Madibinon Bangat Sumpa ed Bangabangat na Saray Demonyo
“Saray arum onsian ira ed pananisia, a dengelen da so saray espiritu a manangilawan tan saray bangat na saray demonyo.”—1 TIMOTEO 4:1.
1. Anton bakal so walad pegley na saray Kristiano?
NONOTEN pa a sikayo so manaayam ed lugar a pakakagawaan na bakal. Anto so kipapasen no onlan onugip tan narerengel so laldis na paltogan tan ombangon lapud ongol na tanke? Makapaermen, diad arum a pasen na mundo, peteg ya ontan so kabibilay na totoo. Anggaman kuan, diad espiritual a pantalos, amin a Kristiano so manbibilay ed onian paraan. Sikara so wala ed utel na sakey a baleg a panlalaban ed loob na ngalngalin 6,000 a taon tan diad saray agew tayo et pinmalalo. Anto iyan abayag lan bakal? Salanti say panlalaban na katuaan sumpa ed katilaan, madibinon bangat sumpa ed bangabangat na saray demonyo. Ag-alablabas so panawag ed satan a panlalaban—anggaman ed kabiangan na sakey ed saray onsusumpan dapag—a say andiay-panangasin tuloy tan makapatey a tuloy a gutgutan ed awaran na katooan.
2. (a) Unong ed si Pablo, anton duaran dapag a mansusumpaan ed balang sakey? (b) Anto so labay ya ibaga nen Pablo ed say “pananisia”?
2 Sinalambit nen apostol Pablo so duaran dapag na sayan gutgutan sanen sinulat to si Timoteo: “Ingen say Espiritu kuan to ed maliwawa, a dia ed saray arapen a panaon saray arum onsian ira ed pananisia, a dengelen da so saray espiritu a manangilawan tan saray bangat na saray demonyo.” (1 Timoteo 4:1) Imanoen a saray bangat na saray demonyo so nagkalalon makaimpluensya ed “arapen a panaon.” A singa minoria ed agew nen Pablo, sikatayo so manbibilay ed ontan a panaon. Imanoen, met, no anto so susumpaen na bangabangat na saray demonyo, salanti “say pananisia.” Dia, say “pananisia” so mangirerepresenta ed madibinon bangat, a nibase ed madibinon apuyanan iran balikas na Dios a lugan na Biblia. Satan a pananisia so manangiter-bilay. Babangatan to so sakey a Kristiano a manggawa ed linawa na Dios. Satan so katuaan a mangitonton ed maandon bilay.—Juan 3:16; 6:40.
3. (a) Anto so agawa ed saray atigway ed panlalaban ed baetan na katuaan tan katilaan? (b) Siopa so wala ed benegan na bangabangat na saray demonyo?
3 Siopaman ya onarawi manlapud pananisia et agmakagamor na maandon bilay. Sikara so natitigway ed bakal. Agaylan makaderal a resulta diad pangiyabuloy na sakey a palikdoen na bangabangat na saray demonyo! (Mateo 24:24) Bilang indibidual, panon tayon napaliisan so pakatigway? Diad panamegley na sigpot a pangipulisay ed sarayan tilan bangabangat, ya onkana lambengat ed gagala na “say manuley na saray demonyo,” si Satanas a Diablo. (Mateo 12:24) Nipasakbay, saray bangat nen Satanas so katilaan, lapud si Satanas so “Ama na tila.” (Juan 8:44) Konsideraen no panon inka-onsiano ed impangusar to na katilaan pian palikdoen so inmunan atateng tayo.
Niparungtal so Bangabangat na Saray Demonyo
4, 5. Anton katilaan so imbaga nen Satanas ed si Eva, tan akin a satan so mauges a tuloy?
4 Saray ebento so nikurit ed Biblia diad Genesis 3:1-5, NW. Diad impangusar ed sakey ya uleg, sininggeran nen Satanas si Eva tan tinepetan to: “Peteg tan inbaga na Dios ya agkayo mangan manlapud amin a kiew ed tanamanan?” Say tepet so ompatnag ya agmakapasakit, balet imanoen lamet. “Peteg ta?” Makasurpresa so impangibaga nen Satanas, a singa to inkuan ya, ‘Akin ya ibaga na Dios so ontan?’
