Tepetepet Manlapud Saray Managbasa
Sanen saray sundalo nen Saulo so angan na karne pati ed dala, akin a sikaray agpinatey, anta saman so dusan ingetar na Ganggan na Dios?
Sinumlang na sarayan lalaki so ganggan na Dios nipaakar ed dala, balet nayarin sikaray pinanengnengan na panangasi lapud walaan ira na panagrespeto ed dala, anggaman nagmaliw ira komon a nagkalautlan maseseg ed panangipanengneng na ontan a respeto.
Kunsideraen so kipapasen. Saray Israelita ed silong nen Arin Saul tan say ilalak ton si Jonatan so akibakal ed saray Filisteo. Diad aminsan ya agawa sanen “saray lalaki na Israel apaermen ira” ed panlalaban, manapuratsan nansamba si Saul a saray sundalo to so agnepeg a mangan anggad natalo ra iray kalaban. (1 Samuel 14:24) Agnambayag et amawala na sakey a problema so samba to.
Manatalo ed saman iray sundalo to ed sakey a panlalaban, balet say sagpot da so amawala na makaderal ya epekto. Sikaray narasan tan naknaksawan. Anto so ginawa ra ed sayan alablabas a situasyon? “Et say baley binmatik ira ed samsam tan angala ra na saray carnero, tan bakbaka, tan kilakilaw na baka tan sikara so panatey da ed dalin, et sikara so kinan na baley a pati say dala.”—1 Samuel 14:32.
Satan so isusumlang ed ganggan na Dios nipaakar ed dala, a singa imbaga na pigaran totoo nen Saul ed sikato, a kuanda: “Nia, say baley nankasalanan sumpa ed Jehova, a mangan ira na pati dala.” (1 Samuel 14:33) On, say Ganggan so mangibabaga a sano mamatey na ayayep, say dala so kaukolan ya ipatedter sakbay a kanen so karne. Anggapo so panatikon ganggan na Dios ya ipatedter so dala. Diad panagala na saray makatunongan a kundag ed panangipatedter, saray aripen to so makapangipanengneng na panamagalang ed kabaliksan na dala. (Deuteronomio 12:15, 16, 21-25) Say dala na ayep so nausar ed paraan a sakey a bagat ed altar, balet ta agnepeg a kanen. Say ginagalan isumlang so nadusa ed ipapatey, ta imbaga ed saray totoo na Dios a: “Sikayo ag kayo mangan na dala na angan anton nengneng na laman; ta say bilay na amin a laman say dala to: say siopaman a mangan nisian.”—Levitico 17:10-14.
Kasin saray sundalo nen Arin Saul so sigagalan sinmumlang ed Ganggan? Kasin sikaray angipanengneng na sigpot a panangibaliwala ed ganggan na Dios nipaakar ed dala?—Ipareng so Numeros 15:30.
Sikatayo so agnepeg a manampot. Ibabaga na rekord a ‘sikaray pinatey da [saray ayayep] ed dalin tan kinan pati say dala.’ Kanian nayarin sikaray manasalin mangipatedter ed dala. (Deuteronomio 15:23) Ingen, lapud sikaray naknaksawan, narasan ni, agda inbitin iray pinatey ya ayep tan angiter na magenap a panaon pian makaturo so dala a singa ed kaslakan a gagawaen. Pinatey da iray karnero tan saray baka “ed dalin,” a nayarin mangamper ed ituro na dala. Tan ginerger dan tampol so karne a nanlapud pinatey ya ayep a nayarin akarukol ed dala. No ontan, nayarin makaamper ed itedter na dala. Kanian, anggaman walad kanonotan da so itulok ed ganggan na Dios, agda sinumpal iman ed duga iran paraan nisay magenap so impanumbok da.
Say resulta et “say baley nankasalan ed si Jehova a mangan ira na pati dala,” saya so sakey a kasalanan. Amoria iya nen Saul tan inganggan a sakey a baleg a bato so ipatulin a mamaarap ed sikato. Inganggan to ed saray sundalo: “Yakar yo ed siak dia balang laki so baka to, tan balang laki so carnero to, tan sikara so pateyen yo dia tan mangan kayo; et ag kayo mankasalanan na sumpa ed Jehova dia ed pangan na pati dala.” (1 Samuel 14:33, 34) Tinmulok iray nankasalanan a sundalo, tan “si Saul so amaalagey na altar ed Jehova.”—1 Samuel 14:35.
Say panagpatey na saray ayep ed tapew na bato so nayarin akatulong pian susto so ituro na dala. Say karnen nanlapud ayayep so kanen ya arawi ed pinanpateyan na ayep. Angangko ta inusar nen Saul so nipatedter a dala ed altar diad ikerew na panangasi na Dios nipaakar saray nankasalanan. Si Jehova so angipanengneng na panangasi, mapatnag ta kabat to so impanalin impanggawa ed saman et lapud saray sundalo so naknaksawan tan narasan. Nayarin inkuenta nen Jehova met a say manapuratsan impansamba nen Saul so nansengegay inkaplag na saray totoo to ed onman a gipit a situasyon.
Sayan rekord so mangipapanengneng a say sakey a gipit a kipapasen so agrason pian ibaliwala so ganggan na Dios. Saya so nepeg met ya ontulong ed sikatayon nanengneng so pankaukolan na pannonot sakbay a mansamba, lapud say sakey a manapuran sipan so nayarin mangiter na saray problema ed sikatayo tan ed arum.—Eclesiastes 5:4-6.