Panggunaetan a Pulongan Iray Ulo na Pamilya

1. Anto so maganat a pankaukolan diad pangasikaso ed intereses na Panarian?

¹ Legan ya onlalaknab so kimey nipaakar ed Panarian ed sarayan unor ya agew, walay pankaukolan parad saray kualipikado ed espiritual a lalaki a mangidaulo. (Mar. 4:30-32; Gawa 20:28; 1 Tim. 3:1-13) Balet, diad arum a pasen et mas daiset so lalaki nen say bibii a mangaawat ed mensahe na Panarian. Diad arum a kultura, ipapasen na saray ulo na pamilya a responsabilidad na kaasawaan da so pambangat ed ananak da no nipaakar ed relihyon. Panon tayon napaseseg so dakel nin ulo na pamilya a magmaliw a manonot ed espiritual a pankaukolan da tan mibiang ed sikatayo diad tuan panagdayew?

2. Panon a walaan na maabig a resulta iray sagpot nen Pablo tan Pedro diad impanpulong da ed lalaki odino ulo na pamilya?

² Katongtongen Iray Ulo na Pamilya: Sano awaten na ulo na pamilya so katuaan, kaslakan et natangguyor toy arum ed pamilya to a mibiang ed sikato ed tuan panagdayew. Alimbawa, sanen nipriso si Pablo tan Silas lapud panagpulong da, pinulongan da so sakey a guardia na prisoan. Sikato tan say sankaabungan to so abautismoan. (Gawa 16:25-34) Bilang resulta na impanpulong nen Pablo ed Corinto, si “Crispo a pangulo na sinagoga [so] anisia ed Katawan, pati amin a kaamong to.” (Gawa 18:8) Inusar nen Jehova si Pedro pian pulongan si Cornelio, sakey ya opisyal na sundalo a “masimpit tan maitatakot ed Dios.” Si Cornelio, pati kakanayon tan maapit a kakaaro to, so abautismoan.​—Gawa 10:1-48.

3. Bilang pangalig ed si Felipe, siopa iray “wala ed atagey a betang” a kaukolan tayon pulongan?

³ Say pampulong ed lalaki a “wala ed atagey a betang” et walaan na baleg ya epekto. (1 Tim. 2:1, 2) Alimbawa, imbilin na anghel nen Jehova ed si Felipe a mansalita ed lakin “walaan na baleg a pakauley” ed amin a kayamanan na reyna na Etiopia. Nadngel nen Felipe so laki a “babasaen [toy nipaakar ed] propeta Isaias” tan impaliwawa to ed sikato so maong a balita nipaakar ed si Jesus. Sayan Etiope so nagmaliw a babangatan tan maseguron inyabawag to so maong a balita ed saray nabet to ed dalan sanen mamapaarap ed nianakan ton baley. Nayarin pinulongan met na Etiope so reyna tan saray membro na korte to, totoon ngalngali anggapoy pankanawnawa ran napakabatan na maong a balita.​—Gawa 8:26-39.

4. Panon tayon naikdan na dakel a pankanawnawa iray ulo na pamilya a napakabatan na maong a balita?

⁴ No Panon Tayon Nakatongtong so Dakel ya Ulo na Pamilya: Lapud saray ulo na pamilya so mabetbet a walad trabaho ra legan na agew, kasin niyeskedyul yo so malaem nin oras ed ministeryo diad labi, diad saray Sabado tan Simba, odino diad saray holiday? No regular yon nakikimeyan iray pasen na negosyo, mangiter itan ed sikayo na kaaruman a pankanawnawa a pulongan iray ulo na pamilya a matalag a nasabi ed abung da. Nayari met a panggunaetan na agagin lalaki a pulongan iray katrabahoan dan lalaki ed impormal a paraan. Diad panagkabkaabungan, nagkalalo la ed teritorya a mabetbet a nakikimeyan, no maminsan et nakerew iray agagin lalaki a mitongtong ed ulo na pamilya a nasabi ed abung.

5. Antoy nepeg a gawaen na sakey ya agin bii no makaromog na ulo na pamilya ya interesado ed mensahe na Panarian?

⁵ Say agin bii a makaromog na sakey ya ulo na pamilya ya interesado ed katuaan so agnepeg ya ompawil a bukor. Ipila toy asawa to odino sananey a manangipalapag. No mantultuloy so interes na satan ya ulo na pamilya, mas maabig no iyuksoy so sakey a kualipikadon agin laki a mangituloy ed panagpawil.

