Tepetepet Manlapud Managbasa

Kasin matukoy para’d sakey a Kristiano a mimoyong ed negosyo ed sakey ya agmananisia, anta ibabaga ed sikatayo na Biblia ya: “Ag kayo miolop ed pako a duma na saray ag mananisia”?

Satan a simbawa so naromog tayo ed 2 Corinto 6:14-16: “Ag kayo miolop ed pako a duma na saray ag mananisia, ta anto so piolopan na katonongan ed kaugsan? Odino anto so piolopan na silew ed bilunget? Tan anto so pinonongan nen Cristo ed si Belial? Odino anto so pinabangan na mananisia ed ag mananisia? Tan anto a pinonongan so wala ed templo na Dios ed saray talintao?”

Anggapoy rason a manisian inter nen apostol Pablo iyan simbawa ed gagalan mangiletneg na ispisipiko iran pananebel, a singa say pangisebel ed pimoyong na Kristiano ed sakey ya agmananisia diad negosyo. Bangbalet say simbawa to so peteg a misiglaotan ed satan, ontan met ed arum niran angulo na bilay.

Insulat itan nen Pablo ed saray Kristianon agagi to ed kadaanan a Corinto. Lapud sikara so manaayam ed sakey a syudad a nagkalautlan mauges, kaukolan da so inagew-agew a pipuligesgesan sumpad saray kapeligroan ed moral tan espiritual. No sikaray agmanalwar, say kidunget ed agmaabig iran impluensya so nayarin kalkalnan mamakapuy ed determinasyon dan magmaliw a duman totoo, “apili a kapolian, peteg ya inkasacerdote, masantos a nacion, sakey a baley na Dios a dilin kayarian to.”​—1 Pedro 2:9.

Sakbay ya insulat so simbawan wala’d 2 Corinto 6:14-16, si Pablo so angareglo ed seryoson problema ed leet na agagin taga Corinto. Inabuloyan da a niwala so seryoson imoralidad ed limog da, kanian sinimbawa ira nen Pablo ya ekalen, odino dispilosipen, so agmagbabawin managkasalanan. (1 Corinto 5:1) Impanengneng na gawan-mauges na saman a too a say makapuy a pililimog odino say agmaalwar a pidedeneng ed moral a kipapasen na mundo so nayarin mangapekta ed saray Kristiano.

Kaukolan a paliisan na saray Kristiano ed Corinto so pilimog ed inekal a too, balet kasin kabaliksan na satan a nakaukolan dan interamentin iyarawi so inkasikara manlapud saray agmananisia? Kasin sikara so kaukolan ya onarawi ed amin a pisiglaotan tan pidedeneng ed saray aliwan-Kristiano, a magmaliw a singa sektan akakulong ed monasteryo, a singa saray Judio ed Qumran ed asingger na Inatey a Dayat? Abuloyan ya onebat si Pablo: “Insulat ko ed sikayo ed sulat ko ya ag ki miolop komon ed saray managlawan, agto kabaliksan ya amin na saray managlawan ed saya’n mundo, . . . No ontan sirin nakaokolan yo so onpaway naani ed mundo.”​—1 Corinto 5:9, 10.

Malinew so ipapatnag na saraman a salita. Kabat nen Pablo a saray Kristiano so wadia ni ed sayan planeta, manbibilay ed leet na saray agmananisia tan ngalngalin walaan na inagew-agew a pidedeneng ed saray agmananisia a walaan na abeban moral tan duma iray estandarte ra. Lapud satan so agnaarawian, saray Kristiano so kaukolan a manalerto ed saray kapeligroan na ontan iran pililimog.

Natan kunsideraen tayo pa lamet so komaduan sulat nen Pablo ed saray taga Corinto. Indanet to a saray alanaan a Kristianos so kualipikado bilang ministros na Dios, embahadores a kasalat nen Kristo. Imbaga to ed sikara a kaukolan a manbantay sumpad antokaman a sengegan na pakatiroran a nayarin mangitarok na kabalawan ed ministeryo ra. (2 Corinto 4:1–​6:3) Direktan sinimbawa nen Pablo iray Kristianon agagi to ed Corinto, a singano ra espiritual ya ananak to, a palaknaben da so panamabli ra. (2 Corinto 6:13) Kayari to et nansimbawa: “Ag kayo miolop ed say pako a duma na saray ag mananisia.” Inusar to so nantutumbokan a panangipareng pian idanet itan a punto.

Ipapanengneng na konteksto ya ag-iyaapasakey nen Pablo ed arum ya ispisipikon parti na bilay, a singa say negosyo odino panimpleyo, tan angiletneg na pormal a totontonen a kaukolan ya iyimpuersa ed satan a pamaakaran. Imbes, sikato so angitarok na malaknab, mabunigas, makatulong a simbawa ed saray pinabpabli ton agagi.

Kasin sayan simbawa so onaplika, alimbawa, ed kipapasen na sakey a Kristiano ya interesado ed panangasawa? Maseguro. Diad inmunan sulat to, sinimbawa na apostol iray Kristiano a labay da so mangasawa “ed linawa na Katawan lambengat.” (1 Corinto 7:39) Indanet to so kakabatan na saraman a salita diad saginonor ya insulat to, unong a nibaga ed 2 Corinto 6:14-18. No say sakey a Kristiano so mannononot a mangasawa ed sakey ya aliwan aripen nen Jehova tan aliwan patumbok nen Kristo, ikunsidera to so inkasikato a nisisiglaot ed sakey ya agmananisia. (Ipareng so Levitico 19:19; Deuteronomio 22:10.) Malinew, say agpakapanpakoan so maseguron mamadaak na saray problema, pati ed saray espiritual a pamaakaran. Alimbawa, say agmananisia so nayarin diad kaplesan odino diad arapen et mandayew ed sakey a palson dios. Inkatunongan nen Pablo: “Anto so pinonongan nen Cristo ed si Belial?”

