Saray Manangiyabawag na Panarian so Aktibo ed Amin a Dalin
“Et sikayo so tasik . . . anga ed kasampotan na dalin.”—GAWA 1:8.
1. Anton mensahe so imbaga nen Jesus ed saray patumbok ton iyabawag ed agew tayo?
SANEN dineskribe so kimey ya angibakian nen Jehova ed Anak to a gawaen diad dalin, inkuan nen Jesus: “Kaokolan ko met ya ipulong ko so evangelio na panaria’y Dios.” (Lucas 4:43) Mipadpara, diad pangibabaga nipaakar ed kimey a gawaen na saray babangatan to ed dalin sano sikato so ompawil tekep na maarin pakauley, inkuan nen Jesus: “Saya ya evangelio na panarian nipulong naani ed sankamundoan ya onkanan pamintuaan ed saray amin a naciones; et saman la onsabi angaan.”—Mateo 24:14.
2. (a) Akin ya ontanlan importanti a say mensahe na Panarian so malaknab a nipalapag? (b) Anton tepet so nepeg ya itepet tayon amin ed inkasikatayo?
2 Akin a say balita nipaakar ed Panarian na Dios so ontanlan importanti? Akin a kakaukolanen na Panarian so malaknab a panangiyabawag? Lapud say Mesianikon Panarian so mangalangon ed sankatalbaan ya inkasoberano nen Jehova. (1 Corinto 15:24-28) Diad panamegley na satan, idapo nen Jehova so panangukom to sumpad kaplesan a satanikon sistema na bengabengatla tan sumpalen so sipan ton pamendisyon ed amin a pamilya ed dalin. (Genesis 22:17, 18; Daniel 2:44) Diad pakawala na pantasin niiter nipaakar ed Panarian, aromog nen Jehova iramay alanaan pian magmaliw a kaiban mananawir na Anak to. Diad panamegley na panangiyabawag ed Panarian, sakey a kimey na panangibiig so nagagawa met natan. (Mateo 25:31-33) Kaliktan nen Jehova a saray totoo ed amin a nasyon so napakabatan nipaakar ed gagala to. Kaliktan ton sikara so nawalaan na pankanawnawa a pilien so bilay bilang uuleyan na Panarian to. (Juan 3:16; Gawa 13:47) Kasin sika so sigpot a mibibiang ed panangiyabawag na sayan Panarian?
Panilalo ed Anggaan na Saray Panaon na Hentil
3. (a) Matukotukoy, anto so teman imparungtal nen C. T. Russell ed akaunan impanbaroy pian mangorganisa na saray grupo para’d panagaral na Biblia? (b) Anto so amoria na saray asasakbay ya Estudyante na Biblia no nipaakar ed no anto so nepeg a pasen na Panarian na Dios ed saray bilay da?
3 Nen 1880, si Charles Taze Russell, say inmunan editor na magasin a Watch Tower, so nanbaroy ed northeastern na Estados Unidos pian ipaseseg so pamorma na saray grupo para’d panagaral na Biblia. Matukotukoy, say teman imparungtal to et “Saray Bengatlan Walaay Pisiglaotan ed Panarian na Dios.” Singa nipatnag ed saray akaunan paway na Watch Tower, amoria na saray Estudyante na Biblia (bilang tawag ed Tastasi nen Jehova ed saman) a no paneknekan da a sikaray makanepegan a nawalaan na betang ed Panarian na Dios, kaukolan a gawaen da so Panarian a manunan interes da, a sigagayagan usaren so bilay da, saray abilidad da, tan saray kayarian da ed sayan serbisyo. Arum niran bengatla so kaukolan a segundaryo. (Mateo 13:44-46) Katekep na say responsabilidad da et say pangiyabawag ed arum na maong a balita nipaakar ed Panarian na Dios. (Isaias 61:1, 2) Diad anton laknab a ginawa ra itan sakbay na anggaan na saray panaon na Hentil nen 1914?
4. Diad anton kalaknab a say melag ya ulop na saray Estudyante na Biblia so angibunog na literatura na Biblia sakbay na 1914?
