Report na Saray Manangiyabawag na Panarian
Sakey a Pamilyan Pinankasakey na Katuaan na Biblia
NATAN, diad dakel a parti na dalin, say pankakasakey na pamilya so ngalngali anggapo. Anggaman ontan, ipaparungtal na Biblia so sekreto pian napankasakey so pamilya. Kunsideraen paray salita nen Jesus: “Ganagana sirin a makadngel na saraya ya salitak, et sumpalen to ra, sikato so niolibay ed sakey a too’n makalakal, ya inpaalagey to’y abung to ed tapew na baton dampay.” (Mateo 7:24) Nilibon pamilya na saray Tasi nen Jehova so akapankakasakey diad impangiyaplika ra ed sarayan salita tan diad impangusar ed Biblia bilang pundasyon diad pamaalagey na nankakasakey a pamilya. Nagagamoran met na arum itan a pankakasakey, a singa ipapanengneng na onggendan ya eksperiensia.
Legan a si Daniel so manlilingkor ed armada na Pransya, sakey a pari so angisuheri ed si Daniel a manaliw na sakey a Biblia, a ginawa to, tan ginapoan ton binasa iman a maparanay. Diad saginonor sikato so niyalis ed Tahiti. Arum ed saray kaiba nen Daniel a sundalo so Adventist, tan saray arum met so Mormon. Mabetbet a saray tongtongan da so nipaakar ed relihyon. Sakey ya agew, inkabat na hepen sarhento ed si Daniel so asawa to, a sakey ed saray Tasi nen Jehova. Sikato so sanngarem ya angebat ed dakel a tepet nen Daniel tan sikatoy inkabat ed sakey ed lokal iran kongregasyon na Tastasi nen Jehova ed Tahiti. Ag-abayag et sakey a regular a panagaral na Biblia so nigapo ed sikato.
Saray ateng nen Daniel a manaayam ed Pransya so debotadon Katoliko. Say ama to so managkonseho ed saray estudyante tan manangasikaso na panagbangat na relihyon ed sakey a Katolikon eskuelaan. Diad pankaliktan ton nipanabang ed atateng to so pigara ed espiritual a kayamanan a naaaralan to, kalkalnan insalet nen Daniel ed saray sulat to ed sikara so pigaran ideya a nanlapud Biblia.
Diad gapo et aliketan so ina nen Daniel, balet sikato so abigla sanen anengneng to so ngaran a Jehova ed sakey ed saray sulat na anak to. Pigaran agew ed saginonor, nadngelan na ina so sakey a programa ed radyon mangibabagan “mapeligron sekta” iray Tasi nen Jehova. Sinulatan to si Daniel, a kekerewen ed sikaton itunda ton tampol so pilimog ed saray Tasi. Anggaman ontan, nantultuloy si Daniel ya inmaligwas ed panagaral to na Biblia tan ag-abayag et angiyuksoy pian makaalis ed armada tan makapawil ed Pransya.
Bektan sikato so akasempet, si Daniel so angusar ed kada labi—no maminsan anggad pegley labi—ed andukey iran pididiskusyon ed ina to nipaakar ed Biblia. Diad kaunoran, sikato so inmabobon a mila ed si Daniel ed Kingdom Hall. Sanen inmatendi ed sankaunaan a miting to, sikato so nikelawan a tuloy a sengegay inkerew ton nawalaan na personal a panagaral na Biblia. Maples so inyaligwas to tan ag-abayag et abautismoan.
Say ama nen Daniel so maabuloy a too balet ta dedikadon tuloy ed saray aktibidad na propesyon tan relihyon to. Balet, aminsan et impatnubang to so asawa to tan si Daniel ed sakey a distriton kumbension. Saman so Hulyo 14, tan walad kanonotan to so panbantay na parada na Bastille Day ed syudad. Legan na panalagar to, lapud inkamaupapet, nalmo ton maabig so iloob pian nengnengen so kumbension hall. Sikato so asagyat ed inkauksoy tan kareenan a naimatonan to ed limog na totoo nen Jehova, tan legan na panaakar to ed nanduruman departamento na kumbension, amin so manatawag ed sikaton “brother.” Alingwanan to so parada na Bastille Day tan nansiansian dinmengel anggad asumpal so kumbension. Impaiyaralan na Biblia tan maples so inyaligwas to ed impakaaral na katuaan. Anggaman ontan, legan a makakaaral, lalon nasisigensigen lapud kipapasen na trabaho to, kanian diad edad a 58, tinaynan to so trabaho to. Natan sikaran talo ed pamilya so dedikado tan bautismado tan nankakasakey a manlilingkor ed si Jehova.
Say katuaan na Biblia so amasakey ed pamilya nen Daniel. Satan so mamakasakey met ed arum a pamilya no aralen tan iyaplika ra itan ed interon puso.