Alabas Ta so Pangipapasen ed Panangiyalis na Dala?

Saray panangiyalis na dala so kaslakan ed modernon medisina, balet kasin saratan so misimbangan ed reputasyon da? Anto so padesir mo?

Onia so intepet nen Dr. Craig S. Kitchens ed The American Journal of Medicine (Pebrero 1993): “Kasin Alabas so Pangipapasen ed Saray Panangiyalis?” Naimano ton saray doktor so mabetbet a maalwar a mangukunsidera no kasin say gungguna na sakey a panagtambal so nagkalalo nen say risgon nayarin itarok to. Anto so nipaakar ed saray panangiyalis?

Nirepaso nen Kitchens so agano nin ebidensya na dakel a risgon nisisiglaot ed saray panangiyalis, a singa say hepatitis, a tinmantan ya immune system, inletey na sistemay organo, tan saray graft-versus-host reaksion. Sakey a panagsukimat ya anegek ed “dakerakel a komplikasyon” nisesengeg ed panangiyalis na dala so “anampot a kada panangiyalis ya agawa et walaan na dagup a 20% a tsansa na negatibon reaksion, a say arum a reaksion to et samet labat balet saray arum so sengegay pansakit na sakey,” makapatey ni ingen.

Anggaman ontan, kasin saray inkuan a gungguna so makatunongan la ed iyarap ed saratan a risgo?

Nirepaso nen Dr. Kitchens iray nireport a  16 a panagsukimat a manasaglawi’d 1,404 ya operasyon ed Tastasi nen Jehova, ya angipulisay ed panangiyalis lapud itutulok ed ganggan na Biblia ya ‘onarawi ed dala.’​—Gawa 15:28, 29.

Say resulta? “Say desisyon na saray pasyente a Tasi nen Jehova ya agpasaksakan na dala ed saray manunan (major) operasyon so ompatnag a mangarum na 0.5% ya anggad 1.5% na ipapatey ed interamentin operasyon. Say agtanton malinew et no kaunongan a sakit tan ipapatey so napaliisan diad panamegley na niyugalin agpanangiyalis, balet ta saray peles na pakapaliis ed pansakit tan ipapatey so palumbasan na saray peles ed desyang na agpanpasaksak.” (Kien mi so italiko.) Say punto to? Antokaman a risgo ed medisina ed pangipulisay na dala so nayarin mas daiset nen say risgon nalalanor ed pangawat na saray panangiyalis na dala.

Kanian, say makatunongan a tepet nen Kitchen: “No say agpanangiyalis na dala ed saray Tasi nen Jehova so aktual a mansumpal ed daiset ya epekto ed pansakit tan ipatey tan napaliisan so baleg a gastos tan manbayag iran komplikasyon, nepeg kasin saray pasyente so mangawat na mas daiset a panangiyalis?”

Saramay mangipupulisay ed panangiyalis nisesengeg ed ontan ya ebidensya so onkiwas met a mitunosan ed saray panangiwanwan na Manamalsa tayo.