Magmaliw a Napno na Gayaga
“Nantultuloy iray babangatan a napnoan na gayaga tan masanton espiritu.”—Gawa 13:52.
1. (a) Anton nengneng a bunga so gayaga? (b) Diad anton magayagan probisyon a nigloria so Dios?
GAYAGA! Sayan Kristianon kalidad so nilistan komadua lambengat ed aron deneskribe nen Pablo ed bunga na masanton espiritu. (Galacia 5:22-25) Tan antoy manawag ed satan a gayaga? Satan so maong a balitan inyanunsyo na anghel na Dios ed mauyamo iran managpastol ed masulok nen 1,900 a taon nen saman: “Nia! Mangibabawag ak na maong a balita ed sikayo na sakey a baleg a gayaga a niwala ed amin a totoo, lapud wala so nianak ed sikayo natan a sakey a Manangilaban, a Kristo say Katawan, ed syudad nen David.” Insan say anghelikon tugyop, so inmapireng tan akiulop ed anghel a magaygayagan mandadayew ed Dios tan angikuan: “Gloria ed tagey na Dios, tan kareenan ed dalin ed limog na totoo na panangasi.”—Lucas 2:10-14.
2, 3. (a) Akin a matukotukoy ya imbaki na Dios so panguloan ya Anak to a magmaliw a Mananondon na katooan? (b) Diad anto iran dalan a si Jesus so nanserbi ed saray gagala na Dios legan a walad dalin?
2 Say panangasi na Dios ed totoo so nibalikas ed pangitarok na kilalaban ed panamegley nen Kristo a Katawan. Sayan panguloan ya Anak na Dios so personipikasyon na tuan kakabatan tan adeskribe a mangikuan ed Ama to ed panaon na inkapalsa: “Insan wala ak ed abay to sakey a mabiskeg tan maseguron kumikimey, insan nagmaliw ak a napnoan na ligliwa ed agew agew, mangitatanduro ed arap to ed balang okasyon; mangitatanduro ed mabungan dalan na dalin to, on say inkanagnap so diad ananak na totoo.”—Uliran 8:30, 31, Rotherham.
3 Matukoy, sirin, ya imbaki nen Jehova iyan Anak, ya akaromog na ontan a ligliwa ed ananak na totoo, a magmaliw a Mananondon na katooan. Tan panon iyan makapangitarok na gloria ed Dios? Mangilukas itan na dalan ed sikato a manumpal na engraden gagala to ed pamano na dalin na matunong tan maaro-ed-deen iran totoo. (Genesis 1:28) Niarum ni, legan a wadia ed dalin, sayan Anak, si Jesus, so mangipanengneng ed silong na sankamairapan a subok a say ayadyarin too et makatulok a sitotoor ed si Jehova bilang Soberanon Katawan, sirin nanagnap a mangalangon ed inkanepeg na uley nen Ama to ed saray palsa To. (Hebreos 4:15; 5:8, 9) Say manamenben-katooran a kurang nen Jesus so angitilak na sakey a modelo parad amin a tua iran Kristiano a tomboken iray bakat ton maapapit.—1 Pedro 2:21.
4. Say impansungdo nen Jesus so nansumpal ed anton baleg a gayaga, tan panon iyan mamaseseg ed sikatayo?
4 Aromog nen Jesus so alablabas a gayaga ed panggawa na linawa na Ama to, tan ed panilalo na lalon babaleg a gayaga, unong ya ipanengneng nen apostol Pablo ed Hebreos 12:1, 2: “Ombatik tayo ed sungdo ed babatiken a walad arap tayo, unong a maapit ya onnengneng ed Manunan Ahente tan Manamayadyari na pananisia tayo, si Jesus. Ta say gayagan niiyan ed arap to et sinungdoan to so sakey a panamairapan a kiew, a binalaw ed kababaingan, tan yinmurong ed nikawanan a lima ed trono na Dios.” Anto iyan gayaga? Gayagan walad si Jesus, aliwa lambengat ed pangalangon ed ngaran na Ama to tan panagdondon na katooan a manlapud patey noagta ontan met ed panuley a bilang Ari tan Atagey a Saserdote unong ya impawil to lamet so matulok a totoo ed andi-geter a bilay ed sakey a paraison dalin.—Mateo 6:9; 20:28; Hebreos 7:23-26.
