Manlilingkor ed si Jehova Tekep na Gayaga
“Manlinkor kayo ed si Jehova tekep na panliket. Ondago ed arap to tekep na magayagan eyag.”—SALMO 100:2.
1, 2. (a) Panon a say inkarasa so nitarok ed manuna ed Berlin, Alemanya, balet panon so nansumpalan na krusada parad “Sanlibon-Taon a Reich”? (b) Anton panduma so naimano ed 1936 diad Olympia Estadyum ed samay Hulyo 1990, tan diad anto a nikiwit so gayaga na internasyonal a grupon nanasamblea?
SAY eksena so Estadyum na Olympia, Berlin. Limamplo tan apat a taon ed imbeneg, sayan marakep ya estadyum so nagmaliw a sentro na gotgotan sanen say diktador na Nazi a si Adolf Hitler so nireport ya agnangimano ed sakey ya andeket ya Americanon bumabatik ya analo na apatiran medalyan balitok. Peteg a, sakey ya atake, ed ibabagan inkarasa nen Hitler ed “inkasuperyor na Aryan”!a Balet natan, nen Hulyo 26, 1990, saray andeket, amputi, duyaw—a nankakasakey a totoon nanlapud 64 nasyonal a grupo, 44,532 ed amin–so nantitipon dia parad “Puron Lenguahe” Distrito Kumbension na Tastasi nen Jehova. Agaylan gayaga so linmippua ed saman a ngarem na Huebes! Ontumbok ed paliwawa ed bautismo, 1,018 iran kandidato so inmeyag na “Ja!” tan lamet, “Ja!” diad pamalet na dedikasyon da ed si Jehova a Dios, a gawaen so linawa to.
2 Kinaukolan to so 19 a minutos ed sarayan balon Tasi ya onalis a manlapud estadyum a mamaarap ed panagbautismoan a luak. Tan kaleganan na saraman a minuto, maksil iran tipak so nadngel ed interon maawang ya arena. Agnaeksperiensan balot na saray analo ed Olympic Games so singa ontan natan a mangaabrasa ed sarayan nilasus, a nanlapud dakel a nasyonal iran grupo, a mangipapanengneng na pananisia a mangonkesta ed mundo. (1 Juan 5:3, 4) Say gayaga da so nikiwit a malet ed talek a say uley na Panarian na Dios diad panamegley nen Kristo so peteg a mangitarok na sanlibon taon na maglorian bendisyon ed katooan.—Hebreos 6:17, 18; Apocalipsis 20:6; 21:4, 5.
3. Anton katuaan so indanet na talek na saray kumbensionista, tan panon?
3 Anggaporay rasyal o nasyonalistikon panbubusolan dia, ta amin so mansasalita na puron lenguahe na Salita na Dios, sirin mangidadanet na katuaan ed saray salita nen Pablo: “Ta peteg a natebek ko a say Dios so aliwan mangiduma, balet diad balang nasyon say toon ontakot ed sikato tan mankimey na inkatunong so awaten to.”—Gawa 10:34, 35; Sofonias 3:9.
4. Diad silong na anto iran kipapasen a karaklan na saray kumbensionista et nagmaliw a mananisia, tan panon so inka-ebat na saray pikakasi ra?
4 Say baleg a kabiangan na sarayan kumbensionista ed Berlin so nagmaliw a mananisia kaleganan na andukey a taotaon na panamairap, a sayakupen so panaon na Nazi (1933-45) tan say sosyalistikon panaon a tinmunbok ed Bukig ya Alemanya, a say pananebel ditan ed saray Tasi nen Jehova et legal a kapkapanekal nen Marso 14, 1990. Sirin, dakel ed sikara so “angawat na saray salita ed silong na dakel ya irap tekep na liket ed masanton espiritu.” (1 Tesalonica 1:6) Walaan ira natan na babaleg a kawayangan a manlingkor ed si Jehova tan say liket da so andian na ketegan.
