Pasalimbengan ed si Jehova
“Dia ed sika, O Jehova so panginan ko na panmatalek ko.”—SALMO 31:1.
1. Panon ya ibabalikas na Salmo 31 so panmatalek ed abilidad nen Jehova a manalimbeng?
SAKEY a marakep a kanta so ikakanta na sakey a laki ya, anggaman naksawan ed kanonotan tan laman et inpia to so inkasikato ed si Jehova. Say pananisia so ontatalona, kuan na liriko na satan a sagradon kanta. Diad manaalagar iran taklay na Makapanyarin-amin, sayan laki so makakaromog na siroman manlapud panosonson na saray manamasegsegang. “Dia ed sika, O Jehova so panginan ko na panmatalek ko,” inkuan na salmo to. “Ag moak pabaingan komon a balot. Dia ed loob na inkatunong mo iliktar moak.”—Salmo 31:1.
2. (a) Makapanmatalek itayo ed si Jehova bilang biskeg tayo base’d anton duaran letnegan? (b) Anton klase na Dios si Jehova?
2 Say salmista so walaan na sakey a salimbengan—say sankaabigan! Abuloyan iray arum a bengatla a panduaruwaan, ingen sayan katuaan so mansiansia: Si Jehova so biskeg to, salimbeng to. Say talek to so mantegteen ed duaran mabiskeg a letnegan. Ununa, say pananisia to, ag-iiyan nen Jehova ed kabalawan, tan komadua, say inkatunong nen Jehova, a kabaliksan ton Sikato so agbalot permanentin mangikaindan ed aripen To. Si Jehova so aliwan sakey a Dios a mamabaing ed matoor ya ariripen to; anggapoy sipan ton sinmaew. Imbes, sikato so Dios na katuaan tan mananumang ed saraman so sigugunaet a manmamatalek ed sikato. Diad kaunoran, say pananisia so natumangan! Onsabi so ilelegyas!—Salmo 31:5, 6.
3. Panon so pangitatandoro na salmista ed si Jehova?
3 Diad panitibukel ed musika to tekep na malaineng a tuno na manguman-uman a tonada tan pakaskasin panangibalikas ya anggad pantok na panangibalikas na talek, say salmista so akalikna na akindalem a biskeg. Intandoro to si Jehova lapud matoor ya aro To. “Nagalang si Jehovah,” inkakanta to, “ta sikato ipatnag to ed siak so pankelawan ya abig na linawa [maaron-kaabigan, NW] to ed sakey a malet a ciudad.”—Salmo 31:21.
Say Mabiskeg a Koro na Saray Manangiyabawag na Panarian
4, 5. (a) Anton mabiskeg a koro so mangidadayew ed si Jehova natan, tan panon dan ginawaan itan legan na apalabas a serbisyon taon? (Nengnengen so tsart ed pahina 12-15.) (b) Diad anton paraan a say bilang na inmatendi ed Memoryal so mangipapanengneng a walay dakel nin sinansakey a mabulos a mibiang ed koro na saray manangiyabawag na Panarian? (Nengnengen so tsart.) (c) Anton grupo ed kongregasyon yo so nayarin walad kipapasen a mibiang ed koro?
4 Natan, saray balikas na satan a salmo so walaan na kaaruman a kabaliksan. Saray kanta na panangidayew ed si Jehova so agnapatunda na siopaman a mauges a sumusumpa, na antokaman a natural a desyang, odino antokaman ya ekonomikon kapagaan; peteg, say maaron-kaabigan nen Jehova so magmamaliw a makapakelaw ed totoo to. Diad apalabas a sankamundoan a serbisyon taon, sakey a mabiskeg a koro, ya adampot to’y pantok a 4,709,889 diad 231 a daldalin, so angikanta ed mensahe na Panarian na Dios. Say mangatatawen a gobierno nen Jehova diad panamegley nen Kristo Jesus so sakey a salimbeng ya agmanismaya ed sikara. Katantaon, sarayan manangiyabawag na Panarian manlapud 73,070 a kongregasyon so angusar na sakey a dagup na 1,057,341,972 ya oras diad panag-ebanghelyon kimey. Saya so nansumpal ed 296,004 a totoon angisimbolo na dedikasyon da ed Dios diad panamegley na bautismo ed danum. Tan agaylan makapakelaw a surpresa so nangayagaan na amin ya inmatendi ed Madibinon Panangibangat ya Internasyonal a Kumbension ya agawa ed Kiev, Ukraine, nen imbeneg ya Agusto. Anengneng da so sankamakatantandan ebento ed awaran na Tastasi nen Jehova, atasian da so sankabalgan a nirekord ya ulop na bautismo na tua iran Kristiano ed kapiganman! A singa nipropesiya diad Isaias 54:2, 3, saray totoo na Dios so ondaraak ed agnaparaan a bilang.
