Kasin Gagawaen Mo so Linawa na Dios?

DIAD panagkabkaabungan a ministeryo ra, nabet na duaran tasi nen Jehova so sakey a pari na Episcopal Churh. Sikato so singa maabig a too, balbasan, ngalngalin manedad na 60, akakamisita a walaan na ngaran na iglesia to. Anggapoy suyat, inkuan to: “Kaliktan kon saray membro na iglesia mi so singa inkaseseg yo ed panangilaknab na Salita, balet kerewen ko ed sikayo ya agkayo la ondadalaw ed ayaman ko.”

On, walaray dakel a totoon mandinayew ed kimey na Tastasi nen Jehova tan sikaray kokomendaan ed seseg tan inkasigla ra. Ingen, sikaray ag-interesado ed gagawaen na Tastasi, nisay ipapasen da a sikaran mismo so manggagawa ed satan. Anggaman ontan, say singa mankontraan a kipapasen na sarayan nagagawa so aliwan balo. Satan so naimano nen Jesus ed agew to, tan mapekder ton indanet so punto diad panamegley na sakey a makatenyeg-kanonotan ya ilustrasyon.

“Bangbalet, anto so isisip yo? Sakey a too wala’y duaran anak ton lalaki; et sikatoy linma ed inmona, a kuan to, Anak, onla kan mankimey natan ed uvasan. Et sikato inmebat tan inkuan to, Siak onlaak, katawan: et ag linma. Et linma ed komadua, tan onman met so imbaga to. Et inmebat tan inkuan to, Ag ko; balet nagogonoyan nagbabawi, tan linma. Siopa’d sikara’n dua kasi so angonor na linawa nen ama to?”​—Mateo 21:28-31, NW.

Say ebat so malinew. Singa say karaklan ya akarengel ed si Jesus, sikatayo’y onebat, “Say unor.” Balet tuan malinew a, diad panamegley na satan ya ilustrasyon, ipapaimano nen Jesus ed sikatayo a say panggawa ed kaliktan na ama so importanti. Anggaman say komadua ya anak so angibaga ya agto labay so onla, sikato’y linma tan sikato so kinomendaan. Say panggawa ed suston klase na kimey so importanti met. Say komaduan anak so kinmiwas diad impankimey ed ubasan na ama to; sikato so agpinmaway tan nankimey ed dilin ubasan to.

Anto so isusuhere na amin na saya ed sikatayo? Anto so kakaukolanen na Dios ed managdayew natan? Anto so naaralan tayo manlapud bilay nen Jesus ya ontulong ed sikatayo diad panggawa ed linawa na Ama? Saraya so importantin tepet, tan say pananap tayo ed suston ebat et kabaliksan to so anggapoy anggaan a pankaabigan tayo, lapud say “mangoonor ed linawa na Dios onsiansia lawas.”​—1 Juan 2:17; Efeso 5:17

Anto so “Linawa na Dios”

Say noun a “linawa” so nilistan masulok a 80 a danay ed Comprehensive Concordance of the New World Translation of the Holy Scriptures. Diad ngalngali 60 ed sarayan inkagawa (odino ngalngalin 75 porsiento a danay) say tutukoyen et say linawa na Dios. Saray balikas a singa say “linawa na Dios,” “linawa nen Amak,” so pinmatnag ed 20 a danay. Manlapud saya et nanengneng tayo a say madibinon linawa so nepeg a magmaliw a sankaimportantian ed sikatayo. Say panggawa ed linawa na Dios so nepeg a manuna ed kabibilay tayo.

Diad Ingles say noun et “linawa” et kabaliksan to so ‘pilalek, pitamitam, determinasyon, bengatlan panpilalekan, nagkalautla ed pinili odino determinasyon na sakey a walaan na autoridad odino pakayari.’ Kanian sirin, si Jehova, say Atagey ya Autoridad, so walaan na linawa, sakey a pilalek odino determinasyon. Anto itan? Say Kasulatan so mangibabaga ed sikatayo a diad sakey a kabiangan et “linawa na [Dios] ya amin a totoo so niliktar komon tan nawalaan na suston pikakabat ed katuan.” (1 Timoteo 2:4, NW) Si Jesu-Kristo tan saray inmunan Kristiano so nankimey a sigpot-kamarerwa ed pangitarok ed sayan suston kakabatan ed arum.​—Mateo 9:35; Gawa 5:42; Filipops 2:19, 22.

