Say Sankabalgan a Toon Nambilay ed Kapiganman

Kapitulo 4

Malukon Balet Ta Anggapoy Asawa

Si Maria so walad komatlon bulan na panlolukon to. Nanonotan mo a diad masasakbay a kabiangan na impanlokon to et akiayam ed kinen Elizabet, balet natan sikato so sinmempet la ed Nazareth. Agmabayag et say kipapasen to so mapublikon naamtaan ed dilin baley to. On, sikato so walad makapagonigon a kipapasen!

Tan say iyuuges na saman a kipapasen et say bengatlan si Maria so akisipanan a mikasal ed si Jose a karpintero. Tan amta to a, diad silong na Ganggan na Dios ed Israel, say sakey a bii ya akisipanan a mikasal ed sakey a laki balet ta gagalaen to so mirelasyonan ed sekso ed arum a laki so tupaken anggad ompatey. Panon ton nipaliwawa so panlolukon to ed si Jose?

Lapud si Maria so naandi ed loob na taloran bulan, maseguro tayon makakailiw la si Jose ed sikato. Sanen sikaray akapannengnengan, maseguron ibalita nen Maria itan ed sikato. Nayarin ginawa to so anggaay nayarian ton ipaliwawa itan, a diad panamegley na masanton espiritu na Dios et sikato so malukon. Balet, singa namoria yo, saya so mairap a bengatla para’d si Jose a panisiaan.

Kabat nen Jose so maabig a talindeg nen Maria. Tan mapatnag a si Maria so inar-aro to. Ingen, anggaman panon lay pangisalaysay to, peteg ya ompatnag a sikato so alukonan na arum a laki. Anggaman ontan, aglabay nen Jose a sikato so tupaken anggad ompatey odino sikatoy mapublikon napabaingan. Kanian deniside nen Jose a maamot ton isian si Maria. Diad saraman ya agew, saray nansipanan a totoo so impasen lan sanasawa, tan nakaukolan so diborsyo pian panganggaen so sakey a sipanan.

Diad saginonor, legan ya ikokonsidera nen Jose irayan bengatla, sikatoy akaugip. Sakey ya anghel nen Jehova so inmapireng ed sikato ed sakey a kugip tan inkuanto: “Agka natatakot ya isempet si Marian asawam, lapud say ilolukon to so nilukon diad panamegley na masanton espiritu. Sikato so mananak na sakey ya anak a laki, tan tawagen mo so ngaran to a Jesus, lapud iliktar to so baley to manlapud saray kasalanan da.”

Sanen abangon si Jose, agaylan sikato so misadsalamat! Tampol ton ginawa no anto so indirehe na anghel. Insempet to si Maria ed ayaman to. Sayan mapublikon kiwas so kinmana bilang sakey a seremonyay kasal, a mangipapakabat a si Jose tan si Maria so opisyal lan sanasawa natan. Balet si Jose so ag-akipirelasyonan ed sekso ed kinen Maria legan a lukon to si Jesus.

Nia! Ambelat lan tuloy so lukon nen Maria, ingen si Jose so mangilalason ed sikato ed sakey ya asno. Iner so laen da, tan akin a sikara so manbiahe ni bangta ngalngali lan mananak si Maria? Lucas 1:39-41, 56; Mateo 1:18-25; Deuteronomio 22:23, 24.

▪ Anto so kipapasen na kanonotan nen Jose sanen naamtaan to so panlolukon nen Maria, tan akin?

▪ Panon a nayarin idiborsyo nen Jose si Maria bangta agnira akasal?

▪ Anton mapublikon kiwas so kinmanan seremonyay kasal nen Jose tan si Maria?