5 Anggaman ontan, saray kaaruman a mabulos ya uuleyan na Panarian na Dios so manaalagar na torno ra diad pibiang ed koro. Nen katantaon, say Memoryal na impatey nen Jesus so inatendian na makapakelaw a dagup na 11,865,765 a totoo. Siiilalo, dakel ed saraya so onkualipika diad panganta ed kanta na Panarian ed kabkaabungan legan na sayan serbisyon taon. Agaylan satan ya iilaloan so managyat na sanok ed kabusol na katuaan, si Satanas a Diablo!—Apocalipsis 12:12, 17.
6, 7. Ipaliwawa no panon ya atalonaan na sakey ya interesadon laki so panangataki na demonyo tekep na tulong nen Jehova.
6 Panggunaetan nen Satanas ya amperen iray arum ed pibiang na saray boses da para’d satan a mabiskeg a koro. Alimbawa, diad Thailand, saray manangipalapag so akaimano ed idaraak na bilang na totoo a sinalot na panangataki na demonyo. Anggaman ontan, dakel a masimoon so nibulos la diad tulong nen Jehova. Kayari na inpanbisita ed sakey a manananem lapud pan-usyoso, sakey a laki so walad silong na pakayari na saray demonyo ed loob na samplo’y taon la. Nambanikelan to so ilukpos manlapud pakayari ra ed tulong na sakey a klero, balet sikato so ag-akasagmak na peteg ya inyaligwas. Sakey a sigpot-panaon a ministro na Tastasi nen Jehova so angigapo na panangiyaral ed Biblia ed laki tan inbangat to ed sikato a manlapud Biblia so alenleneg a paraan pian makalukpos manlapud pakayari na demonyo—say pangala na suston kakabatan na katuaan, say panisia ed si Jehova a Dios, tan pikerew ed sikato diad pikakasi.—1 Corinto 2:5; Filipos 4:6, 7; 1 Timoteo 2:3, 4.
7 Diad labi kayari na sayan diskusyon, say laki so awalaan na kugip a pinagyaw na inatey lan ama to no sikato so ag-ompawil bilang sakey ya espiritistikon medyum. Say pamilya to so ginmapon nanirap. Agpapaimpluensyaan, intultuloy na laki iray leksyon to ed Biblia tan ginmapon inmatendi ed saray miting. Legan na sakey ed saraman a panagaral, impaliwawa na payunir a no maminsan et saray agamil ed espiritistiko ran ritual so mangiter na pankanawnawa ed saray demonyo a mangataki ed totoo a manggugunaet a makalukpos ed pakayari ra. Anonotan na laki a sikato so walaan na larak ya inusar to bilang galing. Diad saman et amoria to a kaukolan ton ibantak iman. Manlapulad inpangibasileng ed saman, sikato so agla sinigensigen na saray marelmeng ya espiritu. (Ipareng so Efeso 6:13; Santiago 4:7, 8.) Sikato tan say asawa to so onaaligwas a tuloy ed panagaral da tan maparanay ya onaatendi ed saray miting para’d panamilin na Biblia.
8, 9. Anto niran babeng so tinalonaan na arum a manangiyabawag na Panarian?
8 Saray arum a babeng so nayarin mangamper ed tanol na maong a balita. Lapud mairap a tuloy a kipapasen ed ekonomiko diad Ghana, saray trabahador so inekal. Say bili na sasaliwen so tinmulasok, a sengegay peteg a problema ed panaliw na kabkaabigan iran pankaukolan ed bilay. Panon so panatalona na totoo nen Jehova? Diad panmamatalek, aliwan diad inkasikaran mismo, noagta diad si Jehova. Alimbawa, sakey ya agew et sakey a laki so angitilak na sakey a silyadon sobre diad reception desk na sangan opisina. Diad sobre et walay $200, odino taloran bulan a minimun a sueldo. Say sobre so nanlapud agkabat a manangiter na regalo, balet diad punggos et walay akasulat ya onia: “Nakal’ak ed trabaho, balet itataryaan ak nen Jehova na sananey nin trabaho. Siak so misadsalamat ed sikato tan ed Anak to, si Kristo Jesus. Diad pangasisti ed panangilaknab na maong a balita na Panarian sakbay ya onsabi so anggaan, intekep ko so melag a kontribusyon ko.”—Ipareng so 2 Corinto 9:11.