Siopa so manggagawa ed linawa na Dios natan? Diad ngalngali duaran bilyon a totoo a mankuan a patumbok nen Jesu-Kristo, pigara so kapara na malalangwer ya anak ed ilustrasyon nen Jesus, a linma tan nanggawa ed linawa na ama to? Say ebat so agmairap ya anapen. Saray tuan mananumbok ed bakat nen Jesu-Kristo so manggagawa ed kimey ya imbaga ton gawaen da: “Say evangelio kaokolan ya nipulong ya unona ed saray amin a naciones.” (Marcos 13:10) Saray Tasi nen Jehova, a manbilang na masulok ya apatira tan kapalduan milyon ed sankamundoan, so aktibon mangipupulong ed maong a balita na Panarian na Dios tan mangibabangat ed arum, a mangituturo ed Panarian bilang say alenleneg ya ilalo na katooan para’d kareenan tan kaligenan. Kasin sika so sigpot a mibibiang ed panggagawa na linawa na Dios? Kasin sika so mangipupulong ed maong a balita na Panarian a singa ginawa nen Jesus?​—Gawa 10:24; Hebreos 10:7.

Pakaromog na Gayaga ed Panggawa na Linawa na Dios

Bangta wala so gayaga ed panaral ed no anto so linawa na Ama, wala so babaleg a gayaga ed pangibangat ed arum na linawa na Dios. Aromog nen Jesus so gayaga diad pangibangat ed totoo nipaakar ed linawa na Dios. Saman so singa tagano to. (Juan 4:34) Sikatayo met so makaromog na tuan liket no sikatayo so manggawa ed singa ginawa nen Jesus, sanlanti, say pangipulong tan pangibangat ed bengatlan imbangat to, saray bengatlan inawat to ed si Ama to. (Mateo 28:19, 20) Unong ya insipan nen Jesus, “no amta yo so sarayan bengatla, mapalar kayo no sikaray gawaen yo.”​—Juan 13:17.

Diad pangiyilustra: Sakey ya ina ya agano nin linmoob lamet ed sigpot-panaon a ministeryo na panagpayunir so angikuan: “Say pakanengneng a masnag so lupa na iyaaralan na Biblia legan a saray nanduruman katuaan na Biblia so onsesepsep ed puso et makapaliket a tuloy! Sakey a gayaga ed siak so pakaimano ed sakey ya iyaaralan a mangisulat ed amin a kasulatan sakbay na panaral tan mangala na nota legan na panagaral ta pian sikato so makaebat ed antokaman a repason tepetepet ed saginonor.” Sakey ni ed iyaaralan to na Biblia so awalaan na pankanawnawan makaamta ed katuaan sanen sikato so katayatdang ni. Natan sikato so akapiasawa la tan mapaga nipaakar ed pigaran personal iran problema, sikato so manpirawat a makaromog na Tastasi. Agaylan sikato so maliket sanen say payunir ya agin bii so akaromog ed sikato! Malikeliket so kalangweran a bii a nituloy so panagaral to na Biblia.

Pamasiansia ed Gayaga ed Panggawa ed Linawa na Dios

Si Arin David na inmunan Israel so sakey a nanggunaet a manggawa ed linawa na Dios ed amin a bilay to. Anggaman ed saray kairapan tan desdes a nitarok sumpad sikato, sikato so pinuyanan a mangibaga: “Makaliket ak a mangunor na linawam, O Dios ko; on, say gangan mo wala ed dalem na pusok.” (Salmo 40:8) Say panggawa ed linawa nen Jehova so kabiangan na bilay nen David, diad mismon inkatoo to. Satan so sekreto na ag-onkupas a gayaga to ed panlilingkor ed si Jehova. Say panggawa ed linawa na Dios so aliwan mairap ed si David. Imbes, satan so makapaliket, bengatlan nanlapu ed puso to. Anggaman no maminsan si David so akagawa na kasalanan tan inpakalukso, diad interon bilay to, sikato so akipuligesgesan a gawaen so anggaay nayarian to ed panlingkor ed Dios, si Jehova.