4 Nanlapulad saray taon 1870 ya anggad 1914, dagdaiset iray Estudyante na Biblia ed bilang. Kasabi 1914, ngalngali 5,100 lambengat so aktibon mibibiang ed publikon panagtasi. Balet, agaylan nikadkaduman panagtasi iman! Nen 1881, duay taon lambengat kayari na inmunan inkapalapag na Watch Tower, ginawa ra so panangibunog na 162-pahinan palapagan a Food for Thinking Christians. Diad loob lambengat na pigaran bulan, akapangibunog ira na 1,200,000 a kopya. Diad loob na pigaran taon, minilyon a tract so nibunog a tinaon ed dakel a lenguahe.
5. Sioparay colporteur, tan anton nengneng na espiritu so impatnag da?
5 Ontan met nanlapulad 1881, inyopresi na arum iray serbisyo ra bilang ebanghelisador a colporteur. Saraya so angiyuna ed kaplesan iran payunir (sigpot-panaon iran ebanghelisador). Arum ed saray colporteur, a nan-aakar odino nanbibisikleta, so personal ya akapantasi ed ngalngali amin a parti na bansan nanayaman da. Say arum met so akasabi anggad saray sankailin daldalin tan sikaray inmunan angipasabi ed maong a balita ed saray lugar a singa say Finland, Barbados, tan Burma (a natan et Myanmar). Sikaray angipatnag na misioneron seseg a singa ed seseg nen Jesus tan saray apostol to.—Lucas 4:43; Roma 15:23-25.
6. (a) Kaunongan kalaknab iray impanbaroy nen Brother Russell pian ikayat so katuaan na Biblia? (b) Anto ni so ginawa pian nipalaknab so panangipulong na maong a balita diad saray lawak na biek-taew sakbay na anggaan na saray Panaon na Hentil?
6 Si Brother Russell a mismo so malaknab a nanbaroy pian ikayat so katuaan. Sikato so aminpigan linma ed Canada; nampaliwawa ed Panama, Jamaica, tan Cuba; aminpigan linma ed Europa; tan niliktob to so globo lapud panag-ebanghelyon kimey. Sikato met so angibaki na arum a lalaki pian mangigapo tan mangidaulo ed panangipulong na maong a balita ed saray sankailin daldalin. Si Adolf Weber so imbaki ed Europa ed kapegleyan na saray taon 1890, tan say ministeryo to so akarateng manlapud Switzerland ya anggad Pransya, Italya, Alemanya, tan Belgium. Si E. J. Coward met so imbaki ed lugar na Caribbean. Si Robert Hollister so pinabtangan a manlingkor ed Oriente nen 1912. Diman et niparaan iray espesyal a tract ed samploran lenguahe, tan minilyon a kopya na saraya so inbunog na saray lokal a manangibunog ed interon India, Tsina, Hapon, tan Korea. No sikayo so nambilay la ed saman, agkayo kasi pakiwasen na puso yo pian manggunaet a nasabi iray arum ed komunidad yo tan pian ipasabi so maong a balita?
7. (a) Panon a saray palapagan so inusar pian napalaknab so panagtasi? (b) Anto so say “Photo-Drama of Creation,” tan pigaran totoo so akanengneng ed satan ed sakey taon lambengat?
7 Legan a manasingger so anggaan na saray Panaon na Hentil, inusar iray peryodiko pian ipalapag iray sermon ed Biblian impaliwawa nen Brother Russell. Say manunan indanet na saraya et aliwan say taon 1914 noagta, imbes, say gagala na Dios tan say panamaseguron saya so nasumpal. No maminsan et unabot ed 2,000 a palapagan, so makakasabi ed 15,000,000 a managbasa, a regular a mangipapalapag ed sarayan sermon. Insan, legan na igagapo na taon 1914, say Sosyedad so angigapo ed inkalapagan a panangipanengneng na “Photo-Drama of Creation.” Diad apatiran 2-oras a presentasyon, imparungtal na satan iray katuaan ed Biblia manlapud panamalsa a nampatuloy anggad Milenyo. Diad loob lambengat na sakey taon, saray dumerengel a walaan na dagup na masulok a siameran milyon ed Amianen ya Amerika, Europa, Australia, tan New Zealand so akapanbantay ed satan.
8. Diad 1914, pigaran daldalin so akapangipasabian na saray Estudyante na Biblia ed maong a balita?
8 Unong ed nala iran report, diad kaunoran a kabiangan na 1914, sayan maseseg ya ulop na saray ebanghelisador so akapangilaknab ed panangiyabawag da na Panarian na Dios ed 68 a daldalin.a Balet satan so gapoan labat!
