Sarag Yo Kasin Tulongan Iray Agmananisian Asawa na Agagi?
1. Akin et aliwa labat a saray Kristianon walaan na agmananisian asawa so interesadon ontulong pian awaten na asawa ra so katuaan?
1 Kasin walaray kakongregasyon yo ya agmananisiay asawa ra? Seguradon labay na sarayan agagi ya nakaiba so asawa ra diad tuan panagdayew. Balet aliwan sikara labat so manpipilalek ed satan. Singa ed Dios, labay na interon kongregasyon ya “nilaban so amin a klase na totoo tan nawalaan ira na suston pikakabat ed katuaan.” (1 Tim. 2:4) Panon tayon natulongan iray agmananisian asawa na saray kakongregasyon tayo?
2. Panon ya ontulong so pakatalos diad pidedeneng tayo’d agmananisian asawa na agi?
2 Unona, kaukolan tayon talosan iray bengatla unong ed panmoria na agmananisia. Dakel ya agmananisian asawa so maaro ed pamilya ra tan maong iran asawa tan ateng. Ompan walaray malet ya sisiaen da ya duma’d saray sisiaen tayo. Nayarin say amta da labat nipaakar ed saray Tasi nen Jehova et saramay imbaga’d sikara na kakaaron agda met tanton kabat iray Tasi odino kabusol da ra. Wala iramay ansakit so liknaan da ta abawasay panaon na asawa ra parad pamilya lapud pandadayew to’d Dios. Ontulong so pakatalos pian maaro tan marespeto so pantrato tayo’d agmananisia tan pian agtayo masyadon mapaga ed no antoy ikiwas tayo sano kaiba tayo.—Uli. 16:20-23.
3. Antoy sankaabigan ya paraan pian nakombinsi ed katuaan so agmananisian asawa na agi?
3 Personal ya Interes: Diad unaan, nayarin say sankaabigan a paraan pian nakombinsi’d katuaan so agmananisian asawa na agi et panamegley na saray gawa tayo, aliwan say pampulong ed sikaton tampol. (1 Ped. 3:1, 2) Importante sirin so pangipanengneng na personal ya interes. Nipanengneng itan na saray sister ed saray agmananisian asawan bii, tan nipanengneng met itan na saray brother ed saray agmananisian asawan laki. Panon?
4. Panon tayon nipanengneng so personal ya interes?
4 No agmo ni akabat so agmananisian asawa, salien moy mikabat, ya ipanon mo itan diad samay agin akan-asawa. Agka nadidismaya no diad unaan et baliwala labat ed agmananisian asawa so ipapanengneng mon personal ya interes. No makaaro tayo’d sikato, nayarin magmaliw ya mas maabig so impresyon to’d saray Tasi nen Jehova. (Roma 12:20) Say gagawaen na arum ya matatken ed espiritual iran Kristiano et iimbitaan da so agmananisia tan say pamilya to ed pangdem pian nakabat day sakey tan sakey tan naekal so antokaman a panangidumaduma. Say panistoryaan da et no antoy paninteresan na agmananisia, imbes ya ipilit dan isalet ed tongtongan iray espiritual ya topic. Diad kalabas na panaon, no komportable la’d sikara, nayari da lan itongtong ed sikato so nipaakar ed Biblia. Tan ompan awaten to lay imbitasyon tayo’d saray aral ta labay ton nengnengen no antoy aaralen ditan na asawa to, lalo la ta wala la ray kabat to’d kongregasyon. Anggaman agto ni labay ya araley katuaan, sikatoy nakomendaan ed suportan iiter to ed mananisian asawa to.
5. Panon ya natulongan na saray elder so agmananisia?
5 Saray elder so nagkalalo lan kaukolan ya ontulong ed saray agmananisian asawa na agagi tan alerto iran inabang ed sikatoy katuaan diad kada pankanawnawa. Say agmananisian agto labay ya pantongtongay Biblia et nayarin ondengel ed panamaseseg manlapud Kasulatan sano naospital odino mansasakit na grabe. Odino no walad mairap a situasyon so pamilya to, singa bilang no inateyan ira, nayarin sikatoy tawagen na saray elder pian kaiba diad panligliwa ra’d interon pamilya.
6 Nonot yo pay liket na kakongregasyon tayo sano say asawa to et onkiwas tan awaten toy katuaan! No ontan so nagawa, naliketan met ya maong si Jehova, saray anghel, tan say interon kongregasyon. (Luc. 15:7, 10) Balet no say agmananisian asawa et agni interesado natan, magayaga tayo nin siansia ed pansasagpot tayon paliketey Jehova, ya “agto labay a naderal so siopaman noagta labay to a makapambabawi so amin.”—2 Ped. 3:9.
6. Antoray rason no akin ya labay tayon tulongan so agmananisian asawa na saray agagi tayo?
[Blurb ed pahina 6]
Diad unaan, nayarin say sankaabigan a paraan pian nakombinsi’d katuaan so agmananisian asawa na agi et panamegley na saray gawa tayo, aliwan say pampulong ed sikaton tampol