Apocalipsis​—Asingger la so Engranden Kapantokan To!

Kapitulo 42

Sakey a Balon Tawen tan sakey a Balon Dalin

1. Anto so deneskribe nen Juan sanen sikatoy ipapawil na anghel ed gapo na Sanlibon Taon ya Uley?

Say maglorian pasingawey so mantultuloy a niparungtal legan a si Juan so ipapawil na anghel ed gapo na Sanlibon Taon ya Uley. Anto so dedeskribien to? “Tan anengneng ko so sakey a balon tawen tan sakey a balon dalin; ta say una a tawen tan say una a dalin so linmabas la, tan anggapo la so dayat.” (Apocalipsis 21:1) Sakey a makapasagyat a nenengnengen so nanengneng la natan!

2. (a) Panon a say propesiya nen Isaias nipaakar ed balon katawenan tan sakey a balon dalin et asumpal ed nipawil iran Judios nen 537 K.K.P.? (b) Panon tayon amta a wala so kaaruman a pangiyaplika ed propesiya nen Isaias, tan panon a sayan sipan et asumpal?

² Nilasus a taon sakbay na agew nen Juan, onya so inkuan nen Jehova ed si Isaias: “Ta nia mamalsa ak na balon katawenan tan sakey a balon dalin; ta saray una a bengabengatla so agla nanonotan, nisay nipanonot ira.” (Isaias 65:17; 66:22) Sayan propesiya so walaan na inmunan kasumpalan sanen pinmawil iray matoor a Judios ed Jerusalem nen 537 K.K.P. kayari 70-taon na inkadakep da ed Babilonia. Diad saman a panangipawil, sikaray amorma na sakey ya alinisan a sosyedad, “sakey a balon dalin,” diad silong na balon sistema a pananguley, “balon katawenan.” Anggaman ontan, indanet nen apostol Pedro so sakey nin kaaruman a kasumpalan na propesiya, diad pangibabagan: “Balet unong ed sipan to et walaray balon katawenan tan sakey a balon dalin, tan diad saya so panayaman na inkatunong.” (2 Pedro 3:13) Ipapanengneng nen Juan a sayan sipan so nasumpal legan na agew na Katawan. “Say una a tawen tan say una a dalin,” say organisadon sistema na bengabengatla nen Satanas a pati ed ginogobiernon oksuyan to ya iimpluensyaan nen Satanas tan saray demonyo to, so onlabas. Say maburakan a “dayat” na mauges, rebelyoson katooan so naandi. Nisandi so “sakey a balon tawen tan sakey a balon dalin”​—sakey a balon mangaraldalin a sosyedad ed silong na balon gobierno, say Panarian na Dios.​—Ipareng so Apocalipsis 20:11.

3. (a) Anto so deskribien nen Juan, tan anto so Balon Jerusalem? (b) Panon a say Balon Jerusalem et ‘onleleksab a manlapud tawen’?

³ Intuloy nen Juan: “Tan anengneng ko so masantos a syudad, say Balon Jerusalem, ya onleleksab ed tawen a manlapud Dios tan nitarya a bilang sakey a nobya ya akawesan para’d asawa to.” (Apocalipsis 21:2) Say Balon Jerusalem so nobya nen Kristo, a tugyopen na alanaan iran Kristiano a nansiansian matoor ya anggad patey tan apaoli a magmaliw ya arari tan saserdote a kaiba na niglorian Jesus. (Apocalipsis 3:12; 20:6) No panon a say mangaraldalin a Jerusalem et nagmaliw a kabisera na gobierno ed kadaanan ya Israel, say marakerakep a Balon Jerusalem tan say Nobyo to so manugyop ed gobierno na balon sistema na bengabengatla. Saya so balon tawen. Say nobya ya ‘onleleksab a manlapud tawen,’ et aliwan diad literal a paraan, noagta diad pantalos ya ipaarap so imano ed sayan dalin. Say nobya na Kordero so magmaliw a matoor a katulongan to ed panangipakurang na matunong a gobierno ed amin a katooan. Peteg a sakey a bendisyon para’d balon dalin!