Maseseg ya Iyabawag so Niletneg a Panarian
9. Diad saray kumbension ed Cedar Point, panon ya inikdan na nikabiig a panamaseseg so panagtasin kimey nipaakar ed Panarian?
9 Sanen saray Estudyante na Biblia so nantitipon ed Cedar Point, Ohio, nen 1919, si J. F. Rutherford, a presidente ed saman na Watch Tower Society, so angiyabawag: “Say kimey tayo nen saman tan natan et say pangiyabawag ed onsasabin maglorian panarian na Mesias.” Diad komaduan kumbension ed Cedar Point, nen 1922, impabitar nen Brother Rutherford so katuaan a say anggaan na Saray Panaon na Hentil, nen 1914, ‘say Ari na gloria so angala ed baleg a pakayari to tan ginmapon manuley.’ Insan, inyarap to so isyu ed saray dumerengel to, diad impangibagan: “Kasin manisia kayo a say Ari na gloria so ginmapo la ed uley to? No ontan pawil kayo ed lawak, O sikayon ananak na sankatagyan a Dios! . . . Iyabawag so mensahe ed amin a pasen. Nepeg a naamtaan na mundo a si Jehova so Dios tan si Jesu-Kristo so Ari na arari tan Katawan na kakatawan. Saya so agew na amin ya agew. Nia, say Ari so manuuley la! Sikayoray manangipalapag a manangilaman to.”
10, 11. Panon a nausar ya epektibo iray radyo, saray sound car, tan saray plakard pian nipasabi’d totoo so katuaan na Biblia?
10 Masulok a 70 a taon la so linmabas nanlapulad saraman a kumbension ed Cedar Point—ngalngalin 80 a taon nanlapulad impangigapo nen Jehova ya ibalikas so inkasoberano to diad panamegley na Mesianikon uley na Anak to. Diad anton kalaknab a saray Tasi nen Jehova so peteg a manusumpal ed kimey a nidatak ed sikara na Salita na Dios? Anto so personal a pibibiang yo ed saya?
11 Diad asasakbay na saray taon 1920, ginmapon inusar so radyo bilang instrumento pian niiter so malaknab a panangipalapag ed mensahe na Panarian. Legan na saray taon 1930, saray diskurso ed kumbension a mangipaparungtal ed Panarian bilang say ilalo na mundo so ni-broadcast diad mankokonektaan iran istasyon odino diad saray chain broadcast tan saray linya na telepono ed sankagloboan. Angusar met na saray luluganan a walaay loudspeaker pian ipaknol iray plaka na saray diskurso ed Biblia ed publikon paspasen. Insan, nen 1936, diad Glasgow, Scotland, ginapoan na saray agagi tayo so pangisulong na saray plakard legan a sikaray manpaparada ed saray lugar na negosyo pian iyanunsyo iray publikon paliwawa. Amin na saraya so epektibon paraan na panagtasi ed dakel a totoo ed saman a panaon sanen say bilang tayo et daiset ni.
12. Singa ipapanengneng na Kasulatan, anto so sakey ed sankaepektiboan a dalan pian balang sakey ed sikatayo so makapantasi?
12 Siempre, impalinew na Kasulatan a bilang Kristianos, sikatayo so personal a walaay responsabilidad a mantasi. Agtayo labat paulyanan iray artikulo ed palapagan odino saray panag-broadcast ed radyo a manggawa ed sarayan bengatla. Nilibon matoor a Kristiano—lalaki, bibii, tan tobonbalo—so angawat ed satan a responsabilidad. Bilang resulta, say panagpulong ed kabkaabungan so nagmaliw a pakatandaan ed saray Tasi nen Jehova.—Gawa 5:42; 20:20.
Panabi ed Interon Atooan a Dalin
13, 14. (a) Akin ya arum a Tastasi so onaalis ed arum a baley, anggan diad arum a bansa ni ingen, pian itultuloy so ministeryo ra? (b) Panon a say maaron panagpaga para’d totoo ed dalin na inkiyanakan na sakey so tinmulong ed panangikayat na maong a balita?
13 Diad pakaamta a say mensahe na Panarian so kaukolan a nipulong ed interon atooan a dalin, seryoson kinunsidera na arum a Tastasi nen Jehova no anto so personal dan nagawaan pian nasabi iray lugar ed labas na komunidad da.