5. Siopa “iray agagi” nen Jesus, tan ed anton nikadkaduman gayaga so pinanabangan da?
5 On, lawas ya aromog na Anak na Dios so gayaga ed panlinkor ed katooan. Tan ontanla so gayaga to a manlinkor a kaibay Ama to ed pamili na sakey a grupo na manamenben-katooran iran totoo, a tatawagen to ya “agagi” tan ed patey et napaoli ira ed tawen. Saraya so onloob ed sakey a nikadkaduman gayaga a tekep nen Jesus. Sikaray niyabawag a “maliket tan masanto,” tan sikaray “magmaliw a saserdote na Dios tan ed si Kristo, tan miuley a bilang arari ed sikato ed sanlibon taon.”—Hebreos 2:11; Apocalipsis 14:1, 4; 20:6.
6. (a) Anton magayagan imbitasyon a say Ari so mangilaknab ed “arum a karnero” to? (b) Anto iran pribilehyo so pangagayagaan na sarayan karnero natan?
6 Niarum ni, sakey a baleg ya ulop na “arum a karnero,” a walan imbiig na manuuley ya Ari ed nikawanan a lima to ed pangabobon, ya angawat ed imbitasyon to: “Gala, sikayoran abendito nen Amak, tawiren yo so panarian a nitarya parad sikayo, a nanlapulad inkiletneg na mundo.” (Juan 10:16; Mateo 25:34) Agaylan magayagan pribilehyo! Diad saraya a manawir na mangaraldalin a pasen ed Panarian, dakel la natan so manggaawat na responsable iran asainmin anggad mitambayan ed alanaan, unong ya impasakbay nen Jehova: “Saray sankaili so peteg ya onalagey tan mamastol ed saray pulok yon totoo, tan saray sankaili et magmaliw iran dumaralos yo tan mangimaton ed ubasan yo. Tan no nipaakar ed sikayo, ningaran kayon saserdote nen Jehova; natawag kayon ministros na Dios tayo.” Amin na saraya so miulop ed propeta na Dios a mangikuan: “Andi saew a mangitanduro ak ed si Jehova. Mangayaga so kamarerwak ed Dios ko. Ta kinawesan toak na saray kawes na kilalaban.”—Isaias 61:5, 6, 10.
7. Akin a sayan “agew” a nanlapulad 1914 so espesyal a maong?
7 Manbibilay tayo la natan ed lalon espesyal a panaon. Nanlapulad 1919 satan so agew na uley nen Kristo bilang mangatatawen ya Ari, ya adeskribe ed Salmo 118:24, 25: “Sikatoya so agew a ginawa nen Jehova, mangayaga tan manliket itayo ed satan. Ah, natan, O Jehova, ilaban kami, ipangasim! Ah, natan, Jehova, pikasi mi, a mangipawit ka natan na kaabobonan!” Agew itan a mandampot na sakey a kapantokan sano gawaen nen Jehova so panangukom ed Binababilonia a relihyon tan mamasakey na nobya nen Kristo a 144,000 iran agagi a pati say mangatatwen ya Ari ra. Amin a totoo na Dios so “manliket tan mansayaksak” ed saya. Sikara met so manliket unong a say Mesianikon Ari da et mibakal ed Armagedon a mangiliktar ed matoor a nasyon to ed matunong a balon mundo to. (Apocalipsis 19:1-7, 11-16) Kasin mamagamor si Jehova na panalona legan ya iyabawag na totoo to iyan magayagan ilalo? Say ontumbok a report so mangisalaysay.
Englobon Inlaknab
8. (a) Panon a say gayaga dingan na masanton espiritu so niretrato ed report ed pahina 18 ya anggad 21 na sayan magasin? (b) Anto iray pigaran report a niparungtal?
