Say Sankabalgan a Toon Nambilay ed Kapiganman

Kapitulo 8

Intaynan Manlapud Maruksan Ari

Binangon nen Jose si Maria pian ibaga ed sikato so maganat a balita. Kasumsumpal labat nin pinmayawar so anghel nen Jehova ed sikato, a kuanto: “Bangon ka, alam so ugaw tan say ina to tan batik kayo ed Ehipto, tan mansiansia kayo diman ya anggad pangibagak ed sika; ta si Herodes so akaparaan ya anapen so ugaw pian saya so pateyen.”

Tampol, sikaran talo so tinmaynan. Tan dugaruga lapud naamtaan nen Herodes a sikatoy pinalikdo na saramay astrologo tan tinmaynan la ed bansa. Tandaan, sikara so nepeg komon ya ompawil pian ibaga ed sikato sano aromog da si Jesus. Asanokan a tuloy si Herodes. Kanian ed gunaet to a pamatey ed si Jesus, sikato so angiganggan a pateyen so amin ya ugaw a laki ed Betlehem tan ed saray distrito to a mantaon na duara tan paabeba. Imbase to iyan kalkulasyon na edad ed say impormasyon a nala to asasakbay manlapud saramay astrologo a nanlapud Bukig.

Say pamatey ed amin ya ugaw a lalaki so bengatlan makapataktakot a nengnengen! Nilooban na saray sundalo nen Herodes so kada abung. Tan sano makaromog ira na ugaw a laki, saya so samsamen da ed saray taklay na ina to. Agtayo amta no pigaran ugugaw so pinatey da, balet say malaknab ya impanugaog tan impanagugul na saray ina so anumpal ed sakey a propesiya ed Biblia na propeta’y Dios a si Jeremias.

Kaleganan to, si Jose tan say pamilya to so maligen ya akasabi ed Ehipto, tan sikara natan so manaayam la diman. Balet sakey a labi et pinmayawar lamet so anghel nen Jehova ed kinen Jose ed sakey a kugip. “Bangon ka, alam so ugaw tan say ina to,” so imbaga na anghel, “tan onla ka ed dalin na Israel, ta saramay manaanap ed kamarerwa na ugaw so inatey la.” Kanian bilang kasumpalan na sakey ni a propesiya ed Biblia a mangibabagan say Anak na Dios so tawagen manlapud Ehipto, say pamilya so pinmawil ed binalegan da.

Mapatnag a plano nen Jose a manayam ed Judea, ed datin nanayamam da ed baley na Betlehem sakbay a sikara so binmatik ed Ehipto. Balet ta naamtaan to a say marelmeng ya ilalak nen Herodes a si Archelaus so natan et ari na Judea, tan ed sananey ni a kugip et sikato so pinasakbayan nen Jehova ed kapeligroan. Kanian si Jose tan say pamilya to so nambaroy ya amaarap ed amianen tan nanayam ed baley na Nazareth ed Galilea. Dia ed sayan komunidad, ya arawi manlapud sentro na relihyoson bilay na Judio, si Jesus so binmaleg. Mateo 2:13-23; Jeremias 31:15; Oseas 11:1.

▪ Sanen saray astrologo so agpinmawil, anton makapataktakot a bengatla so ginawa nen Arin Herodes, balet panon ya asalimbengan si Jesus?

▪ Diad ipawil manlapud Ehipto, akin ya agnanayam si Jose lamet ed Betlehem?

▪ Antoran propesiya na Biblia so asumpal ed sayan peryodo na panaon?