14 Dakel a totoo so akaral na katuaan kayari inyalis da ed niyanakan dan pasen. Anggaman sikaray inmalis lapud materyal a bentaha, aromog da so bengatlan nagkalalon importanti, tan arum so apaskar ya ompawil ed dalin odino komunidad na inkiyanakan da pian ipanabang so katuaan. Kanian, diad gapo na sayan siglo say panangipulong na maong a balita so nilaknab ed Scandinavia, Gresya, Italya, tan saray bansa ed Mamabukig a Europa, tan diad dakel niran pasen. Anggad natan, diad saray taon na 1990, say mensahe na Panarian so nikakayat ed parehon paraan.
15. Legan na saray taon na 1920 tan 1930, anto so asumpal na arum a walaay awawey a singa ed nibalikas ed Isaias 6:8?
15 Diad pangiyaaplika ed simbawa na Salita na Dios ed bilay da, niyarunsa na arum a sikaray makapanlingkor ed saray lugar ya agda ni nanayaman ed inmuna. Si W. R. Brown (mabetbet a tatawagen a “Bible Brown”) so sakey ed saraya. Nen 1923, pian napalaknab so kimey na panag-ebanghelyo, sikato so inmalis manlapud Trinidad ya amaarap ed Sagur ya Aprika. Legan na saray taon na 1930, si Frank tan Gray Smith, Robert Nisbet, tan si David Norman so kabiangan na saramay angawit na mensahe ed bukig a gilig na kadayatan na Aprika. Say arum so tinmulong pian bayuboan so lawak ed Abalaten ya Aprika. Diad gapo na saray taon na 1920, si George Young, sakey a taga Canada, so akibiang ed kimey ed Argentina, Brazil, Bolivia, Chile, tan Peru. Si Juan Muñiz, ya akapanlingkor ed Espanya, so tinmumbok ed Argentina, Chile, Paraguay, tan Uruguay. Amin na saraya so angipatnag na espiritun singa samay nibaga ed Isaias 6:8: “Wadiaak; ibaki moak.”
16. Iner nilikud ed saray manunan sentro na populasyon so naikdan na panagtasi diad saray taon sakbay na bakal?
16 Say panangipulong na maong a balita so makakasabi anggan diad arawi iran lugar. Saray bangkan pinakurang na Tastasi so binmisita ed amin a doongan na Newfoundland, say kadayatan na Norway ed Artic, diad saray isla na Pacifico, tan saray doongan na Mamaabalaten-bukig na Asya.
17. (a) Nen 1935, pigaran daldalin so asabi na saray Tasi? (b) Akin a say kimey so agni asumpal ed satan a taon?
17 Makapakelkelaw, nen 1935, saray Tasi nen Jehova so okupado a manpupulong ed 115 a daldalin, tan asabi da ni so 34 a daldalin diad panamegley na saray panagtasin ekspedisyon odino diad literaturan impawit. Ingen, say kimey so agni asumpal. Diad saman a taon nilukasan nen Jehova iray mata ra ed gagala ton manugyop na “baleg ya olop” a makaliktar a mamaarap ed balon mundo to. (Apocalipsis 7:9, 10, 14) Baleg ni so gawaen a panagtasi!
18. Diad kimey a panangiyabawag na Panarian, anton betang so ginawa na Gilead School tan Ministerial Training School?
18 Anggan legan a nagagawa so Guerra Mundial II tan sinebelan so literatura odino say aktibidad na Tastasi nen Jehova ed dakel a daldalin, say Watchtower Bible School of Gilead so nilukas pian ipasal iray prospektibon misioneron manumpal ed babaleg nin kimey na panangiyabawag na Panarian ed interon mundo. Anggad sayan agew et saray nangraduar ed Gilead so manlilingkor ed masulok a 200 a daldalin. Sikara so akapanggawa na mas ni nen say pangipalima na literatura tan kayari to et onalis ed sananey a lugar. Sikaray mangikokondukta na saray panangiyaral na Biblia, akapangorganisa na saray kongregasyon, tan angipasal ed totoo a manakbat na teokratikon responsabilidad. Agano ni, saray mamatatken tan ministeryal ya ariripen a nangraduar ed Ministerial Training School so ontutulong met a sumpalen iray importantin pankaukolan a misiglaotan ed sayan kimey diad anemiran kontinente. Sakey a putel a pundasyon so nileletneg para’d mantultuloy ya ibubulaslas.—Ipareng so 2 Timoteo 2:2.
