Saray Kalangweran ‘Manmamatalek ed si Jehova’

SARAY tobonbalo so andian na pakakontrol ed kalimgasan, nisay saray maedad la so walaan na nikaduman kakabatan. (Ipareng so Uliran 11:22; Eclesiastes 10:1.) Imbes, saraman so walaan na agmanganggan kalimgasan tan puron kakabatan et saraman so manmamatalek ed si Jehova tan sigpot-puson mangibaga nipaakar ed sikato: “Sika so Dios ko.”​—Salmo 31:14; Uliran 9:10; 16:31.

Diad sankamundoan et wala so ondaraak a malilimgas a totoo, namparan tobonbalo tan matatken, a mangipapanengneng na kakabatan da diad panlilingkor ed Dios tan pangipupulong na maong a balita na Panarian na Dios. Alimbawa, kunsideraen si Sabrina a mantaon na walora.

Si Sabrina so manaayam ed Alemanya tan walad komaduan grado. Sikato so sankaunaan a Tasi nen Jehova a manaaral ed saman ya eskuelaan. Makapaermen, sikato so puntirya na panamabaing na kaeskuela to ya anggad agew a kinerew na say maestra ed saray estudyante a mangawit ed paborito ran libro ed klase. Denisedi nen Sabrina ya awiten so My Book of Bible Stories. Diad labi sakbay to, anggaman mapaga, sikato so namparaan a maong para’d klase. Lapud wala so 26 ya estudyante ed klase to, amta to a sikatoy andian na malaem a panaon. Balet sikato so determinadon agmangabuloy ed siopaman ya onsalet ed presentasyon to tan sikatoy matalek a tulongan nen Jehova. Diad niganan agew, tinmepet so maestra no siopa so angawit na libro tan malabay a magmaliw ya ununan mangipanengneng ed satan. Makapakelaw, si Sabrina labat so angawit. Sikato so tinmalindeg ed arap na klase tan ginmapon nansalita, nambabasa tan nampapanengneng ed saray retrato na libro tan impapaliwawa ya amin a bengatla so nibase’d Biblia. Diad pansampot et intepet to: “Siopa so interesado a nawalaan na sayan libro?” Angiter na sakey a kopya ed maestra, tan legan na pigaran agew, sikato so angiter na samploran kaaruman iran libro ed arum a kaeskuela to. Say komento lambengat na maestra ed presentasyon to et: “Agko nin balot akanengneng na bengatlan singa satan.” Inikdan to si Sabrina sa sankatageyan a grado ed kimey to.

Diad tua, dakel a walad kalangweran a Tastasi so maliket a manangipalapag na maong a balita diad eskuelaan. Sananey nin alimbawa et si Erika, sakey a manedad na 11 a manangipalapag ed Mexico. Sikato so binangatan manlapud inkaugaw a mangaro ed si Jehova. Saray asainmin to ed eskuelaan so matalonggaring. Sakey ed saray asainmin to et say pangiparaan na materyal nipaakar ed AIDS tan inkailuam ed tabako tan alak. Imparaan ton maong, inusar to’y magasin ya Awake!, tan akawaat na sankatageyan a grado. Tinepet na maestra to no iner so angalaan to na impormasyon tan sikatoy naikdan na saray magasin a walaan na saray artikulo ed saraman a tema. Saginonor, inusar na maestra irayan magasin pian isingbat iray tema ed interon klase. Lapud kondukta nen Enrika, say respeto to ed saray mamaestra, tan say atagey iran grado to, sikato so akaawat na saray regalo, diploma, tan manbabayar labat na kapaldua ed matrikula. Anggaman ontan, liknaen to a say sankabalgan iran agawaan to et say impangipakabat to ed inkasikato bilang sakey ed saray Tasi nen Jehova, ya akapangipalima na literatura ed Biblia, tan mangitatandoro ed ngaran na Dios.

Insan wadtan si Shannon, sakey a lakin mantaon na samplora a manaayam ed New Zealand. Sakey labat so makanengneng a mata to; tan say sakey a mata to akanser sanen sikato ni so ugaw. Sanen si Shannon so pitora, say ina to so ginmapon manaral na Biblia ed saray Tasi nen Jehova. Anggaman ontan, ag-abayag kayari inpangigapo to ed saray leksion to ed Biblia, sikatoy ginmapon akiamong ed sakey a laki ya anggapoy kasalan tan nandesidin itunda so panaaral to. Inkerew nen Shannon a itultuloy to so panagaral na Biblia. Naabuloyan so kerew to. Saray Tasi so nantultuloy a dinmalaw, tan diad kaunoran et amin dan talon sankaabungan so nanaral ed Biblia tan inmaligwas ed espiritual. Kayari na legal ya inpankasal, say ina tan ikit nen Shannon so abautismoan.

Sakey ya agew si Shannon tan say asawa na manangasikaso na sirkito so naniba ed lawak na kimeyan. Sakey ya unabong so tinmepet ed si Shannon: “Anto so agawa ed matam?” “Akanser, tan kaukolan ya ekalen,” inyebat to. “Agmabayag et ikdan toak nen Jehova na balon mata diad Paraiso, tan satan so makasengeg na niyakaran mi dia pian ibaga ed sikayo so nipaakar ed satan.”