Sakey a Labin Nodnonoten

DIAD sakey a makatantandan agew masulok a 3,500 a taon lay apalabas, inganggan nen Jehova a Dios iray naaripen ya Israelita ed Ehipto a mamatey na sakey a kordero tan iwalsik so dala na saman ed saray pasindeg tan ed bandad tagey na saray pinto na abung da. Diad saman a mismon labi, nilampasan na anghel na Dios iray abung ya amarkaan ed onian paraan balet ta pinatey toray panguloan ya anak a lalaki ed ayaman na amin ya Ehipsios. Insan saray Israelita so nibulos. Nanlapulad saman, diad anibersaryo na satan ya ebento, sinelebraan na saray Judio so Paskua.

Tampol kayari na impanselebra nen Jesu-Kristo ed kaunoran a Paskua a kaiba iray apostol to, inletneg to so sakey a panangan ya onkanan mangipanonot ed masakripisyon impatey to. Inderew to so tinapay ed matoor ya apostoles to tan kuanto: “Ala yo, kanen yo; saya sikato’y laman ko.” Kayari to et inikdan tora na sakey kupa na alak tan kuanto: “Oninum kayo ya amin ed saya; ta sikato ya’y dalak ed sipan, a sikato’y naibong nipaakad ed amayamay a pangekal ed saray kasalanan.” Inkuan met nen Jesus: “Saya so itultuloy yon gawaen a pakanodnonotan ed siak.” (Mateo 26:26-28; Lucas 22:19, 20) Kanian inganggan nen Jesus ed saray patumbok to a ngilinan iyan pakanodnonotan ed impatey to.

Ampetapetang a mangimbita iray Tasi nen Jehova ed sikayo a miulop ed sikara diad pangimaton na sayan Memoryal ed impatey nen Jesus. Sikayo so nayarin onatendi ed Kingdom Hall ya asingger ed ayaman yo. Kabaten ed saray Tasi ed lugar yo para’d eksakton oras tan pasen. Say petsa na okasyon ed 1994 so Sabado, Marso 26, say tinapay tan alak so iserbi kaselek na agew.