Say Sankabalgan a Toon Nambilay ed Kapiganman

Kapitulo 6

Say Insipan ya Ugaw

Imbes ya ompawil ed Nazareth, si Jose tan si Maria so nansiansia ed Betlehem. Tan nen si Jesus so waloy agew to la, sikato so pinagalsiman da, a singa kekerewen na Ganggan na Dios ed kinen Moises. Mapatnag ya ugali met so pangiter na ngaran ed sakey ya ugaw a laki ed koma-walon agew to. Kanian nginaranan da so anak da a Jesus, unong ya indirehen asasakbay nen anghel Gabriel.

Masulok a sakey bulan so linmabas, tan si Jesus so 40 ya agew la ed edad. Iner natan so pangiyawitan ed sikato na atateng to? Diad templo ed Jerusalem, a pigaran milya labat manlapud pasen a panaayaman da. Unong ed Ganggan na Dios ed kinen Moises, 40 ya agew kayari pangiyanak ed sakey ya anak a laki, say ina so nakaukolan a mangiyapay na sakey a manamalinis a bagat ed templo.

Ontan so ginawa nen Maria. Bilang bagat to, sikato so angitarok na duaran ankelag a manok. Saya so mangipatnag na bengatla ed kipapasen na kabibilay da nen Jose tan si Maria. Ipapanengneng na Ganggan nen Moises a say sakey a kilaw a karneron laki, a lalon mabli nen saray manok, so nepeg ya iyapay. Balet no agnayarian iya na ina, duaran palekpek odino malapati so masarag la.

Diad templo et sakey a masiken so angegna ed kinen Jesus. Say ngaran to et Simeon. Impaamta ed sikato na Dios a sikatoy ag-ompatey anggad nanengneng to ni ya unona so insipan nen Jehova a Kristo, odino Mesias. Sanen sinmabi Simeon ed templo ed saman ya agew, sikato so inwanwan na masanton espiritu ed ugaw ya awit-awit nen Jose tan si Maria.

Legan a sankaegnaan nen Simeon si Jesus et sikatoy akisalamat ed Dios, a kuanto: “Natan, Soberanon Katawan, aabuloyan mo so aripen mo ya ontaynan a mareereen unong ed sinalitam; ta anengneng na saray matak so paraan na panangiliktar mo a sikato so intaryam ed arap na amin a totoo, sakey a silew para’d pangalis na sakbong manlapud saray nasyon tan sakey a gloria ed baley mo ya Israel.”

Si Jose tan si Maria so mankelaw sanen saya so nadngel da. Insan sikara so binendisyonan nen Simeon tan inkuanto ed kinen Maria a say anak to “so nigaton pian kagapolan tan ki-alageyan lamet na dakel ed Israel” tan say kaermenan, a singa makdem a kampilan, so ontalos ed kamarerwa to.

Wadtan met ed sayan okasyon so 84-años a propetisan manngaran na Anna. Diad tua, sikato so agbalot onsasaew ya oonla ed templo. Diad saman a mismon oras et sikatoy inmasingger tan ginmapon mangiter na pisasalamat ed Dios tan nansalita nipaakar ed si Jesus ed amin ya ondengel.

Agaylay liket nen Jose tan si Maria ed sarayan agawa ed templo! Peteg, amin na saraya so mamepekder ed sikara a say ugaw et sikato imay Sakey ya Insipan na Dios. Lucas 2:21-38; Levitico 12:1-8.

▪ Kapigan so mapatnag a niyugalin panangiter na ngaran ed Israelitan ugaw?

▪ Anto so nakakaukolan ed sakey ya Israelitan ina no say anak to so 40 agew la ed edad, tan panon a say impanumpal nen Maria ed sayan kakaukolanen so angipatnag ed kipapasey kabibilay nen Maria?

▪ Siopa so akakabat ed pakabidbiran nen Jesus ed sayan okasyon, tan panon da ya impanengneng iya?