Say Sankabalgan a Toon Nambilay ed Kapiganman

Kapitulo 5

Say Inkiyanak nen Jesus​—Iner tan Kapigan?

Say emperador na Imperyo na Romano, si Cesar Augusto, so angiganggan ya amin so nepeg ya ompawil ed syudad na inkiyanakan to pian manparehistro. Kanian si Jose so amaarap ed pasen na inkiyanakan to, say syudad na Betlehem.

Dakel a totoo so linmad Betlehem pian manparehistro, tan say mogmon lugar ya akaromogan nen Jose tan si Maria a napanpundoan et diad sakey a kuadra. Dia, no iner a saray asno tan arum niran ayep et isisirum, si Jesus so inyanak. Sikato so binalkot nen Maria na lamping tan imparokol to ed sakey ya atotong​—pasen a pangiiyanay tagano na ayayep.

Peteg a saman so panangiderihe na Dios a si Cesar Augusto so nanggawa na panangirehistron ganggan. Saya so nanggawan posibli para’d si Jesus ya iyanak ed Betlehem, say syudad ya abayag lan impasakbay na Kasulatan a kiyanakan na insipan a manuley.

Agaylan importantin labi iya! Diad paway na uma et sakey a masnag a liwawa so onsisinag ed liber na grupo na saray pumapastol. Saya so gloria nen Jehova! Et inkuan na anghel nen Jehova ed sikara: “Ag kayo ontatakot, ta, nia! Ipakabat ko ed sikayo so saray maong a balita na baleg a liket a niwala ed amin a totoo so nawalaan, lapud wala so inyanak ed sikayo natan a sakey a Manangilaban, si Kristo a Katawan, ed syudad nen David. Tan saya so sakey a tanda para’d sikayo: naromog yo so sakey ya ugaw ya abalkot na lamping tan niparokol ed sakey ya atotong.” Kabebekta et lalon dakel nin anghel so inmapireng tan mangakanta: “Gloria ed Dios ed sankatageyan, tan dia ed dalin deen ed saray totoo a walaan na abig linawa.”

Sanen tinmaynan iray anghel, inkuan na saray pumapastol ed balang sakey: “Onla itayo sirin ed Betlehem tan nengnengen tayo iyan bengatlan agawa, ya impakat nen Jehova ed sikatayo.” Linma’ra a maganganat tan aromog si Jesus a singa imbaga na anghel ed sikara. Sanen insalaysay na saray pumapastol so imbaga na anghel ed sikara, amin ya akadngel ed satan so mankelaw. Inememan nen Maria irayan amin a balikas tan pinabli to.

Dakel a totoo natan so manisian si Jesus so inyanak ed Disyembre 25. Balet ta say Disyembre so mauran, ambetel a panaon diad Betlehem. Agnayarin walad paway na uma iray pumapastol a sanlabin kaiba iray pulok da ed satan a panaon na taon. Ontan met, mapatnag ya agkinaukolan na Romanon Cesar iray totoon onkikiling lan onlaban sumpad sikato pian manbaroy ed kinmigtel a panaoy betel pian manparehistro. Kanian mapatnag ya inyanak si Jesus ed arum a panaon ed masasakbay a panagloglog ed taon. Lucas 2:1-20; Micas 5:2.

▪ Akin a manbabaroy si Jose tan si Maria a mamaarap ed Betlehem?

▪ Anton makapakelkelaw a bengatla so agawa ed labi na inkiyanak nen Jesus?

▪ Panon tayon amta a si Jesus so ag-inyanak ed Disyembre 25?