6. Panon tayon naalig si apostol Pablo pian “natangguyor so dakel” a totoo?

⁶ Pantongtongan Iray Teman Interesado Iray Ulo na Pamilya: Inkonsidera nen apostol Pablo iray dumerengel to tan intukoy toy metodo to pian “dakel so natangguyor [to].” (1 Cor. 9:19-23, MB) Nepeg tayo met ya ikonsidera iray teman interesado iray ulo na pamilya tan iparaan iratan a maong. Singa bilang, mabetbet a mapaga iray ulo na pamilya ed kipapasen na ekonomya, nipaakar ed gobierno, pangasikaso ed pankaukolan tan seguridad na pamilya ra. Ompan interesado met ira ed gagala na bilay, pansumpalay dalin, tan no akin ya iyaabuloy na Dios so kairapan. Mas mainomay dan awaten so mensahe na Panarian no tekepan tayo na pakatebek so paraan na pitongtong tayo.​—Uli. 16:23.

7. Panon a say interon kongregasyon et nawalaan na maabig ya epekto ed saray agmananisian kaasawaan a lalaki ya inmatendi ed Kingdom Hall?

⁷ Katongtongen Iray Agmananisian Asawan Lalaki: Anggaman baleg so impluensya na maabig a kondukta na agagi tayon bibii ed agmananisian kaasawaan da, baleg met so nitulong na saray membro na kongregasyon. (1 Ped. 3:1-4) Sano nitagar na agin bii so agmananisian asawa to ed aral, baleg so epekto ed sikato na pangabrasa na kongregasyon. Say inyatendi to et pakapatnagan na interes to ed katuaan, tan nayarin labay toy paiyaralan na Biblia.

8. Panon a nayarin panggunaetan na agagin lalaki a tulongan iray agni tanto interesado ed katuaan ya asawan lalaki?

⁸ Diad biek a dapag, walaray asawan lalaki ya agni tanto interesado ed gapo balet ta diad ilabas na panaon et mabulos iran mitongtong nipaakar ed Biblia ed sakey ya agin laki a kabkabat da la. Nanggunaetan na agagin lalaki ed sakey a kongregasyon so sagpaminsan ya ibisita ed sakey a pamilya ya agmananisia so asawan laki, tan itotongtong da ed sikato iray bengatla ya amta ran paninteresan to. Diad inlabas na panaon et sikatoy inyaralan na Biblia, tan natan et abautismoan la. Diad sananey nin inkagawa, tinulongan na sakey ya agin laki so agmananisian asawan lakin makaaro a man-alar ed abung to. Lapud satan a personal ya interes et nigapo so panagaral na Biblia. (Gal. 6:10; Fil. 2:4) No sakey kan agin laki, akin ta no katongtongen moy sakey odino pigara ni ed sarayan agmananisian asawan lalaki?

9. Antoy resulta na panangipasal ed agagin lalaki?

⁹ Pangipasal Parad Arapen: Saray lalakin angipanengneng na interes ed mensahe na Panarian tan nanggunaet ya onkualipika ed saray pribilehyo ed panaglingkor et nayarin magmaliw met a kabiangan ed “langkap” a lalaki, salanti, Kristianon mamatatken a manguusar ed saray abilidad tan biskeg da ed biang na saray kongregasyon na totoo nen Jehova. (Efe. 4:8; Sal. 68:18) Saratan a lalaki so mabulos tan magunaet a manpastol ed kongregasyon. (1 Ped. 5:2, 3) Talagan magmaliw iran baleg a bendisyon ed interon panlilimog na agagi!

10. Panon ya akagunggonaan na dakel iray sagpot nen Ananias pian tulongan si Pablo?

¹⁰ Singa bilang, si Saulo so nagmaliw ya ‘apostol na saray Gentiles,’ anggaman datin manamasegsegang ed saray Kristiano. (Roma 11:13) Kanian, nen primero et talawan si babangatan ya Ananias a pulongan si Saulo. Bangbalet, tinumbok nen Ananias so panangiwanwan na Katawan tan akitongtong ed si Saulo a nagmaliw ya apostol Pablo. Diad inlabas na saray taon, say ministeryo nen Pablo so akagunggonaan na nilibo ya akadngel ed panagpulong to ontan met ed minilyon a nantultuloy ya agunggonaan ed apuyanan iran sulat to a nirekord ed Salita na Dios.​—Gawa 9:3-19; 2 Tim. 3:16, 17.

11. Akin a gawaen tayoy nakaukolan iran pananguman pian pulongan iray lalaki odino ulo na pamilya?

¹¹ Komon ta gawaen tayoy nakaukolan iran pananguman pian panggunaetan a pulongan iray lalaki odino ulo na pamilya. Legan tayon dadampoten iyan kalat, napaseguroan tayo a bendisyonan nen Jehova iray seet tayo a gawaen so linawa to tan asikasoen so intereses na Panarian.