9 Say iyaatendi ed miting so ontutulong pian mangisanay ed saraman so mibiang ed mabiskeg a koro na panangidayew ed si Jehova. (Ipareng so Salmo 22:22.) Kanian, diad mamaabalaten a parte na Honduras, wala diman so sakey a kongregasyon a tatawagey El Jordán. Anto ta so nikadkaduma ed sayan melag a grupo? Satan et say matoor ya iyaatendi ra ed miting. Diad 19 a manangipalapag, 12 so kaukolan ya onbaliw ed sakey a maawang ya ilog pian onatendi ed saray miting kada simba. Saya so aliwan baleg a problema no tiagew, lapud sikara so makabaliw ed ilog diad panamegley na saray ankabaleg a baton onkakanan tontonan. Balet, legan na mamauran, saray kipapasen so manguman. Bektaman ya onaralem so danum et nalegep ya amin so bengatlan natontonan. Pian natalonaan iyan makasbel, saray agagin lalaki tan bibii so kaukolan a maong a lomalangoy. Sakbay iran onbaliw et iyan daray kawes da para’d miting diad sakey a tina (metal a barilis) tan insan ponggosen itan na plastic bag. Say sankabiskegan a lomalangoy et usaren to’y tina bilang paltawan tan idaulo so grupo ya onbaliw. Diad inbaliw a maligen, pamagaen da so inkasikara, manpales, tan ondateng a masayaksak tan amisteng ed Kingdom Hall!—Salmo 40:9.
Sakey a Pakdaal a Nayarin Panayaman Tayo
10. Akin a makaasingger ed si Jehova legan na saray panaon na gonigon?
10 Balanglan sika so walad sigpot a pangataki na demonyo odino nagogonigon manlapud sananey iran lapuan, si Jehova so nayarin magmaliw a biskeg yo. Ontawag ed sikato diad pikakasi. Sikato so atentibon ontatalineng anggan diad sankaudieman iran igagel na totoo to. Nalmoan na salmista a satan so tua tan insulat to: “Ikiling mo so layag mo ed siak; iliktar mo ak a maganganat; sika so malet a batondampay ko, ya onkana a sake’ ya abung na kiagel a mangilaban ed siak. Ta sika so batondampay ko, tan kutak; kanian nisengeg ed ngaran mo itabin moak tan ibasbas moak. Samsam moak ya ipaway ed bateng ya insilib sa ya impaleg ya onkana ed siak: ta sika so biskeg ko.”—Salmo 31:2-4.
11. Ipaliwawa no akin a say pakdaal nen Jehova so aliwan sakey a temporaryon pasen.
11 Si Jehova so mangitatarok na aliwa lambengat a temporaryon salimbengan noagta sakey ya agnakobkob a pakdaal a nayarin panayaman tayo ed inkaligen. Say panangidaulo tan panangiwanwan to so ag-angipalbeng ed totoo to. Say madibinon pakayari so manggawan andi-kana iray amin a masilib a kalot nen Satanas tan say membro to. (Efeso 6:10, 11) Legan a sikatayo so sigpot-puson manmatalek ed si Jehova, sikato so mangiyarawi ed sikatayo manlapud saray patit nen Satanas. (2 Peter 2:9) Legan na apalabas ya apatiran taon, say panagpulong a kimey na Tastasi nen Jehova so alukasan ed 35 a bansa. Ontan met, diad saray pasen na mundo a say sosyal, ekonomikal, tan mapulitika iran kipapasen so manesebel ed panagpulong na maong a balita, arum a kinmarneron totoo so inmalis ed saray lugar a sikaray mas mainomay a nasabian. Say Hapon so sakey ed ontan a pasen ya inalisan da.
