Say Sankabalgan a Toon Nambilay ed Kapiganman

Kapitulo 9

Say Bilay-Pamilya nen Jesus Sanen Sikatoy Ugaw

Sanen si Jesus so ombabaleg ed Nazareth, satan so melag, agpopular a syudad. Satan so akapasen ed mapukdol a baley ed lugar a tatawagen na Galilea, aliwan arawi manlapud marakep a Lawak na Jezreel.

Sanen si Jesus, nayarin duay-taon, so inawit nen Jose tan si Maria dia manlapud Ehipto, mapatnag a sikato so bukbukor ya anak nen Maria. Balet agnambayag. Asabi panaon, si Santiago, Jose, Simon, tan si Judas so inyanak, tan si Maria tan Jose so nagmaliw met ya atateng na anak a bibii. Diad kaunoran si Jesus et ag-onkulang ed anemira so yogtan ya agagin ton lalaki tan bibii.

Si Jesus so walaan met na kakanayon. Kabat tayo la si Juan a kapinsan to, a manaayam ed Judea dakel a kilometro so kaarawi to. Balet manaayam ya asingger ed Galilea et si Salome, a mapatnag ya agi nen Maria. Si Salome so asawa nen Zebedeo, kanian saray duaran anak da a lalaki, si Santiago tan Juan, so kapinsan nen Jesus. Agtayo amta no, legan ya ombabaleg et dakel a panaon so inusar nen Jesus a kaiba irayan lalaki, balet ta diad saginonor et sikara so nagmaliw a maapit a saniiba.

Si Jose so nakaukolan a mantrabahon impasya pian nasuportaan so ombabaleg a pamilya to. Sikato so karpintero. Pinabaleg nen Jose si Jesus a singa anak to a dili, kanian si Jesus so tinawag ya “anak na karpintero.” Binangatan nen Jose si Jesus a magmaliw a karpintero met, tan sikato so akaaral a maong. Saya so rason no akin a diad saginonor et imbaga na totoo ed kinen Jesus, “Sayaman so karpintero.”

Nisentro so bilay na pamilya nen Jose ed si Jehova a Dios. Diad panguunor ed Ganggan na Dios, inikdan nen Jose tan Maria so anak da na espiritual iran bilibilin ‘kapagno sikara so mandokdokol, tan kapagno sikara so ombangon.’ Wala so sinagoga ed Nazareth, tan makaseguro tayo a regular ya ipipila nen Jose so pamilya to pian mandayew diman. Balet anggapoy duaruwan nalmoan da so sankabalgan a gayaga ra ed regular a panagbaroy ed templo nen Jehova ed Jerusalem. Mateo 13:55, 56; 27:56; Marcos 15:40; 6:3; Deuteronomio 6:6-9.

▪ Ag-onkulang, pigara so yogtan nen Jesus a lalaki tan bibii, tan anto so ngaran na pigara ed saraya?

▪ Siopa so taloran kabkabat a kapinsan nen Jesus?

▪ Anton sekular a trabaho so diad saginonor et kinimeyan nen Jesus, tan akin?

▪ Anton importantin bilin so intarok nen Jose para’d pamilya to?