Mas Mabli Nen Say Korales
Mantultuloy ya ondarakel iray bisitan nasasagyat ya onnengneng ed saray nenengnengen a singa saya ed kaaralman na Ambalangan Dayat.
Say dakerakel a siran walaay nambabangil a kolor so makapaingganyo ed saray onlalangoy ed malinew a danum. Balet onnengneng pa ed kaliberliber na sarayan makolor a siran nanenengneng dia, naalay imanom ed arum niran pakelaw ed dalem na kadayatan, pati sarayan masnag a kolor a korales.
Say marakep a korales so naromog ed dakel ya ohas tan kolor. A singa naisip mo, anggan ed kadaanan a panaon saray masanting a piraso na korales so papablien a tuloy. Manlapud saraya et makagawa na marakep iran alajas, tan saray manag-sulat na Biblia so anaglawi na korales a nilaboran na balitok, pilak, tan saray rubi. (Uliran 3:14, 15; Ezequiel 27:16) Balet saratan a manag-sulat so ontutulong ed sikatayon onnengneng ed labas ed karakpan tan kablian na korales.
Ipapabitar da a walaray bengatlan mas mabli tan pablien tayo iratan. Say sakey a maong, makasarag ya asawan bii so sakey la, lapud nabasa tayo: “Say sankakanaan a bii siopa so makaromog? Ta say bili to sikato so arawi nen saray [korales].” (Uliran 31:10) Kasin sika so sakey a lakin walaay asawa? Imanoen mo lamet so agaylan dakep na sayan korales, tan umamengen no kasin papablien mo so asawam a singa say kanepegan to.
Balanglan sikatayo so lalaki odino bibii, walaay asawa odino walad-kasuloan, say panmoria ed masanting a korales so nepeg ya ontulong ed sikatayon mangapresya ed nagkalalon babaleg a kablian na maridios a kakabatan, pakatebek, tan pikakabat. Kuan na Salita’y Dios: “Mapalar so too a makaromog na kakabatan, tan say too a makagamor na pakatalos. Ta say pakagamor ed sikato magmaong nen say pakagamor ed pilak, tan say pinabangan ed sikato magmaong nen say dalisay a balitok. Sikato so mamabli nen saray rubi: tan angapo ed saray bengatla a napanpilalekan mo so makapipara ed sikato.”—Uliran 3:13-15; 8:11.
Kanian balanglan nanenengneng ira sano sikatayoy onlalangoy odino ed inenengneng ed saray retrato, say korales na Ambalangan Dayat so nepeg a mangipatnag ed sikatayo na karakpan tan bengabengatlan pankaabiganan ya umamengen.