5 Diad inkainosenti to, impatnag nen Eva a saya so tua. Kabat to so madibinon bangat ed sayan pamaakaran, a say Dios inkuanto ed si Adan a sikara so ompatey no sikaray mangan ed kiew na pakaamtaan na maong tan mauges. (Genesis 2:16, 17) Say tepet nen Satanas so mapatnag ya akasagyat ed interes to, kanian sikato so tinmalineng ya anggad sikato so akasabi ed manunan punto na argumento to: “Et say uleg inkuan to ed bii, Ag kayo ompatey.” Agaylan mauges a bengatlan ibaga! Inakusa nen Satanas si Jehova, say Dios na katuaan, say Dios na aro, say Manamalsa, a manitila ed atooan ya ananak To!—Salmo 31:5; 1 Juan 4:16; Apocalipsis 4:11.
6. Panon ya inangat nen Satanas so kaabigan tan inkasoberano nen Jehova?
6 Balet nagkalalo ni so inkuan nen Satanas. Intuloy to: “No ag say amta na Dios a dia ed agew a pangan yo ed satan, nalukasan so saray mata yo ed satan, et singa kayo Dios, ya amta yo so maong tan mauges.” Unong ed si Satanas, si Jehova a Dios—ya angitarok na daakan a tuloy para’d inmunan atateng tayo—kaliktan ton sikaray nasamsaman na bengatlan makapakelaw. Kaliktan ton sikaray amperen ed pagmaliw a singa dirios. Kanian, inangat nen Satanas so kaabigan na Dios. Sikato met so angiyalibansa na dilin-panpilalek tan ginagalan panangibaliwala ed saray ganggan na Dios, diad pangibabagan say ikiwas ed onian paraan so makagungguna. Diad tua, inangat nen Satanas so inkasoberano na Dios ed saray dilin pinalsa To, ibabaga ton say Dios so andian na kanepegan a manlimita ed no anto so ginawa na too.
7. Kapigan ya inmunan nadngelan so bangabangat na saray demonyo, tan panon a saratan so miulibay natan?
7 Tekep na saraman a salita nen Satanas, say bangabangat na saray demonyo so ginmapon nadngelan. Sarayan mauges a bangabangat so siansian mangiyaalibansa na miulibay ya agmaridios iran prinsipyo. Unong a singa ginawa to ed tanamanan na Eden, si Satanas, a kaiba to natan iray arum a rebelyoson espiritu, so siansian mangaangat ed kanepegan na Dios a mangiletneg na saray estandarte na kiwas. Sikato so siansian mangaangat ed inkasoberano nen Jehova tan manggugunaet a mangimpluensya ed katooan ya onsumlang ed mangatatawen ya Ama ra.—1 Juan 3:8, 10.
8. Anto so abalang nen Adan tan Eva ed Eden, balet panon ya apaneknekan a tua si Jehova?
8 Diad inmunan impanabet ed panlalaban ed baetan na madibinon bangat tan bangabangat na saray demonyo, si Adan tan Eva so nanggawa na lingon desisyon tan abalang da so ilalo ran bilay ya andi-anggaan. (Genesis 3:19) Legan na ilalabas na panaon tan saray laman da so ginmapon kinmapoy, apekderan a tuloy ed sikara no siopa so nantila tan no siopa so angibaga na katuaan ed Eden. Anggaman ontan, nilasus a taon sakbay na impatey da ed pisikal a pantalos, sikara so inmunan atigway ed bakal ed baetan na katuaan tan katilaan sanen sikara so inukom bilang ag-makana ed Manamalsa ra, say Subol na bilay. Satan et sanen sikara so inatey ed espiritual a pantalos.—Salmo 36:9; ipareng so Efeso 2:1.
Say Bangabangat na Saray Demonyo Natan
9. Panon inkaipektibo so bangabangat na saray demonyo ed loob na saray siglo?
9 Unong a nikurit ed libro na Apocalipsis, si apostol Juan so angitarokan na panangipuyan ed “agew na Katawan,” a ginmapo nen 1914. (Apocalipsis 1:10) Diad satan a panaon si Satanas tan saray demonyo to so pinagit ed tawen ya imbantak ed kabangibang na dalin—sakey a baleg a babeng para’d sayan sumusumpa ed Baleg a Manamalsa tayo. Aglan balot narengelan so boses to ed tawen a naynay a mangaakusa sumpa’d ariripen nen Jehova. (Apocalipsis 12:10) Anggaman kuan, anto so agawan aligwas na bangabangat na saray demonyo ed dalin nanlapulad inkagawa na saman ed Eden? Ibabaga na rekord: “Tan nibantak dia ed dalin so baleg a dragon, say daan ya uleg, a manngaran na Diablo tan si Satanas, a sikato so mantila ed lapag na sankamundoan.” (Apocalipsis 12:9) Say interon mundo so inmabuloy ed katilaan nen Satanas! Agmakapakelaw a si Satanas so tinawag a “say manuley na sayan mundo”!—Juan 12:31, NW; 16:11.
