Apocalipsis​​—Asingger la so Engranden Kapantokan To!

Kapitulo 38

Idayew si Jah Lapud saray Panangukom To!

1. Anto iran salita so nadngel nen Juan ed “sakey a maksil a boses na baleg ya ulop ed tawen”?

Anggapo la so Babilonia a Baleg! Saya so peteg a makapaliket a balita. Agpankelawan a nadngel nen Juan so malikeliket iran panangikelyaw na dayew ed tawen! “Kayari na sarayan bengatla nadngel ko so sakey a maksil a boses na baleg ya ulop ed tawen. A kuan da: ‘Aleluya!* Say kilalaban tan gloria tan pakayari so kien ira na Dios tayo, ta saray pangukom to sikara so tua tan matunong. Ta sikato so angukom ed baleg a balangkantis ya aneral ed dalin lapu ed impilawan to, tan insingil to so dala na saray aripen to dia ed lima to.’ Tan tamtampol ed komaduan danay ikuan da: ‘Aleluya!a Tan say asewek to so sinmegep ed ando lan ando.”​—Apocalipsis 19:1-3.

2. (a) Anto so kabaliksan na salitan “Aleluya,” tan anto so ipatnag na amiduan danay ya inpakadngel nen Juan ed sayan punto? (b) Siopa so makaawat na gloria para’d paneral ed Babilonia a Baleg? Ipaliwawa.

² Peteg ya Aleluya! Say kabaliksan na sayan salita et “Idayew si Jah, sikayo ran totoo,” a say “Jah” so apatikeyan a porma na madibinon ngaran a Jehova. Napanonotan tayo ed panamaseseg na salmista: “Amin a manbibilay a bengatla​—idayew to si Jah. Idayew yo si Jah, sikayon totoo!” (Salmo 150:6) Diad inpakadngel nen Juan ed magayagan mangatatawen a koron kantan “Aleluya!” ya amidua ed sayan punto ed Apocalipsis so angipatnag na mantultuloy a madibinon pangiparungtal ed madibinon katuaan. Say Dios na Kristianon Griegon kasulatan so parehon Dios na akadkaunan Hebreon Kasulatan, tan Jehova so ngaran to. Say Dios a sengegan na inkagba na kadaanan a Babilonia so angukom tan aneral la natan ed Babilonia a Baleg. Iter ed sikato ya amin a dayew lapud satan a takot! Say pakayari ya angitonton ed inkagba to so nanlapu ed sikato aliwan diad saray nasyon ya inusar to para ed kadederal to. Diad si Jehova lambengat so pakautangan tayo na kililiktar.​—Isaias 12:2; Apocalipsis 4:11; 7:10, 12.

3. Akin a say baleg a balangkantis so makanepegan ed ontan a pangukom?

³ Akin a say baleg a balangkantis so makanepegan ed sayan pangukom? Unong ed ganggan ya inter nen Jehova ed si Noe​—tan diad panamegley to diad amin a totoo—​say agnakontrol a panagpaagos na dala so mankaukolan na dusan patey. Saya lamet so asaglawi ed Ganggan na Dios ed Israel. (Genesis 9:6; Numeros 35:20, 21) Niarum ni, diad silong na Mosaikon Ganggan say parehon pisikal tan espiritual a pikakaluguran so mansumpal ed ipapatey. (Leviticus 20:10; Deuteronomio 13:1-5) Diad loob na pigaran nilibon taon la, say Babilonia a Baleg so nankasalanan ed dala, tan sikato so sakey a baleg a milalawanan. Alimbawa, say totontonen ed panangisebel na Romano Katolikon Iglesia ed saray papari to a mangasawa so nansumpal ed malaknab ya imoralidad ed biang na dakel ed sikara, ya aliwan daiset ed saraya natan so adapoan na sakit ya AIDS. (1 Corinto 6:9, 10; 1 Timoteo 4:1-3) Balet saray manunan pankasalananan to, ‘a nankakasakey a mamaarap ya akasabi ed tawen,’ et saray makapakigtot iran kiwas na espiritual iran pilalawanan to​—ta saya lapud panangibangat to na katilaan tan say pidedeneng to ed saray abulok iran politiko. (Apocalipsis 18:5) Lapud diad kaunoran et tinmalona so kadusaan ed sikato, say mangatatawen ya ulop so mangiyaaniweng natan ed komaduan Aleluya.