12. Panon na sakey a payunir ed Hapon a ginawa si Jehova bilang biskeg to?
12 Diad Hapon et wala so dapag na saray sankailin kumikimey a nanlapud biektaew, tan dakel a kongregasyon so niletneg a walaay sankailin-lenguahe. Say eksperiensia na sakey ya agi ed sakey a kongregasyon na Hapon so mangiyiilustra ed no panon inkamabunga iyan sankailin-lenguahe a lugar. Kaliktan to so onla diman no iner a babaleg so pankaukolan pian manlingkor. Balet ta, sikato so mangikokondukta la na samploran iyaaralan na Biblia ed kulaan to. Sakey ed saray kaaro to so manlulurey ya angikuan: “No onla ka’d babaleg so pankaukolan, kaukolan a sika so mangikondukta diman na 20 ya iyaaralan na Biblia!” Sikato so akaawat na asaimin tan linma ed Hiroshima. Anggaman ontan, kayari na apatiran bulan, sikato so awalaan na saksakey lambengat a panangiyaral na Biblia. Sakey ya agew et sikato so dinmalaw ed lakin taga Brazil a say amta to labat a pansasalita et Portuges. Lapud say agi so agmakapitalosan ed laki, sikato so angaliw na libron-panaralan a Portuges. Kayari impakaaral na pigaran simpli iran balikas ed pitotongtong, sikato lamet so binmisita ed laki. Sanen sikato so inbano na agi ed lenguahen Portuges, say laki so mankelaw tan, tekep na magayagan imis, nilukasan to so puerta tan pinaloob to. Nigapo so panagaral na Biblia. Ag-abayag say agi so mangikokondukta na dagup na 22 ya iyaaralan, 14 ed pansasalitan Portuges, 6 ed Español, tan 2 ed Hapones!
Panagpulong Tekep na Talek
13. Akin ya agnepeg a salien na anggan siopa man a sikatayo so pabaingan pian manlingkor ed si Jehova?
13 Sitatalek iray totoo nen Jehova a mangikakanta ed kanta na Panarian tekep na sigpot a pananisia a si Jehova so salimbeng da. (Salmo 31:14) Sikara so ag-ambaing—sikara so ag-iyan nen Jehova ed kababaingan, lapud sikato so manumpal ed salita to. (Salmo 31:17) Say Diablo tan saray demonikon legion to so niiyan ed kababaingan. Lapud say totoo nen Jehova so ginanggan pian manpulong na sakey a mensahe ya agnepeg ya ibaing, sikara so ag-pinaskar na arum a totoo a manpulong. Aliwan ontan a paraan a papasesegen nen Jehova, odino na Anak to, so totoo pian mandayew ed Sikato. Sano say kapusoan na totoo so napano na pananisia tan apresasyon ed kamaongan tan maaron-kaabigan nen Jehova, say maabig a kipapasen na kapusoan da so mamaskar ed sikaran mansalita. (Lucas 6:45) Sirin, kaunongan man na panaon ya usaren tayo ed serbisyo kada bulan, nagkalalo la no satan a panaon so mangirerepresenta ed sankaabigan a nagawaan tayo, satan so maabig, aliwan makapabaing. Agta say sankamelagan a kantidad ya inter na balo so sigpot ya inapresya nen Jesus tan say Ama to?—Lucas 21:1-4.
14. Antoran komento so nibaga yo nipaakar ed panagpayunir? (Nengnengen met so tsart.)
14 Para’d ombabaleg a bilang na manangipalapag, say pagmaliw a sigpot-kamarerwa ed panagdayew et itetekep to so regular a panlilingkor bilang payunir—890,231 so pantok nen inbeneg a taon! No say inyaligwas ed apalabas a taon so napansiansia, sayan bilang so maseguron onsulok ed 1,000,000. Ipapanengneng na ontumbok ya eksperiensia no panon a say sakey ya agin bii ed Nigeria so nanpayunir. Insulat to: “Sanen pagani-gani ak lan mangraduar ed haiskul, siak so tinmulong ed panagluto para’d saraman so estudyante ed eskuelaan na panagpayunir na Tastasi nen Jehova. Akabat ko so duaran agagin bibii diman a matatatken nen say baik. Sanen naamtaan kon sikaray payunir a manaaral diman, inkuan ko ed inkasiak, ‘No saraman a dua so makapanpayunir, akin ya agko nayarian?’ Kanian kayari na panaral ko, siak met so nagmaliw a regular payunir.”