10, 11. Diad antoran paraan ya aktibo natan si Satanas tan saray demonyo to?
10 Kasin inawat nen Satanas so impakatalo to kayari na impakapagit to manlapud tawen? Peteg ya andi! Sikato so determinado a mansiansian labanan so madibinon bangat tan saraman so manutumbok ed satan. Tinmumbok ed impakapagit to ed tawen, intultuloy nen Satanas so pibabakal to: “Say dragon [si Satanas] apasnokan ed bii, tan nila to a binakal so saray nakdaan a kailalakan to, a sikara so mangoonor ed gangan na Dios, tan wala ed sikara so impantasi nen Jesus.”—Apocalipsis 12:17.
11 Nilikud ed pamabakal ed ariripen na Dios, leleneben nen Satanas so mundo na saray propaganda to, panbabanikelan ton mansiansia so tekmel to ed katooan. Diad sakey ed saray pasingawey to ed Apocalipsis nipaakar ed agew na Katawan, anengneng nen apostol Juan so taloran atap ya ayep a simbolikon mangirerepresenta ed si Satanas, say mangaraldalin a mapulitikan organisasyon to, tan say mamabanlong a pakayari na mundo ed panaon tayo. Pinmaway so patapatang ed saray sangi na sarayan talo. Anto so isisimbolo na saraya? Insulat nen Juan: “Ta sikara so espiritu na saray demonio, a mangagawa na tanda; pian onla ra ed saray arari na amin a mundo, pian tiponen da ra ya iparaan ed bakal na baleg ya agew na Dios, a Makapanyarin amin.” (Apocalipsis 16:14) Malinew, saray bangat na saray demonyo so aktibon tuloy ed dalin. Si Satanas tan saray demonyo to so siansian mibabakal ed madibinon bangat, tan itultuloy dan gawaen itan anggad sikara so napaskar a patundaen nen Jesu-Kristo, say Mesianikon Ari.—Apocalipsis 20:2.
No Panon a Nabidbir so Bangabangat na Saray Demonyo
12. (a) Akin a posibli a naresistian so bangabangat na demonyo? (b) Panon so panasali nen Satanas a dampoten iray gagala to ed ariripen na Dios?
12 Kasin naresistian na matakot-ed-Dios a katooan so bangabangat na saray demonyo? Peteg a nayarian da, lapud duaran rason. Ununa, lapud say madibinon bangat so nagkalalon makapanyari; tan komadua, lapud iwawalwal nen Jehova iray pakana nen Satanas ta pian naresistian tayo iratan. A singa imbaga nen apostol Pablo, “aliwa itayon andi kabat ed saray kasiliban to.” (2 Corinto 2:11) Kabat tayo ya uusaren nen Satanas so panamasegsegang bilang sakey a metodo pian nasumpal so gagala to. (2 Timoteo 3:12) Anggaman kuan, nagkalalon masilib, panggugunaetan ton impluensyaan so kanonotan tan kapusoan na saraman so manlilingkor ed Dios. Pinalikdo to si Eva tan intanem to so mauges iran pilalek ed puso to. Panggugunaetan ton gawaen met so parehon bengatla natan. Insulat nen Pablo ed saray taga Corinto: “Balet antakotak, ompan lamang no, singa say uleg a tinilaan to si Eva ed kasiliban to, saray kanonotan yo naderal ira manlapu ed kalinewan tan kasimpitan ya mamapaarap ed Cristo.” (2 Corinto 11:3) Imanoen no panon so pangiimpluensya to ed panagnonot na katooan ed inkalapagan.
13. Anton katilaan so imbaga nen Satanas ed katooan nanlapu ni ed Eden?
13 Diad si Eva, inakusa nen Satanas si Jehova a manitila tan inkuanto a say katooan so magmaliw a dirios no sumlangen da so Manamalsa ra. Say makasalanan a kipapasen na katooan natan so mamapaneknek a si Satanas so matila, ya aliwan si Jehova. Say katooan natan so aliwan dirios! Anggaman ontan, pinatumbokan nen Satanas itan ya inmunan tila na arum niran katilaan. Sikato so angigapo na ideyan say atooan a kamarerwa so imortal, ag-ompatey. Tutuksoen to so katooan a magmaliw a singa dirios ed sananey a paraan. Insan, base ed satan a palson doktrina, inyalibansa to so bangabangat na impiernon-apuy, purgatoryo, espiritismo, tan panagdayew ed inmunan atateng. Sarayan katilaan so siansian mangaaripen ed nilasus minilyon a totoo.—Deuteronomio 18:9-13.