8 Say modernon-agew a Tastasi nen Jehova “dinmaak ed ilalo a tekep na pakayari na masanton espiritu.” (Roma 15:13) Saya so niretrato ed tsart na pahina 18 ya anggad 21 na sayan magasin, no iner a say englobon report na serbisyo ed Panarian ed 1990 so nilista ed detalye. Agaylan maliket tayo ed sakey a balon pantok na 4,017,213 aktibo iran ministro ed lawak! Saya so mananda na sakey ya indaak na 77 porsiento kaleganan na apalabas a samploran taon, unong a say panugyop na karnero so onaaligaws a mibansag ed 212 iran dalin ed liktob na mundo. Kayari na 15 taon, adampot lamet na bautismo so sankamatalonaan ed amin a panaon a pantok—301,518! Walara so pigaran nikadkaduman atagey a bilang na bautismo ed dakel iran kumbension, nagkalautla ed saramay inatendian na Tastasi a nanlapud Mamabukig ya Europa. Diad limog na saraya so dakel a tobonbalo, mangiiter na katilaan ed saramay mankuan a sosyalistiko a satan a relihyon so ompatey ed daan ya ulop.
9. (a) Say masasakbay a pangipasal na atateng so mangitarok na magayagan resulta? (b) Anton lokal odino arum iran eskperiensia so ipanengneng na saya?
9 Dakerakel a tobonbalo so oneebat ed tawag ed Salmo 32:11: “Manliket ed si Jehova tan mangayaga, sikayoran matunong; tan oneyag a magaygayaga, amin kayo a maptek ed puso.” Ompatnag a dakel ya atateng so manaaplika ed konseho a mangipasal ed ananak da “a manlapud inkaugaw.” (2 Timoteo 3:15) Maabig so pakakausar ed palapagan tan cassette tapes a nitarok parad saramay walad malangwer a taon. Legan a sarayan kalangweran so maneskuela, sikaray tampol a mangiiter na maabig a pantasi, a singa alimbawa na manedad a waloran Haponesan bii ya angisalaysay: “Kayariy bakasyon ed tiagew, inasinggeran koy maestrak tan tinmepet ed sikato: ‘Kasin dinalaw yo so lubok nen ama yo kaleganan a bakasyon?’ Inyebat to: ‘On, say amak so maaron tuloy, tan dadalawen ko so lubok ton tinaon.’ Inkuanko: ‘No aralen yo so Biblia tan tumboken so bangabangat na Dios, minengnengan kayo ed maaron ateng yo ed sakey a mangaraldalin a paraiso.’ Insan initdan ko na My Book of Bible Stories. Natan say maestra mi et mamabasa na sakey a kapitulo na sayan libro ed interon klase ed panaon na pannagugto kada simba.”
10. Antoy maong ya inkausaran na libron Young People Ask, tan anto iray alimbawa?
10 Saray tobonbalo ed kaugawan da so walan angusar a maabig ed libron Questions Young People Ask—Answers That Work, nampara ed pribadan panagaral tan panagtasi ed arum a kalangweran. Walan angapresya met iray ateng ed sayan libro. Sakey ya agin bii ed Switzerland, so nan-auxiliary payunir, nandeside a dalawen iray ateng na kaeskuela na anak to. Angitarok iya na panangilukas na maabig iran diskusyon ed dakel ya atateng, tan 20 iran libro (Kaslakan et Young People Ask) tan 27 magasin ni so nitilak ed sikara. Sanen sakey ya eskuelan bii ed Trinidad so angipalima na sayan libro ed maestra to ed eskuelaan, say ina to so tinmunbok met, ya angibunog na 25 iran kopya ed limog na staff na 36. Intuloy to ed ontumbok a bulan a tekep na espesyal ya imano ed saray ateng a kabkabat ton personal, ya angibunog na sananey a 92 iran libro tan angigapo na balo iran panagaral na Biblia ed abung. Diad Korea, sakey a maestra so angusar na libron Young People Ask ed pangiiter na antikey iran sermon ed saray tema a singa “How Can I Improve My Grades?” tan “How Can I Get Along With My Teacher” tan insan iyopresi so libro. Kayarin inawat na saray estudyante iray 39 a libro, pigaran atateng so ginmapon nanreklamo. Balet inusisa na headmaster so sakey a kopya, tan inkuanton “makapakelaw,” tan nanpedido na sakey parad anak ton bii.
Say Sankaabigan ya Edukasyon
11, 12. Anto iray arum a pantasi ed katuaan a saray palapagan na Watch Tower Society et mangitatarok na sankaabigan ya edukasyon?