15. Diad anton paraan a say inpormal a panagtasi so manggawan posibli para’d arum a pasalimbengan ed si Jehova?
15 Aliwan amin so makapanpayunir, balet sikara so makapantasi. Diad Belgium et sakey a manedad na 82 ya agin bii so manaliw na karne. Naimano ton say asawa na matadero so nagogonigon a tuloy ed apalabas iran gutgutan ed pulitika. Kanian insigpit na agin bii so tract a What Do Jehovah’ Witnesses Believe? ed kuarta sanen sikato so manbayar. Sanen say agin bii so pinmawil ed lakoan, say asawa na matadero, ya andian panangipaleen, so tinmepet no anto so ibabaga na Biblia nipaakar ed posiblin komatlon bakal na mundo. Sikato’y inawitan na agin bii na libron True Peace and Security—How Can You Find It? Pigaran agew ed saginonor, legan a say maedad lan agin bii so onsasabi ed lakoan, say asawa na matadero so walaan na dakerakel nin tepet. Naabagey na agin bii iyan bii; inopresian to na sakey a panagaral na Biblia, tan saya met so inawat. Natan, say asawa na matadero so malabay a manpabautismo. Kumosta so matadero? Binasa to so tract tan natan et manaaral met la na Biblia.
‘Sakey a Kayamanan na Kaabigan’
16. Panon so pangibiig nen Jehova ed sakey a kayamanan na kaabigan para’d totoo to?
16 Legan na sarayan magonigon a kaunoran ya agew, agta si Jehova so ‘mangitatarok na makapakelaw a maaron-kaabigan’ ed saraman so manpapasalimbeng ed sikato? Singa sakey a maaro, mapeget ya ama, si Jehova so angigana na sakey a kayamanan na kaabigan ed mangaraldalin ya anak to. Sikara so papauranan to na liket diad arap na amin ya onnenengneng, a singa kuan na salmista: “Alay kinabalgan na kaabigan mo, ya tinipon mo ya onkana ed saray ontakot ed sika, kaabigan a ginawam ya onkana ed saray manmatalek ed sika, dia ed arapan na saray anak na too!”—Salmo 31:19, 21.
17-19. Diad Ghana, anton maabig a nansumpalan ed inpangi-legal na sakey a masiken la ed inpangasawa to?
17 Sirin, saray totoo ed mundo so makakatasi ed inkamatua na saramay mandadayew ed si Jehova, tan sikaray mankelaw. Alimbawa, diad Ghana sakey a masiken a manedad na 96 so linma ed opisina na managrehistro na kasal tan kinerew ton iparehistro so 70 a taon lan common-law ya impangasawa to. Say opisyal na panangasawa so abigla tan tinmepet: “Kasin sigurado kayo a satan so labay yon nagawa? Diad satan ya edad yo?”
18 Impaliwawa na laki: “Labay ko so magmaliw a sakey ed Tastasi nen Jehova tan mibiang ed sankaimportantian a kimey sakbay na anggaan na mundo—say panangipulong na maong a balita na Panarian na Dios. Sayan kimey so mangitonton ed andi-anggaan a bilay. Saray Tasi nen Jehova so ontutulok ed sibil a ley, pati say ley ed panagparehistro na panangasawa. Kanian ipangasin irehistro la para ed siak.” Say opisyal so ag-akasel. Sikato so tinmuloy ya angirehistro, tan say masiken so malikeliket ya inmalis a lapud sikato la so legal ya akasal.—Ipareng so Roma 12:2.
19 Kayari na satan, say managrehistro na panangasawa so nanmorekdek ed saray bengatlan nadngelan to. “Tastasi nen Jehova . . . sankaimportantain a kimey . . . anggaan na mundo . . . Panarian na Dios . . . andi-anggaan a bilay.” Lapud nawewetwet ed no anto so kabaliksan na amin na saya ed bilay na sakey a masiken a manedad na 96, denisidi to ya anapen so Tastasi pian usisaen a nagkalalo so pamaakaran. Inawat to so sakey a panangiyaral na Biblia ed abung tan maples ya inmaligwas. Natan, sayan managrehistro na panangasawa so abautismoan a Tasi. Kanian, sano tuloken tayo si Jehova anggan diad saray bengatlan ipapasen na arum a melag, satan so nayarin mansumpal ed agnibagan kaabigan para’d sikatayo tan para’d saraman so makakatasi ed kondukta tayo.—Ipareng so 1 Pedro 2:12.