No maminsan, say gayaga tayo so onkupas. Nayarin sikatayo so magmaliw a mabanabanal odino nagogonigon. Angangko nayarin sikatayo so naaaburido ed apalabas tayo, say konsiensia tayo so mangogonigon ed sikatayo lapud pigaran lingon agawaan tayo ed abayag la. Mabetbet, natalonaan tayo irayan liknaan diad nagkalalon panaral ed Salita na Dios. Nayarin gagala tayo so pangiyukit ed ganggan na Dios ed “dalem na puso” tayo, a singa ginawa nen David. No panggunaetan tayon gawaen so linawa na Dios a sigpot-kamarerwa, salanti, diad anggaan na nayarian tayo, sikato so manumang ed sikatayo lapud sikato so matoor.​—Efeso 6:6; Hebreos 6:10-12; 1 Pedro 4:19.

Makapainteres, diad Hebreos 10:5-7, inaon nen apostol Pablo iray salita nen David diad Salmo 40:6-8 tan inyaplika iratan ed si Jesu-Kristo. Diad impanggawa ed ontan et si Pablo so manutukoy ed no panon so inkamaapit nen Jesus ed si Ama to. Say salitan Hebreo para’d “linawa” so mangipapakabaliksan na ‘pangayaga, pilalek, pabor, odino panliket.’ Kanian, say Salmo 40:8, NW so nayarin nabasan onia, nipaakar ed Kristo: “Manliket a mangunor na linawan, O Dios ko, siak so manggayaga.”a Si Jesus et kinaliktan ton gawaen so makapaliket ed Ama to. Nagkalalo ni so ginawa nen Jesus ed no anto so kekerewen ed sikato. Ginawa to so maapit ed puso na Ama to, tan nangayagaan to so panggawa ed satan.

Say interon bilay nen Jesus so akasentro ed panangibangat ed arum ed no anto so linawa na Dios tan no anto so nepeg dan gawaen pian nagamoran so bendisyon na Dios. Sikato so sigpot-panaon a managpulong tan managbangat tan akaromog na baleg a gayaga ed panggagawa ed satan a kimey. Sirin makatunongan labat a legan a lalon gawaen tayo so kimey nen Jehova, nagkalalon gayaga so nagamoran tayo. Kasin sikayo met so makapanlingkor a sigpot-panaon ed panagpulong a kimey ta pian say gayaga yo so ombulaslas?

Say nagkalalo nin tulong ed pamasiansia na gayaga ed panggawa na linawa na Dios et say pansiansian akapasakey so nonot tayo ed arapen. Satan so ginawa nen Jesus. “A sikato lapu ed gayaga a niyan ed arap to sinongdoan to so cruz (panamairapan a kiew, NW), ya inbantak to so baing.” Para’d sikato, say gayaga so pamaneknek na inkatoor ed Dios anggad kasampotan tan insan nagamoran so tumang ya inkaari ed nikawanan a lima na Ama to.​—Hebreos 12:2.

Nonoten so arapen a gayaga a nagamoran na saraman so mantultuloy a manggawa ed linawa na Dios. Nanengneng da so kaderal na saraman so mangipipilit ed panggagawa ra na dili ran sinisiblet a linawa anggan saya so pansengegan na panirap na saraman so manggugunaet a manggawa ed linawa na Dios. (2 Tesalonica 1:7, 8) Isipen so gayaga na napaolin inararo ed bilay diad pakagamor na pankanawnawan panaral tan manggawa ed linawa na Dios. Odino konsideraen so gagala na Dios ed pangipawil ed dalin a magmaliw a Paraiso. Tan kaunoran, nonoten pa so kawayangan a resulta na sigpot a kaderal nen Satanas, say sumusumpa ed linawa nen Jehova.

On, say panggawa ed linawa na Dios natan so mangitarok na baleg a gayaga natan tan agmanganggan liket ed arapen. Antokaman so kiwas a naawat tayo ed panagpulong a kimey, komon ta aligen tayo so ehemplo nen Jesus ed pakawalaan na liket ed panggawa na linawa na Ama to.

[Paimano ed leksab]