Kasin Saratan so Mangungguna ed Sika?

SAY magasin a sankaegnaan mo so denisinyo a magmaliw a lapuan na panamaseseg, mangipapanonot ed saray totontonen ed Biblia para’d panamabiskeg ed saray pamilya tan pamasiansia na personal a katooran. Ipapanengneng na satan a say magulo iran panaon natan so nipasakbay ed Biblia, tan satan so mangipapabitar na solusyon​—say gobierno na Panarian na Dios. Kasin sika so nagunggunaan manlapud Say Panag-Bantayan tan ed Awake!, say kaiba ton magasin?

Diad Pilipinas sakey a biin manngaran na Vilma so nansulat: “No wala so antokaman a salita ed paneskrebi na saray palapagan yo, isipen ko a piliin ko’y ‘makapakelaw.’ Anengneng tan abasak ed sankaunaan a pankanawnawa so Awake! tan The Watchtower yo sanen siak so akalugan ed bus a mamapawil la’d ayaman a nanlapud Manila. Gendagendat a siak so mangaawit na saray peryodiko sano manbiabiahe ak, balet diad sayan bekta ag’ak angawit na antokaman.

“Akayurong ed abay ko ed sayan impanbiahe so sakey a medyo maedad met la a laki a walaan na saray palapagan yo. Kayari na inpamasa to ed Awake!, inpaway to so sananey a magasin, say The Watchtower. Inanamot ko’y pankanawnawa diad pamayes ed Awake! Diad katuaan to, siak so peteg a nangayaga ed inpamasa ed saraman a magasin lapud amin na saray artikulo so makapainteres, nipanpanaon, tan makapaalagey.”

Sinampotan na bii: “Peteg a kaliktan ko so makaawat na saray magasin yo. Ipangasin ipaamta yo ed siak no panon so pakaawat ko ed saratan.” Say sangan opisina na Tastasi nen Jehova ed Pilipinas so maliket diad pangiyarum ed sayan bii ed listaan na pawitan da.