14, 15. Anto so katuaan nipaakar ed patey tan ilalo na too para’d arapen?
14 Siempre, say imbaga nen Jehova ed si Adan so katuaan. Peteg ya inatey si Adan sanen nankasalanan sumpa’d Dios. (Genesis 5:5) Sanen si Adan tan saray kailalakan to so inatey, sikara so nagmaliw ya inatey a kakamarerwa, anggapoy pakaamta tan inaktibo. (Genesis 2:7; Eclesiastes 9:5,10; Ezequiel 18:4) Lapud impakatawir ed kasalanan manlapud si Adan, amin ya atooan a kamarerwa so ompatey. (Roma 5:12) Anggaman ontan, diad Eden, insipan nen Jehova so isabi na bini a mamakal ed gawagawa na Diablo. (Genesis 3:15) Say Bini et si Jesu-Kristo, say bogbogtong ya Anak na Dios. Si Jesus so inatey ya andiay-kasalanan, tan say nibagat a bilay to so nagmaliw a dondon pian mangibulos ed katooan manlapud ompapatey a kipapasen da. Saraman so situtulok a mangagamil na pananisia ed si Jesus so walaan na pankanawnawan mangawat na maandon bilay ya abalang nen Adan.—Juan 3:36; Roma 6:23; 1 Timoteo 2:5, 6.
15 Say dondon so peteg ya ilalo para’d katooan, ya aliwan bengatlan makilot ya ideya a say kamarerwa so makaliktar ed patey. Saya so madibinon bangat. Satan so katuaan. Satan met so makapakelkelaw a panangipatnag na aro tan kakabatan nen Jehova. (Juan 3:16) Agaylan sikatayo so misadsalamat diad pakakaaral tayo ed sayan katuaan tan diad impakabulos tayo manlapud bangabangat na saray demonyo ed sarayan pamaakaran!—Juan 8:32.
16. Anto so manbayag iran resulta sano tumboken na katooan so dilin kakabatan da?
16 Diad panamegley na katilaan to ed tanamanan na Eden, pinaseseg nen Satanas si Adan tan si Eva a manpilalek a magmaliw ya independenti ed Dios tan onsaral ed dilin kakabatan da. Natan, nanengneng tayo so manbayag iran resulta na satan ed krimen, kairapan ed ekonomia, bakabakal, tan say baleg ya agpanpapara ed panagbilay a niwawala ed mundo natan. Agpankelawan ya ibabaga na Biblia: “Say karonongan na sayan mundo kakulangkulangan ed Dios”! (1 Corinto 3:19) Anggaman ontan, kaslakan a katooan so makulangkulang a manlabay a manirap imbes a mangimano ed saray bangat nen Jehova. (Salmo 14:1-3; 107:17) Saray Kristiano, ya angawat na madibinon bangat, so ompapaliis ed pakapalikdo ed satan a patit.
17. Anton “sititilan tinawag a kakabatan” so inyalibansa nen Satanas, tan antoray bunga to?
17 Insulat nen Pablo ed si Timoteo: “O Timoteo, imatonan mo so inmatalek ed sika, ya onarawi ka ed saray tongtong ya ag onnepeg ed Dios tan saray siblangan na ningaranan a kakabatan balet aliwa a tua.” (1 Timoteo 6:20, 21) Satan a “kakabatan” so mangirerepresenta met na bangabangat na saray demonyo. Diad agew nen Pablo, satan so maseguron ontukoy ed apostasya iran ideya ya iyaalibansa na arum ed saray kongregasyon. (2 Timoteo 2:16-18) Saginonor, sititilan tinawag a kakabatan, a singa say Gnostisismo tan Griegon pilosopiya, ya angimpluensya ed kongregasyon. Diad mundo natan, say ateismo, agnostisismo, saray teorya ed ebolusyon, tan atagtagey iran kritisismo ed Biblia so alimbawa na sititilan tinawag a kakabatan, bilang agmakasulatan iran ideya ya inyalibansa na moderno iran apostasya. Saray bunga na amin na sayan sititilan tinawag a kakabatan so naiimano ed ikekesay na moral, say malaknab ya agpanagrespeto ed autoridad, say ag-inkamatua, tan kasibletan ya ipapatnag na sistema na bengabengatla nen Satanas.
