Say Sankabalgan a Toon Nambilay ed Kapiganman

Kapitulo 7

Si Jesus tan Saray Astrologo

Pigaran lalaki so nanlapu ed Bukig. Sikara so astrologo​—totoon mankuan a makapangipatalos ed posisyon na saray bitewen. Legan a sikara so walad ayaman da ed Bukig, sikara so akanengneng na sakey a balon bitewen, tan saya so tinumbok da nilasus a milya a mamaarap ed Jerusalem.

Sanen akasabi iray astrologo ed Jerusalem, tinmepet ira: “Kulaan na samay inyanak ya ari na saray Judio? Lapud anengneng mi so bitewen to sanen wala kami ed bukig, tan sikami so linma’d dia pian manggawa kami na panangigalang ed sikato.”

Sanen naamtaan nen Arin Herodes ed Jerusalem so nipaakar ed saya, sikato so agonigon a tuloy. Kanian impatawag to iray manunan saserdote tan tinepetan ira no iner so kiyanakan na Kristo. Diad pangibabase ed ebat da ed Kasulatan, inyebat da: “Diad Betlehem.” Diad saman, impatawag nen Herodes iramay astrologo tan inkuanto ed sikara: “Lakayo a manggawa na maalwar a panag-anap ed ugaw, tan sano aromog yo et pawil kayo ya ibaga’d siak, pian siak met so maka-onla tan makapanggawa na panangigalang.” Balet, diad tua, labay nen Herodes ya anapen so ugaw pian sikato so pateyen!

Kaalis da, sakey a makapakelaw a bengatla so agawa. Samay bitewen ya anengneng da nen wala nira’d bukig so linman inmuna ed sikara. Malinew, saya so aliwan ordinaryon bitewen, noagta saya so nikabkabiig ya intarok pian mangidirehe ed sikara. Nansiansian tinumbok itan na saray astrologo anggad saya so tinmunda ed petek mismo na abung a kulaan nen Jose tan si Maria.

Sanen saray astrologo so linmoob ed abung, nalmo ra si Maria tan say anak to, si Jesus. Diad saman et sikaran amin so dinmakmomo ed sikato. Tan impaway dara’d pananginan da iray regalo ran balitok, incienso, tan mirra. Insan, sanen sikara la so ompawil tan ibaga ed kinen Herodes no iner so kulaan na ugaw, sikara so pinasakbayan na Dios ed panamegley na sakey a kugip ya aggawaen itan. Kanian sikara so sinmempet ed baley da diad panamegley na sananey a dalan.

Siopa so isipen mo ya angitarok na bitewen pian mangiya ed saray astrologo? Tandaan, samay bitewen so agdiretkan angiya ed sikara ed si Jesus ed Betlehem. Noagta, sikara so inmunan indirehe ed Jerusalem a no iner et sikaray akapitongtong ed kinen Arin Herodes, a malabay a pateyen si Jesus. Tan satan so agawaan to no agpinasakbayan na Dios iray astrologo ya ag-ibaga ed kinen Herodes no iner so kulaan na ugaw. Saman so kabusol na Dios, si Satanas a Diablo, a malabay a napapatey si Jesus, tan inusar to so saman a bitewen diad getman panumpal ed gagala to. Mateo 2:1-12; Miqueas 5:2.

▪ Anto so mangipapanengneng a samay bitewen ya anengneng na saray astrologo so aliwan ordinaryon bitewen?

▪ Iner so kulaan nen Jesus sanen sikatoy aromog na saramay astrologo?

▪ Panon tayon amta a si Satanas so angitarok na bitewen pian mangiya ed saramay astrologo?