Report na Saray Manangiyabawag na Panarian
‘Say Dios So Agmanangiduma’
SANLIBO siamalasus taon la so apalabas, inkuan nen apostol Pedro: “Say Dios angapo so pangiduma to ed saray totoo; No ag ingen dia ed balang nacion akuen to so antakot ed sikato tan mangawa na matunong.” (Gawa 10:34, 35) Diad limog na saray Tasi nen Jehova et naromog so totoon nanlapud amin a rasa tan relihyoson nanlapuan. Panpipilalekan da so inkatunong, tan sikaray ontatakot ed Dios. Amin da so aabrasaen nen Jehova ed balon mundon sosyedad, bilang, alimbawa, sanen ginawa to ed sakey a bii ed Chad.
Sayan bii so agnaliliketan ed relihyon to. Pigaran taon so linmabas sikato so akaawat na sakey a kopya na libron Your Youth—Getting the Best Out Of It, impalapag na saray Tasi nen Jehova, tan sikato so angapresya ed maabig a simbawan kinarga na libro. Nigapo so panangiyaral na Biblia, tan sikato so lawas wadman para’d panagaral. Anggaman ontan, sanen pinaseseg pian onatendi ed saray miting ed Kingdom Hall, sikato so agkinmiwas. Akin? Anggaman say asawa to so agmanusumpa ed panagaral to, agto inabuloyan ya onatendi ed saray miting ed Kingdom Hall.
Sanen labay na asawan bii so onatendi ed sirkiton asamblea, impanengneng na Tasi a mangikokondukta na panangiyaral so programa ed asawa na bii, ya ipapabitar so maabig a simbawa ya iparungtal. Inabuloyan ton onatendi so asawa to a “maminsan labat.” Sikato so inmatendi tan sigpot a nangayaga ed programa. Kayari impangipaliwawa to ed asawa to ed nadngelan to, sikato so agsinmumpa ed iyatendi to ed arum iran miting. Sikato so nandinayew ed katuaan a say kongregasyon so tugyopen na totoon nanlapud nanduruman rasa a peteg a mapaga ed balang sinansakey. Diad saginonor et sikato so inmatendi ed distriton kumbension tan sikato so aliketan a tuloy ed impakanengneng to ed ananak to a sankaakual na saray Tasin nanlapud arum a bansa. Saray Tasi so anginabang na tagano ed saray ugugaw, tan trinatro ira a singa kabiangay pamilya. Saya so sengegan na baleg ya impanguman to.
Balet tinmumbok so panamasegsegang. Anggaman gendat a mabaing, sikato so ginmapon mankomento ed saray miting tan mapekder ton nilabanan iray negatibon komento na saray kakanayon tan kakaabay. Anggaman dakel lan taon a miaamong ed asawa to, say kaugalian a paknaan ed panamaley so tutumboken da labat. Panon to kasin itongtong so tema nipaakar ed legal a panpakasal? Kayari na masimoon a pikakasi ed si Jehova, intongtong to ed asawa to, ya inbaga ton sukayan to iyan bengatla. Diad kaunoran saya so ginawa to, tan say sanasawa so legal a nankasal.
Sakey ya ayro a manaayam ed sikara so nansengegan na dakel a problema, balet pinekderan na asawan laki so talindeg to a pabor ed asawa to. Insan say ama na asawan laki so linman binmisita. Inggangan to ed anak to ya idiborsyo so asawa to, unong a sikato’y nansalat na relihyon to. Inkuan na ama ed anak to a sikato so manbayar na dasel (bride-price) para ed “mas maabig ya asawan bii.” Onia so inkuan na anak: “Andi, agko gawaen itan. Sikato so maabig ya asawan bii. No labay to so onsian, sananey la itan, balet agko ibaga a sikatoy onsian.” Say asawan bii so maomaong ed katulangan ton laki, tan nababaingan so katulangan ed ginawa to. Anggaman ontan, sanen sikato so pinmawil ed baryo, sinulatan to so anak to, a diad saman et inikdan to na unor a pankanawnawa pian mandesisyon. Inkuanto a no ag-onabobon so anak a pataynanen so asawa to, sikato’y ipasen ton agto la anak. Lamet pinekderan na anak so talindeg to ed asawa to. Nonoten pa so gayaga na asawan bii diad impakaimaton ed asawa to a mangala na ontan a pihon talindeg.
Natan et labalabay na duaran ankekelag ya anak dan lalaki so mila ed ina ra ed Kingdom Hall. Kinerewan da ni ingen so ama ra na kurbata, lapud anengneng da ya amin ya agagi a mangiiter na paliwawa so mansusulong na saratan. Natan sayan bii so bautismadon agi.
Sikato so sakey ed saray 345 a maliket a Tastasi ed Chad a mangiyaabawag na maong a balita na Panarian nen Jehova tan mangaapresya ed satan, peteg, ‘say Dios so agmanangiduma.’