Panagani!
AKIN a say awaran na “Inkakristiano” so ontanlan agmakristiano? Dakel a manonot a totoo so manetepet ed sayan tepet, balet inebatan itan nen Jesus ngalngali 2,000 a taon ed apalabas diad sakey a parabolo. Inkuan to ed “sakey a too ya angitanem na maong ya bokel ed uma to.” Insan, “say kabusol to linma tan angitanem na zizañas ya insamok to ed saray trigo.” Sanen saray bini so tinmubo, naimano na saray tumatanem so zizañas tan kaliktan dan bagoten. Balet inkuan na too: “Paulian iran ontobo a bansag ya anga’d panani.” Diad panagani, saray trigo so nibiig manlapud zizañas.—Mateo 13:24-30.
Diad pangipapaliwawa nen Jesus ed parabolo, inkuanto a sikaton mismo so samay nantanem na “maong a bini”—saray tuan Kristiano. Say kabusol et si Satanas, say angitanem na saray “zizañas”—ya angisalet na alig-alig iran Kristiano ed kongregasyon. Inabuloyan nen Jesus so palso tan tuan Kristianos ya onlesan manbansag—balet anggad panani lambengat. Insan sikaray panbiiganen.—Mateo 24:36-44.
Kanian, sikatayo so agnabigla sano naamtaan tayo a say “Kristiano” iran organisasyon ed interon siglos so ag-angigalang ed Dios diad inpangadapta na pagano iran doktrina, impangiyabuloy na imoralidad, panusuporta ed bakabakal na panagsakup, tan maruksa iran inkisisyon. Nabidbiran tayo ed saya so agmaabig a bukel ya intanem nen Satanas. Anggaman ontan, sano nabasa tayo so nipaakar ed saray indibidual a nanirap ed inkipangaw odino patey imbes a mangikompromiso ed saray prinsipyo na Biblia, naimano tayo a say maong a bini so ag-aderal.
Inkuan nen Jesus a say panani et say “konklusyon na sistema na bengabengatla.” Lapud sikatayo so manbibilay ed konklusyon na sayan peles a mundon sistema na bengabengatla, saya so nepeg a panagani! Kanian say panangibiig so nepeg a nagawa ed baetan na tua tan palso iran Kristiano. Natan, wala so onlelesan totoo, ya ag-ataytayak ya indibidual, a matukoy ed salaysay nen Jesus ed tuan Kristianos—a pauuleyan ed Panarian na Dios tan mangipupulong na maong a balita nipaakar ed satan, a mangiyaalibansa na nibase’d-Biblian moralidad tan mangipupulisay ed pagano iran doktrina diad abobon na katuaan na Biblia, a mangipapakabat ed ngaran na Dios tan agkabiangan na mundo.—Mateo 6:33; 24:14; Juan 3:20; 8:32; 17:6, 16.
Ipaseguro mi ed sika, a walaray ontan a totoo! Kasin kaliktan mo so naabobonan a manlingkor ed Dios? Sirin anapen irayan totoo, tan manlingkor ed Dios a kaiba ira.