Anggaman ontan, anto met so nipaakar ed sananey a nengneng na panagbilay​—say pimoyong ed negosyo ed agmananisia? Diad arum a kipapasen liknaen na sakey a Kristiano a say pananap na panbilay tan pangasikaso ed pamilya to et kakaukolanen to so pimoyong ed negosyo ed sakey ya aliwan kaparan Kristiano. (1 Timoteo 5:8) Kunsideraen paray alimbawa lambengat:

Say sakey a Kristiano et nayarin labay ton igapo so negosyo ed panlako na sakey a nengneng na bengatla, balet say paraan lambengat et say pimoyong ed toon makayarin makala na nakakaukolan iran produkto odino pundo. Sakey nin Kristiano so malabay ya ondalus (odino mangumponi na saray ayep); balet anggapo so dalin to, kanian kaukolan to so pimoyong ed sakey a mabulos a mangipaabang ed sikato na dalin diad pinabang ed tubo. Nayarin say sakey a Kristiano so agmakaloob ed negosyo na pantubero lapud daiset labat so inter na gobiernon lisensya, tan nipagamor lara; say mogmon paraan et say pimoyong ed sakey ya agmananisian kanayon a lisensyado.​—Marcos 12:17.

Saraya so ilustrasyon lambengat. Agmi sasalien ya ipaarap so amin a posibilidad, nisay ibabalikas mi so panangabobon odino agpanangabobon. Balet tekep na sarayan alimbawa ed kanonotan, agyo ta nanengneng a nepeg ya ag-ibaliwala so konseho ed 2 Corinto 6:14-18?

Say sakey a Kristianon akimoyong ed negosyo na sakey ya agmananisia, balanglan sakey a kanayon odino andi, so nayarin nipaarap ed ag-iilaloan iran problema tan katuksoan. Nayarin disidien na kamoyong a pian nawalaan na makatunongan a tubo et bawasan to so nalmoan odino mangimpleyo na kumikimey ya agnilista ed libro, anggan satan et sumlang ed saray ley na gobierno. Ompan sikato so maliket a manpasoksok ed saray managdeliber na ilalakon agnilista ed opisyal a resibo. Kasin say sakey a Kristiano so mibiang ed ontan odino mipadparan ag-inkamatua? Tan anto so nepeg a gawaen na sakey a Kristiano sano onsabi panaon a sikaray manpirma na papeles para’d buis odino arum niran legal a papeles nipaakar ed negosyo ra?​—Exodo 23:1; Roma 13:1, 7.

Odino say agmananisian kamoyong et kaliktan to so mangisimpen na saray bengatlan mitukoyan ed pagano iran piestay opisyal, mangipawit na saray kard para’d piesta diad ngaran na kompanya, tan manarkos ed negosyo para’d relihyoso iran piestay opisyal. Intepet nen Pablo: “Anto a pinonongan so wala ed templo na Dios ed saray talintao? Ta sikatayo so templo na Dios a mabilay.” Agaylan matukotukoy so komenton: “Kanian. Ekal kayo ed leet da, tan onsian kayo,” kuan nen Jehova, “tan agyo diwiten so marutak tan akoen takayo”! (2 Corinto 6:16, 17) Diad pangiyaplika ed satan a makabat a simbawa, pinili na dakel a Kristianos so nengneng na sekular a trabahon mangiwalwal ed sikara ed daiset lambengat a problema no nayari.​—Hebreos 13:5, 6, 18.

Say kongregasyon so agbinilin a manbantay odino mangimbistiga ed amin a gagawaen na Kristianos ed sekular a trabaho ra, balanglan empleado odino bilang akan-kien na negosyo. Siempre, no say sakey a Kristiano so akabatan ya akibabali ed gawan-mauges, a singa say panangiyalibansa na palson panagdayew odino panagtila odino panagtakew, say kongregasyon so kaukolan a manggawa na saray kundang pian itandoro iray estandarte nen Jehova.

Anggaman ontan, say manunan punto na impuyan a simbawa nen Pablo ya, “Ag kayo miolop ed pako a duma na saray ag mananisia,” so makatulong ed Kristianos ya ompaliis ed saray problema tan antokaman a hudisyal a kiwas na saray mamatatken. Saray makabat a Kristiano so mangipapuso ed satan a simbawa tan agda pilien so iloob ed saray situasyon a nisilong ira ed kaaruman a desdes a nikompromiso daray prinsipyo na Biblia. No liknaen na sakey a sikato so kaukolan a mimoyong ed sakey ya agmananisia, saray arum so nepeg ya agmasiglat a mangukom odino mamalaw ed sikato, diad panmoria a sikaton mismo so manakbat na say responsabilidad ed pinili to. Manuna ed amin, ag-angiletneg si Pablo na sakey a pormal, impaskar a totontonen sumpad pimoyong ed agmananisia. Siansia, say simbawa to so nepeg ya ag-ibaliwala. Impuyan na Dios itan a simbawa tan impairekord to itan ed Biblia para’d kagunggunaan tayo. Makabat so itumbok tayo ed satan.