4. Anton sipan so ginawa na Dios a mipadpara ed samay ginawa ed balobalo nin aporman nasyon na Israel?

⁴ Onya so ibabaga ni nen Juan ed sikatayo: “Kayari na saya nadngel ko so sakey a baleg a boses ed tawen a kuanto: ‘Nia! Say tabernakulo na Dios so wala ed saray totoo, tan sikato so manayam naani ed sikara, tan sikaray magmaliw a baley to. Tan say Dios a mismo so wala ed sikara.’” (Apocalipsis 21:3) Sanen ginawa nen Jehova so Ganggan na sipan a kaiba na saman so peles a balon letneg a nasyon ya Israel, insipan to: “Ta ipasen ko naani tabernakulo ed nanleleetan yo, tan agkayo gulaen na kamarerwak. Tan peteg a siak so manakar ed nanleleetan yo tan paneknekan ko so inkasiak a Dios yo, tan sikayo, ed biang yo, paneknekan yo so inkasikayo a baley ko.” (Levitico 26:11, 12) Natan si Jehova so manggagawa lamet na mipadparan sipan ed matoor a katooan. Legan na sanlibon taon ya agew na Panangukom, sikara so magmaliw a nikabkabiig totoo para ed sikato.

5. (a) Panon a say Dios et miayam ed katooan legan na Milenyon Uley? (b) Panon a manayam so Dios ed limog na katooan kayari na Sanlibon Taon ya Uley?

⁵ Legan na Sanlibon Taon ya Uley, si Jehova so “manayam” ed limog na katooan ed temporaryon uksoyan, a sikatoy ilalaman na say arin Anak to, si Jesu-Kristo. Anggaman ontan, diad sampot na Sanlibon Taon ya Uley, sano iyawat nen Jesus la so Panarian ed Ama to, agla kaukolan so maarin representanti odino manamegley. Si Jehova so manayam ed espiritual a pamaakaran a “kaibay baley to” ed sakey a permanenti tan direktan dalan. (Ipareng so Juan 4:23, 24.) Agaylan atagey a pribilihyo para’d nipawil a katooan!

6, 7. (a) Anton engranden sipan so imparungtal nen Juan, tan siopa so mangayaga ed sarayan bendisyon? (b) Panon a deskribien nen Isaias so paraiso ed parehon espiritual tan pisikal?

⁶ Inpatuloy ya inkuan nen Juan so onya: “Tan punasen to so amin a lua ed kamataan da, tan anggapo la so patey, nisay pannangis nisay pandageyem nisay ot-ot. Saray gendat a bengatla sikara so naandi.” (Apocalipsis 21:4) Sikatayo lamet, so apasakbayan ed saray inmunan inpuyan a sipasipan. Tatalaranan met nen Isaias so panaon sano say patey tan pannangis so sigpot a naandi la tan say ermen so nasalatan na panliket. (Isaias 25:8; 35:10; 51:11; 65:19) Pinekderan natan nen Juan a sarayan sipan so walaan na makapakelaw a pansumpalan legan na sanlibon taon ya Agew a Panangukom. Ununa say baleg ya ulop so makapanliket ed saray bendisyon. “Say Kordero, a wala ed pegley na trono,” so mantultuloy a mamastol ed sikara, ya “itonton ira ed subol na danum na bilay. Tan punasen na Dios so amin a lua ed kamataan da.” (Apocalipsis 7:9, 17) Balet diad saginonor amin a paolien tan mangagamil na pananisia ed saray probisyon nen Jehova so nakaiba ra, a manliket ed sakey a paraiso a namparan espiritual tan pisikal.

⁷ “Diad satan a panaon” inkuan nen Isaias, “saray mata na bulag so nalukasan, tan saray mismon layag na telek so nibuang.” On, “diad satan a panaon say lupoy so onkalab a singa ulsa, tan say dila na umel so onkelyaw ed gayaga.” (Isaias 35:5, 6) Diad saman met a panaon, “peteg a sikara so mangipaalagey na abung tan panayaman da; tan peteg a sikara so mantanem na ubasan tan sikara naani mangan na saray bunga ra. Ag-ra la manpaalagey tan sananey so manayam; tan ag-ira mantanem tan sananey so mangan. Lapud tano anto so agew na sakey a kiew ontan met so agew na saray katooan ko; tan say kimey na saray dilin lima na pinilik so nagnap a mangayaga.” (Isaias 65:21, 22) Kanian sikara la so agnabagot naani manlapu ed dalin.

