Apocalipsis—Asingger la so Engranden Kapantokan To!
Kapitulo 41
Say Agew na Panangukom na Dios—Say Magayagan Pansumpalan To!
Pasingawey 15—Apocalipsis 20:11–21:8
Tema: Say karaklan a kioli; Agew na Panangukom, tan saray bendisyon na balon katawenan tan say balon dalin
Panaon na kasumpalan: Say Sanlibon Taon Ya Uley
1. (a) Anto so abalang na katooan sanen si Adan tan si Eva et nankasalanan? (b) Anton gagala na Dios so agnauman, tan panon tayon amta?
Bilang totoo, sikatayoy pinalsa pian manbilay ed ando lan ando. No si Adan tan si Eva et tinmulok ed saray ganggan na Dios, ag-ira komon inatey. (Genesis 1:28; 2:8, 16, 17; Eclesiastes 3:10, 11) Balet sanen sikaray nankasalanan, abalang da so inkayadyari tan bilay a nampara ed inkasikara tan ed ilalak da, tan nanari so patey ed katooan a bilang masebeg a kabusol. (Roma 5:12, 14; 1 Corinto 15:26) Anggaman ontan, say gagala na Dios a manbilay ed ando lan ando so ayadyarin katooan ed paraison dalin so ag-anguman. Lapud baleg a panangaro to ed katooan et imbaki to so bogbogtong ya Anak to ed dalin, si Jesus, ya inter to so ayadyarin atooan a bilay to bilang dondon para’d “dakel” ed saray anak nen Adan. (Mateo 20:28; Juan 3:16) Nausar la natan so legal a merito na bagat to ed pangipawil na mananisian totoo ed ayadyarin bilay ed paraison dalin. (1 Pedro 3:18; 1 Juan 2:2) Agaylan engranden rason para’d katooan a “mangayaga tan manliket”!—Isaias 25:8, 9.
2. Anto so ireport nen Juan ed Apocalipsis 20:11, tan anto so “baleg ya amputin trono”?
2 Lapud si Satanas et akakulong ed kaaralman, makagapo la so maglorian Sanlibon Taon ya Uley nen Jesus. Saya la so “agew” ya ingeter na Dios a “ginagala ton pangukom ed dalin pian panayaman na inkatunong diad panamegley na sakey a toon tinuro to.” (Gawa 17:31; 2 Pedro 3:8) Inyabawag nen Juan: “Tan anengneng ko so baleg ya amputi a trono tan saman so akayurong ed sikato. A diad arap to et say dalin tan say tawen so binmatik et anggapoy aromog a pasen a panayaman da.” (Apocalipsis 20:11) Anto iyan “baleg ya amputin trono”? Maseguron anggapoy arum noag say panangukom ya irongan na “Dios ya Ukom na amin.” (Hebreos 12:23) Natan sikato la so mangukom no siopa ed totoo so nagunggunaan ed dondon bagat nen Jesus.—Marcos 10:45.
3. (a) Anto so ipanengneng na katuaan a say trono na Dios so inkuan a “baleg” tan “amputi”? (b) Siopa so manggawa na pangukom ed Agew a Panangukom, tan ed anton basiyan?
3 Say trono na Dios so “baleg”, a mangidadanet ed katalonggaringan nen Jehova a bilang Soberanon Katawan, tan satan so “amputi,” a manatawag na imano ed ayadyarin inkatunong to. Sikato so kaunoran ya Ukom na katooan. (Salmo 19:7-11; Isaias 33:22; 51:5, 8) Anggaman ontan, sikato so angipabtang na kimey a panangukom ed si Jesu-Kristo: “Ta say Ama agmangukom na siopaman a too inter to ingen so amin a pangukom ed Anak.” (Juan 5:22) Kaiba nen Jesus et saray 144,000, a pinabtangan na “pakayariy pangukom . . . ed sanlibon taon.” (Apocalipsis 20:4) Anggan ontan, siansian si Jehova so panlapuan iray estandarte ed pandesidi no antoy nagawa ed balang sinansakey legan na Agew na Panangukom.
4. Anto so kabaliksan na “say dalin tan say tawen so binmatik”?
4 Panon a “say dalin tan say tawen so binmatik”? Saya so parehon tawen a tinmaynan a singa sakey a lukot ed pangilukas na komanem a tatak—saray pakayari na manuuley a katooan a “niparaan parad apuy tan nireserba ed agew na panangukom tan ed kadederal na agmaridios a totoo.” (Apocalipsis 6:14; 2 Pedro 3:7) Say dalin so say organisadon sistema na bengabengatla ya onkukurang ed saya. (Apocalipsis 8:7) Say kadederal na atap ya ayep tan saray arari ed dalin tan armada ra, a pati saramay walaan na marka na atap ya ayep tan saramay mandayew ed talintao to, so tutukoyen na itaynan na sayan tawen tan dalin. (Apocalipsis 19:19-21) Lapud say pangukom ed dalin tan tawen nen Satanas et agawa la, mangiganggan lamet na sananey ya Agew na Panangukom so Baleg ya Ukom.
(Ituloy ed ontumbok a paway.)