20. Diad Myanmar, panon ya angitonton ed sakey a maabig ya inpantasi so inkamatua na sakey a tobonlalon agin bii?
20 Saray matatken la ya angiyabuloy ed katuaan a manmoldi ed sikara a magmaliw a matuan totoo so angiletneg na maabig ya alimbawa para’d saray kalangweran ed sayan agmatuan mundo. Ontan so kabibilay na sakey a walad kalangweran ya agin bii diad Myanmar. Sikato so nanlapud duka tan mairap a pamilya na samploran ananak. Say ama, a sakey a pensionado, so sakey a regular payunir. Sakey ya agew ed eskuelaan, say agin bii so akarutdok na sakey a singsing a diamante, tampol ton inawit ed maestra to. Legan a say klase so nantitipon ed ontumbok ya agew, imbaga na maestra ed klase no panon a nalmo so singsing tan inpawil ed makankien. Insan kinerew to ed agin bii ya onalagey ed arap na interon klase tan ipaliwawa no akin a ginawa to iya, a kabat ton saray arum ya anak so nayarin manpilin mangiyamot ed satan. Inpaliwawa na agin bii a sikato so sakey a Tasi nen Jehova tan aglabay na Dios to so panagtakew odino antokaman a nengneng na ag-inkamatua. Abalitaan iman na interon eskuelaan a saya so angiter ed agi tayon bii na maabig a pankanawnawa pian mantasi ed saray managbangat tan ontan met ed saray estudyante.
21. Legan a saray tobonbalo so manmamatalek ed si Jehova, panon dan isisindag iray kondukta ra ed sikato?
21 Diad Belgium sakey a maestro so anaglawi ed klase na sakey a makapainteres a bengatla nipaakar ed saray Tasi nen Jehova. Naimatonan to so kondukta na sakey ed saray eskuela to, a sikato so sakey met a walad kalangweran ya agin bii, tan inkuanto: “Siak natan so walaan na duman opinyon nipaakar ed saray Tasi nen Jehova. Say panangiduma so angitonton ed siak ed panisip a sikaray agpadaeg a totoo. Pinaneknekan dan sikara so padaeg a tuloy, bangta agda ikokompromiso iray prinsipyo ra.” Kada taon et sakey a tumang (award) so iiter na saray managbangat ed saray sankaabigan ya eskuela ra. Say sakey et tumang para’d kurso na totontonen ed moral. Diad taloran nantutumbokan a taon, saray tumang para’d taloran ataragey iran grado so initer na sayan managbangat ed saray anak na Tastasi nen Jehova. Kanian satan so mabetbet a nagagawa ed saramay matoor a manmamatalek ed si Jehova.—Salmo 31:23.
22. Anto so mananalon panangisara ed Salmo 31, tan panon a satan so ontutulong ed sikatayo legan na pansampot iran agew na sayan sistema na bengabengatla?
22 Ipapaknol na Salmo 31 so sakey a mananalon panangisara: “Manpabiskeg kayo, tan panliketen yo so puso yo, sikayo ya amin a manilalo ed Jehova.” (Salmo 31:24) Sirin, legan a sikatayo so mamapaarap ed pansampot iran agew na mauges a sistema nen Satanas, si Jehova so onsingger a tuloy ed sikatayo tan ipasen to so dilin biskeg to ed sikatayo. Si Jehova so matoor tan ag-onsaew. Sikato so salimbeng tayo; sikato so ilang tayo.—Uliran 18:10.
Kasin Natandaan Mo?
◻ Akin a sikatayo so sitatalek a gawaen si Jehova bilang salimbeng tayo?
◻ Anto so paneknek a say mabiskeg a koro so mangikakanta na panangidayew na Panarian tekep na inkakpel?
◻ Akin a sikatayo so makapanmatalek a say iket nen Satanas so ag-mangalot ed saray totoo nen Jehova
◻ Anton kayamanan so igagana nen Jehova para’d saraman so manpapasalimbeng ed sikato?
[Tsart ed pahina 12-15]
1993 SERBISYON TAON A REPORT NA SARAY TASI NEN JEHOVA ED SANKAMUNDOAN
(Nengnengen so tomo)
[Saray litrato ed pahina 16, 17]
Saraman so pasasalimbengan ed si Jehova so manggagawa na sakey a mabiskeg a koro na saray manangiyabawag na Panarian—4,709,889!
1. Senegal
2. Brazil
3. Chile
4. Bolivia