19. Diad anton kalaknab a saray aripen nen Jehova so kinmiwas ed imbitasyon a manlingkor ed saray lugar a babaleg so pankaukolan?
19 Kasin makatulong so arum a mangasikaso ed pigara nin ag-akimeyan a teritorya? Nen 1957, diad saray kumbension ed sankamundoan, saray indibidual tan pamilya—a maedad la’d espiritual a Tastasi nen Jehova—so apaseseg a mangunsidera ed iyalis ed saray lugar a walay babaleg a pankaukolan pian manayam diman tan diman da met la ituloy so ministeryo ra. Say imbitasyon so singa ed samay imparungtal na Dios ed si apostol Pablo, a diad sakey a pasingawey et anengneng to so sakey a toon mikakasi ed sikato: “Gala ed Macedonia et tulongan mo kami.” (Gawa 16:9, 10) Arum so inmalis legan na saray taon na 1950, say arum ed saginonor. Ngalngali sanlibon Tasi so inmalis ed Ireland tan Colombia; nilasus so inmalis ed dakel niran lugar. Nilibo so inmalis ed saray lugar a walaan na babaleg a pankaukolan ed dilin bansa ra.—Salmo 110:3.
20. (a) Nanlapulad 1935, anto so asumpal ed kasumpalan na propesiya nen Jesus ed Mateo 24:14? (b) Legan na apalabas a pigaran taon, panon a wala so pamapapeles na kimey?
20 Diad pamebendisyon nen Jehova ed totoo to, say kimey na panangiyabawag na Panarian so mantutultuloy ya onaaligwas tekep na ekstraordinaryon peles. Nanlapulad 1935 say bilang na saray manangipalapag so dinmaak na ngalngali amin-walomplon danay, tan say peles na idaraak ed ranggo na saray payunir so 60 porsiento nen say peles na idaraak na bilang na saray manangipalapag. Say panangiyaral na Biblia ed ayaman so nigapo legan na saray taon na 1930. Wala natan so promedyo na masulok ya apatira tan kapalduan milyon a nikokondukta ed kada bulan. Nanlapulad 1935 masulok a 15 bilyon ya oras so nitalaga ed kimey na panangiyabawag na Panarian. Say regular a panangipulong na maong a balita so nagagawa ed 231 a daldalin. Legan a saray teritorya ed Mamabukig a Europa tan Aprika so mangilulukas para’d lalon bulos a panangipulong na maong a balita, saray internasyonal a kumbension so epektibon nauusar pian niparungtal so mensahe na Panarian ed publiko. Unong ya abayag lan insipan nen Jehova, diad Isaias 60:22, sikato so talagan ‘mamapapeles ed kimey ed dilin panaon to.’ Agaylan engranden pribilihyo itan pian pibiangan tayo!
Nasasabi so Amin a Posiblin Nasabi na Maong a Balita
21, 22. Anto so personal a nagawaan tayo pian magmaliw a lalon epektibon Tastasi inerman so panlilingkoran tayo?
21 Agni ibabaga na Katawan a say kimey et asumpal la. Nilibo ni so manasayakup ed tuan panagdayew. Kanian onlesa iray tepet a, Kasin gagawaen tayo so anggaay nayarian tayo pian usaren a maong so panaon ya iyaabuloy na anos nen Jehova para’d sayan kimey?—2 Pedro 3:15.
22 Aliwan amin so makaalis ed matalag-a-nakimeyan a teritorya. Balet kasin sigpot mon uusaren iray pankanawnawa a lukas ed sika? Kasin mantatasi ka ed saray katrabahoan mo? ed saray managbangat tan kaeskuelam? Kasin niyaadaptam so inkasika ed saray pananguman ed teritoryam? Bilang nansumpalan na panguman-uman na panagtrabaho, dagdaiset a totoo so walad ayaman legan na agew, kasin niyarumsam so eskedyul mo ta pian nadalaw ira ed labi? No saray paalagey so agnayarin laen na agnaimbitaan iran bisita, kasin mantatasi ka ed panamegley na telepono odino diad panamegley na koreo? Kasin susubaybayan mo so nipanengneng ya interes tan iyopresi so pangikondukta na saray panangiyaral na Biblia ed ayaman? Kasin sigpot mon susumpalen so ministeryom?—Ipareng so Gawa 20:21; 2 Timoteo 4:5.