8. Anton mismo so imbaga nen Jehova nipaakar ed kapetegan na sarayan engranden sipasipan?

⁸ Agaylan marakerakep iran sinag na arapen so nisepsep ed kaisipan tayo leleg ya omamengen tayorayan sipasipan! Makapakelkelaw iran probisyon so akatarya para ed matoor a katooan ed silong na maaron mangatatawen a gobierno. Kasin sarayan sipan so mairap a panisiaan? Saraya ta so kugkugip labat la na sakey a masiken a nipangaw ed Patmos? Si Jehova a mismo so oneebat: “Tan say manyurong a Sakey ed trono kuanto: ‘Nia! Gawaen kon amin a bengabengatlan balo.’ Ontan met, inkuanto: ‘Isulat mo, ta sarayan salita so matoor tan matua.’ Tan kuan to ed siak: ‘Agawa la! Siak so Alpa tan Omega, say sengeg tan angaan.’”​—Apocalipsis 21:5, 6a.

9. Akin a sarayan bendisyon ed arapen et moriaen a bilang absoluton pamaseguro na nagawa?

⁹ Singa si Jehova a mismo so manpipirma na sakey a garantiya, odino pankayaryan a titulo, ed sarayan arapen a bendisyon para’d matoor a katooan. Siopa so makpel a manuppiat ed ontan a Garantisador? Peteg a maseguro irayan sipasipan nen Jehova a sinalita ton singano asumpal la: “Agawa la!” Agta si Jehova so say “Alpa tan Omega . . . , say Sakey a sikato so wala tan wala nen saman tan sikato so onsabi, say Makapanyarin amin”? (Apocalipsis 1:8) Peteg a sikato! Sikato a mismo so angibaga: “Siak so inmuna tan say kaunoran, tan anggapo la so arum a Dios noag siak.” (Isaias 44:6) Nisengeg ed saya, sikato so makapanpuyan na saray propesiya tan sumpalen ira anggad kamelmelagan a detalye. Agaylan makapabiskeg na pananisia! Kanian insipan to: “Nia! Gawaen kon amin a bengabengatlan balo”! Imbes a panduaruwaan no peteg a nagawa irayan makapakelaw, maseguron onya so isipen tayo: ‘Anto so nepeg kon personal a gawaen pian natawir so saratan a bendisyon?’

“Danum” Para’d Saray Napgaan

10. Anton “danum” so inyopresi nen Jehova, tan anto so ilalaman to?

¹⁰ Si Jehova a mismo so mangibabaga: “Siopaman a napgaan so painumen kon libre a manlapud subol na danum na bilay.” (Apocalipsis 21:6b) Pian napaer itan a kapgaan, nepeg a kabaten na sakey a too so espiritual a pankaukolan to tan magmaliw a mabulos a mangawat na “danum” ya itarok nen Jehova. (Isaias 55:1; Mateo 5:3) Anton “danum”? Si Jesus a mismo so inmebat ed sayan tepet nen nantasi ed sakey a bii ed abay na bobon ed Samaria. Inkuanto ed sikato: “Siopaman ya uninom ed danum ya iter ko ed sikato so aglan balot napegaan, balet say danum ya iter ko ed sikato so magmaliw ed sikato a sakey a subol na danum a mansosbol a mangiter na bilay ya andi-anggaan.” Satan a “subol na danum na bilay” so onagus a manlapud Dios ed panamegley nen Kristo bilang probisyon to para ed pangipawil na katooan ed inkayadyari ed bilay. Singa say Samaritanan bii, agaylan liket tayo a mankaliktan ya uninom manlapud saman a subol! Tan singa saman a bii, nepeg a sipaparaan tayon isakripisyo iray minumundon interes pian nipanabang ed arum so maong a balita!​—Juan 4:14, 15, 28, 29.