Saray Okasyon parad Gayaga
5. Panon a sinelebraan na Israel so impangiliktar nen Jehova ed Ambalangan Dayat?
5 Say impangibulos ed saray agagi tayo ed Mamabukig ya Europa tan kaplesan a kabiangan na Aprika tan Asya, so mangipanonot ed sikatayo ed saray impangiliktar nen Jehova ed saray totoo to nen inmuna iran panaon. Nanonotan tayo so mabiskeg a gawa nen Jehova ed Ambalangan Dayat, tan no panon a say kanta na pisasalamat na Israel et sinmabi ed sakey a kapantokan ed sarayan salita: “Siopa ed saray dirios so singa sika, O Jehova? Siopa so singa sika, pinaneknekan mo so inkasika a mabiskeg ed inkamasanto? Say Sakey a takotan a tekep na saray kanta na dayew, say Sakey a manggagawa na pakelaw.” (Exodo 15:11) Natan, agta mantultuloy tayo a manliket ed makapakelaw a bengabengatlan gagawaen nen Jehova parad totoo to? Peteg ya ontan tayo!
6. Anto so naaralan tayo a manlapud impaneyag ed gayaga na Israel nen 537 K.K.P.?
6 Dinmaak so gayaga nen 537 K.K.P. sanen say Israel so nipawil ed dalin to kayariy inkakautibo ed Babilonia. Makapanbelyaw natan so nasyon nen Jehova, unong ya inpropesiya nen Isaias: “Nia! Say Dios so kilalaban ko. Manmatalek ak ed sikato tan ag-ontakot; ta si Jah Jehova so kasil ko tan biskeg ko, tan sikatoy sinmabin kilalaban ed siak.” Agaylan panangitandoro! Tan panon ya ibalikas na nasyon itan a gayaga? Intuloy nen Isaias “Diad satan ya agew petepeteg ya ikuanyo: ‘Misalamat ed si Jehova, sikayon totoo! Ontawag ed ngaran to. Ipakabat ed limog na totoo so pidedeneng to. Bitlaen a satan a ngaran to so niatagey. Kantaan si Jehova, ta sikatoy nanggawa na alablabas.’” Nayaryan da natan so “oneyag ed gayaga” diad panggawa ed mabiskeg iran gawa ton “nipakabat ed amin a dalin,” a singa gagawaen na nibulos ya ariripen nen Jehova natan.—Isaias 12:1-6.
Gayaga ed Kimey nen Jehova
7. Anto iran killiktar so manawag na kitandoro nen 1919?
7 Diad modernon panaon saray ariripen nen Jehova so ginmapon inmeyag ed gayaga sanen ginamoran tora na makapakelaw a kililiktar nen 1919. Nen Marso 26 ed satan a taon, nibulos a manlapud prisoan iray membro na Mananguley ya Ulop ed Estados Unidos a nipangaw ira na siameran bulan ed silong na palson dalem a sedisyon. Agaylan engraden selebrasyon so agawa ed pangabrasa lamet ed sikara diad Brooklyn Bethel! Niarum ni, amin na saramay alanaan a nakdaan so makapanliket la natan a nibubulos ed espiritual a manlapud Babilonia a Baleg, say sistema na relihyon a walan inbalor nen Satanas so interon mundo.—Apocalipsis 17:3-6; 18:2-5.
8. Anton manopresan paway so niyabawag ed Cedar Point a Kumbension nen 1919, tan anton tawag na kurang so niiter?
8 Say maawaran ya agawgawa nen l919 so abalangetan na say kumbension na totoo na Dios ya agawa ed Cedar Point, Ohio, E.U.A, Setyembre 1-8. Diad komaliman agew na satan ya asamblea, “Kaiban-Kumikimey ya Agew,” say presidente na Watch Tower Society, a si J. F. Rutherford, so nanpaliwawa ed 6,000 ed makapabiskeg a paliwawa ya atituloan na “Panangiyabawag na Panarian.” Kayarin impanbinsabinsa ed Apocalipsis 15:2 tan Isaias 52:7, imbaga to ed saray dumerengel to a sakey a balon magasin, The Golden Age (natan et kabat ya Awake!), so nipalapag kada duaran simba, nagkalautla para ed lawak a panangibunog. Diad impansampot inkuanto: “Saramay nagnap a debotado ed Katawan; saraman so andi-takot, a saray puso ra so puro, ya inaro da so Dios tan say Katawan a Jesus ed interon kanonotan da, biskeg, kamarerwa tan inkasikara, unong ya iyabuloy na pankanawnawa et maliket a mibiang ed sayan kimey. Onkerew ed Katawan na panangigiya tan direksyon pian gawaen to kayon tua, matoor, tan sakey ya onsianon embahadores. Insan, tekep na kanta na gayaga ed puso yo, onla kayon manserbi ed sikato.”