23. Legan ya iimatonan nen Jehova no antoy gagawaen tayo ed serbisyo to, anto so nepeg a napatnagan ed sikatayo?
23 Komon ta amin tayo so manumpal ed ministeryo tayo diad paraan a malinew a mangipapanengneng ed si Jehova a talagan aapresyaen tayo so engranden pribilihyo bilang Tastasi to ed sarayan makatantandan panaon. Komon ta magmaliw a pribilihyo tayo so pakaimaton ed pangidapo nen Jehova na panangukom to ed abulok a daan a sistema tan say iloob na maglorian Milenyon Uley nen Jesu-Kristo!
[Paimano ed leksab]
a Binilang unong ed paraan na inka-apag na dalin anggad kasakbayan na saray taon 1990.
Panrepaso
◻ Akin a say panangipulong na mensahe na Panarian so ontanlan importanti?
◻ Diad anton kalaknab a say maong a balita so nipulong anggad 1914?
◻ Kaunongan kalaknab so impantasin niiter nanlapulad inkiletneg na Panarian?
◻ Anto so nayarin manggawa ed dilin pibibiang tayo ed ministeryo a lalon mabunga?
[Kahon ed pahina 16, 17]
TASI NEN JEHOVA—Manangiyabawag na Panarian na Dios
Diad nilasus a kumbension ed interon mundo legan na 1993-94, inyanunsio so impangipaway na sakey a balon libron apauloan na Jehovah’s Witnesses—Proclaimers of God’s Kingdom. Saya so makaibangat a tuloy, komprehensibon awaran na Tastasi nen Jehova. Satan so sakey a 752-pahinan libro, marakep so inka-iyilustra, a walaay masulok a sanlibon letrato ya atugyop manlapud 96 a nanduruman daldalin. Diad sampot na 1993, saya so nipalapag la ed 25 a lenguahe tan mantultuloy ya ipapatalos ed dakel ni.
Akin a nipanpanaon itan a libro? Diad apalabas iran taon, minilyon a totoo ed sankamundoan so nagmaliw a Tastasi nen Jehova. Amin da so nepeg a napakabatan-a-maong nipaakar ed awaran na organisasyon a pililimogan da. Nagkalalo ni, say panagpulong tan paraan na panagdayew da so akasabi la ed nasyonal tan rasa iran grupo ed sankamundoan tan inabrasa na totoon malangwer man tan maedad la, diad amin a kipapasen na panagbilay tan edukasyon. Bilang nansumpalan, dakel a makakaimano ed nagagawa so walaan na saray tepet nipaakar ed saray Tasi—aliwa lambengat ed saray sisiaen da noagta nipaakar ed lapuan da, say awaran da, organisasyon da, saray gagala ra. Say arum so nansulat nipaakar ed sikara, anggaman no maminsan et walaay panangidumaduma. Anggaman ontan, anggapo so siopaman a mas makaamta ed modernon-agew ya awaran na saray Tasi nen Jehova noagta saray Tasi a mismo. Nambanikelan na saray editor na sayan libro ya iparungtal itan ya awaran diad paraan a matua tan prangka. Diad panggawa ed saya, pinekderan da met so kasumpalan anggad natan na makabaliksan a tuloy ya aspekto na tanda na kiwawala nen Kristo a nikurit ed Mateo 24:14, tan ginawa ra iya tekep na saray detalye a nayarin nagawaan lambengat na saramay nasasaglawin tuloy ed kimey a nipasakbay ditan.
Say libro so naapag ed pitoran manunan seksion:
Seksion 1: Susuysuyen na sayan kabiangan so maawaran iran nanlapuan na saray Tasi nen Jehova. Laktip la na aseksek, makaibangat a sumaryo na modernon-agew ya awaran da manlapud 1870 anggad 1992.
Seksion 2: Wadia so manangiwalwal a repaso ed progresibon inkatibukel na saray sisisiaen a mangibiig ed saray Tasi nen Jehova manlapud arum iran relihyoson grupo.