4. Anto so isisimbolo na katuaan a saman ya asewek a manlapud Babilonia a Baleg so “sinmegep ed ando lan ando”?

⁴ Say Babilonia a Baleg so pinoolan a singa akubkob a syudad, tan say asewek a manlapud sikato so “sinmegep ed ando lan ando.” Sano say literal a syudad so pinoolan na managkubkob ya armada, say asewek so mantultuloy a mamaatagey legan a say dapol to et ampetang. Siopaman a manalin mangipaalagey lamet ed sikato leleg a manaasewek ni so napuldakan ed saray ngalab na inkaderal to. Lapud say asewek manlapud Babilonia a Baleg so mamaatagey “ed ando lan ando” diad kasampotan na kaukom to, anggapon balot so makapangipawil na saman a makasalanan a syudad. Naandi ed ando lan ando so palson relihyon. Peteg ya Aleluya!​—Ipareng so Isaias 34:5, 9, 10.

5. (a) Anto so gawaen tan ikuan na 24 a mamatatken tan apatiran mabilay a pinalsa? (b) Akin a say Aleluyan koro et mas makatandoron kanta nen saray koron Aleluya a kakantaen ed saray iglesia na Kakristianoan?

⁵ Diad asasakbay a pasingawey, anengneng nen Juan so apatiran mabilay a palsa ed kaliberliber na trono, kaiba na 24 a mamatatken a mangiretrato na saray mananawir na Panarian dia ed maglorian mangatatawen a kipapasen. (Apocalipsis 4:8-11) Natan anengneng to ira lamet leleg ya ikekelyaw da so mikatlon Aleluya ed kaderal na Babilonia a Baleg: “Tan saray duwamplo-tan-apat a mamatatken tan saray apatiran pinalsa so dinmakmomo tan nandayew ed Dios ya akayurong ed trono, tan inkuan: ‘Amen! Aleluya!’”b (Apocalipsis 19:4) Sayan engranden Aleluya a koro so kaaruman, sirin, ed say “balon kanta” na panangidayew ed Kordero. (Apocalipsis 5:8, 9) Sikara natan so mangikakanta ed koro a pananalo, ya iter ya amin a gloria ed Soberanon Katawan a Jehova lapu ed sigpot a pananalo sumpa ed baleg a balangkantis, say Babilonia a Baleg. Sarayan Aleluya so mas lalon makbaw nen say anggan anton Aleluya a kakantaen na koro diad simbaan na Kakristianoan, a ditan et si Jehova odino si Jah so nileglemew tan binalaw. Say ontan iran mansimpisimpitan a pankanta ed pakabalawan na ngaran nen Jehova so napepe la natan ed ando lan ando!

6. Siopan “boses” so nadngel, anto so ilagyat to, tan siopa ra so mibiang ed ebat?

⁶ Nen 1918 ginapoan nen Jehova so pamalangkap ed “saraman so tinmakot ed ngaran to, ankelag tan ankabaleg​—say akauna ed saraya et say alanaan iran Kristiano a sikara so inatey a matoor, a sikara so pinaoli to tan impasen to ra ed mangatatawen a rangko na saray 24 a mamatatken. (Apocalipsis 11:18) Akibiang ni so arum ed pankanta na saray Aleluya, ta isalaysay nen Juan: “Ontan met, sakey a boses so nanlapud trono tan kuanto: ‘Idayew yo so Dios tayo, amin yoran ariripen to, ya ontakot ed sikato, say ankelag tan say ankabaleg.’” (Apocalipsis 19:5) Saya so “boses” na Sangian nen Jehova, say Anak ton dili, si Jesu-Kristo, ya akatalindeg ed “leet na trono.” (Apocalipsis 5:6) Aliwa lambengat ed tawen noagta dia ed dalin, “amin yoran ariripen to” so mibiang ed pankanta, a tekep na alanaan a klasen Juan a mangipapangulo ed dalin. Agaylan baleg a liket na sarayan mibiang ed katutulok ed ganggan: “Idayew so Dios tayo”!

7. Kayari kaderal na Babilonia a Baleg, siopa ra so mangidayew ed si Jehova?

⁷ On, say baleg ya ulop so nibilang met ed sarayan ariripen. Nanlapu la nen 1935 sikara la so ginmapon pinmaway ed Babilonia a Baleg tan akaeksperiensia ed kasumpalan na sipan na Dios. “Papalaren toramay ontatakot ed si Jehova, saray ankelag tan ankabaleg.” (Salmos 115:13) Sano say singa balangkantis a Babilonia so naderal, minilyon ed sikara so mibiang ed “pangidayew ed Dios tayo”​—mikasakey ed Juan a klase tan amin a mangatatawen ya armada. Diad saginonor, saramay napaoli ed dalin, balanglan datin bantog odino andi, so agpanduwaruwaan a mankanta ed kaaruman ya Aleluya diad pakaamta a satan a Babilonia a Baleg so naandi la ed ando lan ando. (Apocalipsis 20:12, 15) Amin a dayew so niiter ed si Jehova lapud mananiweng a papanalo to sumpa ed abayag lan balangkantis!