9, 10. Panon ya inaligwas nen Jehova so palapagan a Panag-Bantayan tan Awake! iran magasin?
9 Satan a “kanta na gayaga” so walan nadngelan ed interon dalin! Anggapoy panduwaruwa, a dakel ed saray managbasa tayo so akinabang, ed pamarakel na sirkulasyon na magasin ya Awake! ed kaplesan 12,980,000 iran kopya na kada paway ed 64 iran lenguahe. Bilang mabiskeg ya instrumento ed pangitonton na interesadon totoo ed katuan, say Awake! so nanserbin kaiba na Say Panag-Bantayan. Diad sakey a bansa ed Oriental, sakey a payunir ya agin bii, a mankikimey ed regular a rota na magasin, so asurpresa a makaromog a kada mangibunog na peles iran magasin, say unabung so mangidona na $7 (E.U.) ed sankamundoan a trabaho na saray Tasi nen Jehova—petepeteg a pangipanengneng na panamabli ed kimey ed Panarian!
10 Natan onggagapo ed koma-112 taon na pangipalapag, say Panag-Bantayan a magasin so walaan na sirkulasyon a 15,290,000 ed 111 iran lenguahe, 59 ed sarayan edisyon so nipapalapag a manbabansag ed sankamundoan a walaan na parehon karga. Bilang matoor a manangasikaso, say alanaan a nakdaan so manpatuloy a mangiter ed manamablin bumabasa “ed sukat na [espiritual] a tagano ed dugan panaon.” (Lucas 12:42) Kaleganan na 1990 saray Tasi nen Jehova so akapangipalima na 2,968,309 iran suskripsion ed saraman a duaran magasin, sakey ya 22.7-porsienton indaak nen say 1989.
Ondaraak so Gayaga
11. (a) Anton tawag so angimbitaan ed totoo na Dios ed Cedar Point nen 1922? (b) Panon a walan nipalaknab so eyag na gayaga?
11 Say gayaga so dinmaak unong a saray totoo na Dios, natan et 10,000 ed bilang, so nantipon parad komaduan kumbension ed Cedar Point, nen Setyembre 1922, dingan na 361 ya abautismoan. Diad diskurso to a “Say Panarian ed Tawen so Asingger La,” a nibased Mateo 4:17, si Agin Rutherford so angitonton ed makapaalagey a pantok: “Nakaukolan a nakabatan na mundo a si Jehova et Dios tan si Jesu-Kristo so Ari na saray arari tan Katawan na kakatawan. Saya so agew na saray agew. Nengneng yo, say Ari manuley la! Sikayoray mangipalapag ya ahentes to. Sirin, iyabawag, iyabawag, iyabawag, so Ari tan panarian to.” Saraman so inmeyag a maksil ed saman a kumbension so walan linmaknab ed bilang ya angga ni ed 1989 a musulok nen 6,600,000 so atugyop ed 1,210 iran kumbension na saray Tasi nen Jehova ed sankamundoan, no iner a walaay abautismoan 123,688.
12. (a) Diad anton agnasukat a gayaga so pibibiangan natan na totoo na Dios? (b) Panon tayon balansien so linkor tayo ed si Jehova dingan na katutulok ed “atagtagey a pakauley”?
