agtayo anggan naisip no panon kabaleg so pakapanyarin nakaukolan pian napalsa so interon uniberso. Panamegley nen propeta Isaias, impaseseg nen Jehova a nodnonoten tayon maong iya: “Itangay yo so saray mata yo ed tagey, tan nengnengen yo no siopa so amalsa ed saraya, a sikato alaen to so saray ehersito ra ed bilang; sikato tawagen to ra ya amin ed ngaran; lapu ed kabaleg a tuloy na biskeg to ed pakapanyari, tan lapu ed mabiskeg ed pakayari, anggapo so kulang anggan sakey.”—Isaias 40:26.
Kanian ipapabitar na Biblia a say uniberso et mauk-uksoy lapud ‘mabiskeg a pakapanyari’ na Dios a Makapanyarin-Amin. Malinlinew sirin ya agaylay kasil na puersa na Dios, tan akadepende ed satan so mismon bilay tayo.—Nengnengen so kahon a “Say Impangusar ed Masanton Espiritu.”
Nayarin usaren nen Jehova so masanton espiritu to ed malaknab a paraan, a singa ed panamalsay uniberso. Ingen ta sarag to met ya usaren itan parad saray palsa ton totoo. Dakel so alimbawa’d Biblia a mangipapanengneng ya inusar na Dios so puersa to pian ikday pakayari iray lingkor to.
“Say Espiritu na Katawan Wala ed Siak”
Nanengneng ed ministeryo nen Jesus so alay abig ya alimbawa no panon a mangiiter so masanton espiritu na Dios na pakayari ed saray lingkor to. “Say espiritu na Katawan wala ed siak,” so kuan nen Jesus ed saray taga Nazaret. (Lucas 4:18) Antoray agawaan nen Jesus lapud “pakapanyari espiritu”? (Lucas 4:14) Apaabig toy amin a klase na sakit, apadeen toy manpapasnok a dayat, apakan toy nilibon too diad pigara labat a tinapay tan sira, tan akapamaoli ni ingen na inaatey. Deneskribe nen apostol Pedro si Jesus bilang “laki ya inabobonan na Dios . . . panamegley na saray gawa a makapanyari, tan makapakelaw, tan saray tanda a ginawa na Dios ed panamegley to.”—Gawa 2:22.
Agla natan nanausar so masanton espiritu ed panggaway ontan iran milagro. Balet, makapanggawa itan na makapakelaw iran bengatla parad sikatayo. Mabulos a mangiiter si Jehova na masanton espiritu ed saray managdayew to, a singa impaseguro nen Jesus ed saray disipulo to. (Lucas 11:13) Kanian nibaga nen apostol Pablo: “Nayarian ko a gawaen so ganagana ed saman so mamabiskeg ed siak.” (Filipos 4:13) Sarag ka met kasin pabiskegen na masanton espiritu? Naebatan iya ed ontumbok ya artikulo.
[Kahon/Litrato ed pahina 5]
No akin ya aliwan persona so espiritu santo
Inkompara na Biblia so espiritu santo ed danum. Sanen insipan na Dios iray bendisyon a nagamoran na totoo to ed arapen, oniay inkuan to: “Mangibung ak na danum ed napgaan, tan saray agus na danum ed tapew na amaga a dalin; Yibung ko naani so espirituk ed tapew na binim, tan say bendisyon ko ed tapew na simit mo.”—Isaias 44:3.
Sanen inkalbo na Dios so espiritu to ed saray lingkor to, sikaray ‘apano na espiritu santo.’ Si Jesus, Juan Bautista, Pedro, Pablo, Bernabe, tan saramay disipulon nantitipon nen Pentecostes 33 C.E., et pareparehon deneskribe a napno na espiritu.—Lucas 1:15; 4:1; Gawa 4:8; 9:17; 11:22, 24; 13:9.
Nonoten pa iya: Nayari kasin ‘iyibung’ so sakey a persona ed nanduruman indibidual? Nibagam kasin ‘napano’ na sakey a persona so sakey a grupo na totoo? Siempre, andi. Diad Biblia et walaray asalambit a totoon napno na kakabatan, pakatalos, odino karunongan ni ingen, balet anggapon balot so asalambit a toon apano na persona.—Exodo 28:3; 1 Arari 7:14; Lucas 2:40; Colosas 1:9.
Samay Griegon salita a nipatalos ya “espiritu” et pneuʹma, a mankabaliksan met na agnanengneng a pakapanyari. Unong ed Expository Dictionary of New Testament Words nen Vine, say salitan pneuʹma “et manunan mankabaliksan na dagem . . . tan ingas; insan nagkalautla, say espiritu, ya agnanengneng, agnabembenan, tan makapanyari, a singa say dagem.”
Malinew sirin a say espiritu santo et aliwan persona.a
[Paimano ed leksab]
a Parad kaaruman ya impormasyon, nengnengen so apendise a, “Say Katuaan Nipaakar ed say Ama, say Anak, tan say Masanton Espiritu,” ed pahina 201-204, na libron Anto so Peteg ya Ibabangat na Biblia? ya impalapag na saray Tasi nen Jehova.
[Credit Line]
Photodisc/SuperStock