8. Anton panamabiskeg so niiter natan ed sikatayo na mangatatawen iran koro ed dayew ya atasian nen Juan, sakbay a naderal so Babilonia a Baleg?

⁸ Agaylan panamabiskeg so niiter ed sikatayo pian sigpot a makapibiang ed kimey na Dios ed sayan panaon! Amin komon na ariripen nen Jah so mangideboto na puso tan kamarerwa ra ed pangiyabawag na saray panangukom na Dios, a pati ed engranden ilalo ed Panarian, natan, sakbay na kaekal tan kaderal na Babilonia a Baleg.​—Isaias 61:1-3; 1 Corinto 15:58.

‘Aleluya​—si Jehova so Ari!’

9. Akin a say tanol na unor ya Aleluya et ontanlan nagnap tan marakep a tuloy?

⁹ Wala niray arum a rason diad pangayaga, unong ya ituloy ya ibaga nen Juan ed sikatayo: “Tan nadngel ko so singa boses na sakey a baleg ya ulop tan singa ungol na dakerakel a danum tan singa tanol na ankakabaleg a karol. Akuan da: ‘Aleluya,c ta manari si Jehova a Dios tayo, say Makapanyarin-amin, so ginmapon manuley bilang ari.’” (Apocalipsis 19:6) Sayan kaunoran ya Aleluya so mangiyabawag na sigpot odino inkakompleto. Saya so makapanyarin mangatatawen a tanol, a nagkalalon makapelaw nen dinan man ya atooan a koro, nagkalalon matalonggaring nen dinan man a mangaraldalin a pelag-na-danum, tan lalon makapataktakot nen dinan man a karol ed sayan mundo. Sinelebraan na samplon nilibon mangatatawen iran boses say katuaan a si “Jehova a Dios tayo, say Makapanyarin-amin, so ginmapo a manuley a bilang ari.”

10. Diad anton pantanlos a nikuan a si Jehova so ginmapon manuley bilang ari kayarin nagba so Babilonia a Baleg?

¹⁰ Panon a nibaga a si Jehova so ginmapon manuley? Nilibo iran taon so apalabas nanlapud inpangibawag na salmista: “Say Dios so Arik a nanlapulad inmuna.” (Salmo 74:12) Say inkaari nen Jehova so abayag la, kanian panon a say sankatalbaan a koro so mankanta a si “Jehova . . . so ginmapo a manuley a bilang ari”? Diad satan, sano say Babilonia a Baleg so naderal, si Jehova so andian la na mapangtan kalaslasan a manamsam ed katutulok ed sikato a bilang say Sankatalbaan a Soberano. Agla makapansagyat so palson relihyon ed saray manuley ed dalin ya onsumpa ed sikato. Sanen say kadaanan a Babilonia so nagba ed sankamundoan ya uley to, nadngel na Sion so mananalon panangiyabawag: “Say Dios mo so nagmaliw ya ari!” (Isaias 52:7) Kayari na inkianak na Panarian nen 1914, say 24 a mamatatken so angiyabawag: “Misadsalamat kami, ed si Jehova a Dios . . . lapud binenbenan mo so baleg a pakayarim tan ginmapon manuley bilang ari” (Apocalipsis 11:17) Natan, kayari na inkibalatar na Babilonia a Baleg, say kelyaw lamet so nibalikas: “Si Jehova . . . so ginmapo a manuley a bilang ari.” Anggapo so ginaway-toon dios a mansiansian onsumpa ed inkasoberano na tuan Dios, si Jehova!

(Ituloy ed ontumbok a paway.)

[Saray paimano ed leksab]

[Kahon ed pahina 27]

“Sulat ed Sodoma tan Gomora”

Diad silong na onian paulo, say Daily Telegraph na London na Nobyembre 12, 1987, so angireport na nipaakar ed sakey a kerew ya inyarap ed General Synod na Church of England. Ibabaga na saya ya ekalen manlapud iglesia “iray Kristianon” homoseksual. Inkuan nen kolumnista a si Godfrey Barker: “Nen karuman et onia so maermen ya opinyon na Arsobispo na Canterbury: ‘No si San Pablo so mansulat na sakey a sulat ed Church of England, nayarin itepet tayo no anton klase na sulat iya.’” Si Mr. Barker mismo so nankomento: “Say ebat ed saya et sakey a sulat ed Sodoma tan Gomora,” tan inkuan to ni: “Singa naiisip nen Dr. Runcie [say arsobispo] a saya so nabasan singa ed Roma, Kap. 1.”