12 Nananamen na saray Tasi nen Jehova so kawayangan da. Manuna ed amin, sikaray manliket ed modernon-agew a kasumpalan na saray salita nen Jesus: “Tan nakabatan yo so katuaan, tan say katuaan gawaen to kayo a bulos.” Agaylan gayaga so kibulos a manlapud saray misteryo tan ananito na palson relihyon! Agaylan agnasukat a gayaga a nakabatan si Jehova tan Anak to tan magmaliw a kakimeyan ira, a tekep na ilalo ed andi-anggaan a bilay! (Juan 8:32; 17:3; 1 Corinto 3:9-11) Pablien met na saray ariripen na Dios sano say “atagtagey a pakauley” na sayan mundo, a panbibilayan da et manrespeto ed kawayangan da a mangiyabawag na maglorian ilalo ed Panarian nen Jehova ed silong nen Kristo. Mabulos ira a “manbayar ed si Caesar so saray bengatlan kien nen Caesar,” kaleganan to babayaran da so “saray bengatlan kien na Dios.”—Roma 13:1-7; Lucas 20:25.
13. Panon so impangibalikas na saray Tasi nen Jehova ed gayaga diad impangibulos a manlapud panamairap?
13 Angaman ontan, no say atooan a pakauley et mangamper ed sayan obligasyon ed Dios, onebat iray Tasi nen Jehova a singa saray apostoles: “Tuloken min ununa so Dios nen saray totoo.” Diad saman ya agawa, kayarin saray manuley so inbulos daray apostoles, saraya “so linma ed dalan da . . . a malikeliket.” Panon dan imbalikas iman a gayaga? “Inagew-agew diad templo tan ed kab-kaabungan intultuloy da ya andi-tunda so panagbangat tan iyaabawag so maong a balita nipaakar ed Kristo, Jesus.” (Gawa 5:27-32, 41, 42) Ontan met, say modernon-agew a Tastasi nen Jehova so manliket sano makagamor ira na babaleg a kawayangan pian batiken so ministeryo da. Diad dakel iran dalin no iner a nilukasan nen Jehova so dalan, imbalikas da so ampetang a gayaga diad pangiter na sigpot a pantasi ed ngaran nen Jehova tan say onsasabin Panarian diad panamegley nen Jesu-Kristo. Ipareng so Gawa 20:20, 21, 24; 23:11; 28:16, 23.
Mansusungdo a Tekep na Gayaga
14. Panon a sayan gayaga a bunga na espiritu et palaknaban to so kabaliksan a walad diksiyunaryo?
14 Anto iyan ampetang a gayaga a naeeksperiensia na saray Kristianos? Sikato so mas-aralem tan lalon permanente nen say maganganon gayaga ed panalo ed Olympic Games. Sikato so bunga na masanton espiritu na Dios, ya iiter na Dios ed saramay “ontutulok ed sikato bilang manuley.” (Gawa 5:32) Say Webster’s a diksiyunaryo ipaliwawa to so gayaga bilang ‘araldalem-a-nilamut nen say liket, lalon maliwawa odino demostratibo nen say inkagayaga.’ Diad Kristiano, say gayaga so walaan na nagkalalon kabaliksan. Unong ta mikonekta ed pananisia tayo, sakey itan a mabiskeg, manamaseseg a kalidad. “Say gayaga nen Jehova so biskeg mo.” (Nehemias 8:10) Say gayaga nen Jehova, a babayuboan na totoo na Dios, so lagpasan to so akintapew a panliketan na totoo a manlapud silalaman, minumundon likeliket.—Galacia 5:19-23.
15. (a) Diad eksperiensia na matoor iran Kristianos, panon a walan nilaktip na sungdo so gayaga? (b) Mangisitas na pigaran kasulatan a makapangiter na pamaseguro nipaakar ed pamasiansia na gayaga.
