Report na Saray Manangiyabawag ed Panarian
“Mapalar so Too a Makaromog na Kakabatan”
SAYAN proverbio so apaneknekan a tua diad Korea, a ditan et wala la so masulok a 71,000 a maliket a Tastasi nen Jehova. (Uliran 3:13) Tan isipen pa, 42 a porsiento ed sarayan ministro so walad sigpot-panaon a serbisyo! Saray onggendan ya eksperiensia so mangipanengneng a say liket so betang na saraman so manaanap ed tuan kakabatan.
Sakey a biin taga Pusan so nagmaliw a membro na sakey ed saray iglesia na Kakristianoan ed loob la na 16 a taon. Naimatonan to so dakel ya agmakasulatan ya ag-agamil a sikato so ginmapon nannonot ya anggapo so Dios. Diad biek a dapag, agto niburi so kiwawala na Dios, kanian sikato so sisisimoon a nampikasi ed Dios ta pian naromog to so tuan iglesia no wala bilang itan. Diad saya et bigla ton naisip iray Tasi nen Jehova, tan anonotan to a sikara so binabalaw na iglesia to tan pinasakbayan iray mimimisa sumpad sikara lapud saray Tasi so agmanisia ed Trinidad, impiernon apuy, tan arum niran doktrina na Kakristianoan. Angangko ta sikara so tuan iglesia? Diad tulong na sakey a kaabay, aromog to so lugar na Kingdom Hall. Diad tinmumbok ya agew, inatendian to so sakey a miting.
Sikato so nikelawan ed inka-uksoy na miting. Anggapo so panatikon pan-eyag odino emosyonal a panagkanta a singa nagagawa ed iglesia to. Sikato so inkabat ed sakey a Tasin mabulos a mangiyaral na Biblia ed sikato, tan say inmunan panagaral so nambayag na pigaran oras lapud kinarakel na tepet to. Diad komaduan panagaral, inyabawag ton sikatoy onekal manlapud iglesia to tan magmaliw a sakey a Tasi. Imbaga to’d agin bii ya agto la nakaukolan so paiyaralan, ta nayarian to met so basta onatendi ed saray miting. Anggaman ontan, nipanengneng ed sikato so kablian na pakawalaan na personal a panagaral na Biblia nilikud ed iyaatendi ed saray miting. Inawat to so suhestion, nantultuloy a nanaral, tan ag-abayag et abautismoan.
Natan sikato so ontanlan maliket ta aromog to so kakabatan na tuan Dios, si Jehova, tan awalaan na ilalo ed panbilay na ando lan ando diad balon uksoy na Dios.
Naaralan na Retiradon Heneral so Katuaan
Say asawa na sakey ya heneral na armada so abautismoan nen 1962. Diad inmuna et sikatoy sinumpa na masiken to, balet diad saginonor et tinundaan ton sumpaen, tan tunggal paminsan ed loob na 28 a taon, a nanduruman agagin lalaki so analin managyat ed sikato ed katuaan. Sikato so inmatendi ed pigaran miting tan kumbension, balet sikato so sakey ed saramay agmanseryoso ed katuaan. Nen 1990 sikato tan say akulaw to so linma ed Hapon, ya inmatendi ed sakey a distrito kumbension. Diad sayan okasyon, mapetepet ton tinalineng iray paliwawa—bengatlan agto ginawa nen inmuna. Sikatoy nikelawan ed saray makpel a paliwawan mangiwawalwal ed palson relihyon, balet saraya so peteg ya angilukas ed saray mata to ed pansimpisimpitan na Kakristianoan. Sikato so mandinayew ed inka-uksoy tan liket na totoo na Dios ed Hapon, a mipadparan tuloy ed anengneng to ed Korea. Diad impawil da ed Korea, ginapoan to so sakey a seryoson panagaral na Biblia tan diad kaunoran et nanpabautismo.
Kanian kayari bautismo to anto so nepeg ton gawaen? Sikato so inmekal ed posisyon to bilang presidenti na sakey a bantog a hotel a para’d turista tan akiulop ed akulaw to ed sigpot-panaon a panagpayunir. Liknaen ton say pagmaliw a sakey a regular payunir so sankaabigan a paraan ta pian nabayaran toy abalang to ed agto inkiwas ed loob na 28 a taon.
Natan et namomoria ton say proverbion “mapalar so too a makaromog na kakabatan’ so onaaplika ed sikato!