Singa Saray Mansanas a Balitok

MANSANAS​—makapaingganyo ed pakanengneng tan pakataway! Uusaren na Biblia iyan masamit a prutas ed sakey a makapatenyeg-kanonotan a panangipara sanen kuanton: “Say salita a makana so kisalita to sikato so singa saray manzana a balitok ed iket a pilak.” (Uliran 25:11) Anto so kabaliksan na sayan balikas?

“Saray manzana a balitok ed iket a pilak” so nayarin manutukoy ed saray gawan niyukit, a singa say inukit a bandehadon pilak a walaay prutas na balitok. Lapud diad akadkauna iran bersikulo na sayan kapitulo et nasasalambit so iyaasingger ed sakey ya ari Uli 25:2, 3, 5, 6, sayan bersikulo so nayarin ontukoy ed regalon initer ed sakey a manuley​—binmalitok iran ornamento diad ohas na saray mansanas a nipasen ed saray bandehadon pilak. (Uliran 25:6, 7) Agaylan makapandinayew so dakep to!

Wala so mipadpara ed karakpan diad matukoy, kagalanggalang, nipanpanaon iran salita, balanglan nisulat odino insalita. Saratan so makapaayat, makapaseseg, tan makagungguna ed dakel a paraan. Nagkalautla iray madibinon impuyan a lugan na Biblia a singa “saray manzana a balitok ed iket a pilak.”

Singa inyilustra na makabat a diparan nen Arin Solomon ed Uliran 25:11, “inosisa to ya inanap so saray makapaliket a salsalita, ta say nisulat nen saman a maptek, salanti salsalita a matua.” (Eclesiastes 12:10; Uliran 25:1) Nilasus a taon ed saginonor, insulat na Kristianon apostol Pablo: “Amin a Sulat ya inpuyan na Dios sikato met so maabig.” (2 Timoteo 3:16) On, lugan na Biblia so makagunggunan simbawa, saray propesiya, mangireretraton salita, tan saray katuaan a mansyayap tan marakep, a saraya et palumbasan ton tuloy iray gawa na sankaabigan a kumikimey. Niarum ni, siopaman a makagagamor na kakabatan manlapud Salita’y Dios, say Biblia, so mangagamor na mablin kayamanan tan makapanilalon mangamor na ilalo ed magnayon a bilay.​—Uliran 4:7-9; Juan 17:3.