15 Imanoen iray agagi ed Ukraine. Sanen say ‘atagtagey a pakauley’ et imbantak toray nilibo ed saraya diad Siberia nen asasakbay a 1950’s, sikaray apairap na ankakabaleg iran kairapan. Saginonor, sanen say pakauley so angabobon na sakey ya amnestiya, sikaray misasalamat, balet aliwan amin ed sikara so pinmawil ed dalin-a-nianakan da. Akin? Saray sagpot da ed Bukig so walan angipanonot ed sikara ed Santiago 1:2-4: “Ibilang yon amin a liket, agagik, sano naabot yoray nanduruman pakasubokan, a kabkabat yo a sayan asubok a kalidad na pananisia gawaen to so sungdo.” Labay dan manpatuloy a mansungdo ed satan a magayagan panagani, tan agaylan gayaga so wala ed agano niran kumbension na saray Tasi nen Jehova ed Poland ya abrasaen iray Tasi a manlapud arawin bukig ontan met ed saray pulon komunidad na Pacifico. Say sungdo tan gayaga so walan nanulopan a manbunga na sayan bunga. Peteg, amin tayo so mansungdo a sigagayaga ed linkor ed si Jehova a mangikuan: “Ingen, no say siak, itandorok a mismo si Jehova; siak so mangayaga ed Dios say kilalaban ko. Si Jehova say Soberanon Katawan so manunan biskeg ko.”—Habacuc 3:18, 19; Mateo 5:11, 12.
16. Panon a napaseseg tayo na saray maabig ya alimbawa di Jeremias tan Job ed lawak a serbisyo?
16 Panon, sirin a napansiansia tayo so gayaga sano mantasi ed limog na inmawet-ulon sumusumpa? Nodnonot yo a saray propeta na Dios so nansiansia ed magayagan indengan ed mipadparan sirkumstansya. Si Jeremias inkuanto ed silong na subok: “Saray salitam so nalmoan, tan ginapoan kon kanen ira, tan say salitam so nagmaliw ed siak a kitandoroan tan pangayagaan na pusok; lapud say ngaran mo so nitawag ed siak, O Jehova na saray ehercitos.” (Jeremias 15:16) Agaylan pribilehyo so natawag ed ngaran nen Jehova tan mantasi ed satan a ngaran! Say maseet a personal a panagaral tan sigpot a pibibiang ed saray Kristianon miting so mamabiskeg ed sikatayo a mantultuloy a manliket ed say katuaan. Say gayaga tayo so nipanengneng diad itsura ed ikiwas ed lawak tan ed say Panarian ya imis tayo. Anggan diad silong na ampait a subok, si Job so akayarin angibaga ed saray kalaban to: “Siak so onimis ed sikara—sikaray agmanisia–tan say liwawa na lupak so agda nibantak.” (Job 29:24) Singa si matoor a Job, agtayo magmaliw a maermen sano saray sumusumpa so mamalaw ed sikatayo. Mantultuloy ya onimis! Say itsuray lupa tayo so mangidalangirang na gayaga tayo tan sirin makagamor na saray talineng.
17. Panon a say sungdo a tekep na gayaga et manbunga?
17 Kaleganan a kobrian tayoray teritorya tayo a maparanay, say sungdo tayo tan gayaga so nayarin manglagyat ya onkiling ed matunong iran totoo tan mamaseseg ed inkasikaran manusisa ed maglorian ilalo a bebenbenan tayo. Agaylan gayaga so pangikondukta na saray panagaral na Biblia a maparanay! Tan kaleganan ya ipasepsep da ed puso ra iray mablin katuaan na Salita na Dios, agaylan gayaga so nalikna tayo sano diad kasampotan et kaiba ra ed serbisyo ed si Jehova. Insan nayarian tayon ikuan, so singa inbaga nen apostol Pablo ed saray balon mananisia ed agew to: “Tan anto so ilalo tayo tan gayaga tayo odino balanget na kitandoro—akin agta dia tua ed sikatayo? ed arap na Katawan tayon Jesus ed say kiwawala to? Sikayon peteg so gloria tan liket mi.” (1 Tesalonica 2:19, 20) Tua, a makapenek a gayaga so naromog sano nitonton iray balo ed sayan katuaan na Salita na Dios tan ed pananulong ed sikara a magmaliw a dedikado, abautismoan a Tastasi.