Seksion 3: Sayan parti na libro so manusukimat ed inkatibukel na inkasangal na organisasyon da. Isasalaysay toray makapainteres a katuaan nipaakar ed saray miting da ed kongregasyon tan saray kumbension, ontan met ed paraan na panangipaalagey da na saray Kingdom Hall, angkabaleg iran Assembly Hall, tan saray pasilidad para’d panangipalapag na literatura’y Biblia. Ipanengneng to so seseg na saray Tasi nen Jehova ed pangiyabawag ed Panarian na Dios tan say aro a napatnagan ed sikara ed pangaasikaso ra ed balang sinansakey ed saray panaon na krisis.
Seksion 4: Dia et naromog yo so makapasagyat iran detalye nipaakar ed no panon a saray panangiyabawag ed Panarian na Dios so linmaknab ed manuna iran bansa tan arawi iran isla ed sankagloboan. Isipen pa—manpupulong ed 43 a daldalin ed taon 1914, balet 229 a daldalin nen 1992! Saray eksperiensia na saramay akibiang ed sayan sankagloboan a panangilaknab so talagan makatenyeg-liknaan.
Seksion 5: Say panumpal ed amin na sayan kimey na panangiyabawag na Panarian et kinaukolan to so panangipaalagey na internasyonal iran pasilidad para’d panangipalapag na saray Biblia tan ontan met ed literatura na Biblia ed masulok a duan lasus iran lenguahe. Dia yo naamtaan itan ya aspekto na kimey da.
Seksion 6: Nidunget met iray Tasi ed saray subok—arum so nisesengeg ed ag-inkayadyari na too, say arum et lapud palson agagi, tan nagkalalo ni lapud direktan panamasegsegang. Say Salita na Dios so angipasakbay a saya so nagawa. (Lucas 17:1; 2 Timoteo 3:12; 1 Pedro 4:12; 2 Pedro 2:1, 2) Sayan seksion so mabitar a mangisasalaysay ed no anto so aktual ya agawa tan no panon a say pananisia na saray Tasi nen Jehova so nanggawa ed sikaran mabiktorya.
Seksion 7: Diad konklusyon, kukunsideraen na libro no akin a saray Tasi nen Jehova so mapekder ya akumbensi a say organisasyon a kawalaan da so tuan iwawanwan na Dios. Sisingbaten to met no akin a liknaen da so pankaukolan, bilang sakey ya organisasyon tan saray indibidual, a mansiansian akabantay.
Niyarum ed asaglawi la, say makapaayat a desinyon tomo so mangilalaktip met na marakep tan makaibangat a tuloy a 50-pahinan seksion na saray retrato, a mangipapanengneng ed sankamundoan iran hedkuarter tan say sangan pasilidad ya uusaren na saray Tasi nen Jehova ed sankamundoan.
No agmo ni agawaan itan, sika so seguradon nagunggunaan diad pakawalaan tan panbasa na sakey a kopya na sayan makapaayat a palapagan.
Saray Komento ManlapudArum ya Akabasa La ed Saya
Antoray arum a reaksion na saramay akabasa la ed sayan libro? Nia iray pigara:
“Asumpal ko lan binasa so makapaayat, mabilay a dokumentaryo a Jehovah’s Witnesses—Proclaimers of God’s Kingdom. Sakey labat ya organisasyon a matoor tan sipapaabeban mangiyaalibansa na katuaan so nayarin mansulat na ontanlan prangka, makpel, tan sensitibo.”
“Diad panbasa et singa samay libro na Saray Gawa, a walaay inkamatua tan inkaprangka.”
“Agaylan makaalay-imanon balon palapagan! . . . Satan so maawaran ya obra maestra.”
Kayari impanbasa na ngalngali kapaldua na libro, insulat na sakey a laki: “Siak so akebbiew a tuloy, agmakapansalita, tan ngalngali la onnangis. . . . Diad interon bilay ko, anggapo lay arum a palapagan a makatenyeg na liknaan a singa saya.”
“Say pusok so napno na gayaga kada nanonotan ko no panon a pabiskegen na sayan libro so pananisia na saray walad kalangweran ontan met ed saray balo nin onloloob ed organisasyon natan.”
“Lawas kon aapresyaen so katuaan, balet diad impanbasa na sayan libro saray matak so alukasan tan atulongan ak a namoria a nagkalautla ed kapiganman a say masanton espiritu nen Jehova so walad benegan na amin na saya.”
[Saray litrato ed pahina 18]
Dakel a totoo so nasabi na mensahe na Panarian anggaman saray Tasi so dagdaiset ed bilang