Inaon na saray managsulat iray salita nen Pablo ed Roma 1:26-32: “Lapu ed saya say Dios kinaindan to ra ed makapabaing a posapos. . . . Laki ed laki ginawa ra so agagamil a panlawan . . . dia ed inpakatalos da ed gangan na Dios, a saray managamil na saray ontan a bengatla, nepeg da so ompatey, aliwa lambengat a gawaen da ra no ag ingen abobonan da ni so saray mangawa ed sikara.” Sinampotan to: “Say panpapagaan labat nen San Pablo et saray totoon mimimisa. Say problema nen Dr. Runcie et say walad pulpito.”

Akin ya ontanla so problema na arsobispo? Onia so imbaga na baleg a paulon-balita na Daily Mail na London nen Oktubre 22, 1987: “‘Sakey ed taloran klero so bakla’ . . . Say kampanyan ekalen iray homoseksual so ‘mamasara na Church of England.’” Inaon na sayan report so balikas a “reverend” general secretary na Lesbian tan Gay Christian Movement a kuanto: “No awaten iyan kerew et nabuyak so Iglesia, tan saya so natebek na Arsobispo na Canterbury. Bilang pamadesir, panisiaan mi a 30 anggad 40 porsiento na klero ed Church of England et bakla. Tan sikara ni so sankaaktiboan a totoo ya ontutulong ed ministeryo na Iglesia.” Say ondaraiset a bilang na mimimisa so andi-duaruwan mangisisindag ed sakey a paraan na pandimla ed ombabaleg a ministeryon homoseksual.

Anto so diniside na iglesia na synod? Say kaslakan ed 388 a membro (95 a porsiento ed saray klero) so binmuto ed pabor a pakapuyen iman a kerew. Nipaakar ed saya, et onia so nagmaliw a komento na The Economist na Nobyembre 14, 1987: “Say Church of England et sumpa ed saray agamil na homoseksual, balet aliwan tanto. Sayan simba so diniside na general synod, a sikato so parliamento na Iglesia, nipaakar ed saray homoseksual a klero, a saray gawan homoseksual, aliwan singa saray pilalawanan tan pikakaluguran, et aliwan kasalanan: saratan lambengat so “insaew ed saray uliran’ a say ‘piaamong ed sekso so sakey a gawa na sigpot a pilalanor a manepeg labat ed loob na permanentin relasyon na panangasawa.’” Diad panangipareng ed talindeg na Arsobispo na Canterbury tan saray balikas nen apostol Pablo ed Roma 1:26, 27, et impanengneng na The Economist so sakey ya inpangaon ed saray salita nen Pablo ed tagey na paulon “Kabat nen San Pablo so kanonotan to.”

Kabat met nen Jesu-Kristo so kanonotan to tan imbaga to itan ed malinew iran balikas. Inkuanto a “lalon nitepel na dalin na Sodoma so Agew na Panangukom” nen say saray relihyonista a mangipupulisay ed mensahe to. (Mateo 11:23, 24) Si Jesus so angusar dia na panangiyalimbawa pian ipanengneng a saraman a pangulon relihyoso ya angipulisay ed Anak na Dios tan ed panangibangat to so lalon mauges ni nen say saray taga Sodoma. Ibabaga na Judas 7 a saramay taga Sodoma so anagmak “ed panlikna na dusa na andi angaan ya apuy,” a kabaliksan to so andi-anggaan a kadederal. (Mateo 25:41, 46) Agaylan grabe, sirin, so panangukom ed saray tatawagen a Kristianon papangulo a bulag a mangitotonton ed saray abulag iran pulok da a niarawi manlapud atagey iran estandarte na Panarian na Dios a mamaarap ed maawang, mabanday iran paraan na sayan mundo! (Mateo 15:14) Nipaakar ed palson relihyon, say Babilonia a Baleg, say boses a nanlapud tawen so manasagyat a walaay panangapora: “Ompaway kayo ed sikato, baley ko, pian ag kayo nalanor ed saray kasalanan to, tan ag kayo manlikna ed saray bakbak to.”​—Apocalipsis 18:2, 4.