Gayagan Makasustine
18. Anto so makatulong ed sikatayo ed nanduruman modernon-agew iran subok?
18 Diad inagew-agew a bilay tayo, dakel a situasyon so mankaukolan na sungdo yo. Say pisikal a sakit, panermen, tan ekonomikon kairapan, so pigara labat. Panon a say Kristiano et napansiansia to so gayaga pian natalonaan iratan a pakasubokan? Saya so nagawaan diad panamegley na pangimano ed Salita na Dios parad ligliwa tan giya tayo. Say pamasa odino idengel ed saray salmo so makapangitarok na pakarepreskoan ed panaon na subok. Tan imano yo so makabat a simbawa nen David: “Paawit mo so awit mo ed si Jehova a mismo; tan sikaton mismo sustinien toka. Agton balot paulianan so matunong a natetenyeg.” (Salmo 55:22) Si Jehova so peteg a “Dumerengel na pikakasi.”—Salmo 65:2.
19. Singa si David tan si Pablo, anton talek so niwala ed sikatayo?
19 Say organisasyon nen Jehova, diad panamegley na palapagan to tan saray matatken ed kongregasyon, so lawas akaparaan ya ontulong ed sikatayo, a walan maletey tayo a totoo, pian talonaan iray problema tayo. Si David ampetapetang a nansimbawa: “Ipiam ed si Jehova so dalan mo, manmatalek ka ed sikato, tan sikato a mismo so onkiwas.” Nayarin ibaga to met: “Tobonbalo ak nen saman, siak so minmasiken la, balet ta anggapo ni anengneng kon matunong ya apaulianan a sigpot, nisay saray anak to so mipapayabol na tinapay.” Diad pililimog tayo ed Kristianon kongregasyon, nabidbir tayo a “say kilalaban na saray matunong sikato so manlapud si Jehova; sikato so biskeg da ed panaon na gulo.” (Salmo 37:5, 25, 39) Naynay a tomboken tayo so simbawa nen Pablo: “Kanian agtayo onkapuy, . . . legan a mantultuloy tayon onnengneng, aliwan ed nanengneng iran bengatla, balet ed saray bengatlan agnanengneng. Ta saray bengatlan nanengneng so temporaryo, balet saray bengatlan agnanengneng so andi-anggaan.”—2 Corinto 4:16-18.
20. Anto so nanengneng tayo ed mata na pananisia, tan panon iyan mamayubo ed sikatayo?
20 Tekep na saray mata na pananisia tayo, nanengneng tayo so balon sistema nen Jehova a walad arapan tayo. Agaylan agnaparaan iran liket tan bendisyon so wadtan! (Salmo 37:34; 72:1, 7; 145:16) Diad panprepara ed satan a maglorian panaon, unoren tayoray salita ed Salmo 100:2: “Manlinkor kayo ed si Jehova a tekep na panliket. Ondago ed arap to tekep na magayagan eyag.”
[Paimano ed leksab]
a Nipaakar ed “Inkasupeyor na Aryan,” Say The New York Times na Pebrero 17, 1940, so nangaon ed Katolikon rehente na Georgetown University a mankuan “a nadngel to si Adolf Hitler a nankuan a satan a Masanton Romanon Imperyo, a datin imperyo na Alemanya, so nepeg a niletneg lamet.” Balet isalaysay nen manag-awaran a William L. Shirer so nansumpalan: “Say Komatlon Reich a nianak nen Enero 30, 1933, ya inlastog nen Hitler, a makapantultuloy ed sanlibon taon, tan ed Nazi a panagsalita satan so naynay a tutukoyen a say ‘Sanlibon-Taon a Reich.’ Anampot itan ed labinduan taon tan apatiran bulan.”
Diad Repaso:
◻ Anton magayagan pananalo ed inkarasa so nanenengneng natan?
◻ Anto so sengegan a say kadaanan a totoo na Dios et nankanta tan naneyag ed gayaga?
◻ Panon a walan dinmaak so tuan gayaga ed moderno iran panaon?
◻ Panon a manulopan so sungdo tan gayaga?
◻ Diad anton letnegan a nasustine tayo na gayaga?