11 Say edukasyonal a kablian na saray magasin tayo so naapresya met na dakel, alimbawa sakey ya eskuelaan ed E.U. so nanpedido na 1,200 iran kopya na Hulyo 22, 1990, Awake! (mangiwawalwal na crack addiction) pian usaren ed saray klase. Nagkalalo ni, say maalimbawan kondukta ed eskuelaan na saray Tasi nen Jehova so nantultuloy a maabig ya impresyon. Diad sakey a magulon kuarto-na-klase ed Thailand, say maestra tinawag to so 11-años a Racha ed arap na klase tan sikatoy kinomendaan ed awawey to, ya ibabagan: “Akin ya agyo gawaen a bilang sakey ya alimbawa? Sikato so makuli ed panaral to tan masimpit a maong.” Insan intuloy to: “Bueno, isisipen ko a sikayoy magmaliw ed saray Tasi nen Jehova a singa si Racha pian onabig ed kondukta yo.”—Ipareng so Uliran 1:8; 23:22, 23.
12 Sakey a tobonbalon bii ed Repulika na Dominican insulat: “Sanen apatiran taon ak lambengat, ngalngali ak la mangraduar a manlapud relihyoson preschool, a nanaralan kon manbasa tan mansulat. Bilang sakey a regalo, initdan ko so madre a maestrak na libron Makapanbilay Kayo na Ando lan Ando ed Paraiso Diad Dalin a tekep na mensahen: ‘Siak so misalamat a maong ya imbangat yo ak a manbasa tan mansulat. Pilalek kon natalosan yo met so pananisiak tan onsabi a nawalaan kayo na ilalok a makapanbilay ya ando lan ando ed sayan dalin a nagawan sakey a paraiso.’ Diad saya siak so pinaalis a manlapud eskuelaan. Saginonor kayariy waloran taon nabet ko lamet iyan maestra. Insalaysay to no panon, ya anggaman ed isusumpan maong a manlapud pari et akapanbasa ed libro. Sikatoy inmalis ed kabisera, ya akapanaral na Biblia dingan na sakey a Tasi. Sikatoy abautismoan ed ‘Puron Lenguahe’ a Distrito Kumbension a pati siak.” Unong a nipropesiya, say kakabatan met so manlapud “sangi na saray ugugaw”!—Mateo 21:16; Salmo 8:1, 2.
13. Panon ya oneebat iray dakel a katayatdang ed konseho nen Solomon, tan panon iyan niretrato ed sankamunduan a report?
13 Inter nen Solomon so makapaseseg a konseho: “Manliket ka, tobonbalon laki, ed kaugawan mo, tan abuloyan mo so pusom a manggawa na maabig ed agew na inkabalolakim, tan manakar ka ed saray dalan na pusom.” (Eclesiastes 11:9) Sakey a ligliwa natan a nanengneng so ontanlan dakel ya ugugaw a Tastasi nen Jehova a mangiyaplika ed sarayan salita, ya uusaren so inkaugaw da a mangitarya parad bilay na sigpot-panaon a serbisyo ed si Jehova tan onloloob ed sayan sankaengrandean ed amin iran karera kayariy pansumpal a manlapud eskuelaan. Saray ranko na payunir so mantultuloy a mapmaples ya ondaraak, a tekep na 821,108 a nanreport kaleganan na taon. A kaiba so 11,092 iran agagin lalaki tan bibii a manlilinkor ed Bethel, a mangilalaman na 21 porsiento ed dagup na saray manangipalapag!
14. Anton pananulong so gagawaen na saray agagi tayon bibii, tan anton komendasyon so kanepegan da?
14 Makapainteres ed dakel iran dalin, a singa say Estados Unidos, a ngalngali 75 porsiento ed amin a payunir a manangipalapag et bibii, a mamabiskeg ed saray salita na Salmo 68:11: “Mangiter si Jehova a mismo na saray balikas; saray bibii so mangibabaga na maong a balita so sakey a baleg ya armada.” Saray agagi tayon bibii so nakomendaaan ta sikaray manggagawa na babaleg a kabiangan na lawak a kimey. Say onsianon panagbangat da ed saray panagaral na Biblia ed abung so mangitonton na dakel ed katuaan, tan saray asawan bibii a sitotoor a manusuporta ed kaasawaan a lalaki ed dakel iran kimey ed kongregasyon so narayew met ya ampetapetang.—Uliran 31:10-12; Efeso 5:21-25, 33.