Mansiansia ed Madibinon Bangat
18. Siopa natan so manaanap ed madibinon bangat?
18 Anggaman leleneben nen Satanas so dalin na bangabangat na saray demonyo nanlapulad panaon na Eden, wala ni so arum a manaanap na madibinon bangat. Saratan so manbilang natan na minilyon. Isakup da so nakekeraan ya alanaan iran Kristiano a walaan na seguradon ilalo a manari a kaiba si Jesus ed mangatatawen a Panarian to tan say ombabaleg a baleg ya ulop na “arum a karnero” a say ilalo ra et say panawir ed mangaraldalin a pasen na satan a Panarian. (Mateo 25:34; Juan 10:16; Apocalipsis 7:3, 9) Natan, saraya so natitipon ed saksakey a sankamundoan ya organisasyon a mangiyaaplika ed saray salita nen Isaias: “Ta amin iray anak mo nibangat ira ed Jehova; et baleg naani deen na saray anak mo.”—Isaias 54:13.
19. Anto so laktipen na pagmaliw ya ibabangat nen Jehova?
19 Bilang babangatan nen Jehova et mankabaliksan na nagkalalon pangamta ed tuan doktrina—anggaman saya so importante. Babangatan itayo nen Jehova no panon so panbilay, no panon so pangiyaplika ed madibinon bangat ed personal a kabibilay tayo. Alimbawa, reresistian tayo so kasibletan, imoralidad, tan espiritu na panbukbukor a satan so kasmak a tuloy ed mundo a kulaan tayo. Namoria tayo so andi-panangasin pangegemtan ed kayamanan ed sayan mundo pati ed pansumpalan to—a mangitonton ed patey. (Santiago 5:1-3) Agtayon balot lilingwanan so madibinon bangat a nibalikas ed saray salita nen apostol Juan: “Aleg ya aroen yo so mundo, ni saray bengatla ya wala ed mundo. No siopaman a too aroen to so mundo say aro na Ama andi ed sikato.”—1 Juan 2:15.
20, 21. (a) Anto so uusaren nen Satanas ed saray gunaet to diad pamulag ed katooan? (b) Antoran bendisyon so nagamoran na saraman so mansiansia ed madibinon bangat?
20 Say epekto na bangabangat na saray demonyo ed saray biktima to so naiimano ed saray salita nen Pablo ed saray taga Corinto: “Et dia ed sarama’y say dios na saya’n panaon binulag to so kaisipan da lapu’d ag panisia, pian say silew na evanggelio na gloria nen Cristo a sikato so talintao na Dios, ag komon onsinag ed sikara.” (2 Corinto 4:4) Labay nen Satanas a nabulag so tuan Kristianos ed sayan paraan met. Diad Eden, inusar to so uleg pian palikdoen so sakey ed ariripen na Dios. Natan, uusaren to so karawalan odino imoral iran pelikula tan saray programa ed telebisyon. Uusaren to so radyo, literatura, tan musika. Say mabiskeg ya armas ya uusaren to et say mauges a pililimog. (Uliran 4:14; 28:7; 29:3) Lawas bidbiren so ontan iran bengatla ed no anto iratan—agagamil tan bangabangat na saray demonyo.
21 Tandaan, saray salita nen Satanas ed Eden so katilaan; apaneknekan iray salita nen Jehova a tua. Nanlapulad asasakbay iran agew, parehon kipapasen so mantutultuloy. Lawas napapaneknekan a matila si Satanas, tan say madibinon bangat so agsinmaew a tinmua. (Roma 3:4) No mansiansia tayo ed Salita na Dios, sikatayo so lawas a wala ed mananalon dapag ed panlalaban ed baetan na katuaan tan katilaan. (2 Corinto 10:4, 5) Sirin, magmaliw tayon determinado a mangipulisay ed amin a bangabangat na saray demonyo. Diad ontan et sikatayo so makapansungdo anggad panaon a sano say bakal ed baetan na katuaan tan katilaan so nasumpal la. Say katuaan so ontalona. Si Satanas so naandi, tan say madibinon bangat so narengelan ed dalin.—Isaias 11:9.
Kasin Nipaliwawam?
◻ Kapigan ya inmunan nadngelan so demonikon bangabangat?
◻ Anto so arum a katilaan ya inyalibansa nen Satanas tan saray demonyo to?
◻ Diad antoran paraan a si Satanas so aktibon tuloy natan?
◻ Anto so uusaren nen Satanas diad pangiyaalibansa na bangabangat na saray demonyo?
◻ Antoran bendisyon so nakayarian na saraman so mansiansia ed madibinon bangat?
[Litrato ed pahina 9]
Say demonikon bangat so inmunan nadngelan ed tanamanan na Eden
[Litrato ed pahina 10]
Say madibinon bangat nipaakar ed dondon tan say Panarian so mangiyoopresi na mogmon ilalo para’d katooan