Tepetepet Manlapud Saray Managbasa

Lapud say Biblia so mabetbet a manasaglawi ed “say ulila ed ama,” kasin saya so mangipapanengneng ya agtanton naasikaso iray bibii?

Maseguron andi.

Diad New World Translation of the Holy Scriptures et inusar so balikas ya “ulila ed aman laki” ed dakel a bersikulo a mangipapatnag ed panagpaga na Dios para’d ananak ya ulila. Impalinew na Dios iyan panagpaga ed saray ganggan ya inter to ed Israel.

Alimbawa, inkuan na Dios: “Agyo pabpairapen so siopaman a bii a balo odino say ulila ed ama. No pabpairapen mo ra, et ontawag ira kalamor ed siak, dengelen ko so tagleey da; et say sano’ko ompetang naani, tan pateyen ta kayo naani ed kampilan; et saray kaasawaan yo a bibii nabalora, tan saray anak yo naulila ra naani ed ama.” (Exodo 22:22-24) “Ta si Jehova a Dios yo, sikato so Dios na saray dirios, tan Katawan na saray kakatawan, sikato so abalbaleg á Dios, sikato so makapanyarin-amin, tan tatakótan, ya angapo so iduduma to a too, nisay mangawat na tumang. Sikato agamilen to so inkatunong ed saray ul-ulila tan saray babálo.”​—Deuteronomio 10:17, 18; 14:29; 24:17; 27:19.

Diad dakel a bersyon na Biblia et nabasa so “ugaw ya andian na ama” odino “ulila” ed sarayan bersikulo, diad ontan et lalaktipen toray ananak a lalaki tan bibii. Anggaman ontan, saratan a patalos so mangibabaliwala ed substansyan naromog ed salitan Hebreon (ya·thohmʹ), a walad masculine gender. Imbes, uusaren na New World Translation of the Holy Scriptures so suston patalos a “(saray) ulila ed ama,” a singa ed Salmo 68:5, a nabasa ditan: “Ama na saray ulila ed ama, tan sakey a okom na saray balo a bibi̇́i, say Dios ed masanto ya ayaman to.” Base ed panangikuenta ed sengegan a Hebreo, say feminine gender ed berbo diad Salmo 68:11 so mangirerekomenda na onian panagbasa: “Saray bibii a mangipapaamta na saray balbalita, sikara . . . so sakey ya abalbaleg ya olop.”a

Anggaman “say ulila ed ama” so manunan imapangipatalos ed ya·thohmʹ, saya so nepeg ya agtalosan a mangisusuheri na kakulangan na panagpaga para’d saray ulila a bibii. Saray balikas ya inaon tan arum ni so mangipapanengneng a saray totoo na Dios so apaseseg a mangasikaso ed saray bibii, saray balo. (Salmo 146:9; Isaias 1:17 Jeremias 22:3; Zacarias 7:9, 10; Malaquias 3:5) Diad Ganggan, inlaktip met na Dios so salaysay nipaakar ed hudisyal a desisyon a mangarantiya ed sakey a tawir para’d saray ulilan bibii na Zelofehad. Satan a desisyon so nagmaliw a basiyan ed saray kason walaan na mipadparan kipapasen, diad ontan et nitandoro iray kanepegan na ulilan bibii.​—Numeros 27:1-8.

Ag-angidumaduma si Jesus ed panamegley na gender diad panangipanengneng na panangasi ed ananak. Imbes, nabasa tayo: “Et inyakar da ed sikato so saray ankekelag ya ugugaw, pian diwiten to ra; et saray babangatan binano da ra. Balet sanen sikato’y anengneng nen Jesus, asanokan, et inkuan to ed sikara, ‘Paulian yo so saray ankekelag ya ugugaw ya ondago ed siak; ag yo ra sebelan: ta sikara so makankien na panaria’y Dios. Tua kuan ko ed sikayo, Siopaman ya ag mangawat na panaria’y Dios a singa sakey a melag ya ugaw, ag makaloob a balot diman.”​—Marcos 10:13-16.

Say Griegon salitan nipatalos dia ya “ankekelag ya ugugaw” so walad neuter gender. Sakey a bantog a bokabularyo ed Griego so mankuan a sayan salita so “inusar ed saray ugugaw a lalaki tan bibii.” Impanengneng nen Jesus so mipadparan interes nen Jehova ed amin ya ananak, lalaki tan bibii. (Hebreos 1:3; ipareng so Deuteronomio 16:14; Marcos 5:35, 38-42.) Diad ontan et nepeg a bidbiren a satan a simbawa ed Hebreon Kasulatan nipaakar ed panangasikaso na “saray ulila ed ama” so misimbangan ed simbawa nipaakar ed no panon tayo komon a pampagaan so nipaakar ed amin ya ananak ya andian na ateng odino atateng.

[Paimano ed leksab]