Akin a Magmaliw ya Interesado ed Relihyon?
DIAD kada bansa ed dalin, wala so interes ed relihyon. Diad biek a dapag, dakel met so diretsaan a mangaksobin anggapoy interes da ed relihyon. Balet kasin ontan a naynay so liknaan da?
Say inkanatural na too so mangipapanengneng a say too et agtalagan kontento ed materyal a bengabengatla lambengat. Kaukolan na totoo so espiritualidad. Say inagew-agew a panagbilay a niyapasakey lambengat ed pangamor na pisikal iran pankaukolan, tekep na tunggal paminsan a panaon na panligliwa, so agsigpot a mamenek ed akindalem iran pankaukolan na too. Aliwan singa saray ayep, labay na totoon amtaen, ‘Anto ta so gagala na bilay?’ ‘Onia ta lambengat so bilay, a napno na karakpan balet ta ontan met a napno na aliwliwan bengabengatla?’ Agmo ta nitetepet so singa sarayan tepet?
Ingen, minilyon a totoon manbibilay natan so binmaleg ed saray kaliberliber a mangaamper ed antokaman a makabaliksan ya interes ed relihyon. Satan ya impluensya so nayarin nanlapud atateng da, saray managbangat, saray kaedaran, odino ed gobierno ni ingen.
Si Skalabrino, kalangweran a lakin taga Albania, so angisalaysay a diad silong na uley na Komunista et ibabangat ed totoo ya anggapoy Dios. Sakey ni, mapeligro para’d sikara so mansalita nipaakar ed relihyon; say panggawa ed satan et sengegay kipangaw. Ingen, nen 1991, sanen walad Switzerland bilang sakey a takas, sikato’y naikdan na pankanawnawan manaral na Biblia. Inawat to iman. Akin?
Bueno, diad Albania et abalitaan ton wala so ontan a libro, a singa say Biblia, balet ta anggapon balot so amta to nipaakar ed satan. Kanian, diad kagapo et nayarin aliwan say pilalek a talosan so Biblia so manunan amayubo ed sikato. Anggaman nibaga ed sikaton naaralan toy gagala na Dios para’d katooan tan ed dalin, anengneng to met itan a pankanawnawan napaaligwas to so pangusar ed lokal a lenguahe. Balet, tampol ton nalmoan a say naaaralan to et amenek ed mabiskeg ya akindalem ya espiritual a pankaliktan ed biang to. Sikato so aliketan diad impakaamta to ed sipan na Dios a sakey a balon mundo ya ontalonay kareenan, sakey a mundon makapanbilay ed ando lan ando so totoo tan makapangayaga ed daakan ya amin a bengatlan kaukolan pian manbilay. Apadaak so interes to sanen naaralan to a sikato tan say pamilya to so nayarin magmaliw a kabiangan na sayan balon mundo. Lapud agto nayarian a sarilien so maong a balita, tinawagan to’d telepono so pamilya to ed Albania pian ipanabang itan ed sikara.
Si Aleksei, a manaayam ed Russia, so asurpresa met ed nayarin magmaliw ya epekto na suston pikakabat ed Biblia ed bilay na sakey a too. Lapud natatalonaan na saray problema tan agmakaromog na makapenek a salaysay nipaakar ed gagala na bilay, plano to’y manbitkel. Balet, linma nin inmuna ed Finland pian bisitaey amigo to. Legan ya akalugan ed tren, sinalita to ed pigaran kapara ton pasahero iray problema to. Say sakey ed sikara et Tasi nen Jehova, ya amaseseg ed sikaton manaral na Biblia lapud satan so mangiiter na saray solusyon ed ontan iran problema. Si Aleksei so manduarawa. Diad panbiabiahe ton papawil, sikato so awalaan na mipadparan eksperiensia. Natan et sakey a Tasi so nansalita ya angibaga’d sikato a sikatoy akasagmak met na onman a parehon nengneng na saray problema balet akatulong ed sikato so Biblia a manalona ed saraya. Sikato met so pinaseseg a manaral na Biblia. Sanen akasabi’d abung, kinmiriring so telepono. Saman et sananey ya amiga to, a miaaral a kaiba iray Tasi tan sikato so maliket a tuloy. Ginapoan nen Aleksei a nonoten ya angangko et say Biblia so peteg a makapangitarok na nakakaukolan to, balet amta to a kaukolan to’y ontulong pian natalosan to itan. Inmabobon a regular a paiyaralan na Biblia ed saray Tasi nen Jehova, tan ginapoan ton atendian iray miting. Agnambayag et atalosan to no akin a saramay momoldien da’y bilay da unong ed saray bangat na Biblia so ontanlan maliket, anggaman sikara so nidudunget met ed kaslakan iran problema ed katooan.
Tekep na aralem a pakatalos ed inkanatural na too, inkuan nen Jesu-Kristo: “Say too so agmakapanbilay ed tinapay lambengat.” (Mateo 4:4, The New English Bible) Inkuanto met: “Maliket iramay sinononot ed espiritual a pankaukolan da.” (Mateo 5:3, NW) Sikaray maliket lapud sinononot iran tuloy ed pankaukolan da, manggagawa na susto iran kundang pian peneken itan, tan naeeksperiensia da’y panamendisyon na Dios. Anggaman ontan, say espiritual a pankaukolan tayo so agnapepenek diad pimembro lambengat ed sakey ya iglesia odino diad iyatendi ed pigaran relihyoson serbisyo. Say relihyon a ritualistiko so manunan nayarin mamaliket ed saray emosyon na sakey, balet kasin satan so mangitatarok na realistiko iran solusyon ed saray problema ed bilay? Anggano say sakey a relihyon so mangitatalindeg na pigaran letnegan a maabig a totontonen, no agmangiiter na tuan pakatalos ed peteg a gagala na bilay, kasin satan so mamenek ed espiritual a pankaukolan mo? Say nepeg a nagkalalon panpagaan et, kasin say pangagamil na ontan a relihyon so mangipaarap ed maabig a relasyon ed Dios? No anggapo itan, say sakey so agnawalaan na peteg a liket.
Diad sayan pamaakaran, dakel a totoo so manaanap na sakey a bengatlan agda ni aromog.
[Litrato ed pahina 3]
Peteg kasin napenek iray espiritual a pankaukolan mo diad pimembrom ed sakey ya iglesia?
[Litrato ed pahina 4]
Aromog na dakel a no atalosan da la so Biblia, nawalaan na balon kabaliksan so bilay