Saray Ontalona

11. Anton sipan so ginawa nen Jehova, tan ed siopa so ununan kiyaplikaan na saray salita?

¹¹ Saraman so uninom na satan a makarepreskon “danum” so kaukolan met ya ontalona, unong ya intuloy ya inkuan nen Jehova: “Siopaman a manalo tawiren to irayan amin a bengatla et siak so magmaliw a Dios to et sikato so magmaliw ya ana’ko.” (Apocalipsis 21:7) Sayan sipan so miulibayan ed sipasipan ya aromog ed saray mensahe para’d pitoran kongregasyon; kanian, sarayan salita so nepeg ya ununan iyaplika ed alanaan iran babangatan. (Apocalipsis 2:7, 11, 17, 26-28; 3:5, 12, 21) Nanlapulad saman ya angga ed natan saray espiritual ya agagi nen Kristo so nanilalo ed pribilihyo a makapibiang ed Balon Jerusalem. No sikara so manalo, a singa impanalo nen Jesus, namoria daray ilalo ra.​—Juan 16:33.

12. Panon a say sipan nen Jehova ed Apocalipsis 21:7 so nasumpal ed baleg ya ulop?

¹² Say baleg ya ulop a manlapud amin a nasyon so manilalo ed sayan sipan. Nakaukolan met a sikaray ontalona, tan sitotoor a manlingkor ed Dios ya anggad makapaway ira ed baleg a kairapan. Kayari na saya sikara so onloob ed mangaraldalin a tawir, ‘say panarian a nitarya para’d sikara a manlapud inkiletneg na mundo.’ (Mateo 25:34) Saraya tan saray arum a mangaraldalin a karnero na Katawan ya akapasa ed unor a subok na sanlibon taon so natawag a “sasantos.” (Apocalipsis 20:9) Pangayagaan da so sagrado tan maaron pisiglaotan ed Amalsa, si Jehova a Dios, bilang kabiangan na sankatalbaan a muyongan to.​—Isaias 66:22; Juan 20:31; Roma 8:21.

13, 14. Pian natawir irayan engranden sipan na Dios, antoran agamil so nepeg tayon naspot ya italirak, tan akin?

¹³ Tekep na sayan engranden ilalo, agaylan importanti sirin so pansiansian malinis na saray Tasi nen Jehova natan manlapud makadumsis iran bengatla ed mundo nen Satanas! Kaukolan a magmaliw tayo a mabiskeg, mapekder tan determinado pian agtayon balot naguyor nen Satanas a kaiba na sarayan nengneng a deneskriben mismo nen Jehova: “Balet saray matakot tan agmanisia tan saray makapadimla tan saray akapatey tan saray managlawan tan saray managanito tan saray managtalintao tan saray amin a matila, say apag da wala naani ed dayat a mandarlang ed apuy tan asupre a sikato so komadua ya ipapatey.” (Apocalipsis 21:8) On, say sakey a manpilalek a magmaliw a manawir et kaukolan ton onarawi ed saray agamil a mandudumsis ed sayan daan a sistema na saray bengatla. Nepeg a sikatoy ontalona diad panamegley na pansiansian matoor ed iyarap ed amin a desdes tan tukso.​—Roma 8:35-39.

¹⁴ Anggaman mangibabagan nobya nen Kristo, say Kakristianoan so kabkabat lapud saray makapadimlan gawgawa to unong ed paneskrebi nen Juan dia. Kanian sikato so nansumpal ed andi-anggaan a kadederal a kaiba niray arum a kabiangan na Babilonia a Baleg. (Apocalipsis 18:8, 21) Mitukoyan ed saya, siopaman ed nakdaan odino ed baleg ya ulop a mangagamil ed ontan a kaugsan, odino onggapon mamaseseg ed satan, so onarap ed andi-anggaan a kadederal. No ipilit darayan gawaen, agda natawir irayan sipasipan. Tan dia ed balon mundo, siopaman a mangiparungtal na ontan iran agamil so naderal a tamtampol; mamaarap ed komaduan ipapatey ya andian na ilalo ed kioli.​—Isaias 65:20.

15. Sioparay manuna ed saray tinmalona, tan ed anton basiyan a say Apocalipsis et nitarok ed engranden pantok.

¹⁵ Matalunggaring iran ehemplo na mananalo so Kordero, si Jesu-Kristo, tan say nobya to na 144,000, Balon Jerusalem. Matukoy, sirin, a say Apocalipsis et nitarok ed engranden pantok na pinal, andian na kaparan nenengnengen a Balon Jerusalem! Isasalaysay natan nen Juan so kaunoran a pasingawey.

(Ituloy ed ontumbok a paway.)