Say Edukasyon ed Biblia so Ondaraak
15. (a) Panon a saray pigaran nasyon a nilista ed sankamundoan a report so manalona ed panagaral na Biblia ed abung a kimey? (b) Anto iran eksperiensia so nisalaysay yo, a mangipapanengneng no panon a mabunga iray panagaral na Biblia?
15 Say edukasyonal a kimey ed Biblia so ondaraak, saray panagaral so nikokondukta ed sankamundoan ed sakey a promedyo na 3,624,091 iran pasen ed kada bulan. Say katuaan na Biblia so mamasimbalo na saray personalidad, ya ipanengneng na sakey a report ed leksab. Kasakbayan na Enero 1987, sakey a laki so nibantak ed New Zealand a nanlapud Australia kayariy 25-bulan a terminoy inkipisok ed panagtakew tan panagtila. Sikatoy naadikto ed saray druga tan walan angilako met ed satan ed masulok nen 17 taon. Diad ontumbok a taon say asawa ton bii so ginmapon nanaral na Biblia ed saray Tasi nen Jehova, tan unong a say pikakabat to ombabaleg, naimano to so mapatnag ya impasimbalo na kondukta to. Sikatoy nagmaliw a magmaong ya asawan bii tan ina. Diad panalagyat na asawa ton bii, sikatoy inmatendi ed sirkito asamblea nen Hunyo 1989. Inawat to la natan so panagaral na Biblia ed abung, tan baleg iran pansalat so ginmapon naimano ed sikato ed itsura to tan estiloy-panagbilay. Amin a pitoran membro na pamilya so ginmapon inmatendi ed saray miting. Sikatoy abautismoan nen Enero 1990 bilang sakey a tinmunbok ed ekselentin konseho nen Pablo ed Efeso 4:17-24.
16. (a) Panon a say 1990 iran report ed Memoryal so lapuan na gayaga? (b) Anton ipepeles so nepeg ya imanoen, tan anton tulong so nepeg a gawaen tayo?
16 Sakey a manunan nengneng na report ed taon et say rekord na inmatendin 9,950,058 ed selebrasyon na Memoryal, ya agawa nen Martes, Abril 10, 1990. Masulok nen 70 ed saray 212 iran bansa so angireport na inmatendi a masulok nen taloran danay nen say pantok na mangipalapag da. Alimbawa, anggaman wala so pananebel, pitoran Aprikanon bansa a walaan na tugyop a pantok a 62,712 a manangipalapag so angireport na inmatendi ed Memorial a 204,356. Saray manangipalapag na mipupuligesgesan a Liberia a 1,914 so nanliket ta walaan na 7,811 ed Memorial. Say Haiti et walaan na pantok a 6,427 manangipalapag, so angireport na 36,551. Saray 886 manangipalapag na ataytayak a pulo na Micronesia so walaan na 3,958. Nanreport so Sri Lanka na 4,521 ed manangipalapag ton 1,298, tan say Zambia, a walaan na 73,729 a manangipalapag, so walaan na 326,991 ya inmatendi ed Memorial, a sakey a too ed kada 25 ed populasyon na Zambia. Say report na englobon inmatendi so mangiparungtal lamet a walara so nilaksalaksan masimoon a totoon manalagar a mikasakey ed pulok na pastolan. Balet say inkamasimoon so agmagenap. Kasin napadaak tan napaaligwas tayoy kalidad a panagaral na Biblia ed abung a kimey tayo, a tutulongan so dakel ed saray inmatendi ed Memorial a napabiskeg so pananisia? Labay tayoran magmaliw ya aktibon kakaiba tayo, a mandadayew ed si Jehova. Kabaliksan to so mismon bilay da!—Salmo 148:12, 13; Juan 17:3; 1 Juan 2:15-17.
Say Inkanagnap na Gayaga
17. Anton inmunan-siglo iran alimbawa so nepeg ya ontulong a mamabiskeg ed determinasyon tayon mamenben ed gayaga tayo?
17 Antokaman iray subok a kidungetan tayo, determinado tayon mamenben ed gayaga tayo. Anganko agtayo nasagmak so onman lan irap ya eksperiensia nen Esteban, ingen say alimbawa to so mamabiskeg ed sikatayo. Diad silong na pangidalem, apansiansia to so magayaga a talindeg. Saray kakabusol to “anengneng so lupa to a singa ed sakey a lupa na anghel.” Say Dios so nanalagey ed sikato kaleganan na irap to. Sikatoy nantasi a sitetepel, a “napnoan na masanton espiritu” ya anggad inkamartir to ed patey. Unong a si Pablo tan Barnabas so inmarap ed saray nasyones ed panagpulong da, saraya met so “ginmapon nanliket tan angigloria ed salita nen Jehova.” Linmesa lamet so panamasegsegang. Balet agto pinakapuy iramay mananisia. “Saray babangatan so nantultuloy a napnoan na gayaga tan masanton espiritu.” (Gawa 6:15; 7:55; 13:48-52) Antokaman so gawaen na kakabusol tayo ed sikatayo, antokaman so inagew-agew iran subok tayo ed bilay, agtayon balot abuloyay gayaga tayo ed masanton espiritu a naamper. Nansimbawa si Pablo: “Manliket ed ilalo. Mansungdo ed silong na kairapan. Manpatuloy ed panagpikasi.”—Roma 12:12.
18. (a) Anton so Balon Jerusalem, tan akin a nepeg a mangayaga so totoo na Dios dingan to? (b) Panon a say “balon katawenan tan balon dalin?” et mamendisyon ed katooan?
18 Agaylan makapakelaw itan ya ilalo! Diad amin a totoo to, iyabawag nen Jehova: “Nia mamalsaak na balon katawenan tan sakey a balon dalin; ta say gendat a bengabengatla so agnanonotan, nisay onsabi ira ed puso. Balet mangitandoro, sikayo a totoo, tan magmaliw a magayaga ed ando lan ando ed pinalsak.” Si Kristo a Katawan a pati ed “Balon Jerusalem” (natan say kabiseran syudad na mangatatawen ya organisasyon na Dios, “Jerusalem ed tagey”) tan say balon mundon sosyedad ed dalin so mangitarok na daakan a gayaga ed katooan. (Galacia 4:26) Say kioli na atooan a patey, say kidayew na amin a matutulok ed andi-angaan a bilay ed atooan ya inkayadyari, sakey ya andi-geter a mausar, a matunos a panagbilay ed paraison dalin—agaylan sakey a baleg ya ilalo tan sengegan so kitandoro na saya! Unong a naromog a mismo nen Jehova so ‘gayaga ed Jerusalem tan mangitandoro ed totoo to,’ kanian say propeta to so mangipaway na kaaruman a tawag ed totoo na Dios: “Miliket ed Jerusalem tan migayaga ed sikato, amin yon mangaro ed sikato. Mangitandoron sankabalgan a pati sikato.” (Isaias 65:17-19; 66:10; Apocalipsis 14:1; 20:12, 13; 21:2-4) Komon sikatayo magmaliw a napano na gayaga tan masanton espiritu unong a tomboken tayo so simbawa nen apostol Pablo: “Lawas manliket ed Katawan. Maminsan lamet kuanko, Manliket!”—Filipos 4:4.
Segeken so Gayaga Tayo:
◻ Anton modelon magayagan inkasungdo so inletneg nen Jesus parad sikatayo?
◻ Duaran dedikadon grupo so walaan na anto iran katunongan a manliket?
◻ anon a saray ugugaw tan matatken natan a mangitanduro ed katuaan?
◻ Diad panrerepaso ed 1990 a report, anton ebat natan so niiter ed pikakasi, “Jehova, ipangasim, a mamagamor na panalona”?
◻ Kapigan tan panon a nadampot so inkanagnap na gayaga?
[Tsart ed pahina 18-21]
1990 SERBISYON TAON A REPORT NA SARAY TASI NEN JEHOVA ED SANKAMUNDOAN
(Nengnengen so tomo)
[Litrato ed pahina 16]
Inyabawag na anghel nen Jehova a say kianak na Katawan a Kristo a bilang “maong